DJONDZO 11
U Nga Yendla Yini Swaku U Pfuneka Loko U Lerha Bibele?
U tshama u lava ku yendla ntirho wawukulu hintamu lakakuva u godola hambi hi ku wu sungula? Swi nga yendleka u wu yendle hi kutsongokutsongo. Swa fana ni ku lerha Bibele. U nga ha tivutisa u ku: ‘Ni ta sungula hi kwini?’ Ka djondzo leyi hi ta vona swaku i yini leswi nga ku pfunaka ku lerha Bibele u tlhela u tsaka hi ku li lerha.
1. Hi mhaka muni hi fanele hi lerha Bibele?
Munhu lweyi a lerhaka Bibele kumbe “nawu wa Xikwembu” nkama ni nkama a ta tsaka funtshi swilo swi ta mu fambela kahle. (Lerha Tipisalema 1:1-3.) Leswaku u sungula ku lerha Bibele u nga sungula hi ku lerha nkamanyana wawutsongo hi siku. Loko u tama u yendla leswo u ta ya u swi rhandza ku lerha Rito la Xikwembu.
2. U nga yendla yini swaku u pfuneka loko u lerha Bibele?
Leswaku hi pfuneka loko hi lerha Bibele hi fanele hi pimisa hi leswi hi swi lerhaka. Leswi vulaka swaku hi fanele hi ‘gayela hi swona.’ (Yoxuwa 1:8, ntlhamuselo) Loko u djondza tivutisi leswi: ‘Leswi ni swi djondzaka swi ni djondzisa yini hi Yehovha? Ni nga swi tirhisisa ku yini ka wutomi la mina? Ni nga va pfunisa ku yini vanhu van’wani?’
3. U nga yendla yini swaku u kuma nkama wa ku lerha Bibele?
Vanhu va vanyingi swa va karhatela ku kuma nkama wa ku lerha Bibele. Kambe zama ku “wu tirhisa kahle nkama” wa wena. (Vaefeza 5:16) U nga yendla leswo hi kuva u tivekela nkama siku ni siku swaku u lerha Bibele. Van’wani va vona swi yampsa ku lerha nimixo, van’wanyani va lerha ninhlikanhi hi nkama wa ku dla, se van’wani va lerha nimadlambu na va nga se ya yetlela. Wena ke, hi wini nkama lowu u vonaka swaku wu kahle ka wena?
DJONDZA SWIN’WANI
Vona swaku u nga yendla yini leswaku ku lerha ka wena ka Bibele ku tsakisa. Tlhela u vona swaku u nga tilunghiselelisa ku yini swaku u pfuneka ka djondzo ya wena ya Bibele.
Ku fana ni leswi hi nga djondzaka ku dla swakudla swa ku hambana, hi nga djondza ku rhandza ku lerha Bibele
4. Tsakela ku lerha Bibele
I ntiyiso swaku swi nga hi karhatela ku sungula ku lerha Bibele. Kambe loko hi ya hi lerha hi ta ya hi swi rhandza ku li djondza. Swi fana ni ku dla swakudla swa ku a hi se tshama hi swi dla. Lerhani 1 Pedru 2:2, mi gama mi bula hi xivutiso lexi landzelaka:
U pimisa swaku ku lerha Bibele siku ni siku swi ta ku yendla u ya u swi rhandza ku li lerha?
Sixtirani VHIDIYO leswaku mi vona leswi nga pfuna vanhu van’wani swaku va rhandza ku djondza Bibele. Mi gama mi bula hi swivutiso leswi landzelaka.
Hi swini swikarhatu leswi majovhem lawa ma nga kombisiwa ka vhidiyo a ma kumana na swona?
I yini swi nga pfuna majovhem lawa swaku ma nga tshiki ku lerha Bibele siku ni siku?
I mpsini leswi ma nga swi yendla swaku ma rhandza ku lerha Bibele?
Leswi u nga swi yendlaka swaku u sungula ku lerha Bibele:
Langa Bibele la ku tshembeka naswona li kalaka li nga karhati ku li twisisa. U nga ha tirhisa Wuhundzuluxeli La Misava Ya Nyuwani leli nga kona hi tirimi ta tinyingi.
Sungula ku lerha hi lomu u ku rhandzaka hintamu. Vona swin’wani leswi u nga swi yendlaka ka kwadru le li nge: “Sungula Ku Lerha Bibele.”
Markara lomu se u nga lerha. U nga ha tirhisa kwadru leli nge: “Markara Lani U Nga Lerha”.
Tirhisa aplikativhu la JW Library®. Ka aplikativhu leli u nga lerha ni ku yingisela Bibele hi ka telefoni, ka thableti kumbe ka komputadori.
Tirhisa swiyengetelo swa Wuhundzuluxeli La Misava Ya Nyuwani. Ka swiyengetelo leswi ku ni mimapa, makwadru ni ntlhamuselo wa marito, leswi nga ta yendla swaku ku lerha ka wena ka Bibele ku tsakisa.
5. Lunghiselela djondzo ya wena ya Bibele
Lerhani Tipisalema 119:34, mi gama mi bula hi xivutiso lexi landzelaka:
Hi mhaka muni u fanele u khongela loko u lava ku lerha Bibele kumbe ku lunghiselela djondzo ya wena ya Bibele?
U nga yendla yini swaku u pfuneka loko u djondza? Loko u lunghiselela, zama ku yendla leswi:
Lerha maparagrafu ya ku sungula ya djondzo.
Lerha tindzimana ta Bibele, u gama u vona swaku ti twananisa ku yini ni leswi u swi djondzaka.
Markara nhlamulu ya xivutiso, leswo swi ta ku pfuna swaku u bula ni mudjondzisi wa wena loko mi djondza.
Indjhe a wu swi tiva?
Timboni ta Yehovha ti tirhisa Mabibele ya ku hambanahambana kambe ti rhandza hintamu Wuhundzuluxeli La Misava Ya Nyuwani La Matsalwa Ya Ku Kwetsima hikusa la tshembeka, li vevukile ku li twisisa naswona li tirhisa vito la Xikwembu. — Vona nhlokomhaka leyi nga ka site la jw.org leyi nge “Timboni Ta Yehovha Ti Tirhisa Bibele La Ku Hambana?”
VAN’WANI VA LI: “Ku djondza Bibele swa karhata. Mina a ni na nkama naswona ni tshama na ni karhalile.”
Wena u swi vonisa ku yini?
LESWI HI NGA SWI DJONDZA
Leswaku u pfuneka hi leswi Bibele li swi djondzisaka, tivekeli nkama wa ku djondza Bibele, khongela swaku u twisisa leswi u swi djondzaka. U tlhela u lunghiselela kahle djondzo yin’wani ni yin’wani.
Ku kambela leswi hi nga swi djondza
U nga yendla yini swaku u pfuneka hi leswi Bibele li swi djondzisaka?
Hi wini nkama wa kahle lowu u nga wu tirhisaka swaku u djondza Bibele siku ni siku?
Hi mhaka muni swi pfuna ku lulamisela djondzo ya wena ya Bibele?
LOKO U LAVA KU TIVA SWIN’WANI
Vona swilo swin’wani leswi nga yendlaka swaku ku lerha ka wena ka Bibele ku tsakisa.
“Ndlela Leyi U Nga Pfunekaka Ha Yona Loko U Hlaya Bibele” (Murindzi wa N.o 1 wa 2017 hi Xitsonga)
Vona tindlela tinharhu leti u nga ti tirhisaka swaku u lerha Bibele.
Vona leswi nga ku pfunaka swaku u rhandza ku lerha Bibele.
Kombela ku pfuniwa hi vanhu lava se va nga ni malembe ya manyingi na va lerha Bibele.