Ehleketa hi liranzo lo timisela la Jehova

1, 2. a) Xini xi ku tiyisako lezaku Jehova wa va ranza vanhu vakwe? b) Xilaveko muni lexi a vanhu vontlhe va vangilweko naxo?

XINI xi ku tiyisako lezaku Jehova wa va ranza vanhu vakwe? Na u nga se hlamula xiwutiso lexi, ehleketa hi zikombiso lezi: Hi malembe, Taylene i lo kuciwa hi makholwa-kulobye lezaku ava ni kuringanisela, a nga rinzeli za hombe ku hunza mpimo ka yena wutsumbu. I ngalo: “Loku Jehova i wa nga nzi ranzi, na a nga nzi nyikangi wusungukati hi kuphindaphinda.” Brigitte, loyi a nga wundla vana yece anzhako ka ku felwa hi nuna wakwe, i ngalo: “A ku wundla vana tikweni ga Satani xinwe xa zikarato za hombe nguvu zi nga kona, nguvunguvu loku u hi wece. Kanilezi nza kholwa lezaku Jehova wa nzi ranza hakuva i nzi rangele mihlotini ni kupanzeni ka mbilu, niku a nga tshukangi a nzi tsika nzi tlimbiwa ku hunza ntamu wa mina.” (1 Kor. 10:13) Sandra ilwa ni mababyi ma nga hiko na muri. Ka gotsovanyano wo kari, i lo khatalelwa hi sati wa makabye wo kari wo tiveka nguvu. A nuna wa Sandra i ngalo: “Hambu lezi hi nga kala hi nga mu tivi yena wutsumbu, a kukhatala kakwe ku nehile litsako la hombe timbilwini ta hina. Hambu zikombiso zi tsongwani za liranzo la vamakabye va hina zi hi maha hi wona lezi Jehova a hi ranzisako zona.”

² A vanhu va vangilwe na va hi ni xilaveko xa ku ranza ni ku ranziwa. Za olova ku mbhela ntamu loku a xilaveko lexi xi nga tatiswi hi kota ya zilo za ku humelela na u nga zi rinzelangi kutani zikhunguvanyiso, mababyi, ku luza ntiro, kutani ku nga woni mabhinzu wutirelini. Loku hi sangula ku alakanya lezaku Jehova a nga ha hi ranzi, hi fanele ku alakanya lezaku hi va lisima ka yena hakuva i ‘khomile canja ga hina ga xinene’ a hi vuna. A nga ta tshuka a hi rivala loku hi simama ku tsumbeka ka yena. — Isa. 41:13; 49:15.

 3. Xini xi nga hi vunako ku engetela ku tiyiseka lezaku a liranzo la Jehova hi hina la timisela?

³ A vanhu lava va tshahilweko laha kusanguleni va wa tiyiseka lezaku Nungungulu i wa hi zinwe navo zikaratweni zabye. Hinawu hi nga tiyiseka lezaku i le reveni ga hina. (Tis. 118:6, 7) A nzima leyi yi veka kupima ka lezi a liranzo la Nungungulu li wonekisako zona (1) ka zivangwa zakwe, (2) Mhakeni yakwe, (3) ka mukhongelo, ni (4) ka nzhiho. A ku ehleketa hi zilo zo saseka lezi Jehova a hi mahelako zi ta hi vuna ku engetela ku bonga a liranzo lakwe lo timisela. — Gonza Tisimu 77:11, 12.

 4. A ku ehleketa hi zivangwa za Jehova zi hi maha hi wona yini?

⁴ Hi nga zi kota ku wona a liranzo lo timisela la Jehova ka lezi a zi vangileko ke? Ina, hi nga li wona hakuva a kuvanga ka kona ha koce xikombiso xa liranzo la Nungungulu. (Rom. 1:20) I mahile misava na yi hi ni matirela ya kuva hi zi kota ku tshamiseka hi tlhela hi tiya. Kanilezi a nga lavi lezaku hiva kona ntsena. Hi fanele kuga kasi hi simama ku hanya. Jehova i lo maha lezaku a misava yi humesa tixaka ta tsanza-vahlayi ta tisinya leti hi nga ti tirisako kota zakuga za zi nene. I tlhelile a maha lezaku a kuga kuva nchumu wo tsakisa! (Mutsh. 9:7) A makabye wo kari wa xisati a vitwako Catherine i xalala nguvu hi ku cuwuka a zivangwa, nguvunguvu ka nguva yo tiyisa marambu ya wuxika le Canadá. I ngalo: “Za hlamalisa nguvu ku wona zilo zontlhe na zi hanya — a zitsangi lezi zi vekelweko xikhati xa ku hluka ni zinyanyani lezi zi yako matikweni zi tlhela zi wuya kaya, a ku patsa ni xivevana lexi xi tivako ndlela ya kuta xi taga a zakuga lezi nzi xi chelelako laha janeleni ga kozinya ya mina. Zi te dlunya ku Jehova wa hi ranza nguvu a kuza a hi nyika litsako lelo la hombe.” A Dadani wa hina wa le tilweni wa liranzo wa xalala hi zivangwa zakwe, niku i lava lezaku hinawu hi kuma litsako ka zona. — Miti. 14:16, 17.

 5. A liranzo la Jehova li wonekisa kuyini ka ndlela leyi a vanhu va mahilweko hi yona?

⁵ Jehova i hi mahile ni wuzikoti ga ku maha mitiro yo nyawula ni yo xalalisa leyi yi engetelako a litsako la kuhanya. (Mutsh. 2:24) I wa lava lezaku a vanhu va tata misava, va yi fumela, va tlhela va fumela a zidluwani, ni zinyanyani, ni zivangwa zinwani zi hanyako. (Gen. 1:26-28) Hi nga ehleketa kambe hi liranzo leli Jehova a li kombisileko hi ku hi nyika matshamela ma hi mahako hi zi kota ku mu pimanyisa! — Efe. 5:1.

 6. Hikuyini hi faneleko ku nyika nguvu lisima a Mhaka ya Nungungulu?

⁶ Nungungulu i kombisile liranzo la hombe hi ku hi nyika a Mhaka yakwe yi pimisilweko. Yi hi komba lezi hi faneleko ku zi tiva xungetano hi yena ni kutirisana kakwe ni vanhu. Hi xikombiso, a Mitsalo yi hi byela lezi a nga tirisanisa zona ni vaIsraeli, lava va nga tshamela ku nga mu ingisi. Tisimu 78:38 gi ngalo: “Na [a] hi ni tipswalo, i lo va tsetselela, a nga va lovisangi; I lo ti khoma zangeni yakwe zikhati zo tala.” A ku ehleketa hi vesi legi zi nga ku vuna ku wona lezi Jehova a ku ranzisako zona wena wutsumbu ni lezi a ku khatalelisako zona. Tiyiseka lezaku u wa lisima ka Jehova. — Gonza 1 Pedro 5:6, 7.

 7. Hikuyini hi faneleko ku nyika nguvu lisima a Biblia?

⁷ Hi fanele ku nyika nguvu lisima a Biblia hakuva Nungungulu i wulawula na hina hi ku tirisa gona nguvunguvu. A mabhulo yo nyawula ni ya tipswalo xikari ka vapswali ni vana vabye nja lisima kasi ku tsumbana ni kuva munwe ni munwani a ti wona na a ranziwa. Ahati Jehova ke? Hambu lezi hi kalako hi nga se tshuka hi mu wona kutani ku kuzwa gezu gakwe, i “wulawula” na hina hi ku tirisa a Mhaka yakwe yi pimisilweko, niku hi fanele ku demba ndleve. (Isa. 30:20, 21) Jehova i xuva ku hi rangela, kota vanhu vakwe va ti hendleletileko, ni ku hi vikela ka timhango. I lava kambe lezaku hi mu tiva ni ku mu tsumba. — Gonza Tisimu 19:7-11; Mavingu 1:33.

8, 9. Zini lezi Jehova a lavako lezaku hi zi tiva? Nyika xikombiso xa lomu ka Biblia.

⁸ Jehova i lava lezaku hi mu tiva kota munhu a hi ranzako, loyi a nga cuwukiko a kungambheleli ka hina. I hlota za zi nene ka hina. (2 Kro. 16:9) Hi xikombiso, i mahile lezo ka Hosi Jehoxafate wa Juda. Ka khati go kari, Jehoxafate i lo maha wupumbu, a vumela ku famba na Hosi Ahabi wa Israeli kasi ku ya lwela Ramote-Gileade ka vaSiria. Hambu lezi a 400 wa vaprofeti va mawunwa va nga tiyisa Ahabi lezaku i ta hlula, Mikaia, a muprofeti wa lisine wa Jehova i lo wula lezaku i wa ta hluliwa. Ahabi i lofa yimpini leyo, niku Jehoxafate i lo pona gi no ha. Laha a nga tlhela Jerusalema, i lo kawukiwa hi kuva a mahile wunghana na Ahabi. Hambulezo, Jehu, n’wana Hanani a muprofeti, i lo byela Jehoxafate aku: “Zi kona zilo zo saseka zi kumilweko ka wena.” —  2 Kro. 18:4, 5, 18-22, 33, 34; 19:1-3.

⁹ Kusanguleni ka kufuma kakwe, Jehoxafate i wa rumile a tinduna, ni vaLevi, ni vapristi lezaku va famba va gonzisa Nayo wa Jehova ka vafumelwi vakwe madoropeni wontlhe ya Juda. A tsima lego give ni mabhinzu ya hombe laha kaku a matiko ya wuakelwani ma sangula ku chava Jehova. (2 Kro. 17:3-10) Kunene Jehoxafate i mahile wupumbu, kanilezi Jehova i wa nga ti valangi matihlo ka zilo za zi nene lezi a nga zi mahile. A matimu lawa ya Biblia ma hi alakanyisa ku hambu lezi hi nga mbhelelangiko, Jehova i ta kombisa liranzo lo timisela hi hina loku hi mu hlota hi mbilu yontlhe.

10, 11. a) Hikuyini a mukhongelo wu nga lulamiselo go hlawuleka gi tako hi ka Jehova? b) Nungungulu a nga yi hlamulisa kuyini a mikhongelo ya hina? (Wona mufota kusanguleni ka nzima.)

¹⁰ A raru wa liranzo wa ti nyika xikhati xa ku ingisela vana vakwe loku va lava ku wulawula naye. I lava ku tiva lezi zi va karatako hakuva wa khatala hi lezi zi nga timbilwini tabye. A Dadani wa hina wa le tilweni, Jehova, i demba ndleve ka hina loku hi mu tshinelela hi ku tirisa a lungelo ga hina go hlawuleka ga mukhongelo.

¹¹ Hi nga tshinela ka Jehova hi mukhongelo ni ka xihi xikhati. A nga hi vekeli mbhingano. Munghana wa hina loyi a longileko ku hi ingisela ni ka xihi xikhati. Taylene, a tshahilweko le hehla, i ngalo: “U nga mu byela ni xihi.” Loku hi ti phofula ka Nungungulu hi mukhongelo, a nga ha hi hlamula hi mutsalo wa Biblia, nzima yi nga ka revista go kari, kutani magezu ya mukholwa-kulori ma tiyisako hlana. Jehova i ingisela a zikombelo za hina a tlhela a hi zwisisa hambu loku ku nga hi na munhu munwani a mahako lezo. A mihlamulo yakwe ka mikhongelo ya hina xikombiso xo saseka xa liranzo lakwe lo timisela.

12. Hikuyini hi faneleko ku kambisisa mikhongelo yi tsalilweko lomu ka Biblia? Nyika xikombiso.

¹² Hi nga gonza zotala ka mikhongelo yi tsalilweko Mhakeni ya Nungungulu. Hikwalaho, ka zikhati zo kari zi nga vuna a ku kambisisa mikhongelo leyo wukhozelini ga ngango. A ku ehleketa hi lezi a malanza ya Jehova ya xikhatini xi hunzileko ma tlhatlhisileko zona xifuva ka Nungungulu zi nga hi vuna ku chukwatisa a mikhongelo ya hina. Hi xikombiso, ehleketa hi mukhongelo wa Jona wa kutisola nzeni ka hlavi. (Jona 1:17–2:10) Hi nga kambisisa a mukhongelo wo huma mbilwini lowu Solomoni a wu mahileko ka Jehova kuhendleletweni ka tempeli. (1 Tih. 8:22-53) Ehleketa hi mukhongelo wa xikombiso lowu Jesu a hi maheleko. (Mat. 6:9-13) A ku hunza zontlhe lezo, “tivisani a mixuvo ya nwina ka Nungungulu” xontlhe xikhati. Hi ku maha lezo, “a kurula ka Nungungulu, loku ku nga hiko na kupimiwa, ku ta hlayisa a timbilu ta nwina ni maalakanyo ya nwina.” A kubonga ka hina a liranzo lo timisela la Jehova ku ta engetela. — Fil. 4:6, 7.

13. I lungelo muni gi vululekeleko vanhu hi kota ya lulamiselo ga liranzo ga nzhiho?

¹³ A xinyikiwo xa nzhiho wa Jesu hi nyikilwe kasi “hi fela ku hanya ha yena.” (1 Joh. 4:9) Na a wulawula hi xikombiso lexi xa hombe xa liranzo la Nungungulu, mupostoli Paule i tsalile lezi: “Kristu i lo fela hi xikhati xi faneleko lava va nga chaviko Nungungulu. Hakuva za tsanza ka munhu ku fela loyi a lulamileko, kutani ku ngava kona munhu loyi a tiyako ku fela munhu nene. Kanilezi Nungungulu wa kombisa a kuhiranza kakwe hi lexi, lezaku na ha hi vaonhi Kristu i lo hi fela.” (Rom. 5:6-8) A xikombiso lexi xa hombe ka zontlhe xa liranzo la Nungungulu xi lo vululela vanhu a ndlela ya kuva ni wunghana gi nene na Jehova.

14, 15. A nzhiho wu ma khumbisa kuyini a) a maKristu ma totilweko? b) a maKristu ma nga ni kutsumba ka ku hanya laha misaveni?

¹⁴ A vokari vazwa liranzo la Jehova hi ndlela yo hlawuleka nguvu. (Joh. 1:12, 13; 3:5-7) Va totilwe hi moya, va maha “vana va Nungungulu.” (Rom. 8:15, 16) Xungetano hi maKristu ma totilweko, Paule i lo wula lezaku ma ‘vuxilwe na Kristu Jesu ni ku tshama zinwe naye le tilweni.’ (Efe. 2:6) Va kuma xiyimo lexo xa moya hi kuva va ‘fungilwe hi moya wa ku basa lowu wu tsumbisilweko, lowu wu nga seve wa tshomba yabye,’ ku nga ‘kutsumba loku ku vekelweko vona le matilweni.” — Efe. 1:13, 14; Kol. 1:5.

¹⁵ A vanhu lava vanwani va tsanza-vahlayi va kholwako ka nzhiho va vululekelwe hi ndlela ya ku maha vanghana va Jehova na va hi ni kutsumba ka ku mahiwa vana va Nungungulu ni ku hanya kala kupinzuka paradiseni gi tsumbisilweko misaveni. Hi ndlela leyo, Jehova i kombisa liranzo lakwe hi tiko ga vanhu hi ku tirisa a nzhiho. (Joh. 3:16) Loku hi rinzela ku hanya kala kupinzuka misaveni hi tlhela hi simama ku tirela Jehova hi kutsumbeka, hi nga tiyiseka lezaku i ta hi maha hi hanya wutomi go tsakisa misaveni yiswa. A zo ku fanela a ku wona nzhiho kota xikombiso xa hombe ka zontlhe xa liranzo lo timisela la Nungungulu hi hina!

16. A ku ehleketa hi tindlela to tala leti Jehova a kombisako hi tona liranzo lakwe zi hi khumbisa kuyini?

¹⁶ A hi nge zi koti ku tlhatlhambutela a zikombiso zontlhe za liranzo lo timisela la Jehova hi hina. Mutsali wa tisimu Davida i lo yimbelela aku: “Nungungulu, a maalakanyo ya wena lisima ka mina, wu kulisile kuyini a ntsengo wa wona! Loku nzi wa ta ma hlaya, ma hunza kutala ka seke.” (Tis. 139:17, 18) Hi fanele ku tsika a maalakanyo lawo ma hi vuxela kuxuva ka ku mu ranza nguvu Jehova hi kota ya kukhatala kakwe ka liranzo. Hikwalaho, ngha hi maha zontlhe hi zi kotako ku mu mahela.

17, 18. Hi tihi a tindlela to kari ta ku kombisa liranzo la hina hi Nungungulu?

¹⁷ Ku na ni tindlela to tala ta ku kombisa liranzo la hina hi Jehova. Hi xikombiso, hi kombisa liranzo la hina hi Nungungulu ni muakelane hi ku hiseka nguvu ntirweni wa ku xumayela a Mufumo. (Mat. 24:14; 28:19, 20) Hi komba lezaku hakunene ha mu ranza Jehova hi ku timisela ziringo za kukholwa kota vahlayisi va kutsumbeka. (Gonza Tisimu 84:11; Jakobe 1:2-5.) Loku a minzhingo ya hina yi tshinga nguvu, ngha hi tsumba lezaku Nungungulu wa ku wona kuxaniseka ka hina niku i ta hi vuna, hakuva hi va lisima ka yena. — Tis. 56:8.

¹⁸ A liranzo la hina hi Jehova li hi kuca ku ehleketa hi mitiro yakwe ya kuvanga ni zimaho zinwani zo hlamalisa. Hi komba lezaku ha mu ranza Nungungulu hi tlhela hi nyika lisima a Mhaka yakwe hi ku gonza Biblia hi kuhiseka. A ku ranza Jehova zi hi tshineta ka yena hi mukhongelo. Niku a liranzo la hina hi Jehova li kula nguvu a xikhati lexi hi ehleketako hi nzhiho lowu a hi longiseleleko kasi ku hi basisa ka zionho za hina. (1 Joh. 2:1, 2) Lezi zigelo zi tsongwani ntsena lezi hi nga nazo za kuva hi ranza Jehova kasi ku hlamula a liranzo lo timisela leli a nga nalo hi hina.