U Nga Hlweli Ku Tsakamisiwa

1. Hi yini minkateko leyi u nga ta yi kuma loko u tsakamisiwa?

INDJHE wena wa mu rhandza Yehovha, lweyi a nga ku nyika wutomi ni minchumu hinkwayu yayinene leyi u nga na yona? U nga mu kombisa ku yini swaku wa mu rhandza? Ndlela yayinene ya ku komba Yehovha swaku wa mu rhandza, i ku tinyiketela ka yena u tlhela u tsakamisiwa. Phela loko u tsakamisiwa u sungula ku lumba ndjangu wa Yehovha; leswo swi ta yendla swaku a ku kongomisa a tlhela a ku hlayisa ku fana ni Papayi ni munghanu ka wena. (Ps. 73:24; Esa. 43:1, 2) Xin’wani xa lisima hileswaku u ta va ni ntshembo wa ku kuma wutomi la ku kala li nga heli. — 1 Pe. 3:21.

2. Hi ta djondza hi yini ka nhlokomhaka leyi?

² Indjhe ku ni lexi ku sivela kuva u tsakamisiwa? Loko xi li kona, tiyiseka swaku a swo sungula hi wena. Vanhu va vanyingi swi lave va txintxa mapimiselo ya vona ni mahanyelo ya vona leswaku va za va tsakamisiwa, naswona swoswi va tama va mu tirhela Yehovha hi ku hiseka funtshi na va tsakile. Hambi ka nkama wa vapostolo ku ni van’wani lava swi nga lava va hlula swikarhatu swaku va tsakamisiwa. A hi voneni swaku hi swini swikarhatu swa kona naswona hi nga djondza yini ka xikombiso xa vona.

VASAMARIYA VA TSAKAMISIWILE

3. I mpsini leswi Vasamariya a va fanele va swi yendla swaku va tsakamisiwa?

³ Ka nkama wa Yesu, Vasamariya a va li vakhongeli lava a va tshama norte ka Yudiya kusuhi ni doropa la Xikemi ni Samariya. Leswaku Vasamariya va tsakamisiwa, a swi lava va kholwa swaku mabuku hinkwawu ya Bibele ma ta hi ka Xikwembu va tlhela va ma djondza. Leswo a swi laveka hikusa Vasamariya a vo kholwa ntsena ka 5 wa mabuku ya ku sungula ya Bibele, ku nga Genesa ku ya ka Deteronoma funtshi swi nga yendleka a va kholwa ni ka buku la Yoxuwa. Vasamariya a va ku nyimelile ku ta ka Mesiya hikusa a swi tsaliwile ka buku la Deteronoma 18:18, 19. (Yoh. 4:25) Kambe leswaku va tsakamisiwa a swi lava va pfumela swaku Yesu hi yena Mesiya lweyi Xikwembu xi nga mu rhumela, funtshi “Vasamariya va ku tala” va swi yendlile leswo. (Yoh. 4:39) Xin’wani lexi a va fanele va xi yendla a ku li ku hlula xikheto hikusa ka nkama lowuyani Vasamariya ni Vayuda a va nga twani. — Luk. 9:52-54.

4. I mpsini leswi Vasamariya van’wani va nga swi yendla nkama lowu Filipi a nga va chumayela? (Mintirho 8:5, 6, 14)

⁴ I mpsini leswi nga pfuna Vasamariya leswaku va tsakamisiwa? Nkama lowu Filipi lweyi wa muchumayeli a nga va “djondzisa hi Kreste,” van’wani ka vona “va yamukele rito la Xikwembu.” (Lerha Mintirho 8:5, 6, 14.) Hambileswi Filipi a a li Muyuda, Vasamariya va mu yamukelile. Swi nga yendleka va mu yamukelile hileswi va nga khumbuka leswaku man’wani ya mabuku ya ku sungula ya Bibele ma vula swaku Xikwembu a xi na xikheto. (Det. 10:17-19) Ku nga na mhaka swaku i mpsini leswi nga va pfuna, vona ‘va swi yingisele kahle leswi Filipi a a swi vula’ hi Yesu va tlhela va kholwa swaku a a rhumiwe hi Xikwembu. Filipi a yendle masingita ya manyingi lama patsaka ku hanyisa lava a va vabya ni ku hlongola madimoni. — Min. 8:7.

5. I mpsini leswi hi nga swi djondzaka ka xikombiso xa Vasamariya?

⁵ Vasamariya lavayani a va swi pfumelelanga leswaku xikheto ni ku kala va nga tivi swa swinyingi hi Matsalwa swi va yendla va nga tsakamisiwi. Phela nkama va nga tiyiseka swaku leswi Filipi a nga va djondzisa swona a ku li ntiyiso, va yo vhela va tsakamisiwa. Bibele li li: “Nkama Filipi a nga va chumayela mahungu ya ku tsakisa ya Mfumu wa Xikwembu ni ya vito la Yesu Kreste, va kholwile ka yena kutani va tsakamisiwa.” (Min. 8:12) Wena ke, indjhe wa tiyiseka swaku Rito la Xikwembu i ntiyiso? Wa kholwa swaku Timboni ta Yehovha a ti na xikheto naswona ti kombana lirhandzu, ku nga leswi Yesu a nga vula swaku Vakreste va ntiyiso a va ta swi yendla? (Yoh. 13:35) Loko u tiyiseka, u nga ha hlweliseli; vhela u tsakamisiwa naswona tiyiseka leswaku Yehovha a ta ku katekisa hi mhaka ya leswo.

6. Xikombiso xa Ruben xi nga ku pfunisa ku yini?

⁶ Makwerhu mun’wani wa Alemanha lweyi a vitaniwaka Ruben, a kulisiwe hi vapsali lava nga Timboni ta Yehovha naswona nkama lowu na wa ha li jovhem a a kanakana swaku Xikwembu xi kona. Se lexi xi nga mu pfuna, ku ve ku djondza hi mabuku ya nhlengeletanu. Yena a li: “Ka djondzo ya mina noxe a ni zama ku djondza timhaka ta ku hambanahambana leti a ti ta ni pfuna ku kholwa swaku Xikwembu xi kona.” Makwerhu lweyi a djondze buku leli nge Existe um Criador Que Se Importa com Você? A buku leli li mu pfunile Ruben leswaku a tiyisa lipfumelo la yena a tlhela a kholwa swaku Xikwembu xi kona. Naswona nkama na a djondza a a tinyika nkama wa ku pimisa hi leswi a a swi djondza, se a vhela a swi vona swaku impela Yehovha a kona hikakunene. Xin’wani xi nga pfuna Ruben, ku ve ku pfuxela betele la Sede Mundial. Nkama a nga fika seniyani a hlamale hintamu hi ku vona swaku vamakwerhu amisaveni hinkwayu va hanyisana hi ku rhula, se a nkama a nga tlhela aAlemanha a game a tsakamisiwa na a ni 17 wa malembe. Se wena ke, U nga mu tekelelisa ku yini Ruben? Loko ku ni swilo leswi swi ku kanakanisaka, hamba mapexkiza ka mabuku ya nhlengeletanu. Phela a wutivi leli nga ka Bibele hi lona li nga ku pfunaka swaku u susa ku kanakana hinkwaku loku u nga na kona. (Efe. 4:13, 14) Naswona hi ku famba nkama u ta tiyisiwa hi ku vona ndlela leyi vamakwerhu va twananaka hi yona ni ndlela leyi va rhandzanaka hi yona amisaveni hinkwayu, u ta tlhela u vona ku twanana koloko ka bandla la wena. Se hinkwaswu leswo swi ta ku yendla u ya u va rhandza hintamu vamakwerhu.

SAWULO A TSAKAMISIWILE

7. Hi wani mapimiselo lawa Sawulo a a fanele a tshika ku va na wona?

⁷ Vona leswi nga yendlekela Sawulo lweyi a a tshama Tarsu. Yena a a djondzile ka xikola lexi hloniphiwaka xa Vayuda naswona a a ya a hloniphiwa hintamu hi Vayuda van’wani. (Gal. 1:13, 14; Filp. 3:5) Hi nkama wolowo Vayuda va vanyingi a va pimisa swaku Vakreste a va djikele Xikwembu. Se hi mhaka leyo, Sawulo a a hlupha Vakreste swaku a va helisa, naswona a a pimisa swaku leswo swa mu tsakisa Yehovha. (Min. 8:3; 9:1, 2; 26:9-11) Se ku va Sawulo a pfumela ka Yesu a tsakamisiwa a va Mukreste, a swi kombisa swaku a a tinyimisele ku hluphiwa.

8. a) I mpsini leswi nga pfuna Sawulo swaku a tsakamisiwa? b) Hi ku ya hi Mintirho 22:12-16, Ananiya a mu pfunise ku yini Sawulo? (Vona mufoto.)

⁸ I mpsini leswi nga pfuna Sawulo leswaku a tsakamisiwa? Siku lin’wani, Yesu a vulavule na yena na a li tilweni naswona ku ve ni ku phatima loku nga yendla swaku Sawulo a fa matihlo. (Min. 9:3-9) Sawulo a tshame masiku manharhu na a nga dli nchumu a tlhela a nga phuzi nchumu, na a pimisa hi leswi nga mu humelela! Leswo swi yendle swaku a tiyiseka leswaku Yesu a a li Mesiya ni swaku Vakreste a va gandzela Xikwembu hi ndlela yayinene. Pimisa hi leswi Sawulo a nga titwisa xiswona loko a khumbuka swaku a ku seketelile ku dlayiwa ka Stefano. (Min. 22:20) Loko se ku hundze masiku manharhu, mudjondzisiwa mun’wani lweyi a vitaniwaka Ananiya a vulavule na Sawulo hi ndlela yayinene, a mu hanyisa matihlo ni ku tlhela a mu pfuna swaku a tsakamisiwa. (Lerha Mintirho 22:12-16.) Sawulo a tiveke hansi, a pfumela ku pfuniwa hi Ananiya a tlhela a tsakamisiwa swaku a va Mukreste. — Min. 9:17, 18.

9. Hi nga djondza yini ka xikombiso xa Sawulo?

⁹ Sawulo a nga swi pfumelelanga swaku ku tibyela ku mu sivela ku tsakamisiwa, kambe a tiveke hansi a txintxa mahanyelo ya yena a va mulandzeli wa Kreste. (Min. 26:14, 19) Hambileswi a a swi tiva swaku a a ta hluphiwa, a tsakamisiwile a va mulandzeli wa Kreste. (Min. 9:15, 16; 20:22, 23) Loko se a tsakamisiwile, Sawulo a tame a tiyiseka swaku Yehovha a a ta mu pfuna ka mindzingo hinkwayu leyi a a ta kumana na yona. (2 Ko. 4:7-10) Se hi nga djondza yini ka xikombiso xa Sawulo? Swi nga yendleka loko se u tsakamisiwile u va Mboni ya Yehovha u kumana ni mindzingo ya ku hambanahambana, kambe tiyiseka swaku Yehovha na Yesu va ta ku pfuna loko u tama u tshembeka ka vona. — Filp. 4:13.

10. Xikombiso xa Anna xi nga ku pfunisa ku yini?

¹⁰ Anna a kulele ka ndjangu lowu tshamaka ka tiko leli kumekaka awuxeni ka Ewuropa. Nkama mamani wa yena a nga tsakamisiwa, papayi wa yena a mu pfumelele swaku a sungula ku djondza Bibele na a ni 9 wa malembe. Anna a a tshama ni maxaka man’wani ka munti wun’we. Se maxaka man’wani ya Anna a ma tsakanga hi ku mu vona na a djondza Bibele, hi ku pimisa leswaku a swi nga li swinene kuva a tshika wukhongeli la ndjangu. Nkama lowu a a ni 12 wa malembe, a byele papayi wa yena leswaku a lava ku tsakamisiwa. Leswi papayi wa yena a a lava ku tiyiseka swaku Anna o swi lava ku tsakamisiwa, a ngo sindzisiwa hi munhu, a mu vutisile swaku hi mhaka muni a a lava ku tsakamisiwa. Yena a hlamule a ku: “Na mu rhandza Yehovha.” Se papayi wa yena a game a pfumela leswaku a tsakamisiwa. Hambiloko se a tsakamisiwile, maxaka ya yena ma tame ma mu poyilela ma tlhela ma mu hlupha hileswi a a li Mboni ya Yehovha. Xaka lin’wani li mu byele li ku: “A swi ta yampsa loko a wo va ni mahanyela ya ku biha, u dzaha kumbe ku yendla swilo swin’wani swa ku biha ku tlula ku va Mboni ya Yehovha.” Se i mpsini swi nga pfuna Anna? Yena a te: “Yehovha a ni pfunile swaku ni tiya. Papayi na mamani na vona va ni pfunile hintamu.” Anna a a hamba lixta la minkama leyi Yehovha a nga mu pfuna ka wutomi la yena, naswona a a tolovela ku li lerha leswaku a tiyiseka swaku Yehovha a ta mu pfuna minkama hinkwayu. Na wena loko u poyileliwa, tiyiseka swaku minkama hinkwayu Yehovha a ta ku pfuna. — Heb. 13:6.

KORNELIYO A TSAKAMISIWILE

11. I mpsini leswi a swi ta va swi yendle swaku Korneliyo a hlwela ku tsakamisiwa?

¹¹ Bibele li vulavula hi xikombiso xa Korneliyo. Yena a a rhangela kolomuyani ka 100 wa masonchwa ya Varoma. (Min. 10:1, ntlhamuselo.) Swi nga yendleka leswo swi yendle swaku a va munhu wa ku hlonipheka lomu a a tshama kona ni ka masonchwa. Yena a a swi rhandza ku pfuna swisiwana. (Min. 10:2) Yehovha a rhume mupostolo Pedru swaku a ya mu chumayela mahungu ya ku tsakisa. Ku nga va swaku ntirho wa lisima lowu Korneliyo a a li na wona wu mu yendle a hlwela ku tsakamisiwa?

12. I mpsini swi nga pfuna Korneliyo swaku a tsakamisiwa?

¹² I mpsini leswi nga pfuna Korneliyo leswaku a tsakamisiwa? Bibele li li: “A a gandzela Xikwembu a tlhela a xi hlonipha yena ni ndjangu wa yena hinkwawu.” Korneliyo a a tolovela ku khongela ka Xikwembu. (Min. 10:2) Nkama Pedru a nga mu chumayela, yena ni ndjangu wa yena va tekele ku pfumela ka Yesu va tlhela va tsakamisiwa. (Min. 10:47, 48) Swa tikomba swaku Korneliyo a a tinyimisele ku yendla xin’wani ni xin’wani leswaku yena ni ndjangu wa yena va gandzela Xikwembu. — Yox. 24:15; Min. 10:24, 33.

13. Hi nga djondza yini ka xikombiso xa Korneliyo?

¹³ Ku fana na Sawulo, Korneliyo a a ta va a pfumelele swaku ntirho wa lisima lowu a a li na wona wu mu sivela swaku a tsakamisiwa, kambe a nga swi yendlanga leswo. Yena a tsakamisiwile a va Mukreste. Indjhe swi lava swaku u txintxa swin’wani ka wutomi la wena akuva u tsakamisiwa? Loko swi laveka, Yehovha a ta ku pfuna. Loko u tinyimisela ku hanya hi matshinya ya minawu ya Bibele swaku u tsakisa Yehovha, yena a ta ku katekisa.

14. Xikombiso xa Tsuyoshi xi nga ku pfunisa ku yini?

¹⁴ Makwerhu wa xinuna wa Japão lweyi a vitaniwaka Tsuyoshi, a swi lava swaku a txintxa nchumu ka ntirho wa yena leswaku a ta kota ku tsakamisiwa. A a tirha ka xikola lexi vitaniwaka Ikenobo, lani a ku djondzisiwa vanhu ku lunghiselela maflori lawa a ma tirhisiwa ka swilahlu. Se loko xefi wa yena a nga swi koti ku ya ka swilahlu, Tsuyoshi a a tolovela ku ya mu pfaleta. Kambe nkama lowu a nga djondza ntiyiso a tlhela a tiva leswi yendlekaka loko munhu a fa, a vone swaku leswi a swi yendliwa hala ku lahleni a swi nga fambisani ni leswi a a swi djondza funtshi a swi ta yendla swaku a nga faneleki kuva a tsakamisiwa. A game a bula ni xefi wa yena a mu byela swaku a a nga ha ta ya ka swilahlu swoleswo swa vanhu va wukhongeli la Xibuda. (2 Ko. 6:15, 16) Se ku game ku yendleka yini? Xefi wa yena a mu byele swaku a nga tama a tirha hambiloko a nga yi ka swilahlu swoleswo. Phela Tsuyoshi a tsakamisiwile loko se ku hundze lembe lin’we na a sungule ku djondza Bibele.a Se na wena loko swi lava swaku u txintxa nchumu ka ntirho wa wena leswaku u ta kota ku tsakisa Yehovha, tiyiseka swaku yena a ta ku pfuna, wena ni ndjangu wa wena funtshi a ta mi nyika hinkwaswu leswi mi swi lavaka. — Ps. 127:2; Mat. 6:33.

VAKORINTO VA TSAKAMISIWILE

15. I mpsini leswi a swi ta yendla vanhu va Korinto swi va karhatela ku tsakamisiwa?

¹⁵ Munhu wa doropa la Korinto a swi ta mu karhatela hintamu ku tsakamisiwa, hikusa vanhu va seniyani a vo pimisa hi ku ganya ntsena funtshi a va ni mahanyelo ya ku biha. Kambe nkama lowu Pawulo a nga chumayela aKorinto “va ku tala lava nga swi twa va ve vapfumeli kutani va tsakamisiwa.” (Min. 18:7-11) Hi ku famba ka nkama, Yesu a humelelile ka Pawulo hi ndlela ya singita a mu byela leswi: “Na ha ni vanhu va vanyingi ka doropa leli.” Marito lawa ma yendle swaku Pawulo a heta lembe ni hafu na a chumayela ka doropa leliyani.

16. I yini lexi nga pfuna Vakorinto swaku va tsakamisiwa? (2 Vakorinto 10:4, 5)

¹⁶ I mpsini leswi nga pfuna Vakorinto leswaku va tsakamisiwa? (Lerha 2 Vakorinto 10:4, 5.) Vakorinto va kote ku txintxa mahanyelo ya vona va tshika ku yendla swilo swa ku biha hi ku pfuniwa hi moya wa ku kwetsima ni hi Rito la Xikwembu. (Heb. 4:12) Phela vanhu va le Korinto lava va nga va Vakreste, va swi kotile ku tshika swilo swa ku biha leswi a va swi yendla ka wutomi la vona, swa ku fana ni ku va mageyi, ku yiva ni ku dakwa. — 1 Ko. 6:9-11.b

17. Hi nga djondza yini ka xikombiso xa Vakorinto?

¹⁷ Hilani se hi nga swi vona hi kona, Vakorinto a va fanele va tshika mahanyelo ya vona ya ku biha leswaku va kota ku tsakamisiwa. Kambe ku nga va leswaku va godolile va tibyela swaku a va nge swi koti ku ma tshika mahanyelo wolawo? Nada, a va swi yendlanga leswo. Vona va tame va zama ku famba ka ndlela leyi yisaka ka wutomi la ku kala li nga heli. (Mat. 7:13, 14) Se wena ke, ku nga va swaku u ni vício leli swi ku karhatelaka ku li tshika kumbe mahanyelo ya ku biha lawa u pimisaka swaku a wu nge swi koti ku ma tshika? U nga heli ntamu! Kombela Yehovha swaku a ku nyika moya wa yena wa ku kwetsima a tlhela a ku pfuna leswaku u hlula xikarhatu xolexo.

18. Xikombiso xa Monika xi nga ku pfunisa ku yini?

¹⁸ Monika, lweyi a tshamaka Geórgia swi lave swaku a yendla minzamu yayikulu swaku a tshika mahanyelo ya yena ya ku biha leswaku a ta kota ku tsakamisiwa. Yena a a vulavula nhlambha funtshi a a sixtira swilo swa ku nyenyentsa, leswi kalaka swi nga mu tsakisi Yehovha. Yena a te: “Lexi xi nga ni pfuna nkama na na ha li mutsongo swaku ni txintxa mahanyelo ya mina ku ve ku khongela ka Yehovha ni mu kombela swaku a ni pfuna ni yendla swilo swaswinene. Yehovha a a swi tiva swaku na swi lava ku yendla swilo swaswinene; se a ni pfunile a tlhela a ni kongomisa.” Monika a tsakamisiwile na a ni 16 wa malembe. Se wena ke, ku nga va swaku ku ni swilo swa ku biha leswi u faneleke u swi tshika leswaku u kota ku tirhela Yehovha? Loko swi li kona, khongela ka Yena u mu kombela swaku a ku pfuna u txintxa mahanyelo ya wena. Phela Yehovha a ta ku nyika moya wa yena wa ku kwetsima leswaku u kota ku hlula swikarhatu swoleswo. — Yoh. 3:34.

HI LIPFUMELO, U NGA HLULA SWIKARHATU

19. I yini xi nga ta ku pfuna swaku u hlula swikarhatu swaswikulu? (Vona mufoto.)

¹⁹ Ku nga na mhaka swaku xi tshamise ku yini xikarhatu lexi u faneleke u xi hlula leswaku u kota ku tsakamisiwa, tiyiseka swaku Yehovha wa ku rhandza funtshi a lava swaku u lumba ndjangu wa yena. Khambi lin’wani Yesu a byele vadjondzisiwa va yena a ku: “Loko mi ni lipfumelo la ku ringana ni mbewu ya sinapi, mi ta byela ntshava leyi mi ku: ‘Suka lani u ya lee!’ Kutani yi ta suka, naswona a xi kona lexi nga ta mi tsandza.” (Mat. 17:20) Vanhu lava Yesu a nga va byela marito lawa a va ha ku sungula ku va vadjondzisiwa va yena naswona a swa ha lava va tiyisa lipfumelo la vona; kambe a va tiyisekise swaku loko va ni lipfumelo la ku tiya, Yehovha a a ta va pfuna swaku va hlula swikarhatu swaswikulu leswi fanisiwaka ni tintshava. Se na wena tiyiseka swaku Yehovha a ta ku pfuna swaku u hlula swikarhatu.

20. Swikombiso swa Vakreste va khale ni va swoswi lava ku nga vulavuliwa hi vona ka nhlokomhaka leyi, swi ku pfunise ku yini?

²⁰ Loko ku ni nchumu lexi ku pfalelaka swaku u tsakamisiwa, yendla hinkwaswu leswi u nga swi kotaka leswaku u xi lulamisa hi xihantla. Pimisa hi swikombiso swa Vakreste va minkameni ya khale ni va minkama ya swoswi, lava va nga txintxa mahanyelo ya vona leswaku va kota ku tirhela Yehovha. Phela xikombiso xa vona xi nga ku pfuna xi tlhela xi ku tiyisa leswaku na wena u tinyiketela ka Yehovha u tlhela u tsakamisiwa. Loko u tinyiketela ka Yehovha u tlhela u tsakamisiwa, a wu nga ta tisola hikusa lexo hi xona xiboho xa lisima hintamu lexi munhu a nga xi yendlaka ka wutomi la yena.