Wa ‘ranza muakelane kota lezi u ti ranzisako zona’ ke?

1, 2. A Mitsalo yi kombisa kuyini a lisima la liranzo?

A LIRANZO hi gona a tshamela ga hombe ga Jehova. (1 Joh. 4:16) A xivangwa xakwe xo sangula hi Jesu, loyi a hanyileko naye le tilweni hi xikhati xo leha nguvu a tlhela a gonza a tindlela ta liranzo ta Nungungulu. (Kol. 1:15) Wutomini gakwe gontlhe, a ku patsa ni xikhati lexi a nga hi laha misaveni, Jesu i lo komba ku wa zi zwisisa khwatsi lezaku Jehova i Nungungulu wa liranzo, niku i lo pimanyisa a liranzo lelo. Hikwalaho, hi nga tsumba lezaku a kufuma ka Jehova na Jesu ku tava ka liranzo kala kupinzuka.

² A xikhati lexi va nga mu wutisa lezaku hi wihi a nayo wa hombe ka yontlhe, Jesu i te ngalo: “U ta ranza Hosi Nungungulu wa wena hi mbilu ya wena yontlhe, ni muhefemulo wa wena wontlhe, ni kupima ka wena kontlhe. Lowu hi nayo wa hombe ni wa kuranga. Ni wa wumbiri wu fananako na wona, hi lowu: U ta ranza wakelene na wena kota lezi u ti ranzako wena.” — Mat. 22:37-39.

 3. Himani ‘muakelane’ wa hina?

³ Wona lezaku Jesu i wulawulile hi ku ranza muakelane kota nchumu wa wumbiri anzhako ka ku ranza Jehova. Lezo zi komba a lisima la ku kombisa liranzo ka vontlhe hi tirisanako navo. Kanilezi himani ‘muakelane’ wa hina? Loku hi chadile, a muakelane wa hina wa laha kusuhani munghana wa hina wa wukati. A vanwani vaakelane va laha kusuhani hi lava va wumbako a bandla ga wuKristu, ku nga vakhozeli-kulori va Nungungulu wa lisine. A vanwani hi lava hi va kumako wutirelini. Hi tihi tindlela leti lava va khozelako Jehova ni ku lanzela tigonzo ta N’wana wakwe va nga kombisako hi tona liranzo ka muakelane ke?

 4. Hikuyini zi kotekako kuva ni wukati gi nene hambu lezi hi nga vanhu va nga mbhelelangiko?

⁴ Jehova i wumbile a wukati go sangula hi ku vanga Adamu na Eva, a gumesa a va patsa. I wa lava lezaku va hanya zinwe hi kutsaka kala kupinzuka va tlhela va tata misava hi vana vabye. (Gen. 1:27, 28) Hambulezo, a kuhluwukela wuhosi ga Jehova zi lo onha a wukati lego go sangula zi tlhela zi neha xionho ni kufa ka vanhu vontlhe. (Rom. 5:12) Hambulezo, a Mitsalo yi hi byela lezi zi nga hi mahako hi humelela wukatini. Yi nyika a wusungukati ga gi nene nguvu mhakeni leyi hakuva yita hi ka Jehova, a Muwumbi wa wukati. — Gonza 2 Timote 3:16, 17.

 5. A liranzo li na ni lisima muni wukatini?

⁵ A Mhaka ya Nungungulu yi komba lezaku a liranzo la lisima ka vanhu kasi va hanyisana hi kutsaka. Hi zalezo zi lavekako wukatini. Ka magezu a tsaleleko bandla, mupostoli Paule i te ngalo: “A liranzo li na ni lihlaza-mbilu, li nene; a liranzo a li na makangwa; a liranzo a li ti mahisi matshanza, a li ti kukumukisi, a li mahi lezi zi nga faneliko, a li ti laveli za lona, a li na kuzangara, a li alakanyeli hi kubiha loku li mahelweko kona; a li tsaki hi lezi zi nga lulamangiko, kanilezi li tsakelana ni zinene. Li nonoka ku zwata zilo zontlhe, li kholwa zilo zontlhe, li tsumba zilo zontlhe, li timisela zilo zontlhe. A liranzo cima li nga ta fuva.” (1 Kor. 13:4-8) A ku ehleketa hi magezu lawo ma pimisilweko ni ku hanya hi wona, handle ko kanakana zi ta engetela litsako wukatini.

6, 7. a) A Biblia gi wula yini xungetano hi wuhloko? b) A nuna a nga muKristu i fanele ku khomisa kuyini sati wakwe?

⁶ Hi kota ya tshinya ga nayo ga wuhloko legi gi nga kona nzeni ka malulamiselo wontlhe ya Nungungulu, a liranzo la lisima nguvu. Paule i wulile lezi: “Nzi ranza a kuva mu tiva lezaku a hloko ya wanuna munwe ni munwani hi Kristu, ni hloko ya wasati hi nuna wakwe, ni hloko ya Kristu hi Nungungulu.” (1 Kor. 11:3) Kanilezi a wuhloko a gi faneli ku tiriswa hi ndlela ya tihanyi. Hi xikombiso, Jehova i kombisa wuhloko gakwe hehla ka Kristu hi wunene ni liranzo niku Jesu i gi amukela hi matsenya. Wa xalala hi wuhloko ga Nungungulu ga liranzo, hakuva i te ngalo: “Nza mu ranza Dadani.” (Joh. 14:31) Za kanakanisa ku Jesu i wa tava a ti zwisile lezo loku Jehova i wa no tirisa tihanyi ni ntamu a xikhati lexi a nga tirisana ni N’wana wakwe wo ranzeka.

⁷ Hambu lezi a nuna a nga hloko ya sati wakwe, a Biblia gi mu laya lezaku a mu “dzunza.” (1 Ped. 3:7) A yinwe ya tindlela leti a vanuna va nga dzunzako hi tona vasati vabye ku chela kota hi zilaveko zabye ni ku va tsika va hlawula zilweni zo kari. A Mhaka ya Nungungulu yi ngalo: “Vavanuna, ranzani a vasati va nwina, kota lezi Kristu a nga ranza bandla, a ti nyikela hi kota ya gona.” (Efe. 5:25) Kunene, Jesu i nyikele ni wutomi gakwe hi kota ya valanzeli vakwe. Loku a nuna a pimanyisa a ndlela ya liranzo leyi Jesu a kombisako hi yona a wuhloko gakwe, za mu olovela a sati ku kombisa liranzo ni xichawo a tlhela a ti koramisa ka nuna wakwe. — Gonza Titusi 2:3-5.

 8. A vakhozeli va Jehova va fanele ku ma wonisa kuyini maKristu-kulobye?

⁸ Laha misaveni, ku na ni timiliyoni ta vanhu va khozelako Jehova va tlhela va kustumunya hi vito gakwe ni kungo gakwe. A mukhozeli munwe ni munwani wa Jehova i fanele ku ti wonisa kuyini Timboni-kulobye? A Mhaka ya Nungungulu ya hlamula yiku: “A hi tireni lezi zi nene ka vanhu vontlhe, nguvunguvu ka va le ngangweni wa kukholwa.” (Gal. 6:10; gonza Va Le Roma 12:10.) Mupostoli Pedro i lo tsala aku: “Kota lezi mu basisileko mihefemulo ya nwina hi ku ingisa [lisine], mu kala mu ranza a vamakabye hi liranzo li nga xengeteliko, ranzanani hi timbilu ti basileko.” I tlhelile a byela makholwa-kulobye aku: “Nguvunguvu pinyamelani kuranzana, hakuva a liranzo li khubhunyeta zionho zinyingi.” — 1 Ped. 1:22; 4:8.

9, 10. Hikuyini ku nga ni wumunwe xikari ka vanhu va Nungungulu?

⁹ Hi kota ya liranzo la hombe leli hi nga nalo hi malanza-kulori ya Jehova, hi wumba a hlengeletano ya misava yontlhe. Tlhatakumbiri, hi ku ranza Jehova ni ku hlayisa a milayo yakwe, wa hi nyika a ntamu wa hombe ka yontlhe yi nga kona wuakweni, wu nga moya wakwe wa ku basa. Lezo zi hi vuna kuva ni wumunwe go tsakisa kota hlengeletano ya vamakabye va lisine misaveni yontlhe. — Gonza 1 Johani 4:20, 21.

¹⁰ Paule i lo khanyisa a xilaveko xa lezaku a maKristu ma ranzana, aku: “Ambalani a mbilu yo zwela wusiwana, ni wunene, ni kutikoramisa, ni kurula, ni lihlaza-mbilu. Honiselanani ni ku tsetselelana; loku munhu a hi ni xisolo ka munwani, kota lezi Hosi yi nga mu tsetselela, nwinawu mahani zalezo. A hehla ka zontlhe lezo, ambalani liranzo, leli li nga xiboho xa kumbhelela.” (Kol. 3:12-14) A ho ku bonga hi lezi a liranzo — “leli li nga xiboho xa kumbhelela” — li nga kona xikari ka hina hambu loku hita hi ka matshamu yo hambana kutani matiko yo hambana!

11. A liranzo ni wumunwe zi tivekisisa kuyini a hlengeletano ya Jehova?

¹¹ A liranzo la lisine ni wumunwe zi tivekisa a malanza ya Jehova kota vanhu va lumbako wukhongeli ga lisine, hakuva Jesu i te ngalo: “Loku mu ranzana, a vanhu vontlhe va ta zi tiva lezaku mu vapizani va mina.” (Joh. 13:34, 35) Mupostoli Johani i lo tsala lezi: “Hi xwalexo xi kombisako lava va nga vana va Nungungulu ni lava va nga vana va Satani: kani hi wihi loyi a nga mahiko lezi zi lulamileko a hi wa Nungungulu, ge ni loyi a nga ranziko makabye wakwe. Hakuva a mhaka leyi mu yi zwileko hi le kusanguleni hi leyi, lezaku hi ranzana.” (1 Joh. 3:10, 11) A liranzo leli li pswalako wumunwe go hlamalisa li tivekisa Timboni ta Jehova kota valanzeli va lisine va Kristu, lava Nungungulu a va tirisako kasi ku tatisa kungo gakwe ga ku xumayela a mahungu yo saseka ya Mufumo misaveni yontlhe. — Mat. 24:14.

12, 13. Zini lezi a “xidlemo xa tsanza-vahlayi” xi mahako zalezi, niku zini zi to humelela vanhu lavo lokuloku?

¹² A kutala ka malanza ya Nungungulu ma lumba a “xidlemo xa tsanza-vahlayi, xa matiko wontlhe, ni tixaka, ni mifumo, ni tirimi.” Va “yimile mahlweni ka xitshamu xa wuhosi [xa Nungungulu] ni mahlweni ka Yivana [Jesu Kristu].” Hi vamani? “Lava hi vona va humako kuxanisekeni ka hombe, va hlazile tinguwo tabye va ti basisa nkhateni wa Yivana,” hakuva va kombisa kukholwa ka muphahlo wa kutirula wa Jesu. A vanhu lavo va “xidlemo xa tsanza-vahlayi” va ranza Jehova ni N’wana wakwe niku va “tirela [Nungungulu] mumu ni wusiku.” — Kuv. 7:9, 14, 15.

¹³ Lokuloku Nungungulu i ta fuvisa tiko legi go biha ‘kuxanisekeni ka hombe.’ (Mat. 24:21; gonza Jeremia 25:32, 33.) Kanilezi, hi kota ya liranzo a nga nalo hi malanza yakwe, Jehova i ta ma ponisa kota ntlawa a tlhela a ma nghenisa misaveni yakwe ya yiswa. Kota lezi zi wulilweko kwalomo ka 2.000 wa malembe ma hunzileko, “[Nungungulu] i ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa.” A wu zi naveli ku hanya paradiseni anzhako ka kuva “a zilo zo sangula zi hunzile” ke?

14. A xidlemo xa tsanza-vahlayi xi kulile kala kwihi?

¹⁴ A xikhati lexi a masiku yo gumesa ma nga sangula hi 1914, ku wova ni makume ma tsongwani ya mazana ya malanza ya Jehova misaveni yontlhe. Hi ku ranza muakelane, ni ku vuniwa hi moya wa Nungungulu, a ntlawa wu tsongwani wa misalela ya maKristu ma totilweko wu lo timisela ntiro wa ku xumayela a Mufumo. Kota wuyelo ga kona, inyamutlha ku kari ku hlengeletwa xidlemo xa tsanza-vahlayi xa vanhu va nga ni kutsumba ko hanya laha misaveni. A ntsengo wa malanza ya Nungungulu wu kulile wuya ka xipimo xa 8 wa timiliyoni ta Timboni ti tlhanganako ka mabandla yo hunza 115.400 misaveni yontlhe, niku wuya mahlweni wu kula. Hi xikombiso, nzeni ka lembe ga ntiro ga 2014 ku bapatizilwe Timboni tiswa to hunza 275.500 — lezi zi ringanako 5.300 wa tona hi viki.

15. Hlawutela a kukula ka ntiro wa kuxumayela lowu wu mahiwako zalezi.

¹⁵ A ntiro wa kuxumayela wonawu wu kulile hi ndlela yo hlamalisa. Zalezi, a mabhuku ma seketelwako ka Biblia ma kari ma humesiwa hi 700 wa tirimi ni ku hunza. A Murinzeli hi gona revista gi nyikelwako nguvu misaveni yontlhe. Ku gandliwa xipimo xa 52.000.000 wa tikopiya ta gona ni ku hunza hweti ni hweti niku gi humesiwa hi 247 wa tirimi. A bhuku ga hina ga xigonzo xa Biblia Zini lezi a Biblia gi zi gonzisako Hakunene? gi gandlilwe ntsengo wo hunza 200.000.000 wa wona hi 250 wa tirimi ni ku hunza.

16. Xini xi vunako a hlengeletano ya Jehova lezaku yi humelela laha misaveni?

¹⁶ A kuanza ka hombe loku hi ku wonako nyamutlha i wuyelo ga kukholwa ka hina ka Nungungulu ni kutsumba a Biblia — legi gi nga Mhaka yi pimisilweko ya Jehova. (1 Tes. 2:13) A vanhu va Jehova va kari va humelela kambe hi ndlela yo hlamalisa nguvu, hambu lezi va vengiwako ni ku vukelwa hi Satani, a “nungungulu wa misava leyi.” — 2 Kor. 4:4.

17, 18. A malanza ya Jehova ma fanele ku va khomisa kuyini lava va nga kholwiko?

¹⁷ A malanza ya Jehova ma fanele ku va khomisa kuyini a vanhu lava va nga khozeliko Nungungulu wa lisine ke? Ka ntiro wa hina wo xumayela, hi kuma mihlamulo yo hambanahambana — a yo tsakisa ni ya tihanyi. Hambulezo, na ku nga khataliseki lezi a vanhu va hlamulisako zona, a Mhaka ya Nungungulu yi komba lezi a malanza yakwe ma faneleko ku zi maha. Yi ngalo: “Ngha kuwulawula ka nwina ku hi ni tipswalo xontlhe xikhati, na ku lungilwe hi munyu, lezaku mu fela ku tiva lezi mu ta nga hlamulisa zona ka munwe ni munwani.” (Kol. 4:6) A xikhati lexi va wutisako hi xigelo xa kutsumba ka hina, hi fanele “ku hlamula hi kurula ni xichawo” hakuva hi kuciwa hi ku ranza muakelane. — 1 Ped. 3:15.

¹⁸ Hi kombisa liranzo ka muakelane hambu loku a nwinyi wa muti a ala mahungu ya hina a tlhela a hi zangarela kutani ku hi rukatela. Hi tekelela Jesu, loyi a Biblia gi wulako lezi ha yena: “Laha a nga rukatelwa a nga rukatelangiwo; laha a nga xaniseka a nga dzuxangi, kanilezi i lo yisa mhaka yakwe ka [Jehova] loyi a lamulako hi nongameto.” (1 Ped. 2:23) Kani hi na ni makholwa-kulori kutani vanwani, hi kombisa ku ti koramisa hi tlhela hi tirisa a wusungukati legi: “Mu nga tlheliseli a kubiha hi kubiha, hambu ku tlhelisela a nzhukano hi nzhukano; kanilezi katekisani vanhu.” — 1 Ped. 3:8, 9.

19. I tshinya muni ga nayo legi Jesu a gi nyikileko xungetano hi lava va hi vukelako?

¹⁹ Hi ku ti koramisa, a vanhu va Jehova va ingisa a tshinya ga nayo gi nyikilweko hi Jesu. Ka Kanelo yakwe ya le Xitsungeni, Jesu i te ngalo: “Mu zwile lezaku ku wulilwe ku ngalo: U ta ranza muakelane wa wena, u venga nala wa wena. Kanilezi mina nziku ka nwina: Ranzani valala va nwina, mu kombelela lava va mu xanisako; kasi mu fela kuva vana va Raru wa nwina loyi a nga le tilweni; hakuva wa tsuwukisa gambo gakwe hehla ka vobiha ni ka vosaseka, a nisa vula hehla ka valulamileko ni ka va nga lulamangiko.” (Mat. 5:43-45) Kunene, kota malanza ya Nungungulu, hi fanele ku gonza ku ‘ranza valala va hina,’ na ku nga khataliseki lezi va hi mahelako.

20. Hikuyini a liranzo la Nungungulu ni muakelane li to zima timitsu misaveni yiswa? (Wona mufota kusanguleni ka nzima.)

²⁰ Ka matlhelo wontlhe ya wutomi, a vanhu va Jehova va fanele ku komba hi mapimo ni mahanyela lezaku va mu ranza Jehova ni muakelane. Hi xikombiso, hambu loku a vokari va nga amukeli a mahungu ya Mufumo, hi kombisa liranzo la wuakelane loku va hi ni xilaveko. Mupostoli Paule i tsalile lezi: “Ngha mu nga hi na nanzu ka munhu, sine ku ranzana ntsena; hakuva loyi a ranzako a munhu-kulobye i tatisa nayo. Hakuva a milayo leyi yi nge ngalo: U nga bhayi, u nga dayi, u nga yivi, u nga naveli, hambu ni wihi nayo munwani, yontlhe yi tlhanganyisilwe mhakeni leyi yaku: U ta ranza a waakelane kota lezi u ti ranzako wutsumbu. A liranzo a li mahi za kubiha ka waakelane wakwe; hikwalaho a liranzo hi kutatisa ka nayo.” (Rom. 13:8-10) Kota Timboni ta Jehova, hi kombisa liranzo la lisine tikweni legi go biha gi teleko hi kuhambana, ni tihanyi, na gi fumelwa hi Satani. (1 Joh. 5:19) Handle ko kanakana, a liranzo li ta fumela a mitiro yontlhe yi to mahiwa misaveni yiswa anzhako ka loku Satani, ni madimoni yakwe, ni vanhu vontlhe va vahluwuki va lovisilwe. Ma tava makatekwa ya hombe a ku hanya ka xikhati lexi vontlhe vahanyi va misava va to ranza Nungungulu ni muakelane!