Nengela a muchado wa Yivana!

1, 2. (a) Muchado wa mani wu to vanga litsako la hombe tilweni? (b) Ziwutiso muni zi vukako?

A KU longisela muchado zi teka xikhati. Kanilezi hi ta yisa kupima ka hina ka muchado wo hlawuleka nguvu — wu nga muchado wa wuhosi. Hi nga ehleketa! Wu kari wu longiselwa hi xipimo xa 2.000 wa malembe. Makunu a xikhati xa kuva a muteki a tlhangana ni muswika xa tshinela hi xihatla. Lokuloku, a wucenje gi kombako litsako gi ta tata a yindlu ya Hosi, niku a zidlemo za le tilweni zi ta yimbelela ziku: “Haleluya! hakuva ku fuma Hosi Nungungulu wa hina. A hi nengeleni hi tsaka nguvu, a hi dzunzeni yena; hakuva a xikhati xa muchado wa Yivana xi chikele, ni sati wa yona i ti longisele.” — Kuv. 19:6, 7.

² A “Yivana” leyi a muchado wa yona wu vangako litsako le tilweni a ku na munwani ahandle ka Jesu Kristu. (Joh. 1:29) I bohisile kuyini kasi ku chada ke? Himani muswika wakwe? I ti longiselisile kuyini kasi ku chada? Va chada rini ke? A muchado lowu wu ta vanga litsako tilweni, kanilezi xana lava va rinzelako ku hanya kala kupinzuka laha misaveni vonawu va ta tsaka ke? Na hi zi langutela hi mahlo yo pswhuka, hi ta wulawula hi ziwutiso lezi a xikhati lexi hi yako mahlweni hi kambisisa a Tisimu 45.

3, 4. (a) Ku wuliwa yini hi tinguwo ta muchado ta Muteki, niku xini xi mu engetelako litsako? (b) Hi vamani a “vanhwana va tihosi” ni “muzinza” lava va tsakako zinwe ni Muteki?

³ Gonza Tisimu 45:8, 9. A Muteki, Jesu Kristu, i boha tinguwo takwe ta wuhosi to ngangamela ta muchado. Hi kufaneleko, a tinguwo takwe ti zwala masema yo nuhela yo fana ni “makha yo saseka” ya mira ni kasia, ku nga lezi zi nga maha a mafura yo basa yo tota ma nga tirisiwa le Israeli. — Ekso. 30:23-25.

⁴ A wucenje ga le tilweni legi gi tatako a yindlu ya wuhosi gi engetela litsako leli a Muteki a li zwako hi lezi a muchado wakwe wu tshinelako. Kutsakeni loku, ku na ni “muzinza,” ku nga xipanze xa le tilweni xa hlengeletano ya Jehova, lexi xi patsako ni “vanhwana va tihosi,” ku nga tingelosi to basa. A hi kutsakisa ka zona a kuzwa magezu ya le tilweni na ma huwelela maku: “A hi nengeleni hi tsaka nguvu, . . . hakuva a xikhati xa muchado wa Yivana xi chikele”!

 5. Himani “a sati wa Yivana”?

⁵ Gonza Tisimu 45:10, 11. Hi gi tivile a vito ga Muteki, kanilezi hi mani a muswika wakwe? A muswika loyi i ntlawa wu wumbiwako hi ziro za bandla legi Jesu Kristu a nga hloko ya gona. (Gonza Va Le Efesusi 5:23, 24.) Va tava xipanze xa Mufumo wa Kristu wa wuMessia. (Luka 12:32) A maKristu lawa ya 144.000 ma totilweko hi moya “hi lava va lanzako Yivana ni kwihi laha yi yako kona.” (Kuv. 14:1-4) Va maha “sati wa Yivana” zonake va tshama nayo kaya ka yona le tilweni. — Kuv. 21:9; Joh. 14:2, 3.

 6. Hikuyini a vatotilweko va wulwako ku i “nhwana wa hosi,” niku hikuyini va byeliwako lezaku va ‘rivala va ka kabye’ ke?

⁶ A muswika loyi wa xikhati xa ha tako a nga vitanwi ntsena ku “nhwana” kanilezi i vitanwa ku “nhwana wa hosi” kambe. (Tis. 45:13) Himani a “hosi” leyi? A maKristu ma totilweko ma mahiwa “vana” va Jehova. (Rom. 8:15-17) Kota lezi va to maha muswika le tilweni, a vatotilweko va byeliwa ku ngalo: ‘Rivalani va ka nwina, ni yindlu ya dadani wa nwina’ wa nyama. Va fanele ku veka kupima kabye ka “zilo za le hehla, na ku nga hi zilo za laha misaveni.” — Kol. 3:1-4.

 7. (a) Kristu i mu longiselisisa kuyini a muswika wakwe a ha tako? (b) Xana a muswika i mu wonisa kuyini a Muteki wakwe a ha tako?

⁷ Hi mazana ya malembe, Kristu i kari a longisela muswika wakwe kasi ku chada naye le tilweni xikhatini xa ha tako. Mupostoli Paule i tlhamusele lezaku Kristu i lo “ranza bandla, a ti nyikela hi kota ya gona, lezaku a gi basisa, loku a gi hlazile hi ku bapatiza hi mati zinwe ni mhaka, lezaku a fela ku gi yimisa mahlweni kakwe na gi hi bandla ga kungangamela, gi nga hi na bala ni nkonyi, hambu xilo xinwani xa kunghaho; kanilezi giva legi gi basileko gi nga hiko na kusoleka.” (Efe. 5:25-27) Paule i lo byela maKristu ma totilweko ya le Korinte wa kale aku: “Nza lusa ha nwina hi xiluse xa Nungungulu; hakuva nzi lo mu nyikela a ku wutiwa hi nuna munwe, kasi nza fela ku mu yisa ka Kristu na mu hi nhwana a basileko.” (2 Kor. 11:2) A Muteki tlhelo Hosi Jesu Kristu wa tsaka nguvu hi ku wona “a wumbhuri” ga moya ga muswika wakwe a ha tako. A muswika yenawu i wona Jesu kota “hosi” yakwe a tlhela ‘a yi khizamela’ kota nuna wakwe xikhatini xi tako.

 8. Hikuyini zi faneleko ku a muswika a tlhamuselwa kota wo “ngangamela”?

⁸ Gonza Tisimu 45:13, 14a. A muswika i kombiswa na a sasekile nguvu kasi ku chada ni hosi. Ka Kuvululelwa 21:2, a muswika i fananiswa ni doropa, a Jerusalema Giswa, a “bombiselweko nuna wakwe.” A doropa legi ga le tilweni gi na ni “kungangamela ka Nungungulu” niku ga hatima “khwatsi hi ribye ga ntsengo wa hombe, a ku fanana ni ribye ga jasperi, na gi basisile ku khwatsi hi kristali.” (Kuv. 21:10, 11) A kungangamela ka Jerusalema Giswa ku tlhamuselwa hi ndlela yo saseka ka bhuku ga Kuvululelwa. (Kuv. 21:18-21) A zi hlamalisi lezi a muyimbeleli wa tisimu a kombisako a muswika na a “ngangamela”! Phela a muchado lowo wa wuhosi wu maheka tilweni.

 9. Himani a ‘hosi’ leyi a muswika a yiswako ka yona, niku i bohisile kuyini?

⁹ A muswika i yisiwa ka Muteki — ku nga Hosi ya wuMessia. A Muteki i kari a longisela muswika, a mu basisa hi ku mu hlaza hi mati, ku nga mhaka. I ‘basile niku a nga na kusoleka.’ (Efe. 5:26, 27) A muswika wakwe i fanele ku ngha a bohile tinguwo ti yelanako ni ximaho lexo kambe. Niku hi zalezo a nga bohisa zona! Hakunene, “a tinguwo takwe ti lukilwe hi nzalama,” niku ‘i ta yiswa hosini na bombile hi nguwo yi khomelweko.’ Ka muchado wa Yivana, “i lo nyikiwa ku ambala tinguwo to saseka ta wukene, ti basisilweko tiku pa! A tinguwo to saseka ta wukene hi mitiro ya kululama ya vobasa.” — Kuv. 19:8.

10. Xana a muchado wa Yivana wu maheka rini?

¹⁰ Gonza Kuvululelwa 19:7. Xana a muchado wa Yivana wu maheka rini? Hambu lezi a ‘sati wa yona a ti longiseleko’ ku chada, lezi zi wuliwako hi kulanzela a zi tlhamuseli a muchado ha woce. Wutshanwini ga lezo, zi nyika a mitlhamuselo yo hanya ya xipanze xo gumesa xa kuxaniseka ka hombe. (Kuv. 19:11-21) Xana zi wula lezaku a muchado wu maheka na Muteki tlhelo Hosi a nga se mbhetisa kuhlula kakwe? Ahihi. A miwoniso yi nga ka bhuku ga Kuvululelwa a yi xaxametwangi hi lexi xi to ranga hi xona xi maheka. Ka Tisimu 45, a muchado wa wuhosi wu maheka anzhako ka loku a Hosi, Jesu Kristu, yi boha a supado ya yona zonake yi “ya hlula” a valala va yona. — Tis. 45:3, 4.

11. Komba a xaxameto wa lezi Kristu a to mbhetisisa zona a kuhlula kakwe.

¹¹ Hikwalaho, hi chikelela magumo ya lezaku a zilo zi ta mahekisa lezi: Xo sangula, ku lamulwa ka “xibhayi xa hombe,” ku nga Babuloni loyi wa hombe, a mufumo wa misava yontlhe wa wukhongeli ga mawunwa. (Kuv. 17:1, 5, 16, 17; 19:1, 2) Hi kulanzela, Kristu i ta neha kulamula ka Nungungulu hehla ka zipanze lezi zinwani za mafambisela ya kubiha ya Satani laha misaveni hi ku zi lovisa le Har–Magedoni, ku nga ‘siku ga hombe ga kulwa ga Nungungulu wa Ntamu-wontlhe.’ (Kuv. 16:14-16; 19:19-21) Hi kugumesa, a Hosi tlhelo Mulwi wa tiyimpi yi ta mbhetisa a kuhlula ka yona hi ku hoxa Satani ni madimoni yakwe nkeleni wa lieswila, yi va valela lomo khwatsi va nofa. — Kuv. 20:1-3.

12, 13. (a) Xana a muchado wa Yivana wu maheka rini? (b) Hi vamani va tsakako le tilweni hi kota ya muchado wa Yivana?

¹² Laha a maKristu ma totilweko ma gumesako a kuhanya kabye laha misaveni xikhatini lexi xa kuvakona ka Kristu, ma vuxiwa ma ya hanya tilweni. Ka xikhati xo kari anzhako ka kuloviswa ka Babuloni loyi wa hombe, Jesu i ta tsombanyisa a misalela yontlhe ya ntlawa wa muswika lezaku yiva zinwe naye. (1 Tes. 4:16, 17) Hikwalaho, xikhatanyana mahlweni ka kusangula ka yimpi ya Har–Magedoni, a ziro zontlhe za “muswika” zi tava tilweni. Anzhako ka yimpi leyo, hi kona ku to maheka a muchado wa Yivana. Hi nga wona lezi a muchado lowo wu to tsakisisa zona! “Va katekile lava va rambilweko mubuzweni wa muchado wa Yivana,” ku wula Kuvululelwa 19:9. Hakunene zi ta tsaka nguvu a ziro lezi za 144.000 za ntlawa wa muswika. A Muteki tlhelo Hosi yenawu wa tsaka nguvu hi kuva ni ntsengo wontlhe wa vafumeli-kulobye lava va ‘gaku ni kunwa mezeni ya yena le mufunweni wakwe’ hi ndlela yo fananisa. (Luka 22:18, 28-30) Hambu zi hi tano, a hi Muteki ni muswika wakwe ntsena va tsakako muchadweni wa Yivana.

¹³ Kota lezi hi zi wonileko kusanguleni, a zidlemo za le tilweni zi yimbelela khati ginwe ziku: “A hi nengeleni hi tsaka nguvu, a hi dzunzeni [Jehova]; hakuva a xikhati xa muchado wa Yivana xi chikele, ni sati wa yona i ti longisele.” (Kuv. 19:6, 7) Ahati a malanza ya Jehova ya laha misaveni ke? Xana wonawu ma ta tsaka ka ximaho lexo?

14. Kota lezi zi wulilweko ka Tisimu 45, hi vamani a ‘tipheleketi ta mibulwa’ ta muswika ke?

¹⁴ Gonza Tisimu 45:12, 14b, 15. Muprofeti Zakaria i lo wula na ka ha hi mahlweni lezaku masikwini yo gumesa, a vanhu va matiko va wa ta ti patsa ni misalela ya Israeli wa moya hi kuziranza. I te ngalo: “Masikwini lawo khume ga vavanuna va tirimi ti tsalangeneko ta matiko, va ta khomelela nzhungweni wa nguwo wa muJuda, vaku: Hi ta famba na nwina, hakuva hi zwile lezaku Nungungulu i na nwina.” (Zak. 8:23) Ka Tisimu 45:12, a “khume ga vavanuna” lavo vo fananisa va tlhamuselwa kota “nhwana wa Tire” ni “vafumileko.” Vata ka misalela ya vatotilweko ni zinyikiwo, na va lava kuamukeleka mahlweni yabye ni ku ta lava xivuno xa moya. Kusukela 1935, a vanhu va timiliyoni va vumelela misalela lezaku yi va ‘kokela kululameni.’ (Dan. 12:3) A vanghana lava vo tsumbeka va maKristu ma totilweko va basisile wutomi gabye, va maha mibulwa ya moya. A ‘tipheleketi leti ta mibulwa’ ta muswika ti ti hendleletile ka Jehova ti tlhela ti kombisa lezaku vafumelwi vo tsumbeka va Muteki tlhelo Hosi.

15. Xana a ‘tipheleketi ta mibulwa’ ti tirisa kuyini ni lava va ntlawa wa muswika va ha hiko laha misaveni?

¹⁵ A misalela ya ntlawa wa muswika ya ti bonga nguvu a ‘tipheleketi ta mibulwa’ hi kota ya xivuno xabye xo hiseka kuxumayeleni ka “ivangeli leyi ya mufumo” misaveni yontlhe. (Mat. 24:14) A hi ‘moya ni muswika ntsena va nge ngalo: Tana!’ kanilezi lava va zi zwako vonawu ve ngalo: “Tana!” (Kuv. 22:17) Ina, lava va “tiyivu tinwani” va zwile a ziro zi totilweko za ntlawa wa muswika na ziku “Tana!” zonake va ti patsa ni muswika vaku “Tana!” ka vaaki va misava. — Joh. 10:16.

16. I lungelo muni legi Jehova a nyikako lava va tiyivu tinwani?

¹⁶ A misalela ya vatotilweko ya ti ranza a tipheleketi ta yona niku ya tsaka hi ku tiva lezaku Jehova, a Dadani wa Muteki, i nyika lava va tiyivu tinwani va nga laha misaveni a lungelo ga lezaku vonawu va tsaka hi kota ya muchado wa le tilweni wa Yivana. Ku profetilwe lezaku lava va ‘tipheleketi ta mibulwa’ “va ta tiswa na va yimbelela hi kutsaka.” Kunene, lava va tiyivu tinwani, va rinzelako ku hanya laha misaveni kala kupinzuka, vonawu va ta tsaka ni zivangwa lezi zinwani a xikhati lexi ku to maheka a muchado wa Yivana le tilweni. Hi kufaneleko, a bhuku ga Kuvululelwa gi kombisa a ziro za “xidlemo xa tsanza-vahlayi” na zi “yimile mahlweni ka xitshamu xa wuhosi ni mahlweni ka Yivana.” Zi mahela Jehova a ntiro wo basa tsenzeleni wa laha misaveni wa tempeli yakwe ya moya. — Kuv. 7:9, 15.

17, 18. A muchado wa Yivana wu pswalisa kuyini mihanzu, niku xana Kristu i tava raru wa vamani Kufumeni kakwe ka 1.000 wa Malembe?

¹⁷ Gonza Tisimu 45:16. A ‘tipheleketi ta mibulwa’ ta muswika wa Kristu wa le tilweni ti tava ni xigelo xinwani xo tsaka laha ti to wona a muchado na wu pswala mihanzu misaveni yiswa. A Muteki tlhelo Hosi i ta yisa kupima kakwe misaveni zonake a vuxa “vararu” vakwe laha misaveni, lava va tova “vana” vakwe va laha misaveni. (Joh. 5:25-29; Maheb. 11:35) Xikari kabye i ta yimisa “tihosana misaveni yontlhe.” Handle ko kanakana, Kristu i ta yimisa vanwani xikari ka madota yo tsumbeka lawa ma nga kona nyamutlha lezaku ma rangela misaveni yiswa. — Isa. 32:1.

¹⁸ Kufumeni kakwe ka 1.000 wa malembe, Kristu i tava raru wa vanwani kambe. Hi lisine, a vahanyi vontlhe laha misaveni va kumako wutomi ga pinzukelwa va ta gi kuma hi loku va kholwa ka muphahlo wa Jesu. (Joh. 3:16) Hi ndlela leyo ava ‘Dadani wabye wa Pinzukelwa.’ — Isa. 9:6, 7.

19, 20. Xana a zimaho zo tsakisa nguvu zi kumbukiwako ka Tisimu 45 zi ma khumbisa kuyini a maKristu wontlhe nyamutlha?

¹⁹ Gonza Tisimu 45:1, 17. Hakunene, a zimaho lezi zi tsalilweko ka Tisimu 45 zi khumba maKristu wontlhe. A misalela ya vatotilweko laha misaveni ya tsaka nguvu hi ku tiva lezaku lokuloku yi tava zinwe ni vamakabye va yona zinwe ni Muteki wabye. Lava va tiyivu tinwani va susumeteka kuya mahlweni va ti koramisa ka Hosi yabye yo ngangamela. Va bonga kambe hi lungelo legi va nga nago ga ku tira zinwe ni misalela ya ziro za muswika wa Hosi laha misaveni. Anzhako ka muchado wabye, Kristu zinwe ni lava a hlengelako navo Mufunweni wakwe va ta neha makatekwa ya tsanza-vahlayi ka lava va hanyako laha misaveni. — Kuv. 7:17; 21:1-4.

²⁰ Na ha ha rinzela a kutatiseka ka ‘zilo lezi zo saseka’ xungetano hi Hosi ya wuMessia, xana a hi susumeteki ‘ku tivekisa a vito gakwe’ ke? Ngha hinawu hiva zinwe ni lava ‘va to dumisa a Hosi kala kupinzuka.’