Janeiro

Yin’wani ya minkama ya ku tsakisa leyi nuna na nsati va vaka na yona, hi loko va kuma n’wana wa vona wa ku sungula. Hambileswi va mu rhandzaka hintamu n’wana wa vona, va nyimela swaku hi ku famba ka nkama a ya a kula. Naswona a va ta karhateka loko n’wana wa vona a wo tshama ka ndhawu yin’we a nga kuli. Hilani ku fanaka, hambileswi Yehovha a tsakaka loko hi sungula ku djondza hi yena, a nyimela swaku hi ku famba ka nkama hi ya hi va Vakreste va ku wupfa. (1 Ko. 3:1) Hi yona mhaka a hi kombelaka swaku hi ‘kula hi ku helela’. Ka Bibele a rito leli nge ‘ku kula hi ku helela,’ hi Xigriki li nga ha tlhela li vula “ku wupfa” kumbe “nchumu xa ku helela.” (1 Ko. 2:6) Se ku fana ni leswi xin’wanani xi tamaka xi kula xi va munhu wamukulu, na hina hi fanele hi tama hi kulisa wunghanu la hina na Yehovha; se loko hi yendla leswo hi ta va vanhu va ku wupfa. Naswona hambiloko se hi li Vakreste va ku wupfa a hi fanelanga hi gamela kolanu, kambe hi fanele hi tama hi yampsisa. — 1 Tm. 4:15. Murindzi 04/24 paj. 2 mapar. 1, 3

Loko munhu a wo ku vutisa swaku u mu vonisa ku yini Yehovha, a wu ta ku yini? Kumbexana a wu ta ku ‘i Papayi wa mina, i Xikwembu xa mina kumbe Munghanu wa mina.’ Ku ni tindlela ta ku tala leti hi nga mu vitanaka hi tona Yehovha ni ku tlhamusela leswi a nga tshamisa xiswona. Kambe u tshama u pimisa leswaku Yehovha wa hi yamukela tanihi vapfhumba va yena? Loko Davhida a vulavula hi ku va ni wunghanu na Yehovha a vule leswaku Yehovha a rhamba vanhu va yena leswaku va va vapfhumba va yena. Davhida a vutise leswi: “Yehovha Xikwembu xanga, i mani lweyi a nga vaka mupfhumba ka tende la wena? I mani lweyi a nga tshamaka ka ntshava ya wena ya ku kwetsima?” (Ps. 15:1) Ka ndzimana leyi, hi djondza leswaku hina hi nga swi kota ku va vapfhumba ka tende la Yehovha, ku nga ku va vanghanu va yena. Na a nga se na maha swilo hinkwaswu, Yehovha a a tshama yexe kambe a game a yendla Yesu. Leswo a swo fana ni loko Yehovha a rhambe Yesu kuva a va mupfhumba wa ku sungula ka tende la yena. Yehovha a tsakile swinene hi leswo. Bibele li vula swaku ‘a a swi rhandza hintamu’ ku tshama na Yesu. Na yena Yesu a a swi tsakela ku tshama na Yehovha. Yena a te: “A ni tsakile phambheni ka yena nkama hinkwawu.” — Swiv. 8:30. Murindzi 06/24 paj. 2 mapar. 1-3

Pimisa hi mhaka leyi: Xitshungu lexi tlulaka 340.000 wa vavanuna va patsanile hi nkama lowu Davhida a nga va hosi aIsrayele. Xitshungu lexi xi hete masiku manharhu na xi li ka ntshava a kusuhi ni Hebroni. Phela vona a va tsakile hintamu, a va bula, va yimbelela tinsimu va dzunisa Yehovha. (1 Tik. 12:39) Ndzeni ka xitshungu lexi a ku ni jovhem lin’wani leli vitaniwaka Zadoki. Phela Yehovha a yendle swaku hi swi tiva swaku a jovhem leli a li li kona ka xitshungu lexiya. (1 Tik. 12:22, 26-28) Zadoki a a li muprista lweyi a a tirha ni Muprista Wamukulu Abiyatari. Yehovha a nyike Zadoki wutivi ni wutlharhi la ku kota ku twisisa ku rhandza ka yena. (2 Sa. 15:27) Zadoki a a li wanuna lweyi a a nga chavi nchumu. Ka masiku ya wugamu lawa hi hanyaka ka wona, Sathana a yendla hinkwaswu leswi a nga swi kotaka swaku a hlasela vanhu va Yehovha. (1 Pe. 5:8) Se nkama lowu hi nyimelaka swaku Yehovha a helisa Sathana ni misava leyi ya ku biha, hi fanele hi tiya nhlana hi nga chavi nchumu. (Ps. 31:24) Hi ku yendla leswo hi ta va na hi tekelela Zadoki. Murindzi 07/24 paj. 2 mapar. 1-3

A nkama lowu Yehovha a nga hamba wanuna wa ku sungula ni wansati wa ku sungula, ku nga Adamu na Evha, a a lava leswaku va hanya wutomi la ku tsakisa na va nga na xidjoho. Yena a va nyike a kaya la ku xonga, a va nyika swilo hinkwaswu leswi a va swi lava leswaku va tsaka, a tlhela a va nyika ntirho lowu a va fanele va wu yendla. Naswona a va byele leswaku a va fanele va psala vana va tlhela va yendla leswaku misava hinkwayu yi va paradesi. Kambe ku ni nsinya lowu Yehovha a nga va byela leswaku a va nga fanelanga va dla mafruta ya wona hikusa loko a vo yendla leswo a va ta fa. Se hinkwerhu ha swi tiva leswi swi nga gama swi yendleka. Adamu na Evha va pfumele ku xengiwa hi Sathana lweyi a a nga va rhandzi a tlhela a nga xi hloniphi Xikwembu, naswona va djohile. Hi mhaka leyo, hinkwerhu ha guga, ha vabya hi tlhela hi fa. — Gen. 1:28, 29; 2:8, 9, 16-18; 3:1-6, 17-19, 24. Murindzi 08/24 paj. 3 par. 3

Yehovha ni N’wana wa yena lweyi a mu rhandzaka va lava leswaku minkama hinkwayu hi tshama na hi tsakile. Buku la Tipisalema 119:2 li li: “Va tsaka lava yingisaka switsundzuxu swa yena lava va mu lavetelaka hi mbilu hinkwayu.” Yesu na yena a tshembise leswaku “va tsaka lava twaka rito la Xikwembu va tlhela va yendla leswi li swi vulaka!” (Luk. 11:28) Vanhu va Yehovha amisaveni hinkwayu va tiviwa na va li vanhu lava nga tsaka. Phela nchumu xa lisima hintamu lexi hi yendlaka hi tsaka hi leswi hi lerhaka Bibele nkama ni nkama hi tlhela hi tinyimisela ku tirhisa hinkwaswu leswi hi swi djondzaka ka lona. (Yak. 1:22-25) Loko hi yendla leswi Yehovha a swi lavaka mbilu ya yena ya tsaka, leswo swa hi tsakisa hintamu swinene. (Ekl. 12:13) Naswona loko hi tirhisa leswi nga ka Bibele ka wutomi la hina hi ta va ni ntsaku andjangwini naswona hi ta hanyisana kahle ni vamakwerhu bandleni, funtshi hi ta fambela kule ni swikarhatu swa swinyingi leswi vanhu lava kalaka va nga mu yingisi Yehovha va kumanaka na swona namuntlha. Ha pfumelelana na yena hosi Davhida lweyi loko se a yimbelelile hi minawu ni switsundzuxu swa Yehovha a nga gama a vula swaku: “Swa pfuna hintamu ku swi yingisa.” — Ps. 19:7-11. Murindzi 09/24 paj. 2 mapar. 1-3

Yehovha wa swi vona swilo hinkwaswu leswi yendlekaka lani misaveni. Wa hi vona loko hi tsakile a tlhela a hi vona ni loko hi vavisekile. (Ps. 37:18) Phela wa yi vona minzamu hinkwayu leyi hi yi yendlaka swaku hi tama hi mu tirhela hambiloko ku ni leswi swi hi tsonaka wurhongo ka wutomi la hina, funtshi wa yi tlangela minzamu yoleyo. Naswona Yehovha a swi lava hintamu ku hi pfuna a tlhela a hi tiyisa ka swilo leswi hi kumanaka na swona. Tipisalema 147:3 yi vula leswaku Yehovha a daha swilondza swa lava nga vaviseka mbilwini. A ka ndzimana leyi, Yehovha a fanisiwa ni munhu lweyi a dahaka munhu mun’wani lweyi a nga vavisiwa. Kambe hi fanele hi yendla yini leswaku Yehovha a za a hi pfuna loko hi li ka xiyimu lexo? Pimisa hi xikombiso xa munhu lweyi a nga ni xilondza, lweyi a nga vavisiwa a gama a ya ka dotori leswaku a ya mu daha. Leswaku a kota ku dahiwa, a fanele a yendla hinkwaswu leswi dotori a nga ta mu byela swona. Yehovha a tirhisa Bibele leswaku a vulavula ni lava nga vaviseka ambilwini ni swaku a va pfuna hi ndlela ya lirhandzu. Murindzi 10/24 paj. 6 mapar. 1-2

Ku sukela khale mabuku ya hina ma vulavula hi leswi nga ta yendleka hi vanhu lava Yehovha a va vonaka na va nga lulamanga. A ma vula swaku a vanhu volavo a va na ntshembo wa ku pfuxiwa ka nkama lowu taka. Bibele li ni swikombiso swin’wani swa wuyavanyisi la Yehovha ka vanhu va ku kala va nga lulamanga. Hi xikombiso, Yehovha a helise vanhu hi ku tirhisa Ndhambi ka masiku ya Nowa naswona Vayisrayele va helise 7 wa matiko lawa a ma tshama ka Tiko la Xitshembiso, funtshi hi wusiku lin’we Yehovha a tirhise ntsumi swaku a dlaya 185.000 wa masonchwa ya Vaasiriya. (Det. 7:1-3; Esa. 37:36, 37) Ka timhaka leti, ku nga va leswaku Bibele li hi byela hinkwaswu kuva hi vula na hi tiyiseka swaku Yehovha a va helisile swa wugamu vanhu lava? Nada, a hi swona leswo. Ka swikombiso leswi se hi nga swi vona, a hi swi tivi swaku Yehovha a mu yavanyisise ku yini mun’wani ni mun’wani wa vona naswona a hi swi tivi swaku lava nga dlayiwa va ve na wona nkama wa ku djondza hi Yehovha va tlhela va tisola. Murindzi 05/24 paj. 3 mapar. 5-7

Ka khambi lin’wani Yesu a tirhise xifaniso xin’wani lexi a xi vulavula hi wansati lweyi a nga kombela muyavanyisi leswaku a yi thetha kahle mhaka ya yena. Xifaniso lexi xi va khumbile vadjondzisiwa va Yesu, hikusa ka nkama lowuyani a swi tolovelekile leswaku vanhu va yendleliwa swa ku biha, kumbe timhaka ta vona ti nga thethiwi kahle. (Luk. 18:1-5) Ninamuntlha vanhu va tama va yendlela vanhu van’wani swilo wa ku biha, se hi mhaka leyo xifaniso lexi xi nga hi pfuna na hina. Ka misava leyi namuntlha vanhu va ni xikheto funtshi swi tolovelekile kuva va va yendlela swa ku biha van’wani. Se a swi hi hlamalisi loko vanhu va hi yendlela swa ku biha. (Ekl. 5:8) Kambe leswo a hi swi nyimelanga ka vamakwerhu. Hambileswo, minkama yin’wani va nga hi yendlela swa ku biha, kambe a vo swi yendla hi maxivomu swo va phazamisa hikusa a va hetisekanga. Se loko swi tshuka swi hi yendlekela hi nga tekelela a xikombiso xa Yesu hikusa yena a a tama a lehisa mbilu hambiloko van’wani va mu yendlela swa ku biha. Leswi hi swi kotaka ku va lehisela mbilu vanhu lava va kalaka va nga tirheli Yehovha loko va tshuka va hi yendlela swa ku biha, swi laveka hintamu kuva hi yendla leswi fanaka ni loko hi yendleliwa swa ku biha hi vamakwerhu. Phela loko hi tekelela Yesu hi ta swi kota ku va lehisela mbilu van’wani, ku nga na mhaka swaku i vamakwerhu kumbe a hi vamakwerhu. Murindzi 11/24 paj. 2 mapar. 1-2

Pawu a ku li swakudla swa lisima hintamu ka vanhu va minkama ya Bibele lakaku minkama yin’wani a Bibele li tirhisa rito leli nge “pawu” leswaku li vulavula hi swakudla. (Gen. 14:18; Luk. 4:4; Mat. 6:11) Hambi hi Yesu a li tirhisile pawu ka masingita ya mambirhi lawa a nga ma yendla lawa ma tiviwaka hintamu. (Mat. 16:9, 10) Lin’we la masingita wolawo li kumeka ka buku la Yohani ndzima 6. Vapostolo va Yesu a va ha ku fika hi ka liyendzo lani a va ya ku chumayeleni naswona a va karhalile hintamu; kutani a fambe na vona hi boti va ya ka tlhelo lin’wani la Galileya leswaku va ya humula. (Mar. 6:7, 30-32; Luk. 9:10) Va ye ka ndhawu leyi a ku nga na vanhu, kusuhi ni doropa la Betisayida. Kambe ku game ku humelela vanhu va vanyingi lava a va lava ku vona Yesu. Phela Yesu a nga yendlanga ingaku a nga va voni vanhu lavayani, ku hambana ni leswo, a va kombe wunene a tirhisa nkama wa yena swaku a va djondzisa hi Mfumu wa Xikwembu ni ku hanyisa lava a va vabya. Nkama a li ya li pela, vadjondzisiwa va sungule ku karhateka hi leswaku vanhu hinkwavu lavayani a va ta swi kuma kwini swakudla. Swi nga yendleka vanhu van’wani a va li na swona swakudlanyana, kambe va ku tala a swi ta lava va ya doropeni leswaku va ya xava. — Mat. 14:15; Murindzi 12/24 paj. 2 mapar. 1-2

Vapsali va hina Adamu na Evha a va ni tshomba la linyingi naswona a va tshama ka ndhawu ya ku xonga lani a va ta hanya wutomi la ku kala li nga heli. (Gen. 1:27; 2:7-9) Kambe hi ku tsopeta ka tihlo hinkwaswu swi helile, naswona tshomba leli va nga li siyela vana va vona ku ve xidjoho ni lifu. (Ps. 49:8) Hi leswo Bibele li swi vulaka ka Varoma 5:12, loko li ku: “Hi mhaka leyo, leswi xidjoho xi nga nghena misaveni hi munhu mun’we na lona lifu li nghenile hi mhaka ya xidjoho, se lifu li tlulele vanhu hinkwavu hikusa hinkwavu va djohile.” Yesu a fananise swidjoho ni swikweneti. (Mat. 6:12; Luk. 11:4) Loko hi djoha swi fana ni loko hi txeneka nchumu ka Yehovha. Phela swi lava ku hakeliwa. Se xikweneti lexi hi to tshika ku va na xona ntsena loko hi fa, kambe na ha ha hanya hi ta tama hi va na xona. — Rom. 6:7. Murindzi 02/25 paj. 2 mapar. 2-3

Hi ni nkateko wawukulu wa ku va hi bula ni vanhu van’wani hi Mfumu wa Xikwembu. Phela nkateko lowo a wu kumiwi hi mun’wani ni mun’wani. Hi xikombiso, nkama Yesu na a li lani misaveni a nga ma pfumelelanga madimoni swaku ma vulavula hi yena. (Luk. 4:41) Ninamuntlha, munhu na a nge se pfumeleliwa leswaku a chumayela ni Timboni ta Yehovha, a fanele a rhanga hi ku hanya hi ndlela leyi tsakisaka Yehovha. Se hina hi kombisa swaku ha wu khensa nkateko lowu hi nga na wona wa ku chumayela mahungu ya ku tsakisa, hi ku chumayela ka xiyimu xin’wani ni xin’wani lexi hi nga ka xona loko hi pfulekeliwa hi nkama. Ku fana na Yesu, lexi hi xi lavaka hintamu i ku byala hi tlhela hi regara a mbewu ya ntiyiso ka timbilu ta vanhu. (Mat. 13:3, 23; 1 Ko. 3:6) Nhlengeletanu ya Yehovha na yona yi tekelela xikombiso xa Yesu hi ku yendla hinkwaswu yi nga swi kotaka swaku yi djondzisa van’wani leswaku va tiva vito la Xikwembu. A Bibele la Wuhundzuluxeli La Misava Ya Nyuwani na lona li yendla ntirho wa lisima hintamu ka mhaka leyi ya ku va vanhu va tiva vito la Xikwembu, hikusa ka lona ku tlheliseliwe a vito la Yehovha hinkwaku lomu a li humelela kona nkama lowu ku nga tsaliwa Bibele, funtshi wuhundzuluxeli leli la kumeka hi kolomu ka 270 wa tirimi ni ku tlula na li helelile kumbe hi swiyenge. Murindzi 04/24 paj. 9 mapar. 8-9

Vavanuna van’wani va tolovela ku yendla xan’wanchumu siku ni siku swaku va komba vasati va vona swaku va va rhandza va tlhela va tiyisa wukati la vona. (1 Yo. 3:18) A swi zi swi lava u yendla swilo swaswikulu leswaku u komba nsati wa wena swaku wa mu rhandza. Kambe u nga ha yendla swilo swaswitsongo swa ku fana ni ku khoma voko la nsati wa wena, u mu barasara; u nga ha mu tsalela mensajem u mu byela leswaku wa mu xuva, kumbe u mu vutisa leswaku siku la yena li fambisa ku yini. Minkama yin’wani u nga ha mu tsalela marito ya ku xonga, lawa ma kombisaka swaku wa mu rhandza hintamu. Loko wanuna a yendla swilo hinkwaswu leswi, a kombisa leswaku wa mu hlonipha nsati wa yena a tlhela a tiyisa wukati la vona. Wanuna lweyi a rhandzaka a tlhela a hlonipha nsati wa yena, a mu byela swilo leswi mu yendlaka a titwa kahle. Hi xikombiso, wa mu khensa hi hinkwaswu leswi a swi yendlaka swaku a mu seketela. (Kol. 3:15) Loko wanuna a khensa nsati wa yena ni ku mu byela swaku hi mhaka muni a mu rhandza, nsati wa yena a ta titwa na a vhikelelekile, na a rhandziwa funtshi na a hloniphiwa. Murindzi 01/25 paj. 13 mapar. 15, 16

A buku la Tipisalema 15 li gama hi xitshembiso lexi: “Hinkwavu lava yendlaka swilo leswi, a va nge tshuki va tsekatsekisiwile.” Davhida a tlhamusela swaku hi mhaka muni Yehovha a lava swaku hi yendla swilo hinkwaswu leswi nga tsaliwa ka Tipisalema 15. Phela Yehovha a lava leswaku hi tsaka ka wutomi la hina; hi mhaka leyo, loko hi yendla swilo hinkwaswu leswi Yehovha a hi kombelaka swona, wutomi la hina li ta tsakisa funtshi Yehovha a ta hi vhikela. Vapfhumba va Yehovha va swi nyimele hi ku tsaka ku hetiseka ka ntshembo lowu va nga na wona. Lava va nga totiwa va nyimela ku yamukeliwa “ka tindhawu ta ku tshama” ka tona leti Yesu a nga ti lulamisela matilweni. (Yoh. 14:2) Lava va nga ni ntshembo wa ku hanya lani misaveni va swi nyimele hi ku tsaka ku hetiseka ka leswi nga ka Nhlawutelo 21:3. Ha tiyiseka leswaku i nkateko wawukulu ka hina hinkwerhu ku va hi rhambiwile hi Yehovha swaku hi va vanghanu va yena hi tlhela hi va vapfhumba va yena hilaha ku nga heliki! — Ps. 15:1-5. Murindzi 06/24 paj. 13 mapar. 19-20

Bibele li kombisa leswaku Yehovha i Xikwembu lexi nga tlakuka lexi faneliwaka hi ku dzunisiwa. Nkama Yehovha a wa ha ku humesa Vayisrayele ka wukarawa aGibita, a yendle swilo swa ku hlamalisa leswi nga va komba swaku swa mu fanela ku dzunisiwa. Pimisa hi leswi nga yendleka: Vayisrayele a va ye ka Ntshava ya Sinayi leswaku va ya twa leswi Yehovha a a lava ku va byela swona, se rhefu la ku mphuma li mbhonya ndhawu leyi a va li ka yona, misava yi sungula ku tsekatseka naswona swi nga yendleka ni Ntshava yi sungule ku bulukela; se va twa ku dzindza ka tilo, loko va txuvuka a va vona ku hatima atilweni naswona a va twa guwa la ku chayiwa ka limhondzo. (Eks. 19:16-18; 24:17; Ps. 68:8) Swi va hlamalisile Vayisrayele ku vona swilo leswi Yehovha a nga swi yendla leswi kombisaka swaku swa mu fanela ku dzunisiwa. Namuntlha hi dzunisa Yehovha hi ku va hi byela vanhu hi matimba ya yena ni wumunhu la yena la ku hlamalisa, hi tlhela hi mu dzunisa hi ku va hi swi kombisa leswaku hinkwaswu leswi hi swi yendlaka hi swi yendla hi matimba ya yena. — Esa. 26:12. Murindzi 01/25 paj. 2 mapar. 2-3

Nkama lowu Vayisrayele a va li ndleleni ya tiko leli a va tshembisiwe lona, van’wani va vona lava a va hloniphiwa va sungule ku djikela Moxe va tlhela va solasola ntirho lowu a a nyikiwe wona hi Yehovha, va vula leswi: “Vanhu hinkwavu va kwetsima naswona Yehovha a le xikarhi ka vona.” (Tin. 16:1-3) Hambileswi ‘vanhu hinkwavu a va kwetsima’, Yehovha a a lange Moxe swaku a rhangela Vayisrayele. Vanhu volavayani a va vulanga leswo hi mhaka leswi a va ni mhaka ni xitshungu kumbe a vo lava ku xi pfuna, kambe a va yendla leswo hi mhaka leswi a va lava ku hloniphiwa ni ku nyikiwa lisima hi Vayisrayele hinkwavu. Yehovha a nga tsakanga hi leswo hikusa a a swi vona na va djikela yena hi ku kongoma. Hi mhaka leyo, a va dlayile vona ni hinkwavu lava va nga va seketela. (Tin. 16:30-35, 41, 49) Ninamuntlha loko hi nga yingisi lava Yehovha a nga va langa swaku va hi rhangela, Yehovha a nga ta tsaka. Murindzi 07/24 paj. 11 par. 11

Ku fana ni Vakreste va Vaheberu, na hina hi lava lipfumelo la ku tiya hikusa namuntlha ku ni vanhu va vanyingi va ku a va kholwi swaku hi hanya ka masiku ya wugamu, naswona va hi poyila hileswi hina hi kholwaka ka swona leswo. (2 Pe. 3:3, 4) Ku ni swilo leswi Bibele li kalaka li nga swi vuli, kambe hi fanele hi tiyiseka swaku nhlomulu wawukulu wu ta fika hi nkama wa kona naswona Yehovha a ta hi vhikela. Ku fana ni Vakreste lavayani lava Pawulo a nga va tsalela karta, na hina namuntlha hi fanele hi tiyisa lipfumelo la hina hi tlhela hi tshemba swaku Yehovha a tirhisa “mutirhi wa ku tshembeka ni wa ku tlhariha” leswaku a hi kongomisa. (Mat. 24:45) Leswo i swa lisima hintamu, hikusa swi ta hi pfuna loko nhlomulu wawukulu se wu fikile. Phela hi nkama wolowo hi nga ha yamukela minkongomiso leyi swi nga ta lava hi yi yingisa leswaku hi ponisa wutomi la hina. Se, swoswi i nkama wawunene wa ku hi ensayara a ku yingisa vamakwerhu lava rhangelaka amabandleni. Loko hi yendla leswo, swi ta hi vevukela a ku yingisa vamakwerhu volavo loko nhlomulu wawukulu se wu sungulile. Murindzi 09/24 paj. 11 mapar. 11-12

Kuva vapsali va ni lipfumelo, a swi vuli swona swaku ni vana va vona va ta va na lona. Se a swi bihanga kuva n’wana wa wena a tivutisa a ku: ‘Indjhe Xikwembu xi kona hikakunene? I ntxini lexi nga ni yendlaka ni kholwa swaku leswi Bibele li swi vulaka i ntiyiso?’ Ku vula ntiyiso, hambi hi lona Bibele la hi kutxa leswaku hi tirhisa “mimpimiso” ya hina hi tlhela hi ‘kambisisa swilo hinkwaswu.’ (Rom. 12:1; 1 Tes. 5:21) Se u nga yendla yini swaku u pfuna n’wana wa wena leswaku a tiyisa lipfumelo la yena? Pfuna n’wana wa wena swaku a tiyiseka hi yexe swaku leswi Bibele li swi vulaka i ntiyiso. Loko n’wana wa wena a ku yendla xivutiso, mu djondzisi ku pexkizara leswaku a kuma nhlamulu. U nga ha mu komba leswi a nga yi tirhisisaka xiswona a Índice das Publicações da Torre de Vigia ni Nkongomiso Wa Ku Yendla Pexkiza Wa Timboni Ta Yehovha. Hi xikombiso, nkama lowu a tirhisaka Nkongomiso Wa Ku Yendla Pexkiza (hi Xitsonga) a nga ha nghena lani ku nge “Bibele” a gama a ya lani ku nge “Yi Huhuteriwe Hi Xikwembu” kuva a vona swaku Bibele a lo va buku leli nga tsaliwa hi vanhu ntsena, kambe i “rito la Xikwembu”. — 1 Tes. 2:13. Murindzi 12/24 mapaj. 14-15 mapar. 4-5

Madoda ma nga mu tekelelisa ku yini Yesu? Va fanele va trenara vamakwerhu swaku va yendla mintirho ya yinyingi abandleni hambiloko va ha li majovhem. Kambe madoda a ma fanelanga ma nyimela swaku vamakwerhu lavayani va va djondzisaka va va vanhu va ku hetiseka. Va fanele va va djondzisa hi ndlela ya lirhandzu. Phela loko va yendla leswo swi ta yendla swaku vamakwerhu lava va trenariwaka va djondza ku tiveka hansi, va tshembeka ni ku tlhela va tinyimisela ku pfuna vanhu van’wani. (1 Tm. 3:1; 1 Pe. 5:5) Yesu a nyike vadjondzisiwa va yena ntirho wa ku chumayela va tlhela va djondzisa Rito la Xikwembu. Swi nga yendleka nkama lowu Yesu a nga va nyika ntirho lowuyani, vadjondzisiwa va yena a va pimisa swaku a va nga ta swi kota ku wu yendla kahle hi leswi a va chava. Kambe Yesu a a tshemba leswaku a va ta swi kota ku wu yendla ntirho lowuyani. Hi leswo swi nga mu yendla a vula marito lawa ma nge: “Na mi rhuma ku fana ni leswi na mina ni nga rhumiwa hi Papayi.” — Yoh. 20:21. Murindzi 10/24 paj. 16 par. 15; paj. 17 par. 17

Davhida a a li hosi ya ku tshembeka, a a li sonchwa la matimba, a a li muprofeta, a a li muchayi a tlhela a tsala mapowema. Hambileswo, a kumane ni swikarhatu swa swinyingi ka wutomi la yena. Hi xikombiso, Sawulo a a mu kweleta Davhida funtshi a a lava ku mu dlaya, se a swi lava a hanya hi ku baleka. Funtshi nkama lowu se a a li hosi swi lave a baleka n’wana wa yena Absalomu lweyi a a lava ku mu tekela wuhosi. Kambe a swi gamelanga kolanu, a swa ha lava Davhida a lwisana ni ku tsandzeka ka yena hikusa a a li munhu wa ku kala a nga hetisekanga. Ka swiyimu hinkwaswu leswi, Davhida a tame a tshembeka ka Yehovha anze a ya fa. Hi swona swi nga yendla Yehovha a za a vula swaku Davhida a a tsakisa mbilu ya yena. Se hi nga tiyiseka swaku hi ta pfuneka hintamu loko hi yingisa switsundzuxu swa wutlharhi leswi wanuna lweyi a nga hi nyika swona! (1 Tih. 15:5) Hi xikombiso, vona leswi Davhida a nga mu pfunisa xiswona Solomoni lweyi a a ta va hosi leyi a yi ta landzela aIsrayele. Phela a swi fanelile swaku Solomoni a pfuniwa, hikusa Yehovha a a lange Solomoni leswaku a yaka tempele ya ku xonga, leyi vanhu a va ta gandzela Yehovha ka yona. (1 Tik. 22:5) Phela Solomoni a a ni ntirho wa wunyingi wa ku wu yendla, naswona a swi ta lava a pfuniwa hintamu hi Yehovha leswaku a kota ku fuma kahle. Se i mpsini leswi Davhida a nga swi byela Solomoni? Davhida a byele n’wana wa yena leswaku loko a yingisa Yehovha swi ta mu fambela kahle ka wutomi la yena. — 1 Tih. 2:2, 3. Murindzi 11/24 paj. 10 mapar. 9-11

Wanuna lweyi a tolovelaka ku hlupha nsati wa yena kumbe ku mu tlhava hi marito, a fanele a yendla xan’wanchumu leswaku a pfuxeta wunghanu la yena na Yehovha ni nsati wa yena. Xa ku sungula, a fanele a pfumela swaku leswi a swi yendlaka swi bihile hintamu a tlhela a khumbuka swaku Yehovha a vona swilo hinkwaswu. (Ps. 44:21; Ekl. 12:14; Heb. 4:13) Xa wumbirhi, a fanele a tshika ku hlupha nsati wa yena a tlhela a txintxa mahanyelo ya yena. (Swiv. 28:13) Xa wunharhu, a fanele a kombela ku rivaleliwa ka nsati wa yena a tlhela a kombela ku rivaleliwa ka Yehovha. (Min. 3:19) A fanele a khongela ka Yehovha a mu kombela swaku a mu nyika ku navela ni matimba ya ku txintxa mimpimiso, mavulavulelo ni leswi a swi yendlaka. (Ps. 51:10-12; 2 Ko. 10:5; Filp. 2:13) Xa wu 4, a fanele a hanya hi ku ya hi leswi a nga swi kombela ka xikhongelo a tlhela a nyenya swilo swa ku biha swa ku fana ni ku lwa ni mavulavulelo ya ku tlhava. (Ps. 97:10) Xa wu 5, a fanele a kombela ku pfuniwa hi madoda hi xihantla. (Yak. 5:14-16) Xa wu 6, a fanele a tiyendlela planu leli nga ta mu pfuna ka nkama lowu taka leswaku a nga ha tlheli a hlupha nsati wa yena. Murindzi 01/25 paj. 11 par. 14

Indjhe wena wa mu rhandza Yehovha, lweyi a nga ku nyika wutomi ni minchumu hinkwayu yayinene leyi u nga na yona? U nga mu kombisa ku yini swaku wa mu rhandza? Ndlela yayinene ya ku komba Yehovha swaku wa mu rhandza, i ku tinyiketela ka yena u tlhela u tsakamisiwa. Phela loko u tsakamisiwa u sungula ku lumba ndjangu wa Yehovha; leswo swi ta yendla swaku a ku kongomisa a tlhela a ku hlayisa ku fana ni Papayi ni munghanu ka wena. (Ps. 73:24; Esa. 43:1, 2) Xin’wani xa lisima hileswaku u ta va ni ntshembo wa ku kuma wutomi la ku kala li nga heli. (1 Pe. 3:21) Indjhe ku ni lexi ku sivela kuva u tsakamisiwa? Loko xi li kona, tiyiseka swaku a swo sungula hi wena. Vanhu va vanyingi swi lave va txintxa mapimiselo ya vona ni mahanyelo ya vona leswaku va za va tsakamisiwa, naswona swoswi va tama va mu tirhela Yehovha hi ku hiseka funtshi na va tsakile. Hambi ka nkama wa vapostolo ku ni van’wani lava swi nga lava va hlula swikarhatu swaku va tsakamisiwa. Murindzi 03/25 paj. 2 mapar. 1-2

Bibele li fanisa swidjoho ni xidjumba xa ku tika swinene. Hi xikombiso, loko Hosi Davhida a vulavula hi swidjoho swa yena a te: “Hikusa minandzu ya mina i yinyingi hintamu; yi ni tika ku fana ni xidjumba xa ku tika lexi ni tsandzekaka ku xi rhwala.” (Ps. 38:4) Kambe Yehovha wa hi rivalela loko hi tisola ka swidjoho swa hina. (Ps. 25:18; 32:5) Phela rito la Xiheberu leli nge “ku rivalela” li vula “ku tlakula” kumbe “ku rhwala.” Se, pimisa hi Yehovha na a tirhisa matimba ya yena yamakulu swaku a tlakula xidjumba kumbe swihoxo swa wena a swi teka a swi yisa kule na wena. Bibele li tlhela li tirhisa xifaniso xin’wani kuva li hi pfuna ku vona ndlela leyi Yehovha a hi rivalelaka hi yona. Tipisalema 103:12 yi vula swaku “ku fana ni leswi wuxeni ku nga kule ni wupeladlambu, ni swidjoho swa hina a swi veke kule na hina.” Leswo swi lava ku vula leswaku loko Yehovha a hi rivalela a teka swidjoho swa hina a swi veka kule ku fana ni leswi wuxeni ni wupeladlambu ku nga tindhawu ta kule na kule. Leswo swi lava ku vula swaku Yehovha wa hi rivalela hi ku helela naswona a nga ha tlheli a khumbuka swihoxo swa hina. Ku twa leswo swi pepisa mbilu! Murindzi 02/25 paj. 9 mapar. 5-6

Ku tiveka hansi ka Yesu ku djondzise mupostolo Pedru mhaka ya lisima. Hi xikombiso, loko Yesu se a file, Pedru a game a yendla masingita. Lin’we la masingita wolawo ku ve ku hanyisa wanuna lweyi a nga psaliwa na a limalile. (Min. 1:8, 9; 3:2, 6-8) Loko se a mu hanyisile, vanhu va vanyingi va yile lani Pedru a a li kona. (Min. 3:11) Ku nga va swaku Pedru a a ta londzola nkama wolowo leswaku a tibuma phambheni ka vanhu, ngopfungopfu leswi hi nkama wolowo ku va ni ndhuma a swi li swa lisima? Nada, a nga swi yendlanga leswo. Hi ku tiveka hansi a pfune vanhu swaku va khensa Yehovha na Yesu hileswi nga yendleka. A va byele leswi: “Wanuna lweyi mi mu vonaka a hanyisiwile hi vito la Yesu ni hi mhaka ya lipfumelo la hina ka vito la Yesu.” (Min. 3:12-16) Na hina hi nga swi kota ku tiveka hansi ku fana na Pedru. Hi yendla swilo swaswinene hileswi hi rhandzaka Yehovha ni vanhu van’wani, ku nga li hileswi hi lavaka swaku vanhu van’wani va hi khuza. Hi kombisa swaku hi tiveka hansi hikakunene hi ku tirhela Yehovha ni vamakwerhu na hi tsakile hambiloko van’wani va nga hi voni. — Mat. 6:1-4. Murindzi 03/25 mapaj. 10-11 mapar. 11-12

Lexi nga hi pfunaka leswaku hi rhandza ntirho wa hina wa ku chumayela i lirhandzu leli hi nga na lona hi Yehovha ni vanhu vambenyani. (Mat. 22:37-39) Pimisa hi leswi Yehovha a tsakisaka xiswona loko a hi vona na hi yendla ntirho lowu ni loko a vona vanhu van’wanyani na va djondza Bibele. Khumbuka leswaku lava va yingisaka rungula la hina naswona va zamaka kuva va hanya hi lona, va ta kuma wutomi la ku kala li nga heli. (Yoh. 6:40) Ku nga va swaku wena u ka xiyimu lexi ku sivelaka ku huma kaya? Loko u li ka xiyimu xolexo, u nga swi kota ku yendla leswi u nga swi kotaka leswaku u komba Yehovha swaku wa mu rhandza u tlhela u komba van’wani swaku wa va rhandza. Hi nkama wa korona, Samuel na Dania a va nga humi kaya. Kambe ka xiyimu lexo, minkama hinkwayu vona a va chumayela hi ku tirhisa telefoni, va tsala makarta va tlhela va fambisa swidjondzo swa Bibele hi ku tirhisa Zoom. Hambileswi Samuel na Dania a va nga ha swi koti ku yendla leswi a va swi yendla khale hi mhaka ya xiyimu xa ku karhata lexi a va li ka xona, va tsakile naswona swi va fambele kahle ka ntirho lowu va nga wu yendla. Murindzi 04/24 paj. 18 mapar. 15-16

I ntiyiso swaku ku tsaka a swi yi hi swaku munhu a chadile kumbe a nga chadanga. Hambileswo, Vakreste va ku tala lava nga majovhem ni lava se va nga kula lava kalaka va nga chadanga, va swi navela ku kuma munhu wa kahle wa ku chada na yena. Kambe leswaku u sungula ku namorara swi lava u rhanga hi ku va ni wunghanu la kahle na Yehovha, u titiva kahle naswona u li ni male ya ku yenela ya ku tiwundla ni lweyi u nga ta chada na yena. (1 Ko. 7:36) Naswona i swa lisima kuva u swi tiva leswi u swi lavaka ka munhu lweyi u lavaka ku chada na yena na wu nge sungula ku namorara. Hikusa loko u nga yendli leswo, u nga ha luza munhu wamunene u nga namorari na yena kumbe u namorara ni munhu wa ku a hi munene ka wena. I ntiyiso swaku loko u lava ku namorara u fanele u namorara ntsena ni munhu lweyi a nga tsakamisiwa. (1 Ko. 7:39) Kambe leswo a swi vuli swona swaku mun’wani ni mun’wani lweyi a nga tsakamisiwa i munene swaku u namorara na yena. Se, tivutisi leswi: ‘Hi wani maplanu lawa ni nga na wona ka wutomi la mina? Hi lini wumunhu la lisima leli ni li nyimelaka ka nuna kumbe nsati wa mina?’ Murindzi 05/24 paj. 20 par. 1; paj. 21 par. 3

Mi nga yendla yini loko mi tshuka mi kumana ni swikarhatu na ma ha namorara? Indjhe leswo swi lava ku kombisa swaku n’wina vambirhi a mi fanelani ke? A swi vuli swona. Michadu yayinene yi vumbiwa hi vanhu vambirhi va ku kala va nga fani naswona va tirhaka hi matimba swaku mu’wani ni mun’wani wa vona a hlonipha lweyi a nga chada na yena a tlhela a titwananisa ni leswi rhandziwaka hi nuna kumbe nsati wa yena. Se ndlela leyi mi nga ta swi lulamisa hi yona swikarhatu swoswi na ma ha namorara swi nga ha kombisa leswi mi nga ta swi yendlisa xiswona swilo loko se mi chadile. Se i swinene ku tivutisa leswi: ‘Loko hi nga twani ka xanchumu ha swi kota ku bula hi mhaka ya kona na hi rhulile hi tlhela hi hloniphana? Ha swi kota ku pfumela swaku hi phazamile hi tlhela hi zama ku yampsisa? Ha swi kota ku tiveka hansi, hi kombela rivalelo hi tlhela hi rivalelana?’ (Efe. 4:31) Kambe loko minkama hinkwayu mi tshamela ku holova a swi nga ta yampsa loko se mi chadile. Hi mhaka leyo, loko mun’we wa n’wina a vona swaku n’wina vambirhi a mi kombinari swi nga ha yampsa mi tshikana. Murindzi 05/24 paj. 29 par. 12

Loko hi li vanhu lava yingisaka Yehovha ka swilo hinkwaswu hi tlhela hi yendla swiboho hi ku tirhisa Bibele, hi ta va swikombiso swaswinene ka vanhu van’wani. Loko hi djondza Bibele hi tlhela hi tiyisa lipfumelo la hina, hi ta va vanhu va ku tshembeka ka Yehovha ni ka minawu ya yena. A hi lavi ku kokiwa hi tidjondzo ta mavunhwa kumbe hi mapimiselo ya ku hambana ni lawa Yehovha a hi djondzisaka wona ka Bibele. (Efe. 4:14; Yak. 1:6-8) Se hi nga swi kota ku pfuna lava kumanaka ni swikarhatu ni lava hluphiwaka. (1 Tes. 3:2, 3) Madoda ma fanele ma pimela ka minchumu hinkwayu, ma pimisa kahle, ma yendla swilo hi ndlela yayinene. Madoda ma pfuna vanhu van’wani leswaku va va ni ku rhula ni ku va va kulisa lipfumelo hi ku va ma namarhela “Rito la ku tshembeka” loko ma djondzisa. (Tit. 1:9; 1 Tm. 3:1-3) Hi xikombiso xa wona, ma pfuna vachumayeli va bandla kuva va va kona mintlhanganwini nkama ni nkama, va va kona nsin’wini ni ku tlhela va va ni djondzo ya vona voxe ya Bibele. Loko vamakwerhu va kumana ni swikarhatu ni loko va vilela, a madoda ma va khumbukisa leswaku va fanele va tshemba Yehovha, ni ku va va veka mimpimiso ya vona ka switshembiso hinkwaswu leswi Yehovha a hi tshembisaka swona. Murindzi 06/24 paj. 31 mapar. 16-18

Nkama Yesu na a li lani misaveni a djondzise vanhu leswaku Yehovha i Xikwembu xa lirhandzu, xa timpsalu funtshi i Xikwembu lexi xi rivalelaka. Pimisa hi xitoriya xa n’wana lweyi a nga suka kaya ka papayi wa yena a ya tlanga hi male leyi a a li na yona. N’wana lweyi, loko se a tisolile a tlhelelile kaya ka papayi wa yena. Se Yesu a vule leswaku nkama na ‘a ha li kulenyana, papayi wa yena a mu vonile . . . , a gama a tsutsuma a mu tlhangaveta a fika a mu barasara, a mu bejara.’ Phela n’wana lweyi a a tisolile funtshi a kombele swaku papayi wa yena a mu thola swaku a va xitirhi xa yena. Kambe papayi wa yena a nga pfumelanga ku mu yendla xitirhi hikusa a a mu rhandza. Leswi a a tsakile hi mhaka leswi n’wana wa yena a nga vuya kaya a te: “N’wana wa mina lweyi a a lahlekile se a kumekile.” (Luk. 15:11-32) Phela nkama Yesu na a li matilweni, a a swi vona leswi Yehovha a a titwisa xiswona hi vanhu lava a va djohile va gama va tisola. Yehovha a a va twela wusiwana a tlhela a va rivalela. Hi mhaka leyo, Yesu a kontarelile xitoriya lexi leswaku vanhu va twisisa lirhandzu ni ntwelawusiwana lowu Yehovha a nga na wona! Murindzi 08/24 paj. 11 mapar. 11-12

Ku va ni ‘mimpimiso yayinene’ swi patsa yini? Swi patsa ku va hi yendla swiboho hi ku ya hi leswi Yehovha a swi vonisaka xiswona swilo. Handle ka leswo, swi patsa ku va hi tiva swaku a ku na xa lisima ka wutomi la hina ku tlula ku va ni wunghanu la ku tiya na Yehovha. Swi tlhela swi patsa ku va hi nga tivoni na hi li va lisima ku tlula mpimu kumbe hi tibyela swaku hi tiva swilo hinkwaswu. Munhu lweyi a nga ni ‘mimpimiso yayinene’ a kombisa swaku a tshemba Yehovha hi ku khongela ka yena a mu kombela swaku a mu kongomisa ka xin’wani ni xin’wani lexi a xi yendlaka. Loko hi lava ku yendla swiboho swa lisima ka wutomi la hina, ha khongela ka Yehovha hi mu kombela swaku a hi kongomisa na hi tshemba swaku wa swi tiva leswi nga ta hi pfuna. Hi mu khensa hintamu Yehovha hileswi a nga hi yendla na hi swi kota ku tekelela wumunhu la yena. (Gen. 1:26) I ntiyiso leswaku a hi nge swi koti ku mu tekelela hi ku helela Yehovha. — Esa. 55:9. Murindzi 03/25 paj. 11 par. 13; paj. 13 mapar. 17-18

Tivoneli ka moya wa ku sola van’wani. Minkama yin’wani loko hi nyika vanhu minchumu, swi nga yendleka va nga hi khensi. Se hi nga ha gama hi tivutisa swaku ‘o kala a nga na mhaka ni leswi ni nga mu yendlela swona? Kumbe a yo khohlwa ku ni khensa?’ Minkama yin’wani leswi swi yendleka hikusa van’wani swa va karhatela ku khensa loko hi va yendlela minchumu yayinene. Kumbexana van’wanyani swi nga yendleka hikusa khale a ku li vona a va tolovela ku pfuna van’wani. Se namuntlha swi nga ha va danisa loko i li vona va pfuniwaka. Kambe ku nga na mhaka swaku xiyimu hi xini xa kona, hi lava ku tama hi va pfuna vamakwerhu, hikusa leswo swi ta hi pfuna leswaku hi tsaka. (Efe. 4:2) Lehisa mbilu. Hosi Solomoni loko a vulavula hi ku lehisa mbilu loko hi nyika nchumu munhu mun’wani a te: “Txukumetela pawu la wena ka mati, hikusa u ta tlhela u li kuma loko se ku hundze masiku ya manyingi.” (Ekl. 11:1) Se hilani marito lawa ma kombisaka hi kona, na hina loko hi nyika nchumu wo karhi munhu a nga ha hi khensa se na ku hundze malembe ya ku tala kumbe masiku ya ku tala. Murindzi 09/24 paj. 30 mapar. 18-19

Minkama yin’wani hi nga ha tivisiwa swaku makwerhu manyani a soliwile abandleni, loko leswo swi yendleka a hi fanelanga hi tshika ku titlhanganisa na yena hikusa makwerhu yelweyo se a tisolile a tlhela a tshika swilo swa ku biha leswi a a swi yendla. Naswona loko makwerhu a li ka xiyimu lexo a swi lava hintamu ku tiyisiwa hi hina, se hi fanele hi yendla swoleswo hi tlhela hi khumbuka swaku makwerhu yelweyo wa ha tama a lumba bandla. (Heb. 10:24, 25) Kambe swi hambanile ni loko hi tivisiwa swaku makwerhu manyani a susiwile bandleni, ka xiyimu lexo hi fanele hi “tshika ku titlhanganisa ni munhu” yelweyo, ‘hambi ku dla na yena a hi dli na yena’. (1 Ko. 5:11) Ku nga va swaku loko munhu a susiwa bandleni a hi nga ha ta tshuka hi mu losa kumbe ku mu yangula? A swi vuli swona. Kambe leswi munhu yelweyo a nga susiwa bandleni a ha ha fanelanga hi heta nkama wa wunyingi na hi li na yena kumbe hi va vanghanu va yena. I ntiyiso swaku loko munhu lweyi a nga susiwa bandleni a a li munghanu wa hina kumbe a li xaka la hina, hi nga tirhisa lipfalu la hina leli nga djondzisiwa hi Bibele swaku hi yendla xiboho xa leswaku hi ta mu rhamba swaku a ta mintlhanganwini kumbe nada. Murindzi 08/24 paj. 30 mapar. 13-14