Ti karatele ku tiyisa a wukati ga wena

“Nza laya lava va [chadileko], na ku nga hi mina, kanilezi hi Hosi.” — 1 KOR. 7:10.

WA ZI KOTA KU TLHAMUSELA?

Hikuyini hi wulako lezaku Nungungulu hi yena a tlhanganisako a wanuna ni wasati wukatini ke?

Xana a madota ma nga ma vunisa kuyini a maKristu lawa ma yimisanako ni zikarato wukatini?

Hi fanele ku gi wonisa kuyini a wukati?

 1. Xana a maKristu ma fanele ku gi wonisa kuyini a wukati, niku hikuyini?

A XIKHATI lexi a maKristu ma chadako ma maha xifungo mahlweni ka Nungungulu. A xifungo lexo a hi nchumu wo hlakana. (Mutsh. 5:4-6) Kota lezi Jehova a nga yena Mutumbuluxi wa wukati, hi ngalo hi yena a va “tlhanganyisileko” hi muchado. (Mar. 10:9) A vanhu lavo va tlhanganisilwe wukatini mahlweni ka Nungungulu na ku nga khataliseki lezi a mufumo wa tiko wu wulako. A malanza ya Jehova ma fanele ku wona wukati kota xiboho xi tlhanganyisako vanhu vambiri hambu loku ku hi lezaku a xikhati lexi va nga chada hi xona va wa nga khozeli Jehova.

 2. Hi zihi a ziwutiso hi to wulawula hi zona ka nzima leyi?

² A patswa lowu wu lanzelako a milayo ya Jehova wa kuma litsako la hombe wukatini ga wona. Kanilezi, zini lezi a patswa wu faneleko ku maha loku a wukati ga wona gi hi mhangweni ke? Xana yi kona ndlela ya ku tiyisa a wukati lego? Xini xi nga vunako a patswa lowu a wukati ga wona gi nga hiko na kurula ke?

XANA GI TA TSAKISA KUTANI GI TA BONGOLISA HLOKO KE?

3, 4. Ku nga humelela yini loku a munhu a tsika nayo wa Jehova a xikhati lexi a hlawulako munhu wo chada naye?

³ Loku a maKristu ma hanyisana khwatsi wukatini gabye, zi neha litsako ni wudzunzo ka Jehova. Loku va tsanzeka ku hanyisana khwatsi, a wukati lego gi ta bongolisa hloko. A muKristu loyi a nga ni makungo ya ku chada zi le mandleni yakwe a ku sangula khwatsi a wukati hi ku lanzela a zileletelo za Nungungulu. Hi tlhelo ginwani, a munhu loyi a fularelako a zileletelo za Jehova a xikhati lexi a hlawulako a munhu wo tekana naye i ta wela khombyeni ga ku vumala litsako zi tlhela zi mu bongolisa hloko. Hi xikombiso, a vaswa vo kari va sangula ku gangisana na va nga se ti longisela ku rwala wutihlamuleli ga wukati. A vokari va ti lavela a wo tekana naye lomu ka Internet va tlhela va tsutsumela ku chada kuveni zalezo va ta ti laya. A vanwani va maha zionho za hombe a xikhati lexi va nga kugangisaneni, hambulezo va gumesa va chada. Kanilezi va sangula a wukati gabye na va nga ha hi na xichawo ha vona vambiri.

⁴ A maKristu yo kari ma tsika a nayo wa ku teka ‘ntsena Hosini,’ niku a kutala ka zikhati ma tshovela mihanzu yo bava ya ku hanya ngangweni wu hambeneko hi wukhongeli. (1 Kor. 7:39) Loku u hi ka xiyimo lexo, khongela ka Nungungulu u kombela lezaku a ku tsetselela ni ku ku vuna. Hambu lezi Jehova a to kala ku susa a kubayisa loku ku vangiwako hi zionho lezi a munhu a zi mahileko xikhatini xi nga hunza, yena i ta ku vuna ku yimisana ni xikarato lexo loku u ti sola. (Tis. 130:1-4) Kusukela lezi, ti karatele ku mu xalalisa kala kupinzuka. ‘A litsako la Jehova li tava ntamu wa wena.’ — Neh. 8:10.

LOKU A WUKATI GI LAVA KUFA

 5. Loku hi yimisana ni zikarato wukatini, zini hi nga faneliko ku zi alakanyela?

⁵ Lava va yimisanako ni zikarato wukatini gabye va nga ha ti wutisa lezi: ‘Zi ta nzi vuna yini a ku zama ku tiyisa a wukati legi ke? Loku nzi wa no zi tiva na nzi nga chadangi naye!’ Va nga ha alakanyela a ndlela ya ku tsikana, vaku: ‘Loku nzi wo tlhatlha wukati legi, nzi wa taku hefu! Hambu loku nzi nga vumelelwi hi Mitsalo, hikuyini nzi nga hambaniko ni munhu loyi kasi nzi humula hlomulo ke?’ Wutshanwini ga ku alakanyela tindlela ta ku tlhatlha wukati, a maKristu ma fanele ku ti karatela ku tiyisa a wukati gabye hi ku lanzela zileletelo za Nungungulu.

 6. Tlhamusela a magezu ya Jesu ma nga ka Mateu 19:9.

⁶ Loku a muKristu wo kari a tlhatlha wukati, za koteka ku a Mitsalo yi nga ha mu vumeleli a tlhela a chada kambe. Lezo zi tano, hakuva Jesu i te ngalo: “Kani hi wihi a ta nga hlongola a sati wakwe ahandle ka kubhaya, a teka munwani, wa bhaya; ni loye a tekako loyi a hlongolweko wa bhaya.” (Mat. 19:9) Za lisima nguvu a ku khongela hi mbilu yontlhe loku u tshuka uva ni maalakanyo ya ku tlhatlha wukati kuveni lezo a ku na loyi a nga maha wubhayi.

 7. Xana a vaakelani va ta alakanya yini loku a maKristu ma tsika wukati gabye gifa?

⁷ Loku a nuna ni sati va tlhatlha wukati zi komba lezaku va na ni xikarato hi tlhelo ga moya. Mupostoli Paule i mahile xiwutiso lexi xa lisima: “Loku a munhu a nga zi tivi ku fumela a ngango wakwe, i ta hlayisisa kuyini a bandla ga Nungungulu?” (1 Tim. 3:5) Hi lisine, loku a vanhu lavo va vambiri va ti wula ku maKristu, kanilezi va tsika wukati gabye gifa, a vaakelani va ta alakanya lezaku a patswa lowo a wu hanyi hi lezi wu fambako wu xumayela vanwani. — Rom. 2:21-24.

 8. Loku a maKristu ma kala ma tsikana, xana lezo zi komba yini?

⁸ Loku a maKristu ma bapatizilweko ma maha makungo ya kuhambana kutani ku tlhatlha wukati na va nga vumelelwi hi Mitsalo, handle ko kanakana va babya hi tlhelo ga moya. Kuzilava a munwe wabye kutani vontlhe va vambiri futsi a va hanyi hi matshinya ya milayo ya Biblia. Loku hakunene va wa ‘tsumba Jehova hi mbilu yabye yontlhe,’ na va nga vumalangi xo maha kasi ku tiyisa wukati gabye. — Gonza Mavingu 3:5, 6.

 9. Xana a maKristu yo kari ma katekisisilwe kuyini hi kota ya kutikarata ka wona wukatini?

⁹ Ku na ni maKristu yo tala lawa a wukati ga wona gi nga wonekisa ku khwatsi gi kusuhani ni ku tsanza kanilezi ma zi kotileko a ku gi tiyisa. Lava va nga tsutsumeliko ku daya wukati loku va yimisana ni zikarato, a kutala ka zikhati va kuma makatekwa. Wona lezi zi nga mahekako ngangweni lowu wu hambeneko hi wukhongeli. Mupostoli Pedro i te ngalo: “Nwina vasati, ingisani vanuna va nwina; lezaku kasi hambu loku va hi kona lava va nga ingisiko mhaka, va fela ku kokiwa hi mahanyela ya vasati vabye hi handle ka mhaka; na va wona a mahanyela ya nwina ya kubasa zinwe ni xichawo.” (1 Ped. 3:1, 2) Hakunene, a munhu a nga kholwiko a nga amukela a lisine hi kota ya mahanyela ma nene ya nuna kutani sati wakwe! A wukati lego gi tiyisilweko gi dzunza Nungungulu gi tlhela giva makatekwa ka nuna, sati, ni ka vana.

10, 11. Zikarato muni zi tshukako zi humelela wukatini, kanilezi xana a muKristu i fanele kuva ni kutsumba muni?

¹⁰ Hi kota ya ku xuva ku tsakisa Jehova, a maKristu yo tala ma kalako ma nga se teka ma ti lavela munhu wo tekana naye xikari ka malanza-kulobye lawa mati hendleletileko. Hambulezo, ka tshuka ku humelela zilo va nga zi rinzelangiko. Hi xikombiso, a munwe wabye a nga tshuka ava ni mababyi ya maalakanyo, kanilezi a zi toloveli ku maheka. Za koteka kambe a ku anzhako ka ku chada, a nuna kutani sati a hola hi tlhelo ga moya. Wona lezi zi humeleleko a makabye wo kari: Linda,a a muKristu a bapatizilweko tlhelo mamani wo ti karata, i wa nga ha xi tivi ni xo maha a xikhati lexi a nuna wakwe, loyi yenawu a nga hi muKristu a bapatizilweko, a nga ti nghenisela ka mahanyela yo biha a tlhela a nga ti soli zonake a susiwa bandleni. Xana a muKristu i fanele ku maha yini loku zi wonekisa ku khwatsi a ka ha hi na ndlela ya ku ponisa a wukati gakwe hi kota ya zilo za kunghaho ke?

¹¹ Kuzilava u nga ti wutisa lezi: ‘Xana nzi fanele ku simama nzi ti karatela ku tiyisa a wukati ga mina hambu loku ku humelela ni xihi?’ A ku na munhu a zi kotako kutani a faneleko ku ku mahela xiboho lexo. Kanilezi, ku na ni zigelo zo zwala lezi zi faneleko ku ku kuca a ku ti karatela ku tiyisa a wukati ga wena. A wanuna kutani wasati wo chava Nungungulu, loyi a timiselako zikarato wukatini hi kota ya livalo lakwe wa dzunzeka mahlweni ka Nungungulu. (Gonza 1 Pedro 2:19, 20.) Loku a muKristu a maha zontlhe a zi kotako kasi ku tiyisa a wukati gakwe, Jehova i ta mu vuna hi ku tirisa a Mhaka yakwe ni moya wakwe.

VA TSHAMA NA VA LONGILE KU KU VUNA

12. Xana a madota ma ta hi wonisa kuyini loku hi ma kombela xivuno?

¹² Loku u yimisana ni zikarato wukatini, u nga kanakani a ku kombela xivuno ka maKristu ma buvileko. A madota varisi va ntlhambi. Hikwalaho, va zi wona kota lungelo ga hombe a ku ku vuna hi ku tirisa Mitsalo. (Miti. 20:28; Jak. 5:14, 15) Mu nga alakanyi lezaku mu ta suka wumunhu mahlweni ka madota loku mu va hlawutela a zikarato lezi mu yimisanako nazo wukatini ga nwina. Wutshanwini ga lezo, a madota ma ta mu ranza nguvu hi ku wona lezaku mu ti karatela a ku xalalisa Nungungulu.

13. Wusungukati muni gi nga ka 1 Va Le Korinte 7:10-16?

¹³ A xikhati lexi a madota ma kombeliwako a xivuno hi maKristu lawa ma hanyako mingangweni yi hambeneko hi wukhongeli, wona ma pimanyisa xikombiso xa Paule, loyi a ngaku: “Nza laya lava va tekeneko, na ku nga hi mina, kanilezi hi Hosi, nzi ngalo: A wasati ngha a nga suki nuneni wakwe, (kanilezi loku a suka ngha a tshama a nga tekiwi, kutani a tlhela a zwanana ni nuna wakwe;) ni wanuna ngha a nga tsiki a sati wakwe. . . . Hakuva wena wasati, u zi tiva hikuyini lezaku u ta hanyisa a nuna wa wena ke? Na wena wanuna, u zi tiva hikuyini lezaku u ta hanyisa a sati wa wena ke?” (1 Kor. 7:10-16) A hi kutsakisa ka zona loku loyi a nga kholwiko a amukela lisine hi kota ya nuna kutani sati wakwe!

14, 15. Xana a muKristu a nga ha alakanyela a ku suka wukatini loku zi te yini, kanilezi hikuyini zi nga za lisima a ku ranga hi ku alakanyela khwatsi hi mhaka leyi?

¹⁴ Xana a sati wa muKristu a nga “suka” wukatini loku zi te yini ke? Va kona va nga suka wukatini hi kota ya lezi a vanuna vabye va alileko a ku hlayisa ngango. A vanwani va sukile wukatini hi lezi va nga tshamela ku biwa nguvu kutani ku beletelwa ku khozela Jehova.

¹⁵ Hambulezo, a ku suka kutani ku nga suki wukatini xiboho xa munhu wutsumbu. Hikwalaho, a nuna kutani sati loyi a bapatizilweko i fanele ku zi alakanyela khwatsi hi mukhongelo. Hi xikombiso, xana loyi a nga kholwiko hi yena futsi a vekileko khombyeni a wumoya ga loyi munwani, kutani a maKristu hi yena a nga lolohela a xigonzo xakwe wutsumbu xa Biblia, kuya mitlhanganweni ni ntirweni wa simu hi kukhanzakanya ke?

16. Hi kuyini a muKristu a nga faneliko ku tsutsumela ku tlhatlha wukati ke?

¹⁶ Kota lezi hi nyikako lisima a kuzwanana ka hina na Nungungulu ni lezi hi nga ni xichawo hi wukati a hi faneli ku tsutsumela ku tlhatlha wukati. Kota malanza ya Jehova, hi maha zontlhe zi nga ntanwini wa hina kasi a vito ga Jehova gi nga chakiswi. Hikwalaho, hi nga ta tshuka hi hlota tindlela ta ku tlhatlha wukati hi ku lava ku chada ni munwani munhu. — Jer. 17:9; Mala. 2:13-16.

17. Hi ka xiyimo muni hi nga wulako lezaku Nungungulu i vitanile a muKristu a chadileko kuruleni ke?

¹⁷ A muKristu loyi a tekeneko ni munhu a nga kholwiko i fanele ku ti tsitsirita kasi a wukati gabye gi nga onhiwi hi nchumu. Hambulezo, a nga faneli ku tizwa nanzu loku loyi a nga kholwiko a kurumeta ku daya wukati. Paule i te ngalo: “Loku a suka loyi a nga kholwiko, a suke; a makabye wa xinuna kutani wa xisati a va khungwangi hi timhaka ta kunghaho, hakuva Nungungulu i hi vitanele ku hanya kuruleni.” — 1 Kor. 7:15.b

RINZELA JEHOVA

18. Hambu loku zi nga koteki a ku tiyisa wukati legi gi nga khombyeni, hi yihi a mihanzu ya yi nene yi kumiwako hi loyi a ti karatelako ku gi tiyisa ke?

¹⁸ Loku u kumana ni zikarato wukatini, xontlhe xikhati tsutsumela ka Jehova kasi a ku tiyisa ni ku ku vuna. (Gonza Tisimu 27:14.) Alakanya a mhaka ya Linda, loyi a nga kumbukiwa ka tinzimana ti hunzileko. Hambu lezi a nga mbheta malembe yo tala na a ti karatela ku tiyisa wukati gakwe, va gumesile hi ku tlhatlha wukati lego. Xana Linda i ti zwisa ku khwatsi i wo kuhlehela a manza yo bola ke? Ahihi. Linda i ngalo: “A kutikarata ka mina ku nyikile wukustumunyu ka vaakelani. Nzi na ni livalo li basileko. A xa hombe ka zontlhe lezo hi lezaku a malembe lawo ma vunile a nhanyana wa hina lezaku a tiya lisineni. I lo kula ava Mboni ya Jehova yo chivirika.”

19. Ku ngava ni wuyelo muni loku a maKristu ma ti karatela ku tiyisa a wukati gabye?

¹⁹ A wasati wa muKristu a vitwako Maria wa tsaka hi lezi a tsumbileko Jehova ni ku ti karata hi mbilu yontlhe lezaku a tiyisa wukati gakwe. I ngalo: “Nzi wa yimisana ni xiringo xa ku lava ku hambana ni nuna wa mina hi lezi a nga ala ku hlayisa ngango ni lezi a nga veka khombyeni a wumoya ga mina. Kanilezi, na a nga se sangula ku maha bhinzu ga hava, a nuna wa mina i wa hi dota. I lo sangula ku xwisela mitlhangano, niku halahala hi wa nga ha bhuli. Anzhako ka xikhati xo kari ku lo humelela a xikarato xa hombe lomu doropeni ga hina lexi xi nzi chavisileko nguvu laha ka kuza nzi nga ha zi koti ku hanyisana ni vanwani. Anzhako ka lezo, nzi lo wona lezaku minawu nzi wa hoxisile. Hi lo tlhela hi sangula ku bhula, ku maha xigonzo xa ngango, ni ku nga vumaleki mitlhanganweni. A madota ma lo hi amukela khwatsi ma tlhela ma hi vuna nguvu. A wukati ga hina gi lo sangula ku nyuka. Hi kufamba ka xikhati, a nuna wa mina i lo tlhela a kuma malungelo bandleni. Xi vile xigonzo xo bayisa kanilezi xi pswele mihanzu yo saseka.”

20, 21. Mhakeni ya wukati, zini hi faneleko ku ti yimisela ku maha ke?

²⁰ Ngha hina hontlhe hi tiya hlana hi rinzela ka Jehova, kani hi magwenza kutani hi chadile. Loku hi kumana ni zikarato wukatini, hi fanele ku maha zontlhe hi zi kotako kasi hi zi lulamisa, na hi tiva lezaku lava va tekeneko ‘a va ha hi vambiri, kanilezi i nyama yinwe.’ (Mat. 19:6) Hi nga rivali lezaku loku hi timisela ngangweni wu hambeneko hi wukhongeli hambu loku zi nga nanzihi, hi tava ni litsako loku a munghana wa hina a enghena wukhozelini ga lisine.

²¹ A hi ti yimiseleni a ku hanya hi wutlhari kasi lava va nga hiko Timboni va nyika wukustumunyu gi nene ha hina, hambu loku hi yimisana ni zikarato. Loku a wukati ga hina gi hi kusuhani ni kufa, ngha hi khongela hi mbilu yontlhe, hi ti hlola khwatsi, hi gonza a Mitsalo hi kuchela-kota, hi tlhela hi kombela xivuno ka madota. A xa hombe ka zontlhe lezo, a hi ti yimiseleni a ku xalalisa Jehova Nungungulu zilweni zontlhe hi tlhela hi komba xichawo ka xinyikiwo xakwe xo saseka nguvu — ku nga wukati!

[Mitlhamuselo ya lahasi]

[Magezu yo koka kupima ka phajina 20]

A maKristu lawa ma nga tsutsumeliko ku tlhatlha wukati loku ma kumana ni zikarato a kutala ka zikhati ma tshovela mihanzu yo saseka

[Magezu yo koka kupima ka phajina 22]

Xontlhe xikhati tsutsumela ka Jehova kasi a ku tiyisa hlana

[Mufota ka phajina 19]

Jehova wa ma katekisa a maKristu lawa ma ti karatelako ku tiyisa a wukati gabye

[Mufota ka phajina 21]

A bandla ga wuKristu wuchavelo