“Nzi Lanzele”

 1-3. (a) Xana Jesu i salisile vapostoli vakwe hi ndlela muni, niku hikuyini lezo zi nga vangisiko wusiwana? (b) Hikuyini hi nga ni xilaveko xa ku gonza hi wutomi legi Jesu a gi hanyako cima a nga tlhelela tilweni?

A KHUME ga vavanuna ni munwe va yimile laha xitsungeni. Na va hi ni liranzo ni kuhlamala ka hombe, va cuwuka a munhu wa wu 12. I na ni xiwumbeko xa munhu wa nyama, kanilezi hi lisine la kona hi Jesu loyi a vuxilweko hi ka vafileko, a tlhelileko a maha a n’wana wa Jehova wa moya wa ntamu ka vontlhe. Jesu i tsombanyisile a vapostoli vakwe lezaku va tlhangana naye laha Xitsungeni xa maOliva hi khati go gumesa.

² A xitsunga lexi, xi nga xipanze xa zitsungana zi nga xaxamela le tlhatuko wa Nkova wa Kidroni a kusukela Jerusalema, hakunene xi alakanyisa Jesu a zimaho zo tala. Ka minzhelelo ya zona ku kumeka a doropa ga Betania, laha Jesu a nga vuxa kona Lazaru hi ka vafileko. Ka maviki matsongwani mahlweni ka lezo, Jesu i lo sangula a pfhumba gakwe ga kuhlula ga kuya Jerusalema na a sukela kusuhani ni Betfage. Zi woneka ku khwatsi le Xitsungeni xa maOliva hi kona ku nga hi ni simu ga Getsemane, laha Jesu a nga mbheta kona a tihora ta kuxaniseka mahlweni ka kukhonwa kakwe. Makunu, na a hi hehla ka xitsunga xalexi xa xinwe, Jesu i longa ku salisa valanzeli ni vanghana vakwe va laha kusuhani nguvu. I wula magezu ma nene ya ku va salisa. Zonake a sangula ku tlakuka hi laha misaveni! A vapostoli va yima vaku tse va cuwukisela a Hosi yabye yi ranzekako na yi tlakukela tilweni. Hi kugumesa, a refu gi mu fihla kuwoneni kabye, va nga ha mu woni kambe. — Mitiro 1:6-12.

³ Xana a ximaho lexi a xi ku mahi u alakanya lezaku xi na ni magumo yo tsakisa na ma bayisa, xi vanga wusiwana ka lava va seleko? A hi zona. Hakunene, kota lezi a tingelosi timbiri makunu ti alakanyisako vapostoli, a matimu ya Jesu ma le kule ni kumbhela. (Mitiro 1:10, 11) Hi ka tindlela to tala, a kusuka kakwe aya tilweni masangulo ntsena. A Mhaka ya Nungungulu a yi hi siyi munyameni xungetano hi lezi zi humeleleko Jesu hi kulanzela. A ku gonza xungetano hi wutomi legi Jesu a gi hanyako cima a nga suka misaveni za lisima. Hikuyini? Alakanya a magezu lawa Jesu a ma wulileko ka Pedro: “Nzi lanzele.” (Johani 21:19, 22) Hontlheni hi na ni xilaveko xa ku lanzela xileletelo lexo, na ku nga hi kuhlawula ka xikhatanyana kanilezi kota mahanyela. Kasi ku maha lezo, hi fanele ku pima lezi a Hosi ya hina yi mahako zalezi ni ziavelo lezi yi zi amukeleko le tilweni.

4. Xana a Biblia gi kombisile kuyini na ka ha hi mahlweni lezi zi nga wa ta humelela le tilweni anzhako ka kutlhela ka Jesu kwaseyo?

⁴ A Mitsalo a yi wuli nchumu xungetano hi kuchikela ka Jesu tilweni, a kuhoyozelwa kakwe, ni kutlhangana kakwe ko tsakisa ni Dadani wakwe. Hambulezo, a Biblia gi kombile na ka hi mahlweni lezi zi nga wa ta humelela tilweni xikhatanyana nzhako ka kutlhela ka Jesu kwaseyo. Kunene, hi xikhati xo hunza 15 wa mazana ya malembe, a vaJuda va wa kustumunyile a mubuzo wo kari wo basa hi kukhanzakanya. Ka siku ginwe lembe ni lembe, a mupristi wa hombe i wa nghena Wutshanwini go Basabasa ga tempeli a ya nwatsekela a nkhata wa miphahlo ya Siku ga Nzhiho mahlweni ka nghaxa ya xivumelwano. Hi siku lego, a mupristi wa hombe i wa yimela Messia. Jesu i lo tatisa a xiprofeto xa lezi zi nga yimela a mubuzo lowo kanwe hi kumbhelela anzhako ka kutlhelela kakwe tilweni. I lo ti wonekelisa wutshanwini go tlakuka mahlweni ka Jehova le tilweni — a wutshamu gi hunzeleleko kubasa wuakweni gontlhe — zonake a nyikela ka Dadani wakwe a ntsengo wa muphahlo wakwe wu tirulako. (Maheberu 9:11, 12, 24) Xana Jehova i wu amukele?

 5, 6. (a) Xini xi kombileko lezaku Jehova i wa amukelile a muphahlo wu tirulako wa Kristu? (b) Hi vamani va vunekako hi nzhiho, niku hi ndlela muni?

⁵ Hi kuma a hlamulo wa kona hi ku kambisisa lezi zi mahekileko masikwanyana nzhako ka kutlakuka ka Jesu. A ntlawanyana wa maKristu ya kuringana a 120 wu wa tsombene le Jerusalema lomu ndlwini ya le xitezi a xikhati lexi hi xitshuketi ku nga zwala a kuvumavuma kota a bhubhutsa ga mheho ya ntamu, ku tata a wutshamu lego. Ku lo woneka a tirimi to fanana ni nzilo hehla ka tihloko tabye, va tatiswa hi moya wa ku basa, zonake va sangula ku wulawula hi tirimi to tsalangana. (Mitiro 2:1-4) A ximaho lexi xi fungile a kupswalwa ka tiko giswa, a Israeli wa moya, legi gi nga hi ‘lixaka liswa li hlawulilweko’ la Nungungulu ni “vapristi va wuhosi” kasi va maha a kuranza ka Nungungulu misaveni. (1 Pedro 2:9) Zi te dlunya lezaku Jehova Nungungulu i wa vumelile a tlhela a amukela muphahlo wu tirulako wa Kristu. A kuchululwa ka moya wa ku basa ku wa hi manwe ya makatekwa yo ranga lawa ma kumekisilweko hi nzhiho.

⁶ A kusukela xikhatini lexo a nzhiho wa Kristu wa vuna a valanzeli vakwe misaveni yontlhe. Kani hi xikari ka “ntlhambi wu tsongwani” wa lava va to fuma zinwe na Kristu le tilweni, kutani xikari ka “tiyivu tinwani,” ku nga lava va to hanya hasi ka kufuma kakwe misaveni, ha vuneka hi muphahlo wakwe. (Luka 12:32; Johani 10:16) Hi wona wu nga xiseketelo xa kutsumba ka hina ni xa kutsetselelwa ka zionho za hina. Kota lezi hi simamako a ku kombisa ‘kukholwa’ ka nzhiho lowo, hi lanzela Jesu siku ni siku, ha zi kota kuva ni livalo li hlazekileko la ku rinzela a wumanziko. — Johani 3:16.

7. Jesu i nyikilwe a ntamu muni anzhako ka kutlhelela kakwe tilweni, niku xana u nga mu seketelisa kuyini?

⁷ Zini a mahako Jesu le tilweni kusukela loku a tlhelile seyo? I na ni ntamu wa hombe nguvu. (Mateu 28:18) Hakunene, Jehova i mu yimisile lezaku a fuma hehla ka bandla ga wuKristu, wu nga ntiro a wu mahako hi liranzo ni kululama. (Va Le Kolosi 1:13) Kota lezi zi wulilweko na ka ha hi mahlweni, Jesu i nyikile a wutihlamuleli a vavanuna kasi va khatalela a zilaveko za ntlhambi wakwe. (Va Le Efesusi 4:8) Hi xikombiso, yena i lo hlawula Paule lezaku ava “mupostoli wa vamatiko,” a mu rumela kasi ku ya hangalasa mahungu yo saseka matikweni ya le kule. (Va Le Roma 11:13; 1 Timote 2:7) Kusuhani ni kugumesa ka zana go sangula ga malembe, Jesu i lo yisa mahungu ya kudzunza, wusungukati, ni ya kululeka ka ntlhanu wa mabandla ni mambiri le provincia ga vaRoma ga le Asia. (Kuvululelwa, zipimo 2-3) Xana wa mu vumela Jesu kota Hloko ya bandla ga wuKristu? (Va Le Efesusi 5:23) Kasi ku simama u mu lanzela, u fanele ku vuvumisa a moya wa kuingisa, ni wa kutirisana bandleni ga wena.

 8, 9. Xana Jesu i nyikilwe a ntamu muni hi 1914, niku lezo zi fanele ku wula yini ka hina ni ka ziboho lezi hi zi mahako?

⁸ Jesu i tlhelile a nyikwa a ntamu wunwani hi 1914. Ka lembe lego yena i lo yimiswa kota Hosi ya Mufumo wa Jehova wa wuMessia. A xikhati lexi ku nga sangula a kufuma ka Jesu, ‘kuve kona kulwa le tilweni.’ Ma vile wahi a magumo ya kona? Satani ni madimoni yakwe va lo hoxiwa misaveni, zonake va vanga a nguva ya makhombo. A tiyimpi, wugevenga, kuchava, mababyi, kutsekatseka ka misava, ni tindlala lezi zi tatileko misava, ni zi xanisako vanhu va masiku lawa zi hi alakanyisa lezaku Jesu wa fuma le tilweni zalezi. Satani wa ha hi “hosana ya legi tiko” hi ‘xikhati xi tsongwanyani.’ (Kuvululelwa 12:7-12; Johani 12:31; Mateu 24:3-7; Luka 21:11) Hambulezo, Jesu wa nyika vanhu misaveni yontlhe a lungelo ga ku vumela a kufuma Kakwe.

⁹ Za vuna lezaku hi yima tlhelweni ga Hosi ya wuMessia. Ka ziboho za hina zontlhe za siku ni siku, hi fanele ku hlota ku amukelwa hi yena, na ku nga hi hi tiko legi go biha. Kota lezi a “Hosi ya tihosi tlhelo Mufumeli wa vafumeli” yi kambisisako vanhu, a mbilu yakwe yo lulama yi vura hi zanga yi tlhela yi tala hi kutsaka. (Kuvululelwa 19:16) Hikuyini?

10. Hi wahi a matshamela ya Jesu ya ntumbuluko, hambulezo xini xi tatako a Hosi ya hina hi zanga ya kululama?

¹⁰ A ku fana ni Dadani wa yona, a Hosi ya hina yi tsakile hi ntumbuluko. (1 Timote 1:11, NM) Kota munhu wa nyama, Jesu i wa nga solasoli ge hambu kuva wo karata a ku mu tsakisa. Hambulezo, ku na ni zilo zo tala zi mahekako laha misaveni inyamutlha lezi zi faneleko a ku mu tata hi zanga yo lulama. Hakunene i zangarile hi kota ya tihlengeletano tontlhe ta wukhongeli leti hi mawunwa ti ti wulako lezaku ti yimela yena. Hizalezo i wulile na ka ha hi mahlweni aku: “A hi vona vontlhelele lava va nge ngalo ka mina: Hosi, Hosi, va ta nga enghena mufunweni wa tilo; kanilezi sine loyi a mahako a kuranza ka Dadani wa mina loyi a nga le tilweni. A vanyingi va taku ka mina hi lego siku: Hosi, Hosi, . . . a hi mahangi zirewukiso zo tala hi vito ga wena ke? Zonake nzi taku ka vona: Cima nzi wa nga mu tivi; sukani ka mina, nwina vaonhi.” — Mateu 7:21-23.

11-13. Hikuyini a vo kari va zi kotako ku hlamala hi magezu ya Jesu ya ntamu lawa ma kongomako lava va mahako “zirewukiso zo tala” hi vito gakwe, niku hikuyini a zangarileko? Tlhamusela hi mufananiso.

¹¹ A kutala ka lava inyamutlha va ti vitanako maKristu va nga ha hlamaliswa hi magezu lawo. Hikuyini Jesu a nga wa ta wula magezu lawo ya ntamu ka vanhu lava va mahako “zirewukiso zo tala” hi vito gakwe? A tichechi ta wuKristu ga mawunwa ti rangela a ntiro wa ku vuna lava va vumalako, ti vuna zisiwana, ti aka zipitali ni zikola, ti tlhela ti maha mitiro yinwani yo tala. Kasi ku tiva a xigelo xa kuva va fanelwa hi zanga ya Jesu, wona a mufananiso wo kari.

¹² A raru wo kari ni mamani wo kari va lava ku enza. A va zi koti ku famba ni vanana vabye, hikwalaho va thola a yayi. A zileletelo zabye ka yona za olova: “Hlayisa vana va hina. U va gisa, u va hlambisa, u tlhela u va vikela ka timhango.” Hambulezo, a xikhati lexi a vapswali va wuyako va karateka nguvu hi ku wona vana vabye na va sika hi ndlala. Va chakile, va babya, niku a va tsakangi. Va rilela a yayi, kanilezi a yi khatali hi kurila kabye. Hikuyini? Yona yi nomile laha xikadeni, na yi hlaza tinjhanela. Hi kuzangara, a vapswali va lava ku tiva a tlhamuselo. A yayi ya hlamula: “Wonani zontlhe lezi nzi mahileko! A tinjhanela a ti basangi? Nzi lulamisile a yindlu kambe, zontlhe na nzi mahela nwina!” Xana a vapswali va wa ta tsaka? Ne ni kutsongwani! A va zangi va yi kombela a ku maha a mitiro leyo; lexi va nga xi lava ntsena hi ku a vanana vabye va hlayisiwa. A kuala ka yona a ku lanzela zileletelo zabye ku wa ta va zangarisa.

¹³ A wuKristu ga mawunwa gi maha zilo a ku fana ni yayi leyo. Jesu i siyile zileletelo ni vayimeli vakwe lezaku va gisa a vanhu hi tlhelo ga moya hi ku va gonzisa a zinene za Mhaka ya Nungungulu ni ku va vuna a ku basa hi tlhelo ga moya. (Johani 21:15-17) Kanilezi a wuKristu ga mawunwa gi tsikile ku lanzela a xileletelo xakwe hi ndlela yo biha nguvu. Gona gi tsikile vanhu va sika hi ndlala ya moya, na va kanganyiseka hi mawunwa va tlhela va nga tivi a zinene za Biblia za xiseketelo. (Isaya 65:13; Amosi 8:11) Hambu a mizamo ya gona ya ku chukwatisa a tiko legi a yi nyiki xigelo ne ni xitsongwani xa kungaingisi ka gona ko mahiwa ha womu. Hi lisine, a mafambisela ya tiko legi ma fanana ni yindlu leyi yi konelweko ku hahlulwa! A Mhaka ya Nungungulu yi dlunyatisa lezaku a mafambisela ya tiko ga Satani ma laha kusuhani ni ku loviswa. — 1 Johani 2:15-17.

14. I ntiro muni wu tsakisako Jesu inyamutlha, niku hikuyini?

¹⁴ Hi tlhelo ginwani, Jesu i fanele ku tsaka nguvu hi ku cuwuka na a hi tilweni a wona lezaku a timiliyoni ta vanhu ta tatisa a ntiro wa ku maha vapizani lowu yena a nga wu nyika a valanzeli vakwe na a nga se suka misaveni. (Mateu 28:19, 20) I lungelo ga kuyini a ku hlengela litsako la Hosi ya wuMessia! A hi ti yimiseleni a ku cima hi nga tlheleli nzhako ka ku vuna a “nanza gi tsumbekileko ni go tlhariha.” (Mateu 24:45) A kuhambana ni varangeli va wuKristu ga mawunwa, a ntlawana lowu wa vamakabye va totilweko wu rangela hi kuingisa a ntiro wa kuxumayela wu tlhela wu gisa a tiyivu ta Kristu hi kutsumbeka.

15, 16. (a) Xana Jesu i ti zwisa kuyini xungetano hi kuvumaleka ka liranzo loku ku teleko inyamutlha, niku hi zi tivisa kuyini lezo? (b) Xana a wuKristu ga mawunwa gi mu zangarisisile kuyini Jesu?

¹⁵ Ha zi kota ku tiyiseka lezaku a Hosi ya zangara a xikhati lexi yi wonako a kuvumaleka ka liranzo loku ku teleko misaveni inyamutlha. Hi nga ha alakanya lezi a vaFarisi va nga solisa zona Jesu hi kota ya ku hanyisa vanhu hi Sabado. Vona va wa nonohile nguvu timbilu, na va hi vo sihalala, laha ka kuza va nga woni zinwani ahandle ka mawonela yabye ma nga lulamangiko ya Nayo wa Mosi ni nayo wa nomu. A zihlamaliso za Jesu zi vunile nguvu vanhu! Kanilezi a kutsaka, a kutlhatlheka, ni kutiyisa ka kukholwa lezi zi nehilweko hi zihlamaliso lezo zi wa nga wuli nchumu ka vavanuna lavo. Xana Jesu i ti zwisile kuyini hi vona? Ka khati go kari yena i “langutile ka vona hi kuzangara, na karateka hi kota ya kunonoha ka timbilu tabye.” — Marku 3:5.

¹⁶ Inyamutlha, Jesu i wona kule laha ka kuza a “karateka” nguvu. A varangeli va wuKristu ga mawunwa va pfhupelisilwe hi kutinyiketela kabye ka mikhuwo ni ka tigonzo leti ti nga zwananiko ni leti ta Mitsalo. Ku nga hi lezo ntsena, vona va zangara nguvu hi kota ya kuxumayelwa ka mahungu yo saseka ya Mufumo wa Nungungulu. Matlhelweni yo tala ya misava, a varangeli va wukhongeli va vuvumisa a kuxanisiwa ka maKristu lawa ma ti karatako hi mbilu yontlhe a ku xumayela mahungu lawa Jesu a ma xumayeleko. (Johani 16:2; Kuvululelwa 18:4, 24) Hi xikhati xalexi xa xinwe, a varangeli lavo va wukhongeli va tala ku kuca a valanzeli va vona lezaku vaya yimpini ni ku daya vanwani — a ku khwatsi hi loku a ku maha lezo zi wa ta tsakisa Jesu Kristu!

17. Xana a valanzeli va lisine va Jesu va tsakisisa kuyini a mbilu yakwe?

¹⁷ A kuhambana ni lezo, a valanzeli va Jesu va lisine va ti karata a ku kombisa liranzo ka vanhu-kulobye. Va hlengela a mahungu yo saseka ni “vanhu vontlhe” khwatsi hi lezi Jesu a zi mahileko, na ku nga khataliseki a kukanetwa. (1 Timote 2:4) Niku a liranzo leli va kombisanako la woneka nguvu, hi lona li nga xikombiso xabye xa hombe. (Johani 13:34, 35) Kota lezi va khomako a maKristu-kulobye hi liranzo, xichawo, ni wudzunzo, vona hakunene va lanzela Jesu — va tlhela va tsakisa a mbilu ya Hosi ya wuMessia!

18. Zini zi xanisako a Hosi ya hina, kanilezi hi nga yi xalalisisa kuyini?

¹⁸ A hi alakanyeni kambe lezaku a Hosi ya hina ya xaniseka a xikhati lexi a valanzeli va yona va tsikako ku timisela, va vumela lezaku a liranzo labye ha Jehova li titimela ni loku va tsika a ku Mu tirela. (Kuvululelwa 2:4, 5) Hambulezo, Jesu wa xalala hi lava va timiselako kala kugumesa. (Mateu 24:13) Hikwalaho, a hi maheni zontlhe kasi xontlhe xikhati hi alakanya a xileletelo lexi xa Kristu: “Nzi lanzele.” (Johani 21:19) A hi kambisiseni a makatekwa yo kari lawa a Hosi ya wuMessia yi to ma tisela lava va timiselako kala kugumesa.

19, 20. (a) Xana a ku lanzela Jesu ku yisa ka makatekwa wahi zalezi? (b) Xana a ku lanzela Kristu ku nga hi vunisa kuyini a ku tatisa a xilaveko xa hina xa kuva ni dadani?

¹⁹ A ku lanzela Jesu i ndlela ya ku kuma wutomi ga ku tala hi makatekwa zalezi. Loku hi vumela Kristu kota Hosi ya hina, hi lanzela zileletelo zakwe hi tlhela hi tirisa xikombiso xakwe kota kongomiso wa hina, hi ta kuma a titshomba leti a vanhu misaveni yontlhe va ti hlotako mahala. Hi ta katekiswa hi ntiro lowu wu nyikako xigelo ni kunyawula wutomini ga hina, a ngango wa makholwa-kulori wu tlhanganyisilweko hi xiboho xa liranzo lo mbhelela, a livalo li basileko, ni kurula ka mapimo. Hi magezu matsongwani, hi ta kuma wutomi go tsakisa ni go xalalisa. Niku ha ha ta kuma zinwani zo tala.

²⁰ Jehova i nyikele Jesu kota “Dadani wa Pinzukelwa” ka lava va rinzelako ku hanya laha misaveni kala kupinzuka. Jesu muvaleti wa Dadani wa vanhu vontlhe, Adamu, loyi a nga tokometa a pswalo wakwe wontlhe hlomulweni wa hombe. (Isaya 9:6, 7) Loku hi vumela Jesu kota ‘Dadani wa hina wa Pinzukelwa,’ hi ku kholwa ka yena, hi kuma kutsumba ko tiya ka wutomi ga pinzukelwa. Hizalezo, hi tshinela nguvu ka Jehova Nungungulu. Kota lezi hi gonzileko, a ku ti karatela a ku lanzela xikombiso xa Jesu siku ni siku i ndlela yi nene hi laha zi kotekako ha kona ya ku ingisa a xileletelo lexi xa Nungungulu: “Mahani vapimanyisi va Nungungulu, khwatsi hi vanana va ranzekako.” — Va Le Efesusi 5:1.

21. Xana a valanzeli va Kristu va wonekelisisa kuyini a kuwoninga tikweni ga munyama?

²¹ A xikhati lexi hi pimanyisako Jesu ni Dadani wakwe, Jehova, hi kuma a lungelo go hlamalisa. Hi wonekelisa a kuwoninga ko ngangamela. Ka tiko legi gi pfhupelisilweko hi munyama, lomu a vanhu va tibiliyoni va khohlisilweko hi Satani va tlhela va pimanyisa a matshamela yakwe, hina hi lanzelako Kristu hi hangalasa a kuwonekela ka kuwoninga ko ngangamela nguvu a ku hunza kontlhe — a kuwoninga ka zinene za Mitsalo, a kuwoninga ka matshamela ma nene ya wuKristu, a kuwoninga ka kutsaka ka lisine, a kurula ka lisine, ni liranzo la lisine. Ka xikhati xa xinwe, hi tshinela nguvu ka Jehova, niku loko hi kona a kuxuva ka hombe nguvu, a xikongomelo xa hombe hi laha zi kotekako ha kona, ka xivangwa xihi ni xihi xi pimisako.

22, 23. (a) Hi wahi a makatekwa ma ha tako lawa ma to tela lava va simamako ku lanzela Jesu hi kutsumbeka? (b) Xana ku fanele kuva kwihi a kutiyimisela ka hina?

²² Alakanyela kambe lezi Jehova a lavako ku ku mahela xikhatini xa ha tako hi ku tirisa a Hosi yakwe ya wuMessia. Lokuloku, a Hosi leyo yi ta nghena kulwisaneni ka kululama ni mafambisela ya zilo ya kubiha ya Satani. A kuhlula ka Jesu ku tiyile! (Kuvululelwa 19:11-15) Anzhako ka lezo, Kristu i ta sangula a Kufuma kakwe ka Khume ga mazana ya Malembe misaveni yontlhe. A mufumo wakwe wa le tilweni wu ta tirisela mabhinzu ya nzhiho ka vanhu vontlhe vo tsumbeka, wu va yisa kumbheleleni. Ti alakanyele na u nengela hi wutomi, na uya mahlweni uva jaha go tiya, na u tira hi kutsaka ni ngango wa vanhu vontlhe wu nga ni wumunwe lezaku mu hunzula misava yiva paradise! A kumbheleni ka Khume ga mazana ya Malembe lawo, Jesu i ta tlhelisa kufuma ka Dadani wakwe. (1 Va Le Korinte 15:24) Loku u simama ku lanzela Kristu hi kutsumbeka, u ta nyikwa makatekwa yo hlamalisa nguvu lawa ma karatako ku ma alakanyela — a ‘kutlhatlheka ka kungangamela ka vana va Nungungulu’! (Va Le Roma 8:21) Ina, hi tava ni makatekwa wontlhe lawa Adamu na Eva va nga hi nawo va tlhela va ma luza. Kota vana va Jehova va xinuna ni va xisati laha misaveni, hi ta tlhatlheka kala kupinzuka ka bawa ga xionho xa Adamu. Hakunene, “ku nga ha ta va kona kufa.” — Kuvululelwa 21:4.

²³ Alakanya a jaha ga mufumeli legi gi nga hi ni kufuma ka hombe hi wulawulileko ha gona ka Xipimo 1. Gona gi lo ala a xirambo xa Jesu: “Ngona u nzi lanzela.” (Marku 10:17-22) U nga tshuki u maha xihoxo lexo! Ngha u namarela ka xirambo xa Jesu hi kutsaka ni kuchivirika. Ngha u ti yimisela a ku timisela, u simama a ku lanzela a Murisi Nene siku ni siku, lembe ni lembe, zonake u hanya kasi u mu wona na a tatisa a makungo wontlhe yo hlamalisa ya Jehova hi magumo!