Kota mupswali, wa zi lava nguvu ku vuna vana va wena vo ranzeka lezaku va ranza Jehova ni ku hendleleta wutomi gabye kakwe. U nga va vunisa kuyini lezaku va ti longisela ku bapatizwa? Hi ka tanga muni va to ngha va longile kuba a zambo legi ga lisima? Jesu i leletele valanzeli vakwe aku: ‘Mahani vapizani a matiko wontlhe, mu va bapatiza.’ (Mat. 28:19) Hikwalaho, a nchumu wa lisima wu lavekako kasi ku bapatizwa kuva mulanzeli — ku nga munhu a nga zwisisiko ni ku kholwa tigonzo ta Jesu basi kanilezi a hanyako hi lezi a gonzako. Lezo zilo zaku hambu vanana va nga zi maha.

Ngha uva xikombiso xi nene ka vana va wena u tlhela u va gonzisa milayo ya Jehova. (Deut. 6:6-9) Lezo zi patsa ku tirisa mahungu ma nga ka bhuku Zini lezi a Biblia gi zi gonzisako hakunene? ni ‘Tshamani liranzweni la Nungungulu’ kasi ku va gonzisa a tigonzo-tshinya ta Biblia ni ku va longisela lezaku va zi kota ku ehleketa hi matshinya ya milayo ya Biblia. Vuna vana va wena lezaku va gonza ku tlhamusela lezi va zi kholwako hi magezu yabye wutsumbu. (1 Ped. 3:15) A wutivi ni ku tiyiswa loku u va nyikako a ku patsa ni xigonzo xabye wutsumbu, mitlhangano ya bandla, ni wunghana ni vanhu va nene zi ta va vuna a ku kula kala va bapatizwa va tlhela va simama va kula hi tlhelo ga moya anzhako ka ku ngha va bapatizilwe. Va vekele mixuvo ya moya.

Mavingu 20:11 i ngalo: “Hambu a nwanana i ta tibyiwa hi zimaho zakwe, loku mitiro yakwe yi basile, kutani yi lulamile.” Zilo muni zi to komba lezaku a nwanana wa wena wa mufana kutani wa nhanyana makunu mupizani wa Jesu Kristu niku i longile ku bapatizwa ke?

A nwanana a lavako ku bapatizwa i fanele ku ingisa vapswali vakwe. (Kol. 3:20) A Biblia gi hi byela lezi hi Jesu a xikhati a nga hi ni 12 wa malembe: ‘Yena i wa ingisa’ vapswali vakwe. (Luka 2:51) Hambulezo, u nga rinzeli lezaku a n’wana wa wena ava wo mbhelela. Kanilezi a nwanana loyi a lavako ku bapatizwa i ta ti karatela ku lanzela xikombiso xa Jesu ni ku ingisa vapswali vakwe.

I fanele ku kombisa lezaku wa zi ranza nguvu a ku gonza a lisine la Biblia. (Luka 2:46) Xana a n’wana wa wena wa zi ranza a kuya mitlhanganweni ni ku hlengela ka yona? (Tis. 122:1) Wa zi ranza ku gonza Biblia hi ku khanzakanya ni ku ti mahela xigonzo xakwe wutsumbu? — Mat. 4:4.

A nwanana a lavako ku bapatizwa i ti karatela ku rangisa zilaveko za Mufumo. (Mat. 6:33) Wa chela kota hi wutihlamuleli legi a nga nago kota muhuweleli a nga bapatizwangiko niku xikombiso xi nene xa ku ranza ntiro wa simu. Wa hlengela ka tindlela to hambanahambana ta ku xumayela niku a nga chavi ku byela vagonzisi vakwe ni zigonzani-kulobye lezaku i Mboni ya Jehova. Loku a kuma xipanze ka Mutlhangano wa ntiro ni mahanyela, i chela nguvu kota hi xona.

I ti karatela kambe a ku simama a basile mahanyeleni yakwe hi ku potsa ku maha wunghana ni vanhu vo biha. (Mav. 13:20; 1 Kor. 15:33) Lezo zi woneka ka lezi a zi hlawulako loku zita ka wucenje, mafilmi, milongoloko ya televizawu, mavidiyu-gemi, ni lezi a yi tirisisako zona a Internet.

A vanana vo tala va amukela khwatsi a gonziselelo yo ti karata ya vapswali vabye ya lezaku va ranza lisine ni ku ringanelwa hi ku bapatizwa na va ha hi vanana. Ngha Jehova a ku katekisa laha u vunako a vana va wena lezaku va chikelela a zimaho lezi za lisima zi va vunako kuva ni wunghana gi nene na Jehova.

Mahungu ma yako ka muhuweleli a nga bapatizwangiko:

I lungelo ga hombe a ku tira laha bandleni kota muhuweleli a nga bapatizwangiko. Wa dzunziwa nguvu hi lezi u kulako hi tlhelo ga moya. A ku gonza Biblia ku ku mahile u tiva Nungungulu ni ku kholwa a zitsumbiso zakwe. — Joh. 17:3; Maheb. 11:6.

Na u nga se sangula ku gonza ni Timboni ta Jehova, kuzilava u khozele ka tichechi to hambanahambana kutani u wa nga hi na chechi. Kuzilava u wa maha zilo zi nga zwananiko ni matshinya ya milayo ya Biblia. Kanilezi zalezi u kombisile kukholwa ka wena hi kutisola, zi wulako ku ti laya hi zilo zo biha u zi mahileko, ni ku hunzuluka zi wulako ku tsika lezi u nga zi maha kale kasi ku maha lezi zi lulamileko mahlweni ka Nungungulu. — Miti. 3:19.

Hi tlhelo ginwani, kuzilava “kusukela wuhlangini ga wena u tivile a mitsalo yo basa,” a ku fana na Timote. Hikwalaho lezo zi ku mahile u nga ti ngheniseli ka mahanyela ma nga hiko ya wuKristu ni ku nga mahi zionho za hombe. (2 Tim. 3:15) U gonzile tindlela ta ku hlula a tshikelelo wa vanghana ni mikucetelo yinwani ya ku maha zilo zi bihileko mahlweni ka Jehova. U kombisile kukholwa ka wena hi ku seketela a wukhozeli ga lisine ni ku bhulela vanwani lezi u zi kholwako. U gonzisilwe a ntiro wa ku xumayela. Zalezi u mahile xiboho xa ku tirela Jehova kota muhuweleli a nga bapatizwangiko.

Kani u gonzile tindlela ta Jehova na wa ha hi xihlangi kutani u tivile Jehova hi nzhako ka xikhati, za koteka ku ngha makunu u kari u lava ku chikelela zinwani zigava za zimbiri za kukula ka wena hi tlhelo ga moya — ku nga kutihendleleta ni kubapatizwa. Makunu u fanele ku ti hendleleta ka Jehova hi ku maha mukhongelo u mu byela xiboho xa wena wutsumbu xa ku lava ku tirela yena yece kala kupinzuka. (Mat. 16:24) Kota xikombiso xa ku ti hendleleta ka wena, u lava ku bapatizwa hi mati. (Mat. 28:19, 20) Loku u ti hendleleta ni kubapatizwa, u maha nanza gi ringanelwako hi ku maha a ntiro wa Jehova Nungungulu. Hi nga wona a lungelo u nga nago!

Hambulezo, kota lezi u zi wonileko kugonzeni ka wena ka Biblia, kuzilava u ta kumana ni zikarato zo tala. Alakanya lezaku xikhatanyana anzhako ka kubapatizwa kakwe, “Jesu i lo yiswa hi moya xiwuleni, lezaku kasi a ya ringwa hi Satani.” (Mat. 4:1) Anzhako ka ku bapatizwa kota mupizani wa Kristu, u ta kumana ni zikarato zinwani. (Joh. 15:20) Zi tata hi tindlela to tsalangana. U ta kanetwa hi maxaka. (Mat. 10:36) Kuzilava u ta hlekiwa hi zigonzani-kulobye, vatiri-kulobye ni lava u nga tivana navo hi kale. Xontlhe xikhati alakanya a magezu ya Jesu ma nga ka Marku 10:29, 30, ma nge ngalo: “Hizinene nziku ka nwina: A ku na munhu loyi a siyileko yindlu, kutani vanakulobye, kutani vamakabye, kutani i nyine, kutani i raru, kutani i vana, kutani masimu, hi kota ya mina ni ivangeli, loyi a ta nga kala a nga amukeliswi hi ka zana a ka lexi xikhati, a tiyindlu, ni vanakulobye, ni vamakabye, ni vanyine, ni vana, ni masimu, na hi kona zixanisweni; ni ka tiko gi tako a wutomi ga pinzukelwa.” Hikwalaho, simama ku ti karata kasi uva kusuhani na Jehova ni ku hanya hi milayo yakwe yo lulama.

Loku u lava ku bapatizwa, byela madota ya bandla. A ziwutiso lezi zi lanzelako zi tira kota xiseketelo xa mabhulo u tova nawo ni madota kasi ku wona lezaku wa ringanelwa hi ku bapatizwa ke. U nga ti mahela longoloko wa ku vuxeta ziwutiso lezi a xikhati lexi u mahako a xigonzo xa wena wutsumbu.

A xikhati u longiselako a mabhulo lawa u tova nawo ni madota, ti nyike xikhati xa ku gonza ni ku ehleketa hi Mitsalo yi kumbukiwako ni yi tshahilweko. Ka zikhati zo tala, a mitsalo leyi a yi nyiki a hlamulo wo mbhelela wa xiwutiso, kanilezi yi ku vuna a ku tiva laha a hlamulo wa xiwutiso wu seketelwako kona. Loku u nga tiyiseki hi hlamulo wo kari, zi nga ku vuna nguvu a ku hlota mahungu yo engeteleka ka Biblia ni ka manwani mabhuku ma humesilweko hi “nanza gi tsumbekileko ni go tlhariha.” (Mat. 24:45) U nga tsalatsala zo kari lomu matlhelweni ya bhuku legi kutani ka wutshamu ginwani. Loku u zi lava u nga vulula bhuku ga wena ni ku tirisa lezi u zi tsalatsalileko ka gona a xikhati u bhulako ni madota. Loku zi ku karatela a ku zwisisa ziwutiso zo kari, kombela xivuno ka loyi u gonzako naye a Biblia kutani ka madota.

A xikhati u bhulako ni madota, u nga alakanyi lezaku u fanele ku nyika mihlamulo yo leha kutani ku tatela zilo ka mihlamulo ya wena. A hlamulo wo olova ni wo kongoma, u wu nyikako hi magezu ya wena wutsumbu wa enela. Ka ziwutiso zo tala, zama ku kumbuka a mutsalo wunwe kutani yimbiri yi kombako laha a hlamulo wa wena wu seketelwako kona.

Loku a madota ma wona lezaku zi kona za ha kiyelako, ma ta maha malulamiselo ya lezaku u vuniwa kala u zi kota ku tlhamusela hi magezu ya wena wutsumbu lezi u zi zwisisako hi Mitsalo kasi u ringanelwa hi kubapatizwa xikhatini xi tako.

[Xialakanyiso ka madota: A zileletelo za mabhulo mu tova nawo ni lava va lavako ku bapatizwa zi kumeka ka maphajina 211-214.]