U nga tsiki nchumu wu ku vhalela ku kuma nchachazelo

1, 2. a) I nchachazelo muni lowu a malandza ya Jehovha ma wu rindzelako? b) Cini ci to hi vhuna ku tshama na hi alakanya nchachazelo? (Wona mufota laha hehla.)

A MAKRISTU ma totilweko ma na ni kutsumba ko saseka nguvhu. Ma rindzela ku ya hanya tilweni. Lezvo Pawule i zvi vitanile ku i “nchachazelo wa kuvitanwa ku tlakukileko” ku tako hi ka Nungungulu. (Va Le Filipi 3:14) Le tilweni va ta ya fuma na Jesu Kristu Mufun’weni wakwe va tlhela va vhuna vanhu lezvaku va kuma kumbhelela. (Kuvhululelwa 20:6) Hi nga wona kusaseka ka zvona! Lava va tiyivhu tin’wani va rindzela nchachazelo wo hambana. Va rindzela ku hanya kala kupindzuka misaveni ya Paradhise. Lezvo zvi va nyika litsako la lisine! — 2 Pedro 3:13.

² Pawule i wa lava ku vhuna maKristu-kulobye yo totiwa lezvaku ma simama ma tsumbekile kasi ma kuma nchachazelo. I ma byelile lezvi: ‘Alakanyani a zvilo zva le hehla.’ (Va Le Kolosi 3:2) Va wa fanele ku tshama na va alakanya kutsumba kabye ka ku ya hanya tilweni. (Va Le Kolosi 1:4, 5) Hi lisine, kani hi rindzela ku ya hanya tilweni, kani hi rindzela ku hanya laha misaveni, a ku ehleketa hi makatekwa ya Jehovha zvi nga hi vhuna ku tshama na hi alakanya a nchachazelo wa hina. — 1 Va Le Korinte 9:24.

 3. Zvini lezvi Pawule a nga byela maKristu lezvaku ma ti wonela ka zvona?

³ Pawule i tlharihisile maKristu kambe lezvaku ma ti wonela ka lezvi zvi nga wa ta va vhalela ku kuma nchachazelo. Hi cikombiso, i tsalele maKristu ya le Kolosi lezvaku ma ti wonela ka maKristu ya mawunwa lawa ma nga zama ku tsakisa Nungungulu hi ku landzela Nayo wa Mosi wutshan’wini ga ku kholwa ka Kristu. (Va Le Kolosi 2:16-18) I tlhelile a wulawula hi timhango ti nga kona ni nyamutlha leti ti nga hi vhalelako ku kuma nchachazelo. I tlhamusele lezvi hi nga hlulisako zvona kunavela ka hava ka masango ni lezvi hi nga mahako loku hi nga zwanani ni van’wani laha ngangweni kutani ni vamakabye bandleni. A wusungukati ga Pawule gi nga hi vhunawo nyamutlha. A hi woneni zvitlharihiso zvo kari zva lirandzo hi zvi kumako ka papilo legi a nga tsalela maKristu ya le Kolosi.

 4. Hikuyini a kunavela ka masango ku nga hi vhalelako ku kuma nchachazelo?

⁴ Andzhako ka ku va alakanyisa kutsumba kabye ko saseka, Pawule i tsalele vamakabye vakwe aku: ‘Dayani a zviro zva n’wina zva laha misaveni: a wubhayi, ni kungahlazveki, ni wurembi, ni kumbilukela ka kubiha, ni likaka.’ (Va Le Kolosi 3:5) A kunavela ka masango ku nga tshuka ku kula nguvhu laha ka kuza ku hi dayela wunghana ga hina na Jehovha ku tlhela ku hi luzisa nchachazelo wa hina. Hi cikombiso, a makabye wo kari a nga hluliwa hi kunavela kakwe ka masango, a cikhati a nga wuya bandleni i wulile lezvaku a kunavela kakwe kuve ni ntamu nguvhu laha ka kuza a “yaku tsope na a wonhile.”

 5. Hi nga ti vhikelisa kuyini ka zviyimo zvi hi vekelako timhango?

⁵ Hi fanele ku ti wonela nguvhu loku hi hi ka ciyimo ci nge khwatsi ci nga hi maha hi tshova milayo ya Jehovha. Hi cikombiso, wutlhari ku a mufana ni nhanyana va randzanako va ti vekela mimbhingano ka zvilo zvo kota ku khomanakhomana, ku pswopswana, ni ku tshama voce. (Mavingu 22:3) A zviringo zvin’wani hi nga kumana nazvo loku hi endza hi ntiro kutani loku hi tira ni munhu wa rambu gin’wani. (Mavingu 2:10-12, 16) U nga ti vhikelisa kuyini? Ti tivekise lezvaku u Mboni ya Jehovha. U nga tshuki u rivala lezvaku a ku hlakana hi lirandzo zvi yisa khombyeni. Hi fanele ku ti wonela kambe loku hi xukuvalile kutani hizwa ciwundza. Ka ciyimo leco, hi lava munhu wa ku a hi komba ku hi va lisima. Hi nga tshuka hi amukela ni wihi a nge khwatsi wa khatala hi hina. Leyo i mhango ya hombe. Hikwalaho, loku u tshuka u ti zwisa lezvo, ti wonele kasi u nga mahi nchumu wu to ku vhalela ku kuma nchachazelo. Kombela civhuno ka Jehovha ni ka vamakabye va wena. — Gondza Lisimu 34:18; Mavingu 13:20.

 6. Zvini hi faneleko ku zvi alakanya a cikhati hi hlawulako zvihungato?

⁶ Kasi ku daya kunavela ka hava, hi fanele ku potsa zvihungato zva hava kambe. A zvihungato zvo tala zvi nga kona nyamutlha zvi hi alakanyisa a ciyimo ca Sodhoma ni Gomora. (Judha 7) A vamahi va zvihungato va maha wubhayi gi ku khwatsi a gi bihangi. Hikwalaho hi fanele ku tshama na hi tlharihile. Hi nga vhumeli ni cihi leci a tiko gi nge cihungato. Hi fanele ku hlawula zvihungato zvi to kala zvi nga hi vhaleli ku kuma nchachazelo. — Mavingu 4:23.

 7. Zvikarato muni zvi nga tshukako zviva kona lomu bandleni?

⁷ A ho ku tsaka hi kuva ka bandla ga wuKristu. Hi gondza Mhaka ya Nungungulu mitlhanganweni, hi tlhela hi tiyisana hi lirandzo. Lezvo zvi hi vhuna ku tshama na hi alakanya a nchachazelo. Kanilezvi hi nga tshuka hi hambana kuvila ni vamakabye va hina. Loku hi nga lulamisi zvikarato lezvo, zva olova ku hi tshama ni civiti. — Gondza 1 Pedro 3:8, 9.

8, 9. a) Matshamela muni ma to hi vhuna ku kuma nchachazelo? b) Cini ci to hi vhuna ku hlayisa kurula loku a muKristu-kulori a hi khunguvanyisa?

⁸ Hi nga tsiki civiti ci hi vhalela ku kuma nchachazelo. Pawule i tlhamusele lezvi hi faneleko ku maha aku: ‘Kota lezvi mu nga vahlawulilweko va Nungungulu, mu basile ni ku randzeka, ambalani a mbilu yo zwela wusiwana, ni wunene, ni kutikoramisa, ni kurula, ni lihlazva-mbilu. Honiselanani ni ku tsetselelana; loku munhu a hi ni cisolo ka mun’wani, kota lezvi Hosi [Jehovha a] nga mu tsetselela, n’winawu mahani zvalezvo. A hehla ka zvontlhe lezvo, ambalani lirandzo, leli li nga ciboho ca kumbhelela.’ — Va Le Kolosi 3:12-14.

⁹ A lirandzo ni wunene zvi nga hi vhuna ku tsetselelana. Loku a wokari a wula kutani ku maha nchumu wu hi bayisako, hi nga alakanya makhati lawa hina hi nga wula kutani ku maha zvilo zva hava ka van’wani, va hi tsetselela. A hi no ku bonga hi lezvi va nga hi komba lirandzo lelo ni wunene! (Gondza Mutshawuteli 7:21, 22.) Ha bonga hi lezvi Kristu a vekako kuzwanana cikari ka vakhozeli va lisine. (Va Le Kolosi 3:15) Hontlheni hi randza Nungungulu yaloyi wa mun’we, hi chumayela mahungu man’we, hi tlhela hilwa ni zvikarato zvo fana. Loku hi kombisa lirandzo ni wunene, hi tsetselelana, a bandla gi ta bohana nguvhu gi tlhela gi tshama na gi alakanya nchachazelo.

10, 11. a) Hikuyini a ciluse ci nga ni mhango? b) Hi nga maha yini kasi a ciluse ci nga hi vhaleli ku kuma nchachazelo?

¹⁰ A ciluse ci nga hi vhalela ku kuma nchachazelo. A zvikombiso zva lomu ka Bhibhiliya zvi hi vhuna ku wona lezvi a ciluse ci nga bihisa zvona. Hi cikombiso, Kana i lusele Abheli a mu daya. Kora na Dhatani na Abhiramu va lusele Mosi va mu vhukela. Hosi Sawule i lusele Dhavhidha a zama ku mu daya. A Mhaka ya Nungungulu yi wula lisine loku yiku: ‘Laha ku nga ni ciluse ni kuhambana, hi kona ku nga ni pfilupfilu ni mitiro yontlhe ya kubiha.’ — Jakobe 3:16.

¹¹ Loku hi ti karatela kuva vanhu va lirandzo ni wunene, hi nga ta hatlisela ku telwa hi ciluse. A Mhaka ya Nungungulu yi ngalo: ‘A lirandzo li na ni lihlazva-mbilu, li nene; a lirandzo a li na makangwa [“ciluse”, Tradução do Novo Mundo].’ (1 Va Le Korinte 13:4) Kasi ku susa ciluse hi ci hoxa kule, hi fanele ku ti karatela ku wona zvilo hi mawonela ya Jehovha. Hi fanele ku alakanya lezvaku hi zviro zva miri wun’we, gi nga bandla. A Bhibhiliya gi ngalo: ‘Loku a ciro cin’we ci dzundziwa, a zviro zvontlhe zvi tsaka zvin’we naco.’ (1 Va Le Korinte 12:16-18, 26) Loku a makabye wo kari a humelelwa hi nchumu wa wu nene, hi fanele ku tsaka naye wutshan’wini ga ku mu lusela. Alakanya a cikombiso ci nene ca Jonatani, n’wana wa Hosi Sawule. Jonatani a nga lusangi a cikhati leci Dhavhidha a nga hlawuliwa kasi kuva hosi wutshan’wini ga yena. I tlhelile a mu vhuna ni ku mu tiyisa. (1 Samuweli 23:16-18) Hi nga kombisa wunene ni lirandzo a ku fana na Jonatani ke?

12. Wusungukati muni ga Bhibhiliya gi to vhuna mingango lezvaku yi kuma nchachazelo?

¹² Loku a mun’we ni mun’wani laha ngangweni a hanya hi matshinya ya milayo ya Bhibhiliya, a ngango wa hina wu tava ni kurula, wu tsaka, wu tlhela wu kuma nchachazelo. Kasi ku vhuna mingango, Pawule i te: ‘Vavasati, ingisani a vanuna va n’wina, kota lezvi zvi faneleko Hosini. Vavanuna, randzani vasati va n’wina, mu nga va maheli timbiti. Vanana, ingisani a vapswali va n’wina zvilweni zvontlhe, hakuva lezvo zva xalalisa Hosi. Vararu, mu nga zangarisi a vana va n’wina, va nga mbhela ntamu.’ (Va Le Kolosi 3:18-21) Wa wona tindlela leti a wusungukati legi gi nga mu vhunako hi tona ngangweni wa n’wina ke?

13. A makabye wa cisati a nga vhunisa kuyini nuna wakwe lezvaku a xuva ku tirela Jehovha?

¹³ Kuzvilava u makabye wa cisati a nga ni nuna a kalako a nga tireli Jehovha. U ta ku yini loku a nga ku khomisi lezvi a nga fanele ku ku khomisa zvona? Loku wo zangara u zama ku mu komamisa, zvi kona zvi to cica? Hambu loku wo mu komamisa a vhumela, xana u ta mu maha a tirela Jehovha? Zva kanakanisa. Kanilezvi loku u mu komba cichavo kota hloko ya ngango, u nga vhuna ku a ngango wuva ni kurula u tlhela u dhumisa Jehovha. A cikombiso ca wena ca ci nene ci nga tlhela ci maha nuna wa wena a xuva ku tirela Jehovha, mu wu kuma zvin’we a nchachazelo. — Gondza 1 Pedro 3:1, 2.

14. Zvini lezvi a nuna wa muKristu a faneleko ku maha loku a sati wakwe a nga kholwiko a nga mu kombi cichavo?

¹⁴ Ahati loku u hi makabye wa cinuna a nga ni sati a kalako a nga tireli Jehovha ke? U ta kuyini loku a nga ku kombisi cichavo? Loku wo zama ku mu komba ku u hosi hi ku mu bhongela, zvi ta mu maha a ku komba cichavo ke? Kokwihi! Nungungulu i lava lezvaku uva nuna wa lirandzo a pimanyisako Jesu. (Va Le Efesusi 5:23) Jesu, a nga hloko ya bandla, i kombisa lirandzo ni lihlazva-mbilu cikhati contlhe. (Luka 9:46-48) Loku u mu pimanyisa, hi kufamba ka cikhati a sati wa wena a nga tshuka a navela ku tirela Jehovha na yenawu!

15. A nuna a nga kombisa kuyini sati wakwe lezvaku wa mu randza?

¹⁵ Jehovha i byela vanuna aku: ‘Randzani vasati va n’wina, mu nga va maheli timbiti.’ (Va Le Kolosi 3:19) A nuna wa lirandzo wa mu nyika lisima sati wakwe. Hi ndlela muni? Hi ku vhumela kuzwa mawonela yakwe a tlhela a mu komba ku wa ma nyika lisima. (1 Pedro 3:7) Hambu loku a makhati man’wani zvi nga koteki ku maha lezvi a sati a zvi lavako, a ku mu ingisela zvi nga mu vhuna ku maha khwatsi zviboho. (Mavingu 15:22) A nuna wa lirandzo a ngayi hi ku londza cichavo ka sati wakwe. Kanilezvi i maha zvilo zvi to kuca sati wakwe lezvaku a mu komba cichavo. Loku a nuna a randza sati wakwe ni vanana, zvi nga maha lezvaku va tirela Jehovha na va tsakile va tlhela va kuma nchachazelo wa wutomi.

16, 17. Loku u hi muswa, u nga potsisa kuyini ku zangarela vapswali va wena?

¹⁶ Kuzvilava u muswa u alakanyako lezvaku a vapswali va wena va karata kutani a va ku zwisisi. Lezvo zvi nga ku maha u bayiseka nguvhu laha ka kuza u ti wutisa ku kona ndza zvi lava ku tirela Jehovha ke. Kanilezvi loku u tsika Jehovha, u ta wona lezvaku a ku na munhu wa tiko a ku randzako nguvhu a ku fana ni lezvi a vapswali va wena va maKristu ni vanghana va wena va lomu bandleni va ku randzisako zvona.

¹⁷ Ehleketa hi lezvi: Loku a vapswali va wena va wo ku tsika va nga ku kawuki, u wa ta zvi tivisa kuyini lezvaku va khatala hi wena? (Mahebheru 12:8) Lisine ku a va mbhelelangi, hikwalaho va nga tshuka va ku kawuka hi ndlela yo kala yi nga tsakisi. Kanilezvi u nga veki kupima ka lezvo. Wena zama ku zwisisa ku hikuyini va wulako lezvo kutani ku maha. Rula, u nga va holovise. A Mhaka ya Nungungulu yi ngalo: “Loyi a tlharihileko wa ti khoma kuwulawuleni kakwe; ni loyi a nga ni kupimisisa i na ni moya wa kurula.” (Mavingu 17:27) Ti karatele kuva munhu wo buvha loyi a vhumelako wusungukati a tlhela a vhuneka hi gona na a nga cuwuki lezvi gi nga tisa zvona. (Mavingu 1:8) U nga tshuki u rivala lezvaku a kuva ni vapswali va randzako Jehovha cinyikiwo ca lisima nguvhu. Va lava ku ku vhuna ku kuma wutomi ga pindzukelwa.

18. Hikuyini u ti yimiseleko ku tshama na u alakanya nchachazelo wa wena?

¹⁸ Kani hi rindzela ku ya hanya tilweni kutani kwalaha misaveni, hontlheni hi rindzela wumandziko go saseka nguvhu. Lowo a hi noro. Kutsumba ku seketelwako ka citsumbiso ca Muvangi wa wuako gontlhe, loyi a nge: ‘A ku tiva Jehovha ku tava ku enetile misava.’ (Isaya 11:9) Na ku nga hi kale, a vanhu vontlhe laha misaveni va ta gondzisiwa hi Nungungulu. A zvi ringani ku luza nchachazelo lowo. Hikwalaho, contlhe cikhati alakanya lezvi Jehovha a ku tsumbisako. U nga tsiki nchumu wu ku vhalela ku kuma nchachazelo lowo!