‘U nga rereki’

1, 2. Xana a kutsumba ka hina ku tiyisiswa kuyini hi ku wona lezi a hlengeletano ya Jehova ya wuako gontlhe yi zi mahako?

ZA TSAKISA ni ku hlamalisa nguvu a ku tiva lezaku hinawu hi ziro za hlengeletano ya Jehova ya wuako gontlhe. A miwoniso yi tsalilweko ka Ezekieli xipimo 1 ni ka Danieli xipimo 7 yi kombisa Jehova hi ndlela yo hanya na a hunzula timhaka kasi a tatisa kungo gakwe ga hombe. Jesu hi yena a rangelako a xipanze xa laha misaveni xa hlengeletano ya Jehova lezaku xi yisa kupima ntirweni wa kuxumayela mahungu yo saseka, ku hlayisa hi tlhelo ga moya lava va mahako ntiro lowo, ni ku vuvumisa a wukhozeli ga lisine. Kunene, a miwoniso leyi yi hi vuna ku tsumba hlengeletano ya Jehova! — Mat. 24:45.

² Xana ha famba zinwe ni hlengeletano leyi yo hlamalisa, hi nga sali nzhako? A litsako la hina hi lisine laya mahlweni li kula ni ku lo mbhela ke? Loku hi ti maha ziwutiso lezi, hi nga tshuka hi wona lezaku hi sangulile ku rereka kutani ku ngha hi nga ha hiseki khwatsi. Lezo zi nga maheka. Ka zana ga malembe go sangula, mupostoli Paule i zi wonile na zi hi chukwana a ku luleka maKristu-kulobye lezaku ma cuwuka khwatsi a xikombiso xa Jesu xa kuhiseka. Paule i te ngalo lezo zi wa ta va vuna lezaku va ‘nga rereki, va mbhela ntamu mihefemulweni yabye.’ (Maheb. 12:3) Hinawu, a ku kambisisa khwatsi a nzima yi hunzileko, leyi yi kombileko lezi a hlengeletano ya Jehova yi zi mahako, zi fanele ku ngha zi hi kucile a ku simama hi hiseka ni ku timisela.

 3. Zini hi faneleko ku maha kasi hi nga rereki, niku zini hi to wulawula hi zona ka nzima leyi?

³ Hambulezo, Paule i kombile lezaku kasi hi nga rereki ku laveka zo tala nguvu. I te ngalo hi fanele ku ti karatela ‘a ku maha lezi zi nga zi nene.’ (Gal. 6:9) Hikwalaho, ku laveka ku hi maha xokari. A hi wulawuleni hi ntlhanu wa zilo hi faneleko ku maha wutomini ga hina, lezi zi to hi vuna ku tshama na hi tiyile hi tlhela hi nga sali nzhako ni hlengeletano ya Jehova. Anzhako ka lezo hi ta zi kota ku wona lezi hina wutsumbu kutani va ngango wa hina va faneleko ku chela nguvu kota ka zona.

 4. Hikuyini hi nga wulako lezaku a ku tlhangana xipanze xa lisima wukhozelini ga lisine?

⁴ A kutlhangana zinwe xontlhe xikhati wuve nchumu wa lisima nguvu ka malanza ya Jehova kusukela kale. Le tilweni, a zivangwa za moya zi rambiwa kuya mahlweni ka Jehova hi xi khati xi faneleko. (1 Tih. 22:19; Joba 1:6; 2:1; Dan. 7:10) Le Israeli wa kale, a vaIsraeli va wa fanele ku tlhangana “kasi va fela kuzwa va gonza.” (Deut. 31:10-12) A vaJuda ka zana ga malembe go sangula va wa tolovela kuya masinagogeni va ya gonza Mitsalo. (Luka 4:16; Miti. 15:21) A mukhuwo lowu wa ku tlhangana zinwe wu simamile kala ku yimiswa a bandla ga wuKristu, niku wa ha simama kuva zipanze xa lisima xa wukhozeli ga hina. A maKristu ya lisine ma “khatalelana kasi [ma] susumetana liranzweni ni mitirweni yo saseka.” — Maheb. 10:24, 25.

 5. Hi yihi ndlela ya ku tiyisana mitlhanganweni ya hina?

⁵ A yinwe ya tindlela ta lisima leti hi tiyisanako hi tona ku nyika mihlamulo mitlhanganweni ya hina. Hi kombisa kukholwa ka hina kubaseni hi ku hlamula ziwutiso lezi zi tsalilweko, ku komba lezi hi nga yi tirisako zona mitsalo, ku hlawutela tshango go kari gi kombako a wutlhari ga ku lanzela a matshinya ya milayo ya Biblia kutani hi tindlela tinwani. (Tis. 22:22; 40:9) Handle ko kanakana, wa zi tiva lezaku kani hi na ni malembe mangani na hiya mitlhanganweni, za ha simama ku hi tiyisa a kuzwa mihlamulo ya vamakabye va hina va xinuna ni vasati yi humako mbilwini — vaswa ni lava va khosaheleko.

 6. Xana a mitlhangano ya hina yi hi vunisa kuyini lezaku hi tshama na hi tiyile hi tlhelo ga moya?

⁶ Hi zihi zinwani zigelo lezi zi mahako Nungungulu wa hina a nyika nguvu lisima a kuva hi tlhangana hi kukhanzakanya? A mitlhangano ya hina ya bandla, mitlhangano ya xipanze ni yo hlawuleka, ni migotsovanyano ya hina ya hi nyika ntamu wa ku xumayela hi kutiya ni ku hi tiyisa hlana kasi hi nga rereki hambu loku hi kanetiwa kutani loku a vanhu va ala mahungu yo saseka. (Miti. 4:23, 31) Ha tiyisiwa hi ku nde kukholweni hi ku bhulisana hi Mitsalo. (Miti. 15:32; Rom. 1:11, 12) A gonziselelo ni kutiyisana loku hi ku kumako a xikhati lexi hi tlhanganako kasi hi khozela Jehova za hi nyika litsako la lisine ni ‘kurula masikwini ya zikarato.’ (Tis. 94:12, 13) A Kometi ya Gonziselelo ya Hubye yi Fumako yi wonelela a ntiro wa ku longisela a milongoloko ya zakuga za moya kasi ku gonzisa a vanhu va Jehova misaveni yontlhe. A ho ku bonga hi malulamiselo lawa ma mahiwako kasi hi ti buza hi gonziselelo yi basileko mitlhanganweni ya hina viki ni viki!

7, 8. (a) Hi gihi a kungo go ranga ga mitlhangano ya hina ya bandla? (b) Xana a mitlhangano yi ku vunisa kuyini hi tlhelo ga moya?

⁷ Hambulezo, ku na ni nchumu wa lisima nguvu wo hunza xivuno lexi hina wutsumbu hi xi kumako mitlhanganweni ya hina. A kungo go ranga ga kutlhangana ka hina ku khozela Jehova. (Gonza Tisimu 95:6.) Kunene, i lungelo ga hombe nguvu a ku dumisa Nungungulu wa hina wo hlamalisa! (Kol. 3:16) Jehova wa fanelwa hi ku khozelwa hi hina hi kuva hi tlhangana hi kukhanzakanya ni kuva hi hlengela ka zontlhe zi mahiwako mitlhanganweni leyo. (Kuv. 4:11) Hikwalaho, a zi hlamalisi lezi hi kuciwako ku “nga tsiki a tinkhozo ta hina khwatsi hi mukhuwo wa vanwani”! — Maheb. 10:25.

⁸ Xana ha wona mitlhangano ya bandla kota lulamiselo go hi vuna ku timisela kala Jehova a lovisa tiko legi go biha? Loku zi hi tano, a mitlhangano yi tava xinwe za zilo za lisima lezi hi ti xavelako xikhati wutomini ga hina go tshama na hi khomekile. (Fil. 1:10) Hikwalaho, loku u tshuka u tsanzeka kuya mitlhanganweni u ya khozela Jehova ni vamakabye va hina, wu wa fanele kuva nchumu wa hombe nguvu wu ku tsanzekisako.

 9. Hi zi tivisa kuyini lezaku a ntiro wa kuxumayela wa lisima?

⁹ A ku tira hi kuhisela ntirweni wa kuxumayela zonawu za hi vuna ku famba ni hlengeletano hi nga sali nzhako. Jesu i sangulile a ntiro lowu a xikhati lexi a nga hi laha misaveni a tlhela a wu siya na wu famba. (Mat. 28:19, 20) Kusukela kwalaho, a ntiro wa kuxumayela Mufumo ni ku maha vapizani wu lova wo ranga ka hlengeletano ya Jehova. A matshango yo tala ya xikhati lexi ma komba lezaku a tingelosi ta seketela a ntiro wa hina ti tlhela ti hi kongomisa ka ‘lava va ti yimiseleko wutomi ga pinzukelwa.’ (Miti. 13:48; Kuv. 14:6, 7) A xipanze xa laha misaveni xa hlengeletano ya Jehova xi khomekile nguvu hi ku xaxameta ni ku seketela ntiro lowu wa lisima ku hunza yontlhe. Xana a wutireli hi wona nchumu wa lisima wutomini ga hina?

10. (a) Tlhamusela lezi zi nga hi vunako ku simama hi ranza lisine. (b) Xana a wutireli gi ku vunisa kuyini lezaku u nga rereki?

¹⁰ A ku tira hi kuhiseka wutirelini zi hi vuna ku simama hi ranza lisine. Hi nga wona lezi zi wuliwako hi Mitchel, dota ga kale tlhelo phayona ga xikhati xontlhe. I ngalo: “Nza ranza ku bhulela vanhu a lisine la Biblia. Loku nzi wona a nzima ni nzima yi humesiwako ka Murinzeli kutani Despertai! nza hlamala nguvu hi wutlhari, kupimisisa, ni kuringanisela ko lulama ka revista ginwe ni ginwani. Zi nzi nyika manyawunyawu ya kuya sinwini kasi nzi ya wona lezi a vanhu va to gi amukelisa zona ni lezi nzi nga mahisako zona kasi nzi vuxa kutsakela kabye. A wutireli ga mina gi nzi vuna ku tshama na nzi tiyile. A nzi tsiki nchumu wu nzi tsanzekisa kuya wutirelini.” Hi kufanana, loku hi tshama na hi khomekile ntirweni wa hina wa kubasa zi ta hi vuna ku tshama na hi tiyile masikwini lawa yo gumesa. — Gonza 1 Va Le Korinte 15:58.

11. Hikuyini hi faneleko kuga zakuga zontlhe za moya lezi hi nyikiwako hi Jehova?

¹¹ Jehova i longisela zakuga za moya za talela ga cima kasi zi hi tiyisa. Handle ko kanakana, wa alakanya a khati legi u nga lera bhuku go kari zonake u ti byela lezi: ‘Lezi, hi zalezi nzi nga zi lava futsi! Ko khwatsi Jehova i lo leletela lezaku va tsalelwa mina!’ Lezo a zi kotlanangi. Jehova i hi nyika a zakuga lezo kasi ku hi gonzisa ni ku hi rangela. I ngalo: “Nzi ta ku gonzisa nzi ku komba a ndlela leyi u to famba ha yona.” (Tis. 32:8) Xana ha ti karatela kuga a zakuga zontlhe za moya lezi hi nyikiwako hi tlhela hi ehleketa hi lezi hi zi gonzako? Loku hi maha lezo, hi ta simama ku pswala mihanzu hi nga wuni hi tlhelo ga moya masikwini lawa ya zikarato. — Gonza Tisimu 1:1-3; 35:28; 119:97.

12. Xini xi to hi vuna a ku nga hlakani hi zakuga za hina za moya?

¹² Zi na ni xivuno kambe ka hina a ku ehleketa hi ntiro lowu wu mahiwako kasi hi simama ku kuma zakuga lezi zo nona za moya. A Kometi ya Kutsala ya Hubye yi Fumako yi wonelela a ntiro wa ku kambisisa mahungu, ku tsala, ku hlola, ku tsala zithombe, ni wa ku hunzulusela mabhuku ya hina ni mahungu lawa ma cheliwako ka phajina ga hina ga Internet. A tihofisa ta maravi leti ti gandlako mabhuku ti gumesa ti ma rumela mabandleni ya laha kusuhani ni ya le kule. Hikuyini ku mahiwako a ntiro wontlhe lowu ke? Kasi a vanhu va Jehova vaga khwatsi hi tlhelo ga moya. (Isa. 65:13) Ngha hi ti karatela kuga a zakuga zontlhe za moya lezi hi nyikiwako hi hlengeletano ya Jehova. — Tis. 119:27.

13, 14. Hi vamani va seketelako a malulamiselo ya Jehova le tilweni, niku xana hina laha misaveni hi nga va pimanyisisa kuyini?

¹³ Ka muwoniso lowu wu nyikilweko mupostoli Johani, Jesu i woneka na a khilele a haxi go basa a ya hlula lava va vukelako Jehova. (Kuv. 19:11-15) A zo ku tiyisa kukholwa ka hina a ku tiva lezaku Jesu i zinwe ni tingelosi to tsumbeka ni vatotilweko lava va hlulileko laha misaveni, lava makunu va amukeleko a nchachazelo wabye le tilweni! (Kuv. 2:26, 27) Hi nga wona a xikombiso lexi xo saseka xa ku seketela a malulamiselo ya Jehova!

¹⁴ Hi kufanana, a xidlemo xa tsanza-vahlayi xi seketela a ntiro wa vatotilweko va Kristu hi mbilu yontlhe lava va ha hiko laha misaveni, lava va rangelako lomu hlengeletanweni nyamutlha. (Gonza Zakaria 8:23.) Xana a munwe ni munwani wa hina a nga zi kombisa kuyini lezaku wa seketela a malulamiselo ya Jehova? A yinwe ya tindlela ku ti koramisa hi ingisa lava va rangelako. (Maheb. 13:7, 17) Hi sangula ku maha lezo kwalaha bandleni ga hina. Xana a mabhulo ya hina ma komba xichavo hi madota ni ntiro wabye wa ku wonelela ke? Ha gonzisa vana va hina lezaku va kombisa xichavo ka vavanuna lava vo tsumbeka ni ku va kuca lezaku va kombela wusungukati ga Mitsalo ka vona? Tlhatakumbiri, ha bhulisana kota ngango hi lezi hi nga seketelisako zona a ntiro wa kuxumayela misaveni yontlhe hi ku maha minyikelo? (Mav. 3:9; 1 Kor. 16:2; 2 Kor. 8:12) Ha zi wona kota lungelo ga lisima a ku hlayisa Salawu ya Mufumo? A moya wa Jehova wu tira khwatsi laha ku nga ni xichavo ni kuzwanana. A moya lowo wa hi vuna ku tshama na hi tiyile xontlhe xikhati, hi nga rereki masikwini lawa yo gumesa. — Isa. 40:29-31.

15. Hikuyini hi faneleko kulwa yimpi siku ni siku kasi hi hanya hi kuyelana ni kungo ga Jehova?

¹⁵ Hi kugumesa, kasi hi timisela hi tlhela hi nga sali ni hlengeletano ya Jehova, hi fanele ku simama hi hanya hi kuyelana ni mahungu lawa hi xumayelako hi ku tshama na hi ‘hlola hi tiva lezi zi tsakisako Hosi.’ (Efe. 5:10, 11) Hi kota ya nyama ya hina yi nga mbhelelangiko, ni mizamo ya Satani zinwe ni tiko gakwe go biha, hi tshama hi kulwa yimpi ya mikucetelo yo biha wutomini ga hina. A vokari xikari ka nwina vamakabye vo ranzeka, va xinuna ni va xisati mu kari mulwa yimpi siku ni siku kasi mu tiyisa kuzwanana ka nwina na Jehova. Lezo, zi mu maha muva vanhu vo ranzeka nguvu mahlweni yakwe. Mu nga karali! A ku hanya hi kuyelana ni kungo ga Jehova zi ta hi nyika litsako la hombe nguvu zi tlhela zi hi tiyisa lezaku a ku khozela Jehova zi na ni xivuno. — 1 Kor. 9:24-27.

16, 17. (a) Hi fanele ku maha yini loku hi tshuka hi wela xionhweni xa hombe? (b) Hi nga vunekisa kuyini hi xikombiso xa Ana?

¹⁶ Hambulezo, zini hi faneleko ku maha loku hi wele xionhweni xa hombe ke? Tekela ku lava xivuno. A ku fihla xionho zi to bihisa nguvu lezi zi onhekileko. Alakanya ku Davida i te ngalo a xikhati lexi a nga miyela ni zionho zakwe, ‘a marambu yakwe ma lo gutlagutla hi kuketa kakwe gontlhe siku.’ (Tis. 32:3) Kunene, a ku fihla zionho lezi hi zi mahileko xihundleni zi to hi rera hi tlhelo ga moya ni ga kutizwa, kanilezi “loyi a zi wulelako, a zi tsika, i ta mahelwa wuxinji.” — Mav. 28:13.

¹⁷ Wona xikombiso xa Ana.a A xikhati lexi Ana a nga hi kusuhani ni 20 wa malembe, i wa tira kota phayona ga xikhati xontlhe. Kanilezi, i lo sangula ku hanya wutomi gimbiri. Lezo zi lo mu xanisa nguvu. I ngalo: “Nzi wa tshamela ku biwa hi livalo. Nzi lo karateka nzi tlhela nzi mbhelelwa hi litsako.” Zini a nga maha hi kulanzela? I wula lezaku ka siku go kari mitlhanganweni ya bandla ku lo tlhamuselwa a bhuku ga Jakobe 5:14, 15. Ana i lo tekela ku zi wona lezaku i wa fanele ku vuniwa. Kunene, i loya ka madota a ya kombela xivuno lexo. Loku a cuwuka nzhako, Ana i ngalo: “A mitsalo leyo i muri lowu Jehova a hi tsalelako kasi ku hi chuma hi tlhelo ga moya. A muri lowu a zi olovi ku wu mita, kanilezi wa hanyisa. Nzi ingisile a wusungukati gi nga ka mitsalo leyo, niku gi nzi vunile futsi.” Makunu ku hunza malembe yo kari lezo na zi mahekile, niku zalezi Ana i tirela Jehova hi kuhiseka na a hi ni livalo li basileko.

18. Zini hi faneleko ku ti yimisela ku maha?

¹⁸ Kunene, i lungelo ga hombe nguvu a ku hanya masikwini lawa yo gumesa ni kuva xiro xa hlengeletano ya Jehova yo hlamalisa! Ngha hi ti yimisela ku nga tshuki hi alakanya lezaku lezi hi nga nazo hi nge tshuki hi zi luza. Wutshanwini ga lezo, kota ngango ngha hi ti karatela kuya mitlhanganweni lezaku hi ya khozela Jehova zinwe ni bandla, hi hlota hi kuhisela lava va timbilu ti nene lomu xipanzeni xa hina, hi tlhela hi nyika lisima a zakuga za hina za moya lezi hi nyikiwako hi hlengeletano ya Jehova hi kukhanzakanya. Tlhatakumbiri, a hi seketeleni lava va rangelako hi tlhela hi hanya hi kuyelana ni mahungu lawa hi xumayelako. Loku hi maha lezo, hi nga ta tshuka hi sala nzhako ni hlengeletano ya Jehova ge hambu ku tshuka hi rereka ku maha lezi zi nga zi nene!