U nga karali ku rinzela!

A matshango yo kari ya le Inglaterra ma ta ku vuna ku wona lezaku hikuyini u nga faneliko ku karala ku rinzela. U ta tlhela u tiva ndlela ya ku “rumela a zakuga za wena hehla ka mati,” hi ndlela yo fananisa, kasi ku vuna lava va kalako va nga se amukela lisine. — Mutsh. 11:1.

Ka wena, a xa lisima nguvu ku timisela. U fanele ku tiya lisineni u tlhela u namarela ka Jehova. (Deut. 10:20) Hi zalezo Georgina a mahileko futsi. A xikhati lexi a nga sangula ku gonza Biblia ni Timboni ta Jehova hi 1970, a nuna wakwe Kyriacos, i lo zangara nguvu. I lo zama ku mu tsikisa ku gonza. I wa zi kota ku beletela Timboni ta Jehova laha kaya kakwe a tlhela a hoxa wontlhe mabhuku ya Timboni ta Jehova lawa a nga ma kuma.

A xikhati lexi Georgina a nga sangula kuya mitlhanganweni ya bandla, Kyriacos i lo engetela ku zangara. Ka siku go kari, i loya Salaweni ya Mufumo kasi ku ya vuxa gujeguje. Laha va nga wona lezaku Kyriacos i wulawula khwatsi xiGreki ku hunza xiNgiza, a makabye wo kari wa xisati i lo fonela makabye wo kari wa xinuna wa bandla ginwani lezaku ata kasi a ta bhula naye. Kyriacos i lo xalala nguvu hi wunene ga makabye loyi wa xinuna, niku loku ku hunzile tihwetanyana, va zile va sangula ku gonza zinwe a Biblia. Kanilezi, Kyriacos i lo gumesa a zi tsika.

Georgina i lo simama ku xaniswa ka malembe manharu lawa ma nga lanzela. Kyriacos i wa mu byelile lezaku loku i wo tshuka a bapatizwa i wa ta tlhatlha wukati. Ka siku legi a nga lava ku bapatizwa hi gona, Georgina i lo khongela ka Jehova hi mbilu yontlhe lezaku Kyriacos a nga mu tsiki. A xikhati lexi a Timboni ti nga chikela kasi ku hunza ti va teka lezaku vaya mutlhanganweni, Kyriacos i va byelile lezi: “Rangani, hi ta sala hita hi mova.” I lo wona xipanze xontlhe xa ni mixo a tlhela a wona sati wakwe na a bapatizwa!

Hi nzhako ka xikhati, Kyriacos i wa nga ha mu xanisi nguvu a sati wakwe, a tlhela a cica nguvu hi kutsongwani-kutsongwani. Loku ku hunzile xipimo xa 40 wa malembe na Georgina a tivene ni Timboni hi khati go sangula, hi kona a nga wona nuna wakwe na a bapatizwa! Xini xi vunileko Kyriacos? I ngalo: “Nzi tsakisilwe nguvu hi Georgina hakuva a nga vumelelangi nchumu lezaku wu mu tsikisa ku khozela Jehova.” Georgina i bika lawa: “Hambu lezi a nuna wa mina a nga kari a nzi xanisa, nzi wa nga ta tsika ku khozela Nungungulu wa mina. Ka xikhati xontlhe lexo, nzi wa tshama hi ku khongela ka Jehova, niku a nzi tshukangi nzi karala ku rinzela.”

A nchumu wunwani wa lisima mhakeni ya ku vuna munghana wa wena wa wukati ku ti karatela ku kombisa a wumunhu giswa ga wuKristu. Mupostoli Pedro i lulekile vasati va maKristu aku: “Ingisani vanuna va nwina; lezaku kasi hambu loku va hi kona lava va nga ingisiko mhaka, va fela ku kokiwa hi mahanyela ya vasati vabye hi handle ka mhaka.” (1 Ped. 3:1) Christine i lanzele wusungukati lego, hambulezo zi tekile malembe yo tala lezaku a koka nuna wakwe. John i wa nga lavi ku lumba wukhongeli go kari. Kanilezi, i wonile lezaku a wukhongeli legi makunu Christine a nga hi ka gona i wa gi nyika nguvu lisima. John i ngalo: “Nzi wa zi wona lezaku gi wa mu nyika litsako. I lo sangula ku kombisa wumunhu gi nene, niku lezo zi nzi vunile nguvu a xikhati lexi nzi nga lwisana ni zikarato zo tala.”

Christine a nga zangi a kurumeta a nuna wakwe lezaku ava ka wukhongeli legi a nga hi ka gona. A nuna wakwe i vumela a mhaka leyi hi magezu lawa: “Christine i tekele ku zi wona kusanguleni lezaku zi wa hi chukwana ku nga bhuli na mina xungetano hi wukhongeli gakwe, i lo kombisa lihlaza-mbilu hi ku nzi tsika nzi gonza hi gonzela ga mina, a nga nzi hatlisisangi.” Loku Christine a kuma tinzima to kari lomu ka Murinzeli ni Despertai! na ti wulawula hi zilo lezi a nga zi wona ku zi ta mu tsakisa John, ku nga zilo zo kota siensia ni ntumbuluko, i wa mu komba na a wula magezu yo kota lawa, “Nzi alakanya ku a tinzima leti ti ta ku tsakisa nguvu.”

Hi kufamba ka xikhati, John i lo nyikiwa peceni zonake a sangula ku ti hlayisela a simu gakwe ga zitsangi. Kota lezi makunu a nga hi ni xikhati xa ku ehleketa hi ziwutiso za lisima laha kuhanyeni, i lo sangula ku ti wutisa lezi, ‘Xana hina vanhu hi la su halahala hi humelela, ni ku i kona a nga hi vanga hi xigelo xo kari?’ Ka siku go kari, a makabye loyi John a nga tolovela ku bhulanyana naye, i lo mu wutisa ku ngalo, “Zi ngo yini loku ho gonza a Biblia ke?” John i ngalo: “Kota lezi nzi nga sangulile ku kholwa ka Nungungulu, nzi lo vumela ku gonza.”

Kunene, zi’ve ni lisima nguvu a kuva Christine a nga tshukangi a karala ku rinzela! Loku ku hunzile 20 wa malembe na a khongela lezaku John a vumela lisine, hi kona a nuna wakwe a nga bapatizwa. Zalezi va mu tirela zinwe Jehova hi kuhiseka. John i ngalo: “Zilo zimbiri nguvunguvu zi nzi kokileko. Ku’ve wunene ni wunghana ga Timboni. Loku u chadile ni Mboni ya Jehova, u na ni sati wo tsumbeka, wa mu nene, ni ku ti karata.” Kunene, Christine i tirisile a wusungukati ga 1 Pedro 3:1, niku lezo zi’ve ni bhinzu!

Ahati a zigonzani lezi, hi zigelo zo kari, zi kalako zi nga ha tsakeli ke? Hosi Solomoni i tsalile magezu lawa: “Byala a mbewu ya wena na ga hi mixo, ni laha gambyeni u nga humuti a woko ga wena; hakuva a ku zi tivi lezaku ku ta mila yihi, leyi kutani leyiya, hambu loku ti mila hi wumbiri ga tona.” (Mutsh. 11:6) Ka zikhati zo kari, a timbewu ta lisine ti mbheta malembe kasi ti mila. Hambulezo, a munhu a nga gumesa hi ku wona lisima la ku tshinela ka Nungungulu. (Jak. 4:8) Kunene, a siku ginwani u nga tshuka u wona zo tsakisa nguvu.

Wona xikombiso xa Alice a rurileko Índia a ya hanya Inglaterra. Hi 1974 i lo sangula ku gonza a Biblia. I wa wulawula xiHindi kanilezi i wa lava ku chukwatisa xiNgiza xakwe. I lo simama ku gonza hi malembe yo kari zonake a sangula ku wona mitlhangano yo kari ka bandla ga xiNgiza. Laha a ngaya a gonza i lo wona lezaku lezi a nga gonza zi wa hi lisine, kanilezi i wa nga li woni a lisima la zona. Ahandle ka lezo, i wa ti karatela ku kuma mali, niku i wa ranza kuya lomu mibuzweni. Hi kugumesa, Alice i lo nyima ku gonza.

Loku ku hunzile xipimo xa 30 wa malembe, Stella, loyi a nga gonza a Biblia na Alice, i lo amukela papilo gi ngata hi ka Alice. Gi wa hi ni magezu lawa: “Handle ko kanakana u ta xalala nguvu hi ku tiva lezaku loyi u nga gonza naye Biblia kusukela 1974 i bapatizilwe ka gotsovanyano wu hunzileko. U mahile nchumu wa lisima nguvu wutomini ga mina. U byalile a mbewu ya lisine mbilwini ya mina, niku, hambu lezi nzi nga kala nzi nga se longa ku ti hendleleta ka Nungungulu, nzi hlayisile a mbewu leyo lomu mapinweni ni mbilwini ya mina.”

Zini zi nga mahekile? Alice i tlhamusela lezaku i karatekile nguvu mbilwini yakwe a xikhati lexi a nuna wakwe a ngafa hi 1997. I lo khongela ka Nungungulu. Nzeni ka khume ga timeneti, ku lota a Timboni timbiri laha mutini kakwe ti nga wulawula a xiPunjabi zonake ti mu siyela a xiphephana, Kutsumba Muni Ku Nga Kona Hi Varanzekako Lava Vafileko? Alice i lo tekela ku zi wona lezaku a mukhongelo wakwe wu hlamulilwe zalezo a ti mahela xiboho xa ku ti tlhanganyisa ni Timboni ta Jehova. Kanilezi, ti wa kumeka kwihi? I lo kuma xibhukwana xakwe lexi a nga tsaletela kona zilo zakwe lezi a nga maha siku ni siku, ku nga lomu a nga tsalile kona a makhero ya bandla ga xiPunjabi lawa Stella a nga mu nyikele. Alice i loya Salaweni ya Mufumo a tlhela aya amukelwa khwatsi hi vamakabye va xinuna ni va xisati va lirimi la xiPunjabi. Alice i ngalo: “Nzi simamile nzizwa a liranzo labye hambu xikhati lexi nzi nga humile, niku lezo zi nzi vunile ku rula ku karateka ka mina.”

I lo sangula kuya mitlhanganweni hi kukhanzakanya, a sangulisa xigonzo xakwe a tlhela a gonza ku tsala ni ku wulawula khwatsi a xiPunjabi, zonake a bapatizwa hi 2003. A papilo legi a nga tsalela Stella gi gumela hi magezu lawa: “Nzi bongile nguvu hi kuva u byalile timbewu letiya ka 29 wa malembe ma hunzileko ni ku nzi vekela xikombiso xi nene lezaku nzi xi lanzela.”

“Nzi bongile nguvu hi kuva u byalile timbewu letiya ka 29 wa malembe ma hunzileko ni ku nzi vekela xikombiso xi nene lezaku nzi xi lanzela.” — Alice

U gonza yini ka matshango lawa ke? Zi nga tshuka zi hlwela ku hunza lezi u zi alakanyisako zona, kanilezi loku munhu loye a hi ni ndlala hi tlhelo ga moya, a hi wo tsumbeka ni ku ti koramisa, Jehova i ta maha lezaku a lisine li kula mbilwini yakwe. Alakanya magezu ya Jesu ka mufananiso wakwe: “A mbewu yi mila yi kula, na [mubyali] a nga zi tivi lezaku zi mahisa kuyini. A misava yi pswala mihanzu ha yoce: a kuranga, hi khava, zonake a mponwani, zonake mavele ma tiyeleko mponwanini.” (Mar. 4:27, 28) A kukula loko ku maheka hi kutsongwani-kutsongwani ku tlhela ku maheka ha ‘koce.’ Kunene, a muhuweleli munwe ni munwani wa Mufumo a nga zi tivi lezi zi mahekisako zona. Hikwalaho, simama ku byala nguvu. U nga tshuka u pfuna.

Niku u nga kanyisi lisima la mukhongelo. Georgina na Christine va lo tshama hi ku khongela ka Jehova. Loku u ‘simamisa u tiyile kukhongeleni’ u tlhela u nga karali ku rinzela, “anzhako ka masiku yo tala,” u ta tshuka u tlhela u xi kuma kambe a ‘xibaba’ xa wena lexi u xi rumeleko hehla ka mati. — Rom. 12:12; Mutsh. 11:1.