DJONDZO 09
Xikhongelo Xi Nga Tiyisa Wunghanu La Wena Ni Xikwembu
U tshama u kumana ni xikarhatu naswona u lava ku pfuniwa? U ni swivutiso swa lisima leswi u lavaka ku tiva tinhlamulu ta swona? U lava ku tiyisiwa u tlhela u seketeliwa? Wa swi navela ku va munghanu wamukulu wa Yehovha? Xikhongelo xi nga ku pfuna hintamu ka swiyimu leswi hinkwaswu. Kambe hi yini ndlela yayinene ya ku khongela? Ku nga va swaku Xikwembu xi yingisa swikhongelo hinkwaswu? U nga yendla yini swaku Xikwembu xi yingisa swikhongelo swa wena? A hi swi voneni.
1. Hi fanele hi khongela ka mani naswona hi kombela yini?
Yesu a hi djondzise swaku hi fanele hi khongela ka Papayi wa hina lweyi a nga matilweni. Na yena Yesu a yendle swoleswo. A te: “Mi fanele mi khongelisa xileswi: ‘Papayi wa hina lweyi a nga matilweni . . . ’” (Matewu 6:9) Loko hi khongela ka Yehovha, wunghanu la hina na yena li ya li kula.
Ka swikhongelo swa hina hi nga kombela xin’wani ni xin’wani. Kambe Xikwembu xi to hlamula swikhongelo leswi fambisanaka ni ku rhandza ka xona. Bibele li li: “Xikwembu xa hi twa loko hi kombela xin’wani ni xin’wani lexi fambisanaka ni ku rhandza ka xona.” (1 Yohani 5:14) Yesu a vulavule hi swin’wani leswi hi nga swi khongelelaka. (Lerha Matewu 6:9-13.) I ntiyiso swaku hi nga khongelela leswi hi swi lavaka kambe a hi fanelanga hi khohlwa ku khongelela van’wani ni ku khensa Xikwembu hi leswi xi hi yendlelaka swona.
2. Hi fanele hi khongelisa ku yini?
Swikhongelo swa hina swi fanele swi sukela mbilwini. Hi mhaka leyo Bibele li hi byela swaku hi fanele hi ‘chulula timbilu ta hina [ka Xikwembu].’ (Tipisalema 62:8) Hi nga khongela hi rito la ku twakala kumbe hi le mbilwini. Naswona hi nga khongela hi nkama lowu hi wu lavaka ni ka ndhawu leyi hi yi lavaka. A ku na mhaka swaku hi khongela na hi nyimile, na hi tshamile, na hi khizamile kumbe na hi li ka xiyimu xin’wani, a xa lisima i ku kombisa swaku ha mu hlonipha Yehovha.
3. Xikwembu xi swi hlamulisa ku yini swikhongelo swa hina?
Xikwembu xi hlamula swikhongelo swa hina hi tindlela ta ku hambanahambana. Hi xikombiso, ka Bibele hi kuma tinhlamulu ta swivutiso swa swinyingi leswi hi nga na swona. Ku lerha Bibele swi nga “tlharihisa lweyi a kalaka a nga na xiperiyensa.” (Tipisalema 19:7; Lerha Yakobe 1:5.) Yehovha a nga tlhela a yendla swaku timbilu ta hina ti rhula loko hi kumana ni swikarhatu. Naswona a nga tirhisa vamakwerhu swaku va hi pfuna loko hi lava ku pfuniwa.
DJONDZA SWIN’WANI
Vona swaku u fanele u yendla yini swaku Xikwembu xi yingisa swikhongelo swa wena leswi u swi yendlaka hi mbilu hinkwayu naswona vona swaku ku yendla swikhongelo swi nga ku pfunisa ku yini.
4. Hi fanele hi yendla yini swaku Xikwembu xi yingisa swikhongelo swa hina?
I yini leswi hi faneleke hi swi yendla swaku Xikwembu xi yingisa swikhongelo swa hina? Sixtirani VHIDIYO.
Yehovha a lava swaku hi khongela ka yena. Lerhani Tipisalema 65:2, mi gama mi bula hi swivutiso leswi landzelaka:
U pimisa swaku “Mutwi wa xikhongelo” a lava leswaku wena u khongela ka yena? Hi mhaka muni u swi vonisa xileswo?
Leswaku Xikwembu xi yingisa swikhongelo swa hina, hi fanele hi hanya hi ndlela leyi xi yi tsakelaka. Lerhani Mikiya 3:4 ni 1 Pedru 3:12, mi gama mi bula hi xivutiso lexi landzelaka:
Hi nga tiyisekisa ku yini swaku Yehovha wa swi lava ku yingisela swikhongelo swa hina?
Ka nkama wa nyimpi, mintlawa ya masonchwa leyi lwisanaka yi nga ha khongela yi kombela swaku yi hlula a nyimpini. U pimisa swaku Xikwembu xi nga swi hlamula swikhongelo leswo?
5. Swikhongelo swa hina swi fanele swi sukela mbilwini
Vanhu van’wani va djondzisiwe swaku loko va khongela va fanele va phindhaphindha marito ya ku fana. Kambe ku nga va swaku hi swoleswo Xikwembu xi swi lavaka? Lerhani Matewu 6:7, mi gama mi bula hi xivutiso lexi landzelaka:
U nga yendla yini swaku “u nga phindhaphindhi minchumu ya ku fana” loko u khongela?
Siku ni siku zama ku pimisa hi nchumu lowu Yehovha a nga ku yendlela wona u gama u khongela u mu khensa. Loko siku ni siku u yendla leswo u ta vona swaku loko ku hela vhiki u ta va u khongelile hi 7 wa minchumu ya ku hambana na u nga zanga u phindhaphindha swilo swoleswi swa swin’we.
Hi ntolovelo papayi wa tsaka loko n’wana wa yena a vulavula na yena swi suka mbilwini. Na yena Yehovha, wa tsaka loko hi khongela swi suka mbilwini
6. Xikhongelo i nyiko leyi taka hi ka Xikwembu
Ku khongela swi nga hi nyikisa ku yini matimba ngopfungopfu hi nkama wa ku karhata? Sixtirani VHIDIYO.
A Bibele li li loko hi khongela hi ta kuma ku rhula ka ntiyiso. Lerhani Vafilipiya 4:6, 7, mi gama mi bula hi swivutiso leswi landzelaka:
I ntiyiso swaku loko hi khongela a hi minkama hinkwayu swikarhatu swi nga ta nyamalala. Hambileswo, hi mhaka muni xikhongelo xi li xa lisima?
U navela ku khongelela yini?
Indjhe a wu swi tiva?
A rito leli nge “amen” li vula swaku “a swi yendleke” kumbe “a swi ve tanu.” Ku sukela khale ka nkama lowu Bibele li nga tsaliwa hi wona, a rito leli a li tirhisiwa loko va gama ku khongela. — 1 Tikronika 16:36.
7. Tinyiki nkama wa ku khongela
Phela minkama yin’wani hi nga ha va ni minchumu ya yinyingi ya ku yi yendla hi za hi khohlwa ni ku khongela. Ku nga va swaku ku khongela a swi li swa lisima ka Yesu? Lerhani Matewu 14:23 ni Marka 1:35, mi gama mi bula hi swivutiso leswi landzelaka:
Yesu a a yendla yini swaku a kuma nkama wa ku khongela?
Wena u nga yendla yini swaku u kuma nkama wa ku khongela?
VAN’WANI VA LI: “Xikhongelo xo yendla swaku hi titwa kahle ntsena kambe a xi pfuni nchumu.”
Wena a wu ta ku yini?
LESWI HI NGA SWI DJONDZA
Swikhongelo leswi hi swi yendlaka hi mbilu hinkwayu swi nga hi pfuna swaku hi va ni wunghanu la ku tiya ni Xikwembu, hi va ni ku rhula swi tlhela swi hi nyika ntamu lowu hi wu lavaka leswaku hi yendla swilo leswi tsakisaka Xikwembu.
Ku kambela leswi hi nga swi djondza
Swikhongelo swa hina hi fanele hi swi yisa ka mani?
Hi fanele hi khongelisa ku yini?
Ku khongela swi nga hi pfunisa ku yini?
LOKO U LAVA KU TIVA SWIN’WANI
Kuma tinhlamulu ta swivutiso leswi yelanaka ni xikhongelo.
Djondza swaku hi mhaka muni u fanele u khongela ni leswaku u nga yendla yini swaku u yampsisa swikhongelo swa wena.
“Hi Mhaka Muni Ni Fanele Ni Khongela?” (Nhlokomhaka leyi nga ka site la jw.org)
Swikhongelo swa hina hi fanele hi swi yisa ka mani? Vona leswi Bibele li swi djondzisaka ka mhaka leyi.
“Ni Fanele Ni Khongela Ka Vakwetsimi?” (Nhlokomhaka leyi nga ka site la jw.org)
Ka lisimu leli, vona swaku swa koteka kuva u khongela na wu li ka ndhawu yin’wani ni yin’wani ni hi nkama lowu u wu lavaka.