A vapostoli vo kari va wona Kristu na a ngangamela

Laha Jesu a nga kari a gondzisa le Khezariya wa Filipi, ku nga hi ka pfhuka wa 25 wa tikilometro kusukela Citsungeni ca Hermoni, i no gumesa a va byela zvilo zvo hlamalisa a vapostoli vakwe, aku: “Laha ka n’wina mu nga laha, va kona va to kala kufa kala va wona N’wana wa munhu na ata Mufun’weni wakwe.” — Matewu 16:28, NM.

Kuzvilava a vapizani vakwe va wa ti wutisa ku kasi i lava ku wula yini. Loku ku hundzile cipimo ca vhiki, Jesu i no teka vapostoli vanharu a famba navo le hehla ka citsunga co leha. A vapostoli lavo hi Pedro, na Jakobe, na Johani. Ko khwatsi gi wa hi wusiku, hakuva a vapostoli lavo va vanharu va wazwa wurongo. Laha Jesu a nga kari a khongela, i no sangula ku ngangamela mahlweni kabye. A vapostoli va no wona nghohe yakwe na yi hatima ku khwatsi i gambo, ni tinguwo takwe na ti basile ti ku pa ti tlhela ti hatima.

Ku no gumesa ku woneka vavanuna vambiri. A Bhibhiliya gi li hi “Mosi na Elija”. Va no sangula ku wulawula na Jesu xungetano hi ‘kusuka kakwe, loku a nga wa ta suka le Jerusalema.’ (Luka 9:30, 31) Ko khwatsi a kusuka loko ku wuliwa a kufa ka Jesu ni ku tlhela a vhuxiwa. Ku wo hundza cikhatanyana na a wulawulile hi mhaka leyo. (Matewu 16:21) A mabhulo lawo, ma tiyisekisile lezvaku hakunene Jesu i wa ta dawa hi ndlela leyo yo wisa tingana, a kuhambana ni lezvi Pedro a nga mu khongotele zvona.

Laha makunu a wurongo gi nga hangalakile, a vapostoli va no hlamala, va wona lezvi zvi nga kari zvi maheka va tlhela va ingisela bhulo. Lowo wu wa hi muwoniso. Kanilezvi, zvi wa ku khwatsi zvo maheka futsi laha ka kuza Pedro a sangula ku nghena bhulweni yenawu, aku: ‘Rabi, zvi hi sasekele a kuva hi tshama laha; a hi akeni mixaxa minharu: mun’we wa wena, ni mun’we wa Mosi, ni mun’we wa Elija’. (Marku 9:5) Kuzvilava Pedro i wa lava lezvaku ku akiwa mixaxa leyo kutani matenda kasi a muwoniso lowo wu simama hi cikhati co kari.

Laha Pedro a nga kari a wulawula, va no randzelwa hi refu go ngangamela, zvonake ku zwala gezu hi lomu ka refu lego, giku: “Loyi hi N’wananga a randzekako, ndzi xaleleko ha yena; mu ingiseni.” A cikhati leci a vapostoli va ngazwa gezu ga Nungungulu, va no chava nguvhu, va sewa va zimama lomu hasi. Jesu aku: “Vhukani, mu nga chavi.” (Matewu 17:5-7) Loku va vhukile, va no wona Jesu basi. A muwoniso wu wa mbhelile. Loku makunu gi cile, va no tlhela. Laha va nga kari va relela, Jesu i no va laya aku: ‘Mu nga byeli munhu a ciwoniso leci, kala a N’wana wa munhu a vhuka hi ka vafileko.’ — Matewu 17:9.

Lezvi a vapostoli va nga wona Elija laha ka muwoniso, zvi no va vhuxela ciwutiso. Va se wutisa Jesu vaku: “Hi yini a vatsali va wulako ku ngalo Elija . . . [i fanele] ku ranga ata ke?” I no va hlamula, aku: “Elija i sina a tile, kanilezvi a va mu tivangi”. (Matewu 17:10-12) Jesu i wa wula Johani Mubhabhatisi, loyi a nga maha ntiro wo fana ni lowu wa Elija. Elija i vhunile vanhu kasi va amukela Elixa; Johani a vhuna vanhu kasi va amukela Kristu.

Handle ko kanakana, Jesu ni vapostoli vakwe va tiyisilwe nguvhu hi muwoniso lowo. Wu va nyikile masemanyana ya kungangamela ka Kristu Mufun’weni wakwe. Khwatsi hi lezvi Jesu a nga tsumbisile, a vapostoli va no wona “a N’wana wa munhu na ata Mufun’weni wakwe.” (Matewu 16:28) A cikhati leci a vapostoli va nga hi na Jesu le citsungeni, va no wona ‘wukulu gakwe hi mahlo yabye’. Hambu lezvi a vaFarisi va nga lava ku Jesu a maha cihlamaliso kasi ku va komba lezvaku hi yena a nga wa ta yimisiwa hi Nungungulu kota Hosi, a nga vhumelangi. Kanilezvi, a vapizani vakwe lava a nga kari a tira navo hi laha kusuhani, va nyikilwe thomo ga ku mu wona na a ngangamela, lezvi zvi tiyisekisileko a zviphrofeto zva Mufumo wa Nungungulu. Lezvo zvi mahile ku hi kufamba ka cikhati Pedro ava ni ciseketelo ca ku tsala lezvi: “Ku tiyisilwe nguvhu ka hina a mhaka ya kuphrofeta”. — 2 Pedro 1:16-19.