Hi nga mu kuma Nungungulu hakunene?
“Nungungulu a nga zwisiseki.” — Filo wa le Alekzandria, tlhari ya filozofia ya zana ga malembe go sangula.
‘Nungungulu a nga kule ka munwe ni munwani wa hina.’ — Saule wa le Tarsusi, na a wulawula ni titlhari ta filozofia ta zana ga malembe go sangula le Atensi.
KOTA lezi u gonzileko ka mawonela lawa ya mambiri, hi gihi legi gi yelanako ni mawonela ya wena? A votala va wona magezu ya Saule wa le Tarsusi, loyi a vitaniwako kambe lezaku hi mupostoli Paule, na ma chavelela ni ku tsakisa. (Mitiro 17:26, 27) Niku a Biblia gi na ni magezu manwani yo fana ni lawo ma tiyisako. Hi xikombiso, Jesu i mahile mukhongelo wu nga ni magezu yo tiyisa nguvu ya lezaku a valanzeli vakwe va nga mu tiva Nungungulu va tlhela va katekiswa hi yena. — Johani 17:3.
Hambulezo, a titlhari ta filozofia to kota Filo ti wa hi ni mawonela yo hambana. Ti wa wula lezaku a hi nge tshuki hi mu tiva Nungungulu, hakuva a nga zwisiseki ne ni kutsongwani. Makunu, hi lihi lisine?
A Biblia ga vumela lezaku ku na ni zilo zo kari xungetano hi Nungungulu zi karatako ku zwisisiwa hi vanhu. Hi xikombiso, a malembe ya Muvangi, wukulu ga kupima kakwe, ni kueta ka wutlhari gakwe a zi na ku pimiwa, ku hlayiwa hambu ku zwisisiwa. Lezo zilo zaku a munhu a nge zi koti ku zi zwisisa. Hambulezo, a matshamela lawo ya Nungungulu a ma hi siveli ku mu tiva. Hi lisine, a ku ehleketa hi zilo lezo zi nga hi vuna ku ‘tshinela ka Nungungulu.’ (Jakobe 4:8) A hi kambisise a zikombiso zitsongwani za zilo lezo zi nga zwisisekiko. Anzhako ka lezo hi ta wona a matshamela ya Nungungulu lawa hakunene hi nga ma zwisisako.
Zilo muni zi nga kotekiko ku zi zwisisa xungetano hi Nungungulu?
NUNGUNGULU I KONA XONTLHE XIKHATI: A Biblia gi gonzisa lezaku Nungungulu i kona “kusukela kupinzukeni kala kupinzuka.” (Tisimu 90:2) Hi magezu manwani, Nungungulu a nga na masangulo niku a nga na magumo. Hi mawonela ya munhu, “a tsengo wa malembe yakwe a wu na ku hlayiwa.” — Joba 36:26.
Lezi u nga vunekisako zona: Nungungulu i tsumbisa ku ku nyika wutomi ga pinzukelwa loku u ti karatela ku mu tiva. (Johani 17:3) Xana a xitsumbiso lexo xi wa tava xa lisine loku ku hi lezaku Nungungulu wutsumbu a hi wa kala kupinzuka? Ntsena a “Hosi ya pinzukelwa” hi yona yi nga tatisako a xitsumbiso lexo. — 1 Timote 1:17.
KUPIMA KA NUNGUNGULU: A Biblia gi wula lezaku “a wutlhari gakwe [Nungungulu] a gi na ku kambiwa” hakuva a maalakanyo yakwe ma tlakukile nguvu ku hunza ya hina. (Isaya 40:28; 55:9) Hi xigelo xo zwala a Biblia gi vuxa xiwutiso lexi xi nga laviko hlamulo: “Himani a ku tivileko a kupima ka Hosi, lezaku a kala a yi gonzisa ke?” — 1 Va Le Korinte 2:16.
Lezi u nga vunekisako zona: Nungungulu wa zi kota kuzwa mikhongelo ya vanhu va tsanza-vahlayi yi mahiwako hi khati ginwe. (Tisimu 65:2) Hambu loku kuwa manjingiri laha misaveni wa zi tiva. Xana a kupima ka Nungungulu ku nga tala laha ka kuza a nga zi koti ku ku wona hambu ku ingisela mikhongelo ya wena ke? Ahihi, hakuva a kupima kakwe a ku gumelwi. A xinwani kambe, hi lezaku wena wa “va hunza nguvu a vamanjingiri vanyingi.” — Mateu 10:29, 31.
TINDLELA TA NUNGUNGULU: A Biblia gi gonzisa lezaku a munhu a nge tshuki a zi kota ku tiva “ntiro lowu Nungungulu a wu mahileko, a masangulo ya wona ni magumo ya wona.” (Mutshawuteli 3:11) Hikwalaho, hi nga ta tshuka hi tiva zontlhe xungetano hi Nungungulu. A wutlhari gi nga tindleleni ta Nungungulu a gi “na ku tibyiwa.” (Va Le Roma 11:33) Hambulezo, Nungungulu i xuva ku tivekisa tindlela takwe ka lava va lavako ku mu tsakisa. — Amosi 3:7.
A malembe ya Muvangi, wukulu ga kupima kakwe, ni kueta ka wutlhari gakwe a zi na ku pimiwa, ku hlayiwa hambu ku zwisisiwa
Lezi u nga vunekisako zona: Loku u lera ni ku gonza a Biblia, u ta simama ku tiva zilo za ziswa xungetano hi Nungungulu ni tindlela takwe. Lezo zi wula ku hi nga simama ku tshinela ka Dadani wa hina wa le tilweni kala kupinzuka.
Lezi u nga zi kotako ku zi tiva
A kuva hi nga zwisisi hi kumbhelela a matshamela yo kari ya Nungungulu a zi wuli lezaku a hi nge zi koti ku mu tiva. A Biblia gi na ni mahungu yo tala ma hi vunako ku mu tiva khwatsi. Wona zikombiso zo kari:
VITO GA NUNGUNGULU: A Biblia gi hi gonzisa lezaku Nungungulu i ti nyikile vito. I ngalo: “Nzi Jehova, hi gona vito ga mina lego.” A vito ga Nungungulu gi kumeka xipimo xa 7.000 wa makhati lomu ka Biblia, a ku hunza wontlhe. — Isaya 42:8.
Lezi u nga vunekisako zona: Ka mukhongelo wakwe wa xikombiso, Jesu i te ngalo: “Dadani wa hina wa le tilweni, a vito ga wena a gi basiswe.” (Mateu 6:9, NM) Xana wenawo u nga tirisa a vito ga Nungungulu mikhongelweni ya wena? Jehova i ti yimisele ku ponisa vontlhe lava va kombisako xichawo xi faneleko hi vito gakwe. — Joeli 2:32.
LOMU NUNGUNGULU A TSHAMAKO KONA: A Biblia gi gonzisa lezaku ku na ni matshamu mambiri — wutshamu ga moya lomu ku hanyako zivangwa za moya ni wutshamu ga xiviri ga laha misaveni ni wuako gontlhe. (Johani 8:23; 1 Va Le Korinte 15:44) Lomu ka Biblia, a gezu “tilweni,” a kutala ka zikhati gi wula wutshamu ga zivangwa za moya. Lomu a Muvangi a “tshamako kona” hi le “tilweni.” — 1 Tihosi 8:43.
Lezi u nga vunekisako zona: Zi ku maha u mu tiva khwatsi Nungungulu. A Muvangi a hi ntamu wu nga matshanwini wontlhe ni ka zilo zontlhe. Jehova Munhu wa xiviri a hanyako ka wutshamu ga xiviri. Hambulezo, “a xi kona ximahwa xi fihlilweko mahlweni ka yena.” — Maheberu 4:13.
WUMUNHU GA NUNGUNGULU: A Biblia gi gonzisa lezaku Nungungulu i na ni matshamela yo tsakisa. “Nungungulu liranzo.” (1 Johani 4:8) A nga tshuki a hemba. (Titusi 1:2) A nga na xihlawulela, i na ni wuxinji, tipswalo, niku wa nonoka ku zangara. (Eksodusi 34:6; Mitiro 10:34) Lexi xi nga ha hlamalisako votala, hi lezaku a Muvangi i xuva kuva ni wunghana ni lava va mu chavako. — Tisimu 25:14.
Lezi u nga vunekisako zona: U nga maha munghana kutani xaka ga Jehova. (Jakobe 2:23) Zonake laha u yako u tiva a wumunhu ga Jehova, u ta ma zwisisa khwatsi a matimu ya Biblia.
‘MU HLOTE’
A Biblia gi kombisa a matshamela ya Jehova Nungungulu laha kubaseni. I le kule nguvu ni kuva a nga zwisiseki. Hi lisine, a Muvangi i lava lezaku u mu tiva. A Mhaka yakwe, a Biblia, yi tsumbisa lezi: “Loku wena u mu hlota, u ta mu kuma.” (1 Kronekele 28:9) Hikuyini u nga tekiko mazambo ya ku tiva Nungungulu hi ku lera ni ku ehleketa hi matimu ya Biblia? Loku u maha lezo, a Biblia gi tsumbisa lezaku Nungungulu ‘i ta tshinela ka wena.’ — Jakobe 4:8.
Loku u lera ni ku gonza a Biblia, u ta simama ku tiva zilo za ziswa xungetano hi Nungungulu ni tindlela takwe
U nga ha ti wutisa lezi: ‘Kota lezi ku nga ku a nzi nge zwisisi zilo zontlhe xungetano hi Muvangi, nzi nga mahisa kuyini munghana wakwe?’ Ehleketa hi mhaka leyi: Xana a munghana wa chukwana wa dokodela a tirako za wuhanzuli i fanele kuva ni wutivi go kari xungetano hi za xipitali? Ne ni kutsongwani! A munghana wa dokodela loye a nga hava ni ntiro wo hambana nguvu ni wa yena. Hambulezo, za koteka ku va maha vanghana va hombe. Lexi xi lavekako kuva a munghana wakwe a tiva wumunhu gakwe, lezi a zi ranzako, ni lezi a nga zi ranziko. Hi kufanana, u nga gonza lomu ka Biblia u tiva a wumunhu ga Jehova — ku nga lezi u faneleko ku zi tiva kasi ku maha wunghana naye.
Wutshanwini ga ku nyika mahungu matsongwani xungetano hi Muvangi, a Biblia gi na ni mahungu hi ma lavako kasi hi tiva Nungungulu. Wa zi lava ku gonza zinwani xungetano hi Jehova Nungungulu? A Timboni ta Jehova ti fambisa a zigonzo za Biblia za mahala mitini ya vanhu. Hi kombela lezaku u wulawula ni Timboni ta lomu u tshamako kona kutani ku nghena ka saite, www.jw.org/tsc.