Wutomi Li Sungulise Ku Yini?

Bibele li vula swaku Xikwembu hi xona xi nga “tumbuluxa swilo hinkwaswu.” (Nhlawutelo 4:11) Wa swi kholwa leswo? Vanhu van’wani a va kholwi swaku Xikwembu hi xona xi nga yendla wutomi. Loko leswo a ku li ntiyiso a swi ta vula swaku wutomi li yo humelela hi loxe. Kambe loko ku li swaku Yehovha hi yena a nga hi nyika wutomi swi vula swaku a nga hi yendlanga mahala.a Hi ta vona swaku Bibele li li wutomi li sungulise ku yini naswona hi mhaka muni hi fanele hi swi kholwa leswi li swi vulaka.

1. Tilo ni misava swi sungulise ku yini?

Vasiyentixta va kholwa swaku matilo ni misava swi ve ni masungulu. Bibele na lona li vula swaku “a ku sunguleni Xikwembu xi tumbuluxe tilo ni misava.” (Genesa 1:1) Kambe xi swi yendlise ku yini leswo? Xikwembu xi tirhise matimba ya xona, ku nga moya wa ku kwetsima swaku xi yendla swilo hinkwaswu ku patsa ni maplaneta, tinyeleti ni ma galáxia ku nga mintlawa yayikulu ya tinyeleti. — Genesa 1:2.

2. Xikwembu xi yi yendlele yini misava?

Yehovha “a nga yi tumbuluxanga mahala [misava], kambe a yi yendle swaku ku tshamiwa ka yona.” (Esaya 45:18) Xikwembu xi yendle misava leswaku yi va ndhawu yayinene leyi vanhu a va ta tshama ka yona va tlhela va hanya wutomi la ku kala li nga heli. (Lerha Esaya 40:28; 42:5.) Vasiyentixta va pfumela swaku misava yi hambanile ni maplaneta laman’wani hikusa a ku na planeta lin’wani leli nga ni swilo hinkwaswu leswi nga kona lani misaveni leswi hi swi lavaka swaku hi kota ku hanya.

3. Hi mhaka muni vanhu va nga fani ni swiharhi?

Nkama Xikwembu xi nga yendla misava xi tlhele xi yendla minsinya ni swiharhi. Se Xikwembu xi game xi “vumba munhu hi xifaniso xa xona.” (Lerha Genesa 1:27.) Hi mhaka muni vanhu va li va lisima hintamu? I va lisima hikusa va yendliwe hi xifaniso xa Xikwembu, leswi vulaka swaku va nga swi kota ku tekelela wumunhu la xona la ku fana ni lirhandzu ni wululami. Xikwembu xi tlhele xi yendla swaku vanhu va kota ku djondza tirimi, ku yimbelela mamuzika ni swilo swin’wani leswi va kotaka ku swi yendla. Naswona ku hambana ni swiharhi, vanhu va nga swi kota ku tirhela Xikwembu.

DJONDZA SWIN’WANI

A hi voneni swilo swinharhu: 1) Leswi kombisaka swaku wutomi li yo yendliwa, 2) leswi kombisaka swaku leswi Bibele li swi vulaka hi ku yendliwa ka misava swa twisiseka ni 3) leswi hi nga swi djondzaka hi Xikwembu loko hi vona leswi vanhu va nga tshamisa xiswona.

4. A wutomi li yo yendliwa

Vanhu va khensiwa loko va yendla minchumu na va kopiyara leswi nga kona ka ntumbuluku. Se lweyi a nga yendla minchumu leyi nga ka ntumbuluku a fanele a khensiwa hintamu ku tlula vanhu. Sixtirani VHIDIYO, mi gama mi bula hi xivutiso lexi landzelaka.

VHIDIYO: Ku Va Ni Lipfumelo Ka Xikwembu (2:43)

• I mpsini leswi vanhu va nga swi yendla na va kopiyara ka ntumbuluku?

Tiyindlo hinkwatu ti yakiwa hi vanhu. Kambe i mani a nga yendla swilo hinkwaswu leswi nga kona ka ntumbuluku? Lerhani Vaheberu 3:4, mi gama mi bula hi swivutiso leswi landzelaka:

• A ntumbuluku wu tale hi swilo leswi nga yendliwa kahle. Hi swini swilo leswi nga kona ka ntumbuluku leswi ku tsakisaka?

• Wa kholwa swaku swilo hinkwaswu leswi nga kona ka ntumbuluku ku ni munhu lweyi a nga swi yendla? Hi mhaka muni?

Indjhe a wu swi tiva?

U nga kuma tinhlokomhaka ni mavhidiyo lawa ma vulavulaka hi mhaka leyi ka site la jw.org, lani ku nge “Swi Yo Yentxiwa?” ni lani ku nge “Mavonelo Ya Van’wana Hi Swaku Wutomi Li Sungulise Ku yini.”

“Yindlo yin’wani ni yin’wani yi yakiwa hi munhu, kambe lweyi a nga yendla minchumu hinkwayu i Xikwembu”

5. Hinkwaswu leswi Bibele li swi vulaka hi ku yendliwa ka swilo swa twisiseka

VHIDIYO: Matilo Ni Misava Swi Yo Yentxiwa? — Xiyenge (3:51)

• Indjhe Bibele li djondzisa swaku misava yi yendliwe hi 6 wa masiku lawa ma nga ni 24 wa mawora?

• U pimisa swaku leswi Bibele li swi vulaka hi ku yendliwa ka swilo swa twala? Hi mhaka muni?

Lerhani Genesa 1:1, mi gama mi bula hi xivutiso lexi landzelaka:

• Vasiyentixta va li tilo ni misava swi ve ni masungulu, leswo swi twananisa ku yini ni leswi wa ha ku gamaka ku swi lerha ka Bibele?

Vanhu van’wani va pimisa swaku Xikwembu xi yendle wutomi hi ku tirhisa ku tiyendlekela ka swilo. Lerhani Genesa 1:21, 25, 27, mi gama mi bula hi swivutiso leswi landzelaka:

• Ku nga va swaku Bibele li djondzisa swaku Xikwembu xi tirhise ku tiyendlekela ka swilo swaku xi yendla vanhu, tihlampfi ni swiharhi swin’wani? Kumbe Xikwembu xi yendle swiharhi hi ku ya hi mixaka ya swona?b

6. Vanhu va hambanile ni hinkwaswu leswi Xikwembu xi nga swi yendla

Hina vanhu a hi fani ni swiharhi. Lerhani Genesa 1:26, mi gama mi bula hi xivutiso lexi landzelaka:

• Vanhu va ni lirhandzu naswona va ni ntwelawusiwana hikusa va yendliwe hi xifaniso xa Xikwembu. Leswo swi hi djondzisa yini hi Yehovha?

LESWI HI NGA SWI DJONDZA

Yehovha a yendle swilo hinkwaswu ku patsa ni vanhu.

Ku kambela leswi hi nga swi djondza

• Bibele li vula swaku tilo ni misava swi sungulise ku yini?

• Indjhe Xikwembu xi tirhise ku tiyendlekela ka swilo swaku xi yendla swilo hinkwaswu kumbe xona hi xoxe xi yendle swilo hinkwaswu?

• Hi mhaka muni vanhu va li va lisima hintamu?

LOKO U LAVA KU TIVA SWIN’WANI

Vona swilo ka ntumbuluku leswi kombisaka swaku ku ni munhu lweyi a nga swi yendla.

“Hi Nga Djondza Yini Ka Leswi Xikwembu Xi Nga Swi Yentxa?” (Khindlimuka! wa Setembro wa 2006)

Vona swaku vapsali va nga va djondzisisa ku yini vana va vona vavatsongo leswi Bibele li swi vulaka hi ku yendliwa ka swilo.

“Yehovha . . . A Yentxe Minchumu Hinkwayu” (2:36)

Vona swaku indjhe swa twala ku va hi kholwa ka djondzo ya ku tiyendlekela ka swilo ni ka leswi Bibele li swi djondzisaka hi nkama wun’we ke?

“Xikwembu Xi Tirhise Ku Tiyentxekela Ka Swilo Swaku Xi Yentxa Minchumu Hinkwayu Leyi Hanyaka?” (Nhlokomhaka leyi nga ka site la jw.org)

Van’wani va vula swaku a swilo swa khale leswi nga kumiwa ni swilo leswi vasiyentixta va nga swi tsumbula swi kombisa swaku swilo hinkwaswu swi yo tiyendlekela. Indjhe leswo i ntiyiso?

Masungulo Ya Vutomi — Kuma Tinhlamulo Ta Swivutiso Swa Ntlhanu (broxura hi Xitsonga)