DJONDZO 34
Hi Nga Swi Kombisisa Ku Yini Swaku Ha Mu Rhandza Yehovha?
U titwisa ku yini swoswi loko u fananisa ni nkama lowu u nga sungula ku djondza hi wona Bibele? U vona swaku u ya u mu rhandza hintamu Yehovha? Ku nga va swaku u navela ku tama u kulisa wunghanu la wena na yena? Loko u swi navela, khumbuka swaku Yehovha a tsaka hintamu loko a vona swaku wa mu rhandza naswona na yena a ta ku rhandza a tlhela a ku hlayisa. Kambe i mpsini leswi u nga swi yendlaka kuva u kombisa swaku wa mu rhandza Yehovha?
1. Hi nga swi kombisisa ku yini swaku ha mu rhandza Yehovha?
Loko hi yingisa Yehovha hi kombisa swaku ha mu rhandza. (Lerha 1 Yohani 5:3.) A lava swaku mun’wani ni mun’wani a langa swaku a ta mu yingisa kumbe a nga ta mu yingisa, hikusa a lava swaku hi mu yingisa “hi mbilu hinkwayu.” (Varoma 6:17) Hi marito man’wani swi lava ku vula swaku a lava hi mu yingisa hileswi hi mu rhandzaka ku nga li hi ku sindzisiwa. Xiyenge 3 ni 4 xa buku leli xi ta hi pfuna kuva hi mu rhandza Yehovha hi ku yendla leswi a swi rhandzaka ku nga li ku yendla leswi swi mu kwatisaka.
2. Hi mhaka muni minkama yin’wani swi karhata ku kombisa swaku ha mu rhandza Yehovha?
Bibele li li: “I manyingi makhombo ya lweyi wa ku lulama”. (Tipisalema 34:19) Minkama yin’wani swa karhata ku kombisa swaku ha mu rhandza Yehovha hikusa hi ni xidjoho naswona hi kumana ni swikarhatu swa ku hambanahambana ka wutomi la hina, swa ku fana ni ku pfumala male, ku xanisiwa ni ku kanganyisiwa. Loko hi kumana ni swikarhatu hi nga ha pimisa swaku xa ku yampsa i ku yendla leswi Yehovha a kalaka a nga swi rhandzi. Kambe loko hi tama hi tshembeka ka Yehovha hi yendla leswi a swi lavaka, hi ta va hi kombisa swaku Yehovha hi mu rhandza hintamu ku tlula swilo hinkwaswu funtshi loko hi yendla leswo a ta hi katekisa a tlhela a hi vhikela naswona a nge hi tshiki. — Lerha Tipisalema 4:3.
DJONDZA SWIN’WANI
Vona swaku hi mhaka muni Yehovha a tsaka loko u mu yingisa ni swaku u nga yendla yini leswaku u tshembeka ka yena.
3. Mhaka leyi yi ku khumbaka
Ka buku la Yobo hi djondza swaku Sathana a lumbete Yobo a tlhela a lumbeta ni vanhu hinkwavu lava tirhelaka Yehovha. Lerhani Yobo 1:1, 6–2:10, mi gama mi bula hi swivutiso leswi landzelaka:
Sathana a vule swaku Yobo a a yingisa Yehovha hi mhaka muni? — Vona Yobo 1:9-11.
I mpsini leswi Sathana a nga swi vula hi vanhu hinkwavu ku patsa na wena? — Vona Yobo 2:4.
Lerhani Yobo 27:5b, mi gama mi bula hi xivutiso lexi landzelaka:
Yobo a swi kombisise ku yini swaku a a mu rhandza Yehovha hikakunene?
Yobo a kombise swaku a a mu rhandza Yehovha hi ku tshama a tshembekile ka yena
Hi kombisa swaku ha mu rhandza Yehovha hi ku tshama na hi tshembekile ka yena
4. Tsakisa mbilu ya Yehovha
Lerhani Swivuriso 27:11, mi gama mi bula hi swivutiso leswi landzelaka:
Yehovha a titwisa ku yini loko u yendla swilo swaswinene u tlhela u mu yingisa? Hi mhaka muni?
5. U nga swi kota ku tshembeka ka Yehovha
Ku rhandza Yehovha swi hi yendla hi chumayela vanhu hi tlhela hi va djondzisa hi yena. Phela a hi yingisi Yehovha loko swi vevuka ntsena, kambe hi mu yingisa minkama hinkwayu hambiloko swi karhata. Sixtirani VHIDIYO, mi gama mi bula hi swivutiso leswi landzelaka.
Indjhe swa ku karhatela ku vulavula ni vanhu van’wani hi Yehovha?
Ka vhidiyo i mpsini leswi nga pfuna Gérson swaku a nga chavi?
Swa vevuka ku tshembeka ka Yehovha loko hi rhandza leswi a swi rhandzaka, hi nyenya leswi a swi nyenyaka. Lerhani Tipisalema 97:10, mi gama mi bula hi swivutiso leswi landzelaka:
Ka leswi se u nga swi djondza u vona swaku i mpsini leswi Yehovha a swi rhandzaka naswona i mpsini leswi Yehovha a swi nyenyaka?
U nga swi kotisa ku yini ku rhandza swaswinene u nyenya swa ku biha?
6. Ku yingisa Yehovha i swinene
I swinene ku yingisa Yehovha minkama hinkwayu. Lerhani Esaya 48:17, 18, mi gama mi bula hi swivutiso leswi landzelaka:
U pimisa swaku Yehovha wa swi tiva swaswinene leswi hi faneleke hi swi yendla? Hi mhaka muni?
Leswi u nga swi djondza hi Yehovha ka Bibele swi ku pfunise ku yini anze swoswi?
VAN’WANI VA LI: “Xikwembu a xi na mhaka ni leswi hi swi yendlaka.”
Hi yini ndzimana ya Bibele leyi u nga yi tirhisaka swaku u komba munhu swaku leswi hi swi yendlaka swi nga yendla Yehovha a tsaka kumbe a vaviseka?
LESWI HI NGA SWI DJONDZA
U nga kombisa swaku wa mu rhandza Yehovha hi ku mu yingisa u tlhela u tshembeka ka yena hambiloko u kumana ni swikarhatu.
Ku kambela leswi hi nga swi djondza
U djondze yini ka xikombiso xa Yobo?
U nga swi kombisisa ku yini swaku wa mu rhandza Yehovha?
I mpsini swi nga ku pfunaka swaku u tshama u tshembekile ka Yehovha?
LOKO U LAVA KU TIVA SWIN’WANI
Vona swaku u nga yendla yini swaku u tshembeka ka Yehovha ni ka vamakwerhu abandleni.
“Yehovha Wa Tshembeka Ka Lweyi A Tshembekaka Ka Yena” (16:45)
Djondza swin’wani ka leswi Sathana a nga lumbeta Yobo ni vanhu hinkwavu hi swona.
“Yobo A Tame A Tshembeka” (Bibele — I Mpsini Leswi Nga Tsaliwa Ka Lona? xiyenge 6)
Vona swaku hambi hi swivanani swi nga swi kota ku tshembeka ka Yehovha.
I mpsini leswi nga pfunaka jovhem kuva li tshembeka ka Yehovha hambiloko li xengeteliwa ku yendla swa ku biha hi majovhem man’wani?