Leswaku Hi Tekelela Xikombiso Xa Yesu Hi Fanele. . .

HI VA NI NTWELAWUSIWANA

Leswi a a nga na xidjoho, ku tala ka swikarhatu leswi vanhu va kumanaka na swona, Yesu a nga zanga a va na swona. Hambileswo, a va kombe ntwelawusiwana wawukulu vanhu, a a tinyimisele ku yendla hikwaswu leswaku a va pfuna, a ze a yendla ni swilo swaku a swi tikomba swi nga bohi. Hikakunene ntwelawusiwana wu yendle swaku Yesu a pfuna van’wani. Vona swikombiso leswi kumekaka ka Tindzima 32, 37, 57, 99.

HI VA NI XINGHANU

Vanhu va tintanga hinkwatu, majovhem ni lava se va nga kula a va nga chavi ku mu tshinelela Yesu. Hikusa yena a a nga tikombisi na a li munhu lweyi a nga khomeka hintamu, kumbe na a li munhu wa lisima hintamu ku tlula van’wani. Se, hi ku vona swaku Yesu a a li ni mhaka na vona, vanhu a va titwa na va chunsekile lani a nga kona. Swi voni leswo ka Tindzima 25, 27, 95.

HI RHANDZA KU YENDLA SWIKHONGELO

Nkama ni nkama, Yesu a a yendla swikhongelo leswi sukelaka mbilwini, hambiloko a li yexe kumbe loko a ni vagandzeli van’wani. Yesu minkama ya yinyingi a a khongela, naswona a nga khongeli ntsena loko a lava ku dla, a a khongela ka Papayi wa yena leswaku a mu khensa, a mu dzunisa, ni mu mu kombela leswaku a mu pfuna loko a lava ku yendla swiboho swa lisima. Vona swikombiso leswi nga tsaliwa ka Tindzima 24, 34, 91, 122, 123.

HI RHANGISA LESWI LAVIWAKA HI VAN’WANI

Minkama yin’wani, hambiloko a lava ku humula Yesu a tinyika nkama wa ku pfuna van’wani. A a nga rhangisi leswi laviwaka hi yena naswona ka mhaka leyo a hi vekele xikombiso lexi hi nga xi tekelelaka. Vona leswi a nga swi yendlisa xiswona ka Tindzima 19, 41, 52.

HI RIVALELA VANHU VAN’WANI

Yesu a nga yo djondzisa swaku hi fanele hi rivalela van’wani ntsena, yena hi yexe a a swi kota ku rivalela vanhu van’wani. A swi yendlile leswo ka vadjondzisiwa va yena ni ka vanhu van’wani. Pimisa hi swikombiso leswi nga tsaliwa ka Tindzima 26, 40, 64, 85, 131.

HI TIRHA HI MATIMBA

A Bibele a li vule swaku a Vayuda va vanyingi a va ta mu yala Mesiya ni leswaku a valala va yena a va ta mu dlaya. Se leswo a swi ta va swi yendle Yesu a nga karhateki hi ku lava ku pfuna vanhu. Kambe Yesu a a tirha hi matimba leswaku a seketela wugandzeli la ntiyiso, naswona leswi Yesu a a swi yendlisa xiswona swilo i xikombiso ka valandzeli va yena hinkwavu, lava minkama yin’wani va kanetiwaka va tlhela va nyenyiwa. Vona Tindzima 16, 72, 103.

HI TIVEKA HANSI

Yesu a a va tlula hi tindlela hinkwatu vanhu va ku kala va nga hetisekanga, ku nga ha va hi wutlhari kumbe hi wutivi. Leswi a a nga na xidjoho, a kota ku yendla swilo ku tlula vanhu hinkwavu lava a va li kusuhi na yena. Hambileswo, a a tiveka hansi a tirhela vanhu van’wani. Vona swin’wani hi mhaka leyi ka Tindzima 10, 62, 66, 94, 116.

HI LEHISA MBILU

Nkama vapostolo ni vanhu van’wani va nga tsandzeka ku tekelela xikombiso xa Yesu, kumbe va kalaka va nga swi kotanga ku yendla leswi Yesu a nga va byela swona. Yesu minkama hinkwayu a a va lehisela mbilu, a va byela leswi a va fanele va swi yendla leswaku va kota ku va vanghanu va Yehovha. Pimisa hi leswi Yesu a nga swi yendla leswi kombisaka swaku a a lehisa mbilu ka Tindzima 74, 98, 118, 135.