“Mu nga hatlisi ku tsekatsekiswa kupimeni ka nwina”

1, 2. Hikuyini a kukhohlisa ku tatileko tiko nyamutlha, niku ku ngata hi tindlela muni? (Wona mufota kusanguleni ka nzima.)

A MAWUNWA, wuxololi, ni kukhohlisa zi fenengetile a tiko legi ga kubiha. Lezo a zi hi hlamalisi. A Biblia gi wula kubaseni lezaku Satani Diabolus mukhohlisi wa hombe ni lezaku hi yena a hosi ya tiko legi. (1 Tim. 2:14; 1 Joh. 5:19) Laha hi yako hi tshinela magumo ya tiko legi ga kubiha, a zanga ya Satani yo engeteleka hakuva “a xikhati lexi xi mu saleleko xi tsongwanyani.” (Kuv. 12:12) Hikwalaho, lava va kucetelwako hi Satani va taya mahlweni va khohlisa votala. Va ta ti karatela nguvu ku khohlisa lava va tirelako Jehova.

² Ka zikhati zinwani, ka haxiwa mahungu ya hava ni ya mawunwa ka zihaxa-mahungu xungetano hi Timboni ta Jehova ni lezi ti zi kholwako. Va tirisa maphepha-hungu, televizawu, ni Internet kasi ku xwanya mawunwa lawo. Kota mbhanzu wa lezo, a vanhu vo kari va djudjeka kupima va tlhela va kholwa mawunwa lawo hi mbilu yabye yontlhe.

 3. Xini xi to hi vuna lezaku hi nga khohliswi?

³ Kasi hi hahlula a mano wontlhe ya wumbyori ya nala wa hina, hi na ni Mhaka ya Nungungulu leyi yi ‘vunako kululekeni.’ (2 Tim. 3:16) A magezu lawa mupostoli Paule a nga tsalela a maKristu yo kari ya le Tesalonika ka zana ga malembe go sangula ma komba lezaku ma wa khohlisilwe, ma vumela mawunwa. I lo ma khongotela “lezaku [ma] nga hatlisi ku tsekatsekiswa kupimeni [kabye].” (2 Tes. 2:1, 2) Hi gonza yini ka wusungukati ga liranzo ga Paule, niku hi nga gi tirisisa kuyini ka ziyimo za hina?

 4. Xana a maKristu ya le Tesalonika ma tlharihisisilwe kuyini xungetano hi kuta ka siku ga Jehova, niku hina ke, hi tlharihisiswa kuyini?

⁴ Ka papilo gakwe go sangula ka bandla ga le Tesalonika, Paule i lo wulawula hi kuta ka “siku ga Hosi.” Yena i wa nga lavi lezaku a vamakabye vakwe va tshama munyameni na va nga longangi. Wutshanwini ga lezo, i lo va khongotela kota “vana va kuwonekela” lezaku ‘va rinzela, na va kari va ti khoma.’ (Gonza 1 Va Le Tesalonika 5:1-6.) Nyamutlha, hi langutela kuhahlulwa ka Babuloni loyi wa Hombe, a mufumo wa misava yontlhe wa wukhongeli ga mawunwa. Lexo xi tava xikombiso xa masangulo ya siku ga hombe ga Jehova. Hi na ni thomo hakuva hi na ni kuzwisisa ko eta xungetano hi kutatiseka ka kungo ga Jehova. Tlhatakumbiri, xikhati ni xikhati, hi kuma zikhumbuxeto laha bandleni hi xikhati xi faneleko, lezi zi hi vunako ku tshama na hi tlharihile. Loku hi chela kota hi zitlharihiso lezi zo phindaphinda, hi tava ni ntamu wo simama hi mahela Nungungulu a ntiro wo basa hi ntamu wa kupima ka hina. — Rom. 12:1.

5, 6. (a) Ka papilo gakwe ga wumbiri ka va le Tesalonika, xana Paule i wulawulile hi yini? (b) Zini lezi Nungungulu a to maha lokuloku hi ku tirisa Jesu, niku zini hi faneleko ku ti wutisa?

⁵ Xikhatanyana nzhako ka ku rumela a papilo gakwe go sangula ka maKristu ya le Tesalonika, Paule i lo ma rumelela a papilo ga wumbiri. Ka papilo legi, Paule i lo yisa kupima ka kuxaniseka ku tshinelako, laha Hosi Jesu a ta nga neha kulamula ka Nungungulu hehla ka “lava va nga mu tiviko Nungungulu, ni lava va nga ingisiko a ivangeli.” (2 Tes. 1:6-8) Lexi makunu xi nga xipimo 2 xa papilo legi, xi komba lezaku a vokari lomu bandleni va wa gi tsakela nguvu a siku ga Jehova laha ka kuza va alakanya lezaku gi wa ta chikela zalezo. (Gonza 2 Va Le Tesalonika 2:1, 2.) A maKristu lawo yo sangula ma wo zwisisa zitsongwani ntsena xungetano hi kutatiseka ka kungo ga Jehova khwatsi hi lezi Paule a nga zi wona a tlhela a tsala aku: “Hi tiva khihlanya, hi profeta khihlanya; kanilezi loku zi tile lezi zi mbheleleko, lezi za khihlanya zi ta hunza.” (1 Kor. 13:9, 10) Kanilezi a zitlharihiso lezi zi nga tsaliwa hi Paule, mupostoli Pedro ni maKristu manwani yo tsumbeka ma totilweko ya xikhatini lexo, zi ma hlomisile lezaku ma tiya kukholweni.

⁶ Kasi ku lulamisa zilo zi wuya laha ndleleni, hi ku pimiselwa Paule i lo tlhamusela lezaku a ku ranga ku wa ta humelela a wuhluwuki ga hombe ni “Munhu wa kuonha” na siku ga Jehova gi nga se chikela.a Anzhako ka lezo, hi xikhati xakwe xi yimisilweko, Hosi Jesu i wa ta “lovisa” vontlhe lava va khohlisilweko. Paule i lo komba a xigelo lexi xi va mahako va lamulwa; hi lezaku “a va vumelangi ni ku ranza zinene.” (2 Tes. 2:3, 8-10) I chukwana hi ti wutisa lezi: ‘Nzi ranza lisine kala kwihi ke? Xana a nzi sali nzhako ni lezi a hlengeletano ya Jehova yi zi gonzisako hi revista legi ni manwani mabhuku ma seketelweko ka Biblia, lawa ma mahelwako ku gisa a bandla ga vanhu va Nungungulu misaveni yontlhe ke?’

7, 8. (a) Xana a maKristu yo sangula ma wa fanele kulwa ni yini? (b) Hi gihi a khombo ga hombe gi nga ha welako a maKristu ya lisine nyamutlha?

⁷ I mhaka yi tivekako lezaku a maKristu ma wa ta kumana ni zikarato zinwani ahandle ka lezi za vahluwuki ni tigonzo tabye. Paule i lo tsalela Timote lezaku “a ku ranza mali hi mutsu wa tixaka tontlhe ta kubiha.” A mupostoli loyi i lo komba lezaku “a vanwani hi ku yi navela va pengile kukholweni, va ti phoroketile hi kuxaniseka kunyingi.” (1 Tim. 6:10) “A mitiro ya nyama” yonawu yi vanga zikarato za yona xontlhe xikhati. — Gal. 5:19-21.

⁸ Hambulezo, za tsakisa lezi Paule a nyikileko zitlharihiso za ntamu ka va le Tesalonika xungetano hi khombo go tshisa gi nga vangiwa hi vavanuna lava a nga va wula ku “mbapostoli va mawunwa.” Xikari kabye ku wa hi ni vavanuna lava ‘va nga kanela a zilo zi gombonyekileko, kasi ku ti kokela vapizani.’ (2 Kor. 11:4, 13; Miti. 20:30) Anzhako ka xikhati, Jesu i lo dzunza a bandla ga le Efesusi hakuva a va ‘vumelelangi a vanhu va kubiha.’ A va le Efesusi ‘va lo hlola’ a vanhu lavo va ngaku vapostoli kuveni va wo hemba. (Kuv. 2:2) Hi nga wona lezaku ka papilo gakwe ga wumbiri ka va le Tesalonika, Paule i lo va luleka aku: “Makunu ha mu laya, vamakabye, a vitweni ga Hosi ya hina Jesu Kristu, lezaku mu tsawukana ni vamakabye vontlhe va fambako hi vilinganya.” Anzhako ka lezo, i lo kumbuka hi kukongoma a maKristu lawa ma nga kala ‘ma nga vumeli ku tira.’ (2 Tes. 3:6, 10) Loku ku hi lezaku lava va ku ala kutira va wa woniwa kota va vilinganya, a ha ha wuli hi lava va nga tsika ndlela va ti nghenisa ka wuhluwuki! Kunene, a ku tolovelana ni vanhu lavo xikhatini lexo zi wa hi ni khombo ga hombe nguvu niku zi wa fanele ku potsiwa  —  ni nyamutlha kambe. — Mav. 13:20.

 9. Hikuyini hi faneleko ku ti wonela loku a wokari a sangula ku kanakanela tigonzo ta hina kutani ku solasola?

⁹ Hi tshinela kusanguleni ka kuxaniseka ka hombe ni kugumeseni ka tiko legi ga kubiha. Hikwalaho, a zitlharihiso lezi zi pimisilweko, zi nyikilweko ka zana ga malembe go sangula zi na ni lisima la hombe. A hi zi lavi ne ni kutsongwani a ku ‘amukela tipswalo ta Jehova mahala’ hi gumesa hi luza a xitsumbiso xa wutomi ga pinzukelwa, kani hi le tilweni kani hi laha misaveni. (2 Kor. 6:1) Loku a wokari a tako mitlhanganweni ya hina ya bandla o tshuka a zama ku hi phasa lezaku hi ti nghenisela mabhulweni ya ku kanakanela a tigonzo ta hina kutani ku solasola, hi fanele ku ti wonela nguvu ka munhu loye. — 2 Tes. 3:13-15.

10. Xana a maKristu ya le Tesalonika ma wa kuciwa a ku khomisisa ka tigonzo muni?

¹⁰ Paule i lo khongotela vamakabye vakwe va le Tesalonika lezaku va “khomisisa” a gonzo leyi va nga gonziswa yona. (Gonza 2 Va Le Tesalonika 2:15.) I “gonzo” muni leyi va nga gonzisilwe ke? Handle ko kanakana, yi wa nga hi gonzo leyi yi nga gonzisiwa hi wukhongeli ga mawunwa yi tlhela yi vuvumisiswa ku khwatsi nja lisima a ku fana ni lezi zi gonzisiwako hi Mitsalo. A ku hambana ni lezo, Paule i wa wula gonzo leyi yena ni vanwani va nga yi kumile ka Jesu zinwe ni lezi Nungungulu a nga susumetile mupostoli loyi lezaku a zi gonzisa, lezi a kutala ka zona zi mahileko xipanze xa Mitsalo yi pimisilweko. Paule i lo dzunza a vamakabye vakwe va bandla ga le Korinte hakuva, kota lezi a nga tsala, va lo mu ‘alakanya ka zilo zontlhe, va gonga a mikhuwo leyi a nga va nyika yona.’ (1 Kor. 11:2) A tigonzo leto ti wa huma ka xibuka xo tsumbeka niku hakunene ti wa tsumbekile.

11. Xana a vokari va nga kuceteliswa kuyini hi kukhohlisa?

¹¹ Laha a nga tsalela maHeberu, Paule i lo yisa kupima ka tindlela timbiri leti a muKristu a nga luzako ha tona kukholwa ni ku tsanzeka ku yima a tiya aku nde. (Gonza Maheberu 2:1; 3:12.) I wulawulile hi ‘ku penga’ ni ‘ku fularela.’ A ngalava leyi yi yako reveni ga congo za koteka ku ngha zi nga woneki laha yi sangulako. Hi kutsongwani-kutsongwani, yi engeta kuya reveni. Hi tlhelo ginwani, a munhu loyi a kokako a ngalava yakwe lezaku yi huma lomu matini i yi hambanyisa ni congo hi mitiro yakwe. A zilo lezi za zimbiri zi kombisa a tshamela ga vokari lava va nga wela ka kukhohliswa, va vumela lezaku a kutsumba kabye lisineni ku mbhela ntamu.

12. Zilo muni zi hlongoliselwako nyamutlha, lezi zi zi kotako ku onha a wumoya ga hina?

¹² Kuzilava, lezo hi zona zi nga mahekela a vo kari le Tesalonika. Ahati nyamutlha ke? Ku na ni zilo zo tala zi gako xikhati. Hi nga ehleketa ku tihora tingani leti a vokari va ti mbhetako na va bhula ni vanghana va nga va tiviko hi Internet, na va lera ni ku hlamula mamesaji ni ma e-mail, ku hlongolisela mihlakano, kutani ku nga hunziwi ne hi nchumu munwe kutani mahungu ma yelanako ni zibelabela. Ni xihi xi yelanako ni mitiro leyi xa zi kota ku hambukisa kupima ka muKristu xi tlhela xi hungula a kupinyama kakwe. Hi gihi wuyelo ga kona? A munhu loye i wa nga ta ha va ni xikhati xa ku maha mikhongelo yi humako mbilwini, ku gonza a Mhaka ya Nungungulu, kuya mitlhanganweni ni xa ku xumayela mahungu yo saseka. Xini xi to hi vuna a ku nga hatliseli ku tsekatsekiswa kupimeni ka hina hi ndlela leyo?

13. Kota lezi zi profetilweko, hi gihi tshamela ga votala, niku xini xi to vikela a kukholwa ka hina lezaku ku nga mbhetwi ntamu?

¹³ A xinwe xa zilo lezi hi faneleko ku maha ku tshama na hi tiva aku hi hanya xikhatini muni ni ku ti wonela ka khombo ga ku ti tlhanganisa ni lava va alako aku lawa ‘masiku ya kugumesa.’ Mupostoli Pedro i wulile lezi xungetano hi xikhati lexi: “Ku tata a vatseketseli va wulawula kutseketsela, na va famba kumbilukeleni kabye, vaku: Hi kwihi a kuwuya kakwe ku tsumbisilweko ke? Hakuva cima ka lezi vadadani va nga etlela, zontlhe za ha tshamisile zalezo zi nga tshamisile zona hi le kusanguleni ka kuvangiwa.” (2 Ped. 3:3, 4) A ku lera Biblia siku ni siku ni ku gi gonza hi kukhanzakanya zi ta hi vuna a ku tiva lezaku hi hanya xikhatini muni  —  hi ku maha loko hi tshama na hi zi tiva lezaku hi le “masikwini ya kugumesa.” A kuhluwuka loku ku profetilweko ku sangulile kale a ku woneka niku ka ha woneka kala nyamutlha. A “Munhu wa kuonha” wa ha hi kona niku wa ha simama ku kaneta a malanza ya Nungungulu. Hi xigelo lexo, hi fanele ku tshama na hi tlharihele a kutshinela ka siku ga Jehova a ku hunza a zikhati zontlhe. — Zef. 1:7.

14. A ku tshama na hi khomekile ntirweni wa Nungungulu zi hi vikelisa kuyini?

¹⁴ A matimu ma komba lezaku a nchumu wa lisima nguvu wu to hi vuna ku tshama na hi tlharihile hi nga tsekatsekiswi kupimeni ka hina ku xumayela mahungu yo saseka ya Mufumo xontlhe xikhati. Hikwalaho, a xikhati lexi Kristu Jesu, a Hloko ya bandla, a nga laya valanzeli vakwe lezaku va maha vapizani a vanhu va matiko wontlhe, va va gonzisa ku gonga lezi a nga va gonzisile, i wo nyika wusungukati legi gi nga wa ta vikela a valanzeli vakwe. (Mat. 28:19, 20) Kasi ku lanzela xileletelo lexi, ku laveka lezaku hi hiseka ntirweni wa kuxumayela. Xana u alakanya lezaku a vamakabye va wena le Tesalonika va wa ta ngha va xalele hi ku xumayela ni ku gonzisa na va nga cheli kota, ku khwatsi hi loku va wo mahela ku hunzisa ntungu? Alakanya lezi Paule a nga va byela. I te ngalo: “Mu nga timi a Moya. Mu nga kanyisi a kuprofeta.” (1 Tes. 5:19, 20) Hi nga wona a ziprofeto zo hlamalisa ni zo tsakisa lezi hi bhulelako ni ku gonzisa vanhu!

15. Zilo muni za lisima hi nga ha gonzako hi zona wukhozelini ga ngango?

¹⁵ Za zwisiseka lezi hi lavako ku vuna mingango ya hina lezaku yi va ni wutlhari gi nene ga ku tira sinwini. A vamakabye vo tala va xinuna ni va xisati va wonile lezaku a yinwe ya tindlela ta ku maha lezo ku mbheta xikhati xo kari wukhozelini gabye ga ngango na va buvisisa a matirela yabye sinwini. Zi na ni xivuno kambe a ku bhula hi lezi a ziro za ngango zi to mahisa zona a maenzo yo wuyela ka lava va kombisileko kutsakela. Va ta ya wula yini ke? Timhaka muni ti to khumba timbilu ta vanhu lava va enzelweko lezaku va simama ku tsakela? Hi xihi a xikhati xi nene xa ku va tlhelela ke? A vanyingi kambe va tirisa a xikhati xo kari wukhozelini ga ngango lezaku va vuxeta mitlhangano ya bandla kasi va tshama na va zi tiva lezi zi to gonziwa. Xana u nga ti karatanyana kulongiseleni ka wena kasi u hlamula? Loku u hlamula, u ta tiyisa a kukholwa ka wena hi ku maha loko u potsa a ku tsekatsekiswa kupimeni ka wena. (Tis. 35:18) Handle ko kanakana, a ku maha a wukhozeli ga ngango zi tava xivikelo kasi u nga kanakaneli kutani ku sola lezi hi zi gonzako.

16. Kukuciwa muni loku a maKristu ma totilweko ma nyikiwako lezaku ma hlayisa a kupima kabye?

¹⁶ A xikhati lexi hi ehleketako hi lezi Jehova a va katekisisako zona a vanhu kufambeni ka malembe hi kuzwisisa ko eta ka ziprofeto za Biblia, ha zi wona lezaku ku na ni nchachazelo wo saseka mahlweni ka hina. A vatotilweko va na ni kutsumba ka ku yava zinwe na Kristu le tilweni. Kunene, lezo za va kuca nguvu lezaku va hlayisa a kupima kabye! Handle ko kanakana a magezu lawa Paule a tsaleleko va le Tesalonika hi nga ma tirisela kabye kambe. I te ngalo: ‘Hi yimelwe hi ku mu bonga Nungungulu xontlhe xikhati ha nwina, vamakabye va ranzekako va Hosi; hakuva Nungungulu i lo mu hlawula hi ku mu basisa hi moya ni kukholwa ka nwina lisineni.’ — 2 Tes. 2:13.

17. Magezu muni yo tiyisa hlana u ma kumako ka 2 Va Le Tessalonika 3:1-5?

¹⁷ Lava va rinzelako wutomi ga pinzukelwa laha misaveni vonawu va fanele ku kulula va nwatseka kasi va nga hatliseli ku tsekatsekiswa kupimeni kabye. Loku u hi ni kutsumba ka ku hanya laha misaveni, chela kota ka magezu ya Paule ya liranzo ni yo tiyisa hlana, lawa a tsaleleko a vatotilweko-kulobye va le Tesalonika. (Gonza 2 Va Le Tesalonika 3:1-5.) A munwe ni munwani wa hina i fanele ku ma nyika lisima a magezu lawo ya liranzo. Kunene, a mapapilo ka va le Tesalonika ma nyika zitlharihiso za lisima xungetano hi ku hlometela ku tiva zilo zi nga tlhamuselwangiko ka Biblia kutani ku kanakanela lezi hi zi kholwako. Kota lezi hi hanyako xikhatini lexi xo gumesa, hina kota maKristu hi chela nguvu kota ka zitlharihiso lezi.