‘Hunzuluka u tiyisa vamakabye va wena’

PEDRO i lo rila nguvu anzhako ka kuva a kanetile lezaku wa mu tiva Jesu. Hambu lezi a mupostoli loyi a nga fanele kulwa kasi ku wuyela hi tlhelo ga moya, Jesu i wa lava ku mu tirisa kasi ku vuna vanwani. Hikwalaho, i lo mu byela lezi: “Loku u hunzulukile, tiyisa a vanakuloni.” (Luka 22:32, 54-62) Pedro i lova yinwe ya timhanze ta bandla ga wuKristu ga zana ga malembe go sangula. (Gal. 2:9) Hi kufanana, a wanuna a tshukileko a tira kota dota a nga tlhela a rwala wutihlamuleli lego ni kuzwa litsako hi ku tiyisa makholwa-kulobye hi tlhelo ga moya.

A vokari va tshukileko va tira kota vawoneleli va suselwe wutihlamuleli, lezi kuzilava zi va mahileko va ti wona na va nga vuni nchumu. Julio,a loyi a tirileko kota dota le Amerika Dzonga hi xipimo xa 20 wa malembe, i te ngalo: “A ku longisela tikanelo, ku enzela vamakabye, ni ku risa ziro za bandla zi wa maha xipanze xa hombe xa wutomi ga mina! Zontlhe lezo zi lo famba hi xitshuketi, ku sala vanga ga hombe wutomini ga mina. Hi ku kongoma nzi nga wula lezaku lexi xive xikhati xo nonoha nguvu.” Nyamutlha, Julio wa tira kambe kota dota.

Mupizani Jakobe i lo tsala lezi: “Vamakabye va mina, ngha mu wula lezaku kutsaka ntsena loku mu wela lomu minzhingweni yi tsalangeneko.” (Jak. 1:2) Jakobe i wa wulawula hi minzhingo yi vangiwako hi tixanisa ni kungambheleli ka hina. I lo wulawula hi kunavela ka makangwa, xihlawulela ni zinwani. (Jak. 1:14; 2:1; 4:1, 2, 11) A xikhati lexi Jehova a hi kawukako, zi nga ha bayisa. (Maheb. 12:11) Kanilezi a minzhingo leyo a yi faneli ku hi wutlela litsako.

Hambu loku hi tekelwe malungelo ya ntiro laha bandleni, hi simama hi hi ni lungelo ga ku hlola a kukholwa ka hina ni ku kombisa liranzo ka Jehova. Hi nga ha ehleketa kambe hi lexi xi nga hi kuca ku maha ntiro lowo. Hi wa tira hi ku lava ku vuneka hina wutsumbu, kutani hi wa kuciwa hi liranzo la hina ha Nungungulu ni kutsumba ka hina ka lezaku a bandla gi lumba yena niku gi fanele ku khatalelwa ke? (Miti. 20:28-30) A vanhu va tirileko kota madota lava va simamako va maha ntiro wo basa na va tsakile va komba vontlhe, a ku patsa na Satani, lezaku a liranzo labye ha Jehova li huma mbilwini.

A xikhati lexi Hosi Davida a nga tsayiswa hi kota ta xionho xo tshisa lexi a nga wa xi mahile, i lo vumela ku kawukiwa zonake a tsetselelwa. Davida i lo yimbelela aku: “I katekile yena loyi a xihambuko xakwe xi tsetselelweko, loyi a xionho xakwe xi fenengetilweko. I katekile a munhu loyi Jehova a nga mu hlayeliko kuonha, loyi a moya wakwe wu nga hiko na kukhohlisa.” (Tis. 32:1, 2) A tsayiselelo yi chukwatisile Davida yi tlhela yi mu maha ava murisi wa mu nene wa vanhu va Nungungulu.

A kutala ka zikhati, a vamakabye lava va tlhelako va tira kota madota va tala kuva varisi va va nene ku hunza kusanguleni. A ginwe ga madota lawo gi wulile lezi: “Makunu nza zi tiva khwatsi ku khatalela lava va mahako zihoxo.” A dota ginwani gi wulile lezi: “Zalezi nzi nyika nguvu lisima a lungelo ga mina ga ku tirela vamakabye.”

A mutsali wa tisimu i lo tsala lezi: “[Jehova] a nga kawuki xontlhe xikhati.” (Tis. 103:9) Hikwalaho hi nga alakanyi lezaku Nungungulu a nga ta tshuka a tsumba kambe a munhu loyi a mahileko xionho xa hombe. Ricardo loyi a nga luza malungelo ya ku tira kota dota anzhako ka ku tira malembe yo tala ka xiavelo lexo, i ngalo: “Nzi wa bayisekile nguvu hi kota ya xionho xa mina. Hi malembe yo tala, a ku tizwa na nzi nga ha ringanelwi zi nzi tsanzekisile ku tlhela nzi tirela vamakabye kota muwoneleli. Nzi wa nga tsumbi lezaku nzi nga tlhela nziva munhu wo tsumbeka. Kanilezi kota nzi ranzako ku vuna vanwani, nzi wa zi kota ku fambisa zigonzo za Biblia, nzi tiyisa vamakabye laha Salawini ya Mufumo, ni ku tira navo ntirweni wa kuxumayela. Lezo zi nzi vunile ku tlhela nzi ti tsumba, niku zalezi nzi tira kota dota kambe.”

A ku veka xiviti zi nga tsanzekisa makabye lezaku a tlhela a tira kota dota. Zi tava chukwana nguvu ku tekelela a nanza ga Jehova, Davida, loyi a nga fanele ku tsutsuma kasi a nga dawi hi Hosi Saule loyi a nga hi ni xiluse. Davida i lo ala ku ti photela ka Saule, hambu ka zikhati lezi a nga vululekelwa hi tindlela ta ku maha lezo. (1 Sam. 24:4-7; 26:8-12) Laha Saule a ngafa yimpini, Davida i lo mu rila, a wulawula hi yena ni n’wana wakwe Jonatani kota vanhu vo “ranzeka ni ku xalalisa.” (2 Sam. 1:21-23) Davida a nga mu vekelangi xiviti.

Loku u alakanya lezaku u no lumbetwa kutani zi kona va nga kala ku zi zwisisa, u nga tsiki xiviti xi ku hlula. Hi xikombiso, a xikhati lexi William a nga suselwa wutihlamuleli gakwe ga kuva dota anzhako ka ku tira xipimo xa 30 wa malembe le Grã-Bretanya, i lova ni xiviti hi madota yo kari. Xini xi nga mu vuna ku tlhela a wuyela? I ngalo: “A ku gonza bhuku ga Joba zi nzi tiyisile hlana. Loku Jehova a vunile Joba lezaku ava ni kurula ni vanghana vakwe va vanharu, i wa ta nzi vunawo lezaku nziva ni kurula ni madota ya maKristu.” — Joba 42:7-9.

Loku u hlawulile ku nyima ku risa a tiyivu ta Nungungulu, zi tava zi nene ku ehleketa hi lexi xi nga ku maha u nyima. Xana u wo binziwa hi zikarato za wena wutsumbu? Ku na ni zilo zi nga wonekisa ku khwatsi za lisima nguvu wutomini ga wena? Xana u mbhetilwe ntamu hi kungambheleli ka vanwani? Kani xini xi nga humelela, alakanya lezaku u wa hi ka xiyimo xa ku vuna vanwani hi tindlela to tsalangana a xikhati u nga tira kota dota. A tikanelo ta wena ti wa va tiyisa, a xikombiso xa wena xi wa va kuca, niku a maenzo ya wena ya wurisi ma wa va vuna ku timisela zikarato zabye. A ntiro wa wena kota dota go tsumbeka wu wa maha mbilu ya Jehova yi tsaka, a ku fana ni lezi wu nga tsakisa le’ya wena. — Mav. 27:11.

Jehova wa vuna vavanuna lezaku va vuxa litsako labye ni kuxuva kabye ka ku lava ku rangela bandla. Loku u nyimile ku tira kota dota kutani u suselwe wutihlamuleli lego, u nga tlhela u ti karatela kuva murisi kambe. (1 Tim. 3:1) Paule a nga tshukangi a ‘tsika ku khongelela’ lezaku a maKristu ya le Kolosi ma tala hi wutivi ga lisine ga Nungungulu ‘lezaku ma famba hi laha ku faneleko Jehova, ma mu xalalisa ka zontlhe.’ (Kol. 1:9, 10) Loku u tlhela u kuma lungelo ga ku tira kota dota, kombela Jehova lezaku a ku nyika ntamu, ni lihlaza-mbilu, ni litsako. Masikwini lawa yo gumesa, a vanhu va Nungungulu va xi lava nguvu a xivuno xa varisi va nga ni liranzo. Xana u nga zi kota ku tiyisa vamakabye va wena niku u ti yimisele ku maha lezo ke?