Sabata, Disembala 9
Wakatiwuskira pamoza na kutikhazika pamoza mu malo ghakuchanya pakuti tili mu umoza na Khristu Yesu.—Efe. 2:6.
Tikumanya vitumbiko vyose yayi ivyo Yehova wazamupeleka ku Ŵakhristu ŵakuphakazgika para ŵamba kuwusa na Khristu kuchanya. (Luka 22:28-30; Fil. 3:20, 21; 1 Yoh. 3:2) Ŵakhristu ŵakuphakazgika ŵamuŵa “Yerusalemu Muphya,” kweniso mwali wa Khristu. (Chivu. 3:12; 17:14; 21:2, 9, 10) Iwo ŵazamovwirana na Yesu pa mulimo wakuchizga “mitundu” ku wuzga wakwananga na nyifwa na kuŵazgora kuŵa ŵarunji. (Chivu. 22:1, 2, 17) Yehova wazamuwuska ŵanthu ŵakufwa kufuma ku “malaro,” icho chizamulongora kuti Yehova wali na lusungu lukuru nadi. (Yobu 14:13-15; Yoh. 5:28, 29) Ŵanthu wose ŵakugomezgeka awo ŵakafwa pambere Yesu wandize pa charu chapasi, kweniso Ŵakhristu ŵakugomezgeka awo ŵakufwa sono, ŵazamuwuskika kuti ŵalutilire kuteŵetera Yehova.—Yoh. 10:16. w16.07 4:13-15
Mande, Disembala 10
Kasi pa nyengo yanthena iyi mukugona na kupumura?—Mrk. 14:41.
Kuŵa maso mwauzimu kukung’anamura vinandi kuluska kuŵa waka na maghanoghano ghawemi. Mazuŵa ghachoko waka pambere ŵandalute ku munda wa Getisemane, Yesu wakaphalira Petrosi, Yakobe na Yohane kuti ŵalutilire kuŵeyelera kwa Yehova. (Luka 21:36.) Nase kuti tilutilire kuŵa maso mwauzimu, tikwenera kuŵaso maso pa nkhani yakulomba. (1 Pet. 4:7) Yesu wakati umaliro wizenge pa ‘ora ilo tikughanaghana kuti ndilo chara.’ Ntheura sono ni nyengo yakugompholera panji kusiwa mwauzimu yayi. Kweniso tiyeni tichenjere na Satana, mzimu wa charu, na makhumbiro gha mathupi ghithu ghakwananga. (Mat. 24:44) Baibolo likutiphalira vitumbiko ivyo Yehova na Yesu ŵatipenge sonosono apa para talutilira kuŵa maso. Kweniso likutiphalira ivyo tingachita kuti tileke kusiwa mwauzimu na kulutilira kuŵa maso. Nyengo zose tiwoneseskenge kuti tili maso mwauzimu, ubwezi withu na Yehova ngwakukhora, ndiposo tikuŵika Ufumu pakwamba. Tikwenera kulutilira kumanya nyengo iyo tilimo na ivyo vikuchitika sono. Ivi vitovwirenge kuti tiŵe ŵakunozgeka nyengo zose. (Chivu. 22:20) Nakuti sono ndipo umoyo withu uli pangozi chomene! w16.07 2:15-17
Chiŵiri, Disembala 11
Lutilirani kuzizipizgirana na kugowokerana na mtima wose.—Kol. 3:13.
Nthengwa yikuŵa yakukhora para mfumu na muwoli ŵakumanya na kuzomerezga kuti wose mbambura kufikapo ndipo wose ŵakubudiska kanandi waka. Ndipouli, ŵakulutilira “kuzizipizgirana na kugowokerana na mtima wose.” Waliyose wangabudira munyake. Kweni para ŵabudirana, wose ŵakusambirapo kanthu kuti ŵagowokeranenge. Kweniso ŵakuwona kuti ni mwaŵi wakulongolera kuti ŵakutemwana zanadi, “pakuti chitemwa chikukakilira ŵanthu pamoza.” (Kol. 3: 14) Nakuti “chitemwa chikuzikira ndipo ntchalusungu. . . . Chitemwa chikusunga vyakusingo yayi.” (1 Kor. 13:4, 5) Usange mfumu na muwoli ŵapambana maghanoghano, ŵakwenera kumazga luŵiro ivyo vyabudika. Ntheura ŵakutorana ŵakwenera kumazga uto ŵabudirana pambere “dazi” lindanjire. (Efe. 4:26, 27) Wose ŵakwenera kuŵa na chikanga kweniso ŵakujiyuyura kuti chiŵe chipusu kuyowoya kuti “phepa nakukhuŵazga.” Ivi vikovwira kuti mfumu na muwoli ŵamazgenge makora masuzgo ghawo na kulutilira kutemwana. w16.08 2:6