Iulai

A mea katoa ne fai ne Iesu, e aofia ei ana vavega, ne fakaata mai ei a mafaufauga mo lagonaga o tena Tamana i se auala ‵lei katoatoa. (Ioa. 14:9) Ne a mea e mafai o tauloto ne tatou mai vavega a Iesu? E a‵lofa malosi a Iesu mo tena Tamana ki a tatou. I tena nofoga i te lalolagi, ne fakaasi mai ne Iesu te lasi o tena alofa ki tino, mai te fakaaogaga o tena malosi fai vavega ke fakafeoloolo aka ei te lotou logo‵mae. I se taimi e tasi, ne ka‵laga atu se avā tāgata ‵kivi ki a ia mō se fesoasoani. (Mata. 20:​30-34) Lavea ne koutou me “ona ko tena alofa,” ne faka‵lei ei ne ia lāua. A te veape Eleni telā ne ‵fuli i konei ki te “ona ko tena alofa” e fakasino atu ki se lagonaga sili o te alofa atafai telā e vau eiloa mai te loto. A te vaegā lagonaga sili o te alofa atafai tenā, telā se fakaasiga o te alofa, ne fakamalosi ei a Iesu ke fagai a tino fia‵kai kae faka‵lei se tino lepela. (Mata. 15:32; Male. 1:41) E fakamautinoa mai i ei ki a tatou i a Ieova, te Atua “alofa atafai,” mo tena Tama e a‵lofa malosi ki a tatou kae e logo‵mae foki i fakalavelave e fe‵paki mo tatou. (Luka 1:78; 1 Pe. 5:7) E olioli eiloa lāua ke na fakaseai atu katoa a fakalavelave kolā e pokotia i ei a tino! w23.04 3 ¶4-5

Ke taumafai tatou o ‵kalo kea‵tea mai te fai‵tau kae fakalogo‵logo ki manatu ‵se kolā ko salalau i te lalolagi a Satani. E mafai o faka‵fonu ‵tou mafaufau ki mafaufauga aoga mai te fai‵tau kae suke‵suke ki te Tusi Tapu. A te ‵kau ki fakatasiga mo te galuega talai ka puipui foki ne ia ‵tou mafaufauga. E tauto mai a Ieova me kafai e fai tatou penā, ka se talia ne ia ke tofotofogina tatou ke silia atu i te mea telā e mafai o fa‵ki ne tatou. (1 Koli. 10:​12, 13) E ‵tau mo tatou taki tokotasi o ‵talo faeloa ke tumau i te fakamaoni ki a Ieova i taimi faiga‵ta konei o aso fakaoti. E manako a Ieova ke ‘‵ligi atu ki tua a mea i ‵tou loto ki a ia’ i ‵talo. (Sala. 62:8) Ke avatu a vikiga ki a Ieova kae fakafetai atu mō mea katoa ne fai ne ia. Fakamolemole atu ki a ia ke fesoasoani mai ke loto malosi koe i te galuega talai. Akai atu ki a ia mō se fesoasoani ke mafai o fakafesagai atu koe ki so se fakalavelave kae ke ‵teke atu so se tofotofoga e mafai o fepaki mo koe. Ke mo a ma talia so se mea io me se tino ke taofi ne ia koe mai te ‵talo atu faeloa ki a Ieova. w23.05 7 ¶17-18

Kaia e ‵kau ei tatou ki fakatasiga a te fakapotopotoga? Te pogai tāua ke ‵viki atu ei ki a Ieova. (Sala. 26:12; 111:1) E ‵kau foki tatou ki fakatasiga ko te mea ke fakatau fakamalosi tatou i taimi faiga‵ta konei. (1 Tesa. 5:11) Kafai e sisi ‵tou lima o fai se tali, ko fai eiloa ne tatou a mea e lua konei. Kae e isi ne mea faiga‵ta e mafai o fakafesagai mo tatou māfai ko fai se tali. E mafai o pole‵pole tatou ma fai ‵tou tali, io me kāti e ma‵nako tatou ke uke ‵tou tali e fai kae e se ti fili sāle tatou. E fakafesagai atu pefea tatou ki tulaga faiga‵ta konei? Te apositolo ko Paulo ne fai mai me ‵tau mo tatou o ‵saga tonu o “fakamalosi atu te suā tino ki te suā tino.” Kafai e masaua ne tatou me i so se tali faigofie telā e fakaasi atu ei te malosi o ‵tou fakatuanaki e mafai o fakamalosi atu ki tino fakalogo‵logo, ka fai ei ke se pole‵pole tatou o fai ‵tou tali. Kae kafai e se ti fili sāle tatou, e fia‵fia eiloa tatou me ko maua ne nisi tino i te fakapotopotoga te avanoaga ke fai olotou tali.—1 Pe. 3:8. w23.04 20 ¶1-3

Ne fai ne te tupu se faka‵pulaga! A tino Iutaia katoa kolā ne ‵nofo fakapagota i Papelonia mō tausaga e 70, ka fakasaoloto ke toe ‵foki atu ki te lotou fenua ko Isalaelu. (Esl. 1:​2-4.) Ko Ieova fua ne mafai o fakataunu ne ia a te mea tenei. E se masani o fakasaoloto sāle ne Papelonia a olotou pagota. (Isa. 14:​4, 17) Kae ko Papelonia ko oti ne fakatakavalegina kae ne fakatonu atu a te tupu fou ki tino Iutaia me ko mafai o tiakina ne latou a te fenua. Ne ‵tau o fai ne tino Iutaia katoa, maise a ulu o kāiga se fakaikuga: ke tiakina a Papelonia io me ke ‵nofo atu i konā. Kāti e se faigofie a te fakaikuga tenā. Kāti e tokouke a tino ko tō ma‵tua ke faima‵laga atu. Kae ona ko te tokouke o tino Iutaia ne fa‵nau i konā, ko fai eiloa ne latou a Papelonia e pelā me ko te lotou fenua tonu. Ne ‵kilo atu latou ki Isalaelu e pelā me ko te fenua o olotou tupuga. Kāti nisi tino Iutaia ko fai pelā me ne tino mau‵mea i Papelonia, tela la, ko faigata ke tiakina ne latou a olotou fale ‵gali io me ko pisinisi kae olo atu ki se fenua e fou ki a latou. w23.05 14 ¶1-2

E fakamalosi mai te Muna a te Atua ke ati aka faeloa ne tatou te kufaki, te alofa atafai, mo te alofa. E fai mai te Luka 21:19: “E auala i te otou kufaki ka faka‵sao ei ne koutou otou ola.” E fai mai te Kolose 3:12: “Fakapei ki luga i a koutou a te alofa atafai.” Kae fai mai te 1 Tesalonia 4:​9, 10: “E akoako eiloa koutou ne te Atua ke alofa te suā tino ki te suā tino. . . . Kae e fakamalosi atu matou, e oku taina, ke momea aka te fai ne koutou a te mea tenā.” A fuaiupu katoa konei ne tusi fakapitoa loa ki soko kolā ko oti ne fakaasi atu ne latou te kufaki, te alofa atafai, mo te alofa. Kae e ‵tau mo latou o tumau i te ati aka faeloa a uiga konā. E ‵tau foki o fai tatou penā. Ke fai penā, ka sau‵tala tatou ki te auala ne fakaasi atu ei ne Kelisiano i aso mua a uiga konā. Ko onoono ei koe ki te auala e mafai ei o fakaakoako koe ki soko konā, kae fai ei ke toka koe mō te fakalavelave lasi. Kafai ko kamata te fakalavelave lasi ka fakaiku aka eiloa ne koe ke tumau i te kufaki, me ko oti ne fakamasani koe ki te kufaki. w23.07 3 ¶4, 8

Faitalia me ko tatou ne tino fakaekegina io me ko “nisi mamoe,” e ‵tau eiloa o tumau tatou i “te Ala Tapu” me takitaki atu ei tatou i loto i te palataiso faka-te-agaga telā ka iku atu ki fakamanuiaga i aso mai mua mai lalo o te Malo. (Ioa. 10:16) Talu mai te 1919 T.A., e lau i te fia miliona o tāgata, fāfine mo tama‵liki ne tiakina ne latou a Papelonia te Sili, te emupaea o lotu ‵se i te lalolagi kātoa, kae kamata o sa‵sale atu i te auala fakatusa tenā. I te taimi ne tiakina ne tino Iutaia a Papelonia, ne fai ne Ieova ke ave kea‵tea so se mea e fakalavelave atu ki te lotou auala. (Isa. 57:14) Kae pefea la a te “Ala Tapu” i aso nei? I se fia selau tausaga mai mua o te 1919, ne fakaaoga ne Ieova a tāgata e ma‵taku ki te Atua ke fesoasoani atu ke fakaavanoa te auala mai Papelonia te Sili. (Fakatusa ki te Isaia 40:3.) Ne fai ne latou a galuega kolā e manakogina ke fakatoka—ko te faitega o te auala i te feitu faka-te-agaga—ke mafai ne tino loto ‵lei o tiaki a Papelonia te Sili fakamuli ifo, kae ulu atu ki loto i te palataiso faka-te-agaga, ko te tapuakiga ‵ma ki a Ieova telā ko toe fakatu aka. w23.05 15-16 ¶8-9

E manako a Ieova ke tavini atu tatou ki a ia mo te loto fia‵fia. (2 Koli. 9:7) Tela la, e mata, e ‵tau o tumau tatou i te kausaki atu ki ‵tou fakamoemoega faka-te-agaga māfai e seai se manakoga i a tatou ke fai penā? Mafaufau ki te fakaakoakoga a te apositolo ko Paulo. Ne fai mai a ia: “E ‵kini ne au toku foitino kae takitaki atu e pelā me se pologa.” (1 Koli. 9:​25-27, fml.) Ne faimālō ne Paulo a ia eiloa ke fai te mea tonu faitalia me ‵kese te mea e manako a ia o fai. E mata, ne talia ne Ieova te taviniga a Paulo? Ao! Kae ne tuku atu ne Ieova te taui ki a ia mō ana taumafaiga. (2 Timo. 4:​7, 8) I se auala tai ‵pau, e fiafia eiloa a Ieova ma lavea ne ia tatou e kausaki ki ‵tou fakamoemoega faitalia me seai se manakoga tonu ke fai penā. E fiafia a ia me faitalia eiloa e se fia‵fia tatou o fai te mea tenā, e iloa ne ia me fai ne tatou ona ko te ‵tou a‵lofa ki a ia. E pelā loa mo Ieova ne fakamanuia ne ia a Paulo, ka fakamanuia foki ne Ia ‵tou taumafaiga. (Sala. 126:5) Kae kafai ko lavea atu a fakamanuiaga a Ieova ki a tatou ka fakamalosi mai foki i ei ki a tatou. w23.05 29 ¶9-10

Ne fakatusa ne te apositolo ko Paulo a tino kolā ka se ‵sao i te aso o Ieova ki tino kolā e ‵moe. E se iloa ne latou a mea e ‵tupu i olotou tafa io me ko te vave o te taimi. Tela la, e se iloa ne latou māfai ko tupu se mea tāua io me ‵saga atu ki ei. A te tokoukega o tino i aso nei e ‵to olotou ‵moe i te feitu faka-te-agaga. (Loma 11:8) E se fia ‵saga atu latou ki fakamaoniga me ko ola tatou i “aso fakaoti” kae ko pili fua o oko mai te fakalavelave lasi. (2 Pe. 3:​3, 4) Kae ko iloa ne tatou me i te fakatonuga fakaosofia ke tumau i te ala faeloa ko gasolo o sili atu tena tāua i aso takitasi konei. (1 Tesa. 5:6) Tela la, e ‵tau mo tatou o nofo filemu kae se gasue‵sue. Kaia? I te mea ma ‵to atu tatou ki faifaiga fakapolitiki io me ko mea fakafenua. A fakamalosiga mai tino ke ‵kau ki mea konei ka gasolo aka eiloa ki luga māfai ko pili mai te aso o Ieova. Kae e se ‵tau eiloa o manava‵se tatou ki te auala e ‵saga atu ei ki mea konā. E mafai eiloa o fesoasoani mai te agaga o te Atua o fai ke tokagamalie kae toka ‵tou mafaufau kae ke fai a fakaikuga ‵poto.—Luka 12:​11, 12. w23.06 10 ¶6-7

Se a te mea ka mafaufau koe ki ei māfai ko lagona ne koe te igoa Samasoni? E mafai eiloa o mafaufau koe ki se tagata telā ne tu ‵kese a tena malosi. E tonu. Kae ne fai ne Samasoni se fakaikuga sē ‵lei telā ne iku atu ki logo‵maega. Kae ui i ei, ne saga atu a Ieova ki mea katoa ne fai ne Samasoni ke fakaasi atu ei tena fakamaoni, telā ne aofia ei ne Ia a te tala o tou tagata i te Tusi Tapu ke maua ei ne tatou a mea aoga mai i ei. Ne fakaaoga ne Ieova a Samasoni ke fai a mea fakaofoofogia ke fesoasoani atu ei ki Ana tino filifilia, ko tino Isalaelu. I se fia selau tausaga mai tua o te matega a Samasoni, ne fakaosofia ne Ieova a te apositolo ko Paulo ke fakaaofia ne ia a te igoa o Samasoni i te fakasologa o tāgata fakatuanaki. (Epe. 11:​32-34) E mafai o fakamalosi mai a te fakaakoakoga a Samasoni. Ne fakalagolago a ia ki a Ieova, faitalia foki loa a tulaga faiga‵ta. E mafai ne tatou o maua a fakamalosiga kae ke tauloto ki nisi akoakoga aoga mai i tena tala. w23.09 2 ¶1-2

E mafai o ati aka ne tatou te ‵tou kufaki mai te fakaasi atu faeloa ki a Ieova a mea e manavase tatou ki ei. (1 Tesa. 5:17) Kāti e seai se tofotofoga faigata e fepaki nei mo koe. Kae e mata, e ‵sala koe ki te takitakiga a Ieova i so se taimi e fanoanoa, ‵numi te mafaufau, io me ko se iloa me se a te mea e ‵tau o fai? Kafai e ‵sala faeloa koe ki te fesoasoani o te Atua ke fakafesagai atu ki ou fakalavelave i aso takitasi, ka se fakatalave koe o ‵sala ki a ia māfai ko fepaki mo tulaga faiga‵ta tai ‵lasi atu i aso mai mua. Ka maua eiloa ne koe te loto talitonu me iloa ‵lei ne ia te taimi mo te auala tonu ke fesoasoani atu ki a koe. (Sala. 27:​1, 3) Kāti e mafai eiloa o kufaki tatou i te fakalavelave lasi i aso mai mua māfai e kufaki ne tatou a tofotofoga i aso nei. (Loma 5:3) Kaia e fai atu ei tatou penā? Ne iloa aka ne taina e tokouke me i so se tofotofoga o te fakatuanaki kolā ne kufaki latou i ei ne fesoasoani atu ke mafai ne latou o kufaki te suā fakalavelave. Ko te lotou kufaki ne fai ei ke gasolo o ‵lei atu latou, kae fakamalosi aka ei te lotou fakatuanaki ki te toka mo te loto fiafia o Ieova o fesoasoani ki a latou. Ona ko te fakatuanaki ne mafai ei o kufaki ne latou te suā tofotofoga.—Iako. 1:​2-4. w23.07 3 ¶7-8

E fakamalosi aka ne te loto maulalo mo te alofa atafai o Ieova ke uiga faigofie a ia. Ne fakaasi mai ne Ieova a tena loto maulalo i te taimi ko pili ei o fakaseai ne ia a tino amio ma‵sei i Sotoma. E auala i ana agelu, ne fakatonu atu a Ieova ki te tagata amiotonu ko Lota ke ‵tele ki koga maugā. Ne mataku a Lota ma fano ki ei. Tenā ne fakamolemole atu a ia ke olo tena kāiga o faka‵lafi i Soala, se tamā fa‵kai telā ne fakaiku aka ne Ieova ke fakaseai atu. Ne mafai fua o faimālō ne Ieova ke fakalogo a Lota ki Ana fakatonuga takitasi. Kae e ui ei, ne talia ne ia te fakamolemole a Lota, faitalia me iku atu ki te fakasaoga o Soala. (Kene. 19:​18-22) E fia senitenali ki tua, ne fakaasi atu ne Ieova te alofa atafai ki tino i Nineva. Ne uga ne ia te pelofeta ko Iona ke folafola atu te fakaseaiga o te fa‵kai mo tino ma‵sei i ei. Kae i te taimi ne sala‵mō ei a tino Nineva, ne alofa a Ieova ki a latou kae fakasao ne ia te fakai.—Iona 3:​1, 10; 4:​10, 11. w23.07 21 ¶5

Ne a mea e mafai o tauloto ne tatou mai te fakaakoakoga a Ioasa? Ne fai a ia e pelā me se lakau telā e ‵sae fua ana aka i luga kae tokai ki pou. I te taimi ko galo ei a te pou—ko Ieoiata—kae ‵sae mai a akoakoga aposetasi, ne faigofie fua ke siga a Ioasa. E fakamatala faka‵lei mai i konei me e se ‵tau fua o ma‵taku tatou ki te Atua ona ko fakaakoakoga ‵lei a ‵tou taina Kelisiano, e aofia i ei ‵tou kāiga. Ke tumau i te ma‵losi faka-te-agaga, e ‵tau mo tatou o fakamalosi aka te ‵tou tapuaki fakamaoni atu ki te Atua mo te ma‵taku ki a ia mai te faiga o sukesukega, mafaufau ‵loto mo te ‵talo faeloa. (Iele. 17:​7, 8; Ko. 2:​6, 7 ) E se manako a Ieova ke fai ne tatou a mea e uke. E fakamatala mai i te Failauga 12:​13, a te mea telā e manako a ia ki ei: “Mataku ki te Atua tonu kae fakalogo ki ana fakatonuga, me tenei eiloa te tiute kātoa o te tagata.” Kafai e ma‵taku tatou ki te Atua, ka mafai eiloa o fakafesagai atu tatou ki tofotofoga i aso mai mua kae tu ‵mautakitaki i te fakamaoni. Ka seai eiloa se mea ka mafai o fakamasei ne ia a te ‵tou va fakataugasoa mo Ieova. w23.06 19 ¶17-19

E kamata penei te fuaiupu e 5: “Te Atua telā e sagasaga i luga i te nofogaaliki, ne fai mai.” (Faka. 21:5a) Tenei te taimi muamua mai taimi e tolu i te tusi o Fakaasiga ne faipati mai ei a Ieova e auala i se fakaasiga. Tela la, a te fakamaoniga tenei ne seki fai mai ne se agelu ‵mana, ke oko ki a Iesu telā ne toetu aka mai te mate, kae mai i a Ieova eiloa! E faka‵mafa mai i te manatu tonu tenei a te fakatuagagina o pati kolā e ‵soko mai. Kaia? Me i a Ieova “e se mafai o loi.” (Tito 1:2) A te fuaiupu tenā e fakatalitonu katoatoa mai ne ia a te ‵tonu o pati ne fai‵tau tatou ki ei i te Fakaasiga 21:​5, 6. Ke sau‵tala tatou ki te pati “Kiloke!” A te pati Eleni telā ne ‵fuli ki te “kiloke!” ne fakaaoga faeloa i te tusi ko Fakaasiga. Ne a la mea ne ‵tupu mai tua o te faiatuga o te pati tenā? Ko pati a te Atua: “Ko faka‵fou ne au a mea katoa.” E tonu, e faipati a Ieova ki mea ka ‵tupu i aso fakamuli, kae ona ko te mautinoa i a ia me ka taunu eiloa tena folafolaga, tenā ne faipati ei a ia e pelā eiloa me ko oti ne kamata o ‵tupu a mea konā.—Isa. 46:10. w23.11 3-4 ¶7-8

Ne taua atu a Petelu ki ana vāivāiga. Mafaufau ki nai fakaakoakoga. I te taimi ne fakamatala atu ne Iesu a te auala ka logo‵mae kae mate ei a ia ke fakataunu ei a valoaga i te Tusi Tapu, ne ‵liko ne Petelu a ia. (Male. 8:​31-33) Ne kinau faeloa a Petelu mo nisi apositolo me ko oi e sili i a latou. (Male. 9:​33, 34) I te ‵toe po o Iesu mai mua o mate, ne ‵kati ne Petelu te taliga o se tagata. (Ioa. 18:10) I te po eiloa tenā, ne mataku a Petelu, kae fakafiti fakatolu ne ia tena taugasoa ko Iesu. (Male. 14:​66-72) Ne fai ne te mea tenā ke tagi mautuutu a Petelu. Ne seki ‵fiu vave a Iesu i tena apositolo loto vāivāi tenei. Mai tua o te toe‵tuga a Iesu, ne toe ‵sala a ia ki se avanoaga ke fakaasi atu me koi alofa eiloa a ia ki a Petelu. Ne ‵kami ne Iesu a Petelu ke tavini atu e pelā me se tausi mamoe loto maulalo ki ana mamoe. (Ioa. 21:​15-17) Ne toka a Petelu o fai te mea tenā. Kae ne nofo atu a ia i Ielusalema i te aso o te Penitekoso kae aofia i tino muamua kolā ne fakaekegina ki te agaga tapu. w23.09 22 ¶6-7

“Tausi faka‵lei te lafu mamoe a te Atua,” ko te fakamalosiga a te apositolo ko Petelu ki ana taina toeaina. (1 Pe. 5:​1-4.) Kafai koe se toeaina, e iloa ne matou me alofa koe ki ou taina mo tuagane kae manako o tausi faka‵lei ki a latou. Kae i nisi taimi ko mafaufau ifo koe me i a koe ko tō fakalavelave io me ko tō fi‵ta telā ko se mafai ei o fakataunu tou tiute. Se a tau mea e mafai o fai? ‵Ligi atu ki a Ieova a mea e manavase koe ki ei. Ne tusi mai a Petelu: “Kafai e tavini atu se tino, ke tavini atu e ‵tusa mo te malosi telā e tuku atu ne te Atua.” (1 Pe. 4:11) Kāti e fe‵paki ou taina mo tuagane mo fakalavelave kolā e se mafai o faka‵lei aka i te olaga tenei. Kae masaua me e sili fakafia atu te fesoasoani e mafai o maua mai i “te tausi mamoe sili,” ko Iesu Keliso, i lō te mea e mafai ne koe o fai. E mafai o fesoasoani mai a ia i te taimi nei pelā foki mo te lalolagi fou. E fakamolemole atu a te Atua ki toeaina ke a‵lofa ki olotou taina, ke tausi faka‵lei a taina, kae ke fai pelā me ne “fakaakoakoga ‵lei ki te lafu mamoe.” w23.09 29-30 ¶13-14

E ‵tau o ‵kalo kea‵tea tatou mai i te fakaaogaga o mafaufauga o tino. Kafai e maua ne tatou te kilokiloga a te tagata e uiga ki mea, kāti e mafai loa o fakaseaoga ne tatou a Ieova mo ana tulaga. (1 Koli. 3:19) A te “poto o te lalolagi tenei” e fakamalosi faeloa ne ia a tino ke sē faka‵logo ki te Atua. Ne talia ne nāi Kelisiano i te fakai ko Pelekamo mo Tuatila a te ifo ki tupua mo amioga ma‵sei. Ne polopoloki ‵mafa ne Iesu a te avā fakapotopotoga konei me ne talia ne latou a amioga fakatauavaga sē ‵tau. (Faka. 2:​14, 20) I aso nei, e fakafesagai tatou ki fakamalosiga ke talia a kilokiloga ‵se. Kāti e taumafai ‵tou kāiga mo taugasoa o fai ke tali‵tonu tatou me i a tatou ko tō uiga faiga‵ta kae e ‵tau o ofa ne tatou a tulafono a Ieova. E pelā me se fakaakoakoga, kāti ka fai mai latou me se mea ‵lei fua ke fakama‵lie aka ‵tou manakoga, me i tulaga o te Tusi Tapu ki mea tau amioga ne mea mua loa. I nisi taimi, kāti e fakasako‵sako atu tatou i fakatonuga mai i a Ieova e se ma‵nino. Kāti e mafai o tofotofogina tatou ke ‘silia ‵tou mea e fai i lō mea kolā ne tusi i te tusi.’—1 Koli. 4:6. w23.07 16 ¶10-11

Ne manakogina ne Malia, te mātua o Iesu te loto malosi. E seki avaga tou fafine; kae ka faitama a ia. Ne seki ai sena iloa i te putiakaga o tamaliki, kae ne ‵tau o tausi atu a ia ki se tamaliki tagata telā ka fai mo fai te Mesia. Kae ona ko te mea e seki aofia tou fafine i faifaiga fakatauavaga, ka fakamatala atu pefea ne Malia a te mea tenei ki tena ‵sai feagaiga ko Iosefa? (Luka 1:​26-33) Ne maua pefea ne Malia te loto malosi? Ne ‵sala atu a ia ki te fesoasoani o nisi tino. Pelā me se fakaakoakoga, ne fakamolemole a ia ki a Kapilielu ke tuku atu nisi fakamatalaga e uiga ki te tōfiga tenā. (Luka 1:34) E se leva, kae faimalaga atu a ia ki “te fenua maugā” o Iuta o asi tena kāiga ko Elisapeta. Ne fakamālō atu a Elisapeta ki a Malia kae ne fakaosofia ne Ieova ke fakaasi atu ne ia se valoaga fakamalosi loto e uiga ki te tama tagata a Malia telā e seki fanau. (Luka 1:​39-45.) Ne fai mai a Malia me ne fai ne Ieova a “galuega ‵mana ki ana lima.” (Luka 1:​46-51) E auala i a Kapilielu mo Elisapeta, ne fakamalosi ei ne Ieova a Malia. w23.10 14-15 ¶10-12

E isi se aofaki foliki o soko o Keliso ne fakaekegina ki te agaga tapu, kae maua ne latou se fesokotakiga fakapito mo Ieova. A te toko 144,000 konei ka tavini atu e pelā me ne faitaulaga i te lagi fakatasi mo Iesu. (Faka. 14:1) A te Potu Tapu o te faleie tapu e fakaata mai i ei a te lotou tulaga e pelā me ne tino fakaekegina ki te agaga a koi ‵nofo latou i te lalolagi e pelā me ne tama puke a te Atua. (Loma 8:​15-17) A te Potu Tafasili i te Tapu o te faleie tapu e fakaata mai ei a te lagi, telā e nofo i ei a Ieova. A “te ‵pui laugatu” telā e ‵vae ne ia te Potu Tapu mai te Potu Tafasili i te Tapu e fakaata mai i ei a te foitino faka-te-foitino o Iesu telā e fai pelā me se ‵pui e taofi ei a ia mai te ulu atu ki te lagi e pelā me ko te ‵toe Faitaulaga Sili i te faletapu faka-te-agaga. Mai te tuku atu o tena ola faka-te-foitino e pelā me se taulaga mō tino katoa, ne ‵tala mai ei ne Iesu te auala ki te ola i te lagi mō Kelisiano fakaekegina katoa. E ‵tau foki o tiakina ne latou a olotou foitino faka-te-foitino ke maua ne latou a te taui i te lagi.—Epe. 10:​19, 20; 1 Koli. 15:50. w23.10 28 ¶13

Kitiona ne tali atu mo te filemu ki tino Efalaima kolā ne fakamasei ne latou a ia. (Fama. 8:​1-3) Ne seki tali atu a ia mo te kaitaua. Ne fakaasi atu me fakatāua ne ia a nisi tino mai te fakalogologo atu ki olotou fameo, kae ne faka‵noga ne ia mo te atamai te kaitāua o tino. E fakaakoako a toeaina ‵poto ki a Kitiona mai te fakalogo‵logo faka‵lei kae tali atu mo te filemu māfai ko fakamasei latou ne se tino. (Iako. 3:13) Ko fesoasoani eiloa latou ki te tausiga o te filemu i te fakapotopotoga. I te taimi ne tavae ei ne nisi tino a Kitiona ona ko tena manumalo i Mitiana, ne fakasino atu a ia ki a Ieova. (Fama. 8:​22, 23) E fakaakoako atu pefea a tāgata tofia ki a Kitiona? E mafai o avatu ne latou a vikiga ki a Ieova ona ko mea ne fai ne latou. (1 Koli. 4:​6, 7) E pelā mo se toeaina telā ne maua ne ia a tavaega ona ko tena atamai i te akoako atu, e mafai o fakasino atu a ia ki te koga ne maua mai ei a akoakoga konā, telā ko te Muna a te Atua, io me ko akoga fakamasani e maua ne tatou mai te fakapotopotoga a Ieova. E mafai ne toeaina o mafaufau ‵loto i nisi taimi me e mata, e akoako atu fua latou ke maua a tavaega mai tino io me ikai. w23.06 4 ¶7-8

Kafai e seai se tali ki se mea ne fakatagi atu tatou ki ei i ‵tou ‵talo, e mafai o fesili ifo tatou, ‘E mata, e ‵lei a te mea e ‵talo au ki ei?’ Se mea masani o mafau‵fau tatou me iloa ne tatou te ‵toe mea ‵lei mō tatou. Kae ko mea e fakatagi tatou ki ei e mafai o se aoga ki a tatou i se taimi leva. Kafai e ‵talo tatou e uiga ki se fakalavelave, kāti e isi se auala ‵lei atu ke faka‵lei ei te fakalavelave tenā i lō te mea ne ‵talo tatou ki ei. Kae ko nisi mea ne ‵talo tatou ki ei kāti e se fetaui mo te loto o Ieova. (1 Ioa. 5:14) E pelā mo te fakaakoakoga a mātua kolā ne fakatagi atu lāua ki a Ieova ke puipui te lā tama ke tumau i loto i te munatonu. E foliga mai me e ‵lei ‵ki te fakamolemole tenā. Kae ko Ieova e se faimālō ne ia a tino ke tavini atu ki a ia. E manako a ia ke filifili ne tatou katoa, e aofia i ei a ‵tou tama‵liki, ke tapuaki atu ki a ia. (Teu. 10:​12, 13; 30:​19, 20) Tela la, e mafai ne mātua o fakamolemole ki a Ieova ke fesoasoani atu ke mafai o oko latou ki loto o olotou tama‵liki ke mafai o ga‵sue o fakaasi atu te alofa ki a Ieova kae ke fai mo fai Tena taugasoa.—Faata. 22:6; Efe. 6:4. w23.11 21 ¶5; 23 ¶12

Kaia e fai ei a te fakamafanafana atu ki nisi tino e pelā me se auala ke fakaasi atu te alofa ki a latou? E ‵tusa mo se fakamatalaga a se Tusi Tapu e tasi, a te pati “fakamafanafana” telā ne fakaaoga ne Paulo, e fakauiga loa ki te “tu atu i tafa o se tino telā e fepaki mo se fakalavelave faigata kae fakamalosi a ia.” Tela la, kafai e tuku atu ne tatou a fakamafanafanaga, ko fesoasoani tatou ki se taina talitonu telā e loto mafatia ke tu ki luga kae tumau i te sasale atu i te auala ki te ola. I taimi takitasi e tuku atu ne tatou se fakamafanafanaga ki se taina io me se tuagane, ko fakaasi atu eiloa ne tatou te alofa ki ‵tou taina tali‵tonu. (2 Koli. 7:​6, 7, 13) E isi se sokoga o lagonaga alofa atafai mo te tuku atu o fakamafanafanaga. I te auala fea? A te tino alofa atafai ka gasuesue eiloa o fakamafanafana a nisi tino kae taumafai o fakafeoloolo aka olotou lagonaga logo‵mae. Tela la, kafai tatou e a‵lofa atafai, ka fesoasoani mai ei ke fakamafanafana ne tatou a nisi tino. Ne fakaasi mai ne Paulo me ne gasuesue a Ieova o fakamafanafana atu a nisi tino ona ko tena alofa atafai. Ne fakamatala mai ne Paulo a Ieova e pelā me ko “te Tamana o te alofa fakamagalo mo te Atua o fakamafanafanaga katoa.”—2 Koli. 1:3. w23.11 9-10 ¶8-10

E fakamoe‵moe a soko katoa o Keliso ke fe‵paki latou mo puapuaga. Mafaufau ki te fakaakoakoga a te apositolo ko Paulo. Ne fai atu a ia ki tino i Tesalonia: “I te motou ‵nofoga i a koutou, ko leva ne fai sāle atu matou me ka logo‵mae tatou i puapuaga, kae tenā eiloa te mea ko oti ne tupu.” (1 Tesa. 3:4) Kae ne tusi atu a ia ki te kau i Kolinito: “E se ma‵nako matou ke se iloa ne koutou, e oku taina, a puapuaga ne fe‵paki mo matou . . . Ne fakalotolotolua malosi matou e uiga ki omotou ola.” (2 Koli. 1:8; 11:​23-27) E fakamoe‵moe foki a Kelisiano i aso nei me ka fe‵paki latou mo vaegā puapuaga kese‵kese. (2 Timo. 3:12) I te taimi ne fakatuanaki koe ki a Iesu kae tautali atu i a ia, kāti ne kaitāua a taugasoa mo kāiga ki a koe. E mata, e isi ne fakalavelave ne ‵sae aka i te galuega ona ko tou tumau i te fakamaoni i mea katoa? (Epe. 13:18) Kai ‵teke atu a tino o te malo ona ko te talai atu ne koe tou fakamoemoega ki nisi tino? Faitalia me ne a puapuaga e mafai o fe‵paki mo tatou, kae e fai mai a Paulo me ‵tau mo tatou o fia‵fia. w23.12 10-11 ¶9-10

Ne fepaki foki a Iakopo mo fakalavelave e uke. Ne fakamasiasi ne ana tama tāgata e tokolua, ko Simeona mo Levi, a te lotou kāiga mo te igoa o Ieova. E se gata i ei, ne mate atu te avaga pele a Iakopo ko Lasela, i te fanauga o te lā tama tagata i te tokolua. Kae ona ko te malosi o te oge, ne faimālō a Iakopo ke fano ki Aikupito faitalia tena tulaga matua. (Kene. 35:​16-19; 37:28; 45:​9-11, 28) Faitalia a fakalavelave katoa konā, ne ‵mautakitaki te fakatuanaki o Iakopo ki a Ieova mo Ana folafolaga. Kae ne fakaasi atu ne Ieova me ne talia ne Ia a Iakopo. Ne tuku atu ne Ieova ki a ia a koloa e uke. Kae mafaufau la ki te lasi o te loto fakafetai o Iakopo ki a Ieova, i te taimi ne toe fetaui a ia mo Iosefa, tena tama tagata telā ne mafaufau a ia me ko leva ne mate! Ko te va fakataugasoa ‵pili o Iakopo mo Ieova, ne fai ei ke mafai ne ia o fakafesagai atu ki ana fakalavelave mo te manuia. (Kene. 30:43; 32:​9, 10; 46:​28-30) Kafai e fakatumau ne tatou se va fakataugasoa ‵pili mo Ieova, e mafai foki o manuia tatou māfai ko fakafesagai atu ki fakalavelave seki fakamoemoegina. w23.04 15 ¶6-7

A te Salamo 23 se pese e fakaasi mai i ei a te loto talitonu ki te alofa mo te alofa atafai o Ieova. Ne fakamatala mai ne Tavita, telā ne tusi ne ia a te salamo tenei, a te ‵pili o te fesokotakiga i te va o ia mo tena Tausi Mamoe, ko Ieova. Ne tokagamalie a Tavita mai te iloa atu me e takitaki ne Ieova a ia, kae ne fakalagolago katoatoa a tou tagata ki a Ia. Ne iloa ne Tavita me ka fakaasi atu ne Ieova a tena alofa ki a ia i aso takitasi o tena olaga. Se a te mea ne fai ei ke maua ne ia te loto talitonu? Ne tokagamalie eiloa a Tavita me ne tausi atu faeloa a Ieova ki ana manakoga. Ne ‵pili foki te va fakataugasoa o Tavita mo Ieova kae iloa ne ia me maua ne ia a tena taliaga. Tenā te pogai ne mautinoa ei i a ia me faitalia a mea ‵tupu ki a ia i aso mai mua, ka tausi atu faeloa a Ieova ki ana manakoga katoa. A te talitonu o Tavita ki te alofa atafai o Ieova ne sili fakafia atu i lō ana manavasega katoa, kae ne fai ei ke fiafia malosi a ia kae lotomalie foki.—Sala. 16:11. w24.01 29 ¶12-13

Talu mai te Taua i te Lua a te Lalolagi, ne maua eiloa ne tino o Ieova i fenua e uke se tamā filemu kae ne saoloto foki ke fai te lotou galuega talai. E tonu, ne gasolo eiloa ki mua te faiga o te galuega talai. I aso nei, e tumau eiloa a sui o te Potukau Pule i te ‵kilo atu ki a Keliso mō se takitakiga. E ma‵nako latou ke maua ne taina a te kilokiloga me i fakatonuga konā ne aumai eiloa i te Atua. Kae e fakaaoga ne latou a ovasia o seketi mo toeaina ke tuku atu ne latou a fakatonuga konā ki fakapotopotoga. A toeaina fakaekegina e puke ne Keliso ki “tena lima fakaatamai.” (Faka. 2:1) E tonu, a toeaina konei e se ‵lei katoatoa kae fai mea ‵se. Ne fai ne Mose mo Iosua a mea ‵se i nisi taimi, kae penā foki te kau apositolo. (Nume. 20:12; Iosu. 9:​14, 15; Loma 3:23) Kae e lavea ‵lei ne tatou me koi takitaki faka‵lei eiloa ne Keliso a te tavini fakamaoni mo toeaina tofia, kae ka tumau a ia i te fai penā. Tela la, e isi eiloa ne pogai ke tali‵tonu tatou ki te takitakiga e tuku mai ne ia e auala i a latou kolā ne ‵tofi aka ke fai ne latou te takitakiga. w24.02 23-24 ¶13-14

I aso nei e mafai o fakafiafia ne tatou a Ieova mai te fai‵pati e uiga ki a ia mo te alofa mo te loto fakafetai. Kafai e olo atu tatou i te galuega talai, e masaua ne tatou me i te ‵toe pogai tāua o te ‵tou galuega talai ko te fesoasoani atu ki tino ke fakapili‵pili atu ki a Ieova, kae ke ‵pau te lotou kilokiloga mo tatou e uiga ki te ‵tou Tamana pele. (Iako. 4:8) E fia‵fia tatou o fakaasi atu ki tino a fakamatalaga i te Tusi Tapu e uiga ki a Ieova, tena alofa, fai mea tonu, poto, malosi mo nisi uiga ‵gali o ia. E ‵viki atu foki tatou ki a Ieova kae fakafiafia ne tatou a ia mai te taumafai o fakaakoako ki a ia. Kafai e fai tatou penā, ka tu ‵kese eiloa tatou mai tino i te lalolagi masei tenei. Ka lavea mai ne tino me ‵kese tatou kae fai ei ke mafaufau latou ki te pogai e fai ei penā a tatou. (Mata. 5:​14-16) I te taimi e fesokotaki ei tatou mo latou i aso takitasi, e mafai o fakamatala atu ne tatou a pogai e ‵kese ei a mea e fai ne tatou. Mai te fai penā, ka fia fakapili‵pili atu eiloa a tino loto ‵lei ki te ‵tou Atua. Kafai e ‵viki atu tatou ki a Ieova i auala konei, ko fakafiafia eiloa ne tatou a tena loto.—1 Timo. 2:​3, 4. w24.02 10 ¶7

Ke fai pelā me se tagata Kelisiano matua ‵lei, e ‵tau o tauloto koe ki atamai aoga. Ka fesoasoani atu ei ke talia ne koe o fai a tiute i te fakapotopotoga, ke ‵sala se galuega ‵togi ke tausi ei koe mo tou kāiga, kae ke maua a fesokotakiga ‵lei mo nisi tino. E pelā me se fakaakoakoga fai ke iloa o faitau kae tusitusi faka‵lei. E fai mai te Tusi Tapu me i te tagata fiafia kae manuia e fakaaoga ana taimi i aso takitasi ke faitau ki te Muna a te Atua kae mafaufau ‵loto ki ei. (Sala. 1:​1-3.) Mai te faitau ki te Tusi Tapu i aso katoa, ka iloa faka‵lei ne ia a mafaufauga o Ieova, telā ka fesoasoani atu ki a ia ke iloa o fakagalue a manatu mai te Tusi Tapu. (Faata. 1:​3, 4) E manakogina ne ‵tou taina mo tuagane a te fesoasoani o tāgata kolā e mafai o akoako kae tuku mai ne latou a manatu fakatonutonu mai te Tusi Tapu. Kafai e iloa ne koe o faitau kae tusitusi faka‵lei, ka mafai o fakatoka ne koe a lāuga mo tali kolā ka aoga kae fakamalosi aka i ei a fakatuanaki o nisi tino. Ka mafai foki o fakamau ne koe a manatu tāua kolā ka aoga ki te atiakaga o tou fakatuanaki kae fakamalosi atu a nisi tino. w23.12 26-27 ¶9-11

Kafai koe mataku, mafaufau ‵loto ki mea ka fai ne Ieova i aso mai mua māfai ko galo atu a Satani. E isi se fakaasiga i te polokalame o te fono lasi i te 2014 ne fakaasi mai ei se tamana e sau‵tala mo tena kāiga ki te 2 Timoteo 3:​1-5, moi fai ne fakasino atu a fuaiupu konā ki te olaga i te Palataiso: “Ka oko mai eiloa a toe taimi fakafia‵fia i te lalolagi fou. Me i tino ka a‵lofa ki nisi tino, fia‵fai ki koloa faka-te-agaga, agamalu, loto maulalo, ‵viki atu ki te Atua, faka‵logo ki mātua, e loto fakafetai, e fakamaoni, a‵lofa malosi ki olotou kāiga, e lotoma‵lie ki so se feagaiga, e fai‵pati faeloa ki mea e ‵lei ei a nisi tino, e loto pulea, e atafai, e fia‵fia ki te aga‵lei, e fakatuagagina, e loto malamalama, e mafaufau ‵lei, e fia‵fia ki te Atua i lō fakafiafiaga, e fia‵fia tonu o tapuaki ki te Atua; ke fakapili‵pili malosi atu ki tino konei.” E mata, e sau‵tala sāle koe mo tou kāiga io me ko taina tali‵tonu ki te vaegā olaga i te lalolagi fou? w24.01 6 ¶13-14

Ko oko eiloa i te fakamafanafana mai ke iloa atu me e talia ne Ieova ana tino e pelā me se potukau! E fai mai te Tusi Tapu: “A Ieova e fiafia ki ana tino.” (Sala. 149:4) Kae i nisi taimi, e loto vāi‵vai malosi a nisi tino ko ala ei o mafau‵fau ifo penei, ‘E mata, e talia ne Ieova a au?’ E tokouke a tino tapuaki fakamaoni a Ieova i aso o te Tusi Tapu, ne maua ne latou a manatu fakalotolotolua penā. (1 Samu. 1:​6-10; Iopu 29:​2, 4; Sala. 51:11) E fakaasi manino mai i te Tusi Tapu me e mafai eiloa o talia ne Ieova a tino sē ‵lei katoatoa. Pefea la? E ‵tau o fakatuanaki tatou ki a Iesu Keliso kae papatiso. (Ioa. 3:16) I te auala tenei, e fakaasi atu ei ne tatou i mua o tino me ko sala‵mo tatou ki ‵tou agasala, kae ko oti ne fai ‵tou tautoga ki te Atua ke fai tena loto. (Galu. 2:38; 3:19) E fiafia a Ieova māfai e fakagalue ne tatou a auala konei ke ati aka ei se fesokotakiga mo ia. Kafai e tumau tatou i te faiga o te ‵toe mea e mafai ke ola e ‵tusa mo ‵tou tukuatuga, ka talia tatou ne Ieova kae kilo mai ki a tatou e pelā me ne ana taugasoa ‵pili.—Sala. 25:14. w24.03 26 ¶1-2

E mafai o fakaakoako tatou ki soko konei mai te tumau i te talai faitalia loa me fakatonu mai a tino pule o malo ke taofi. E mafai o loto tali‵tonu tatou me ka fesoasoani mai a Ieova ke fakaoti faka‵lei a te ‵tou galuega talai. Tela la ke ‵talo atu tatou ke maua te loto toa mo te poto kae penā ki a Ieova ke fesoasoani mai ke kufaki tatou i ‵tou fakalavelave. E tokouke tatou e logo‵mae i se masaki io me ko mea tau lagonaga, te galo atu o se tino pele, se fakalavelave i te kāiga, fakasauaga, io me se isi fakalavelave aka. Kae e fai ne vaegā fakalavelave pelā mo famai ‵pisi mo taua ke na faigata aka eiloa o kufaki i tulaga penā. ‵Ligi atu ki tua a mea i tou loto ki a Ieova. Fakaasi atu ki a ia tou tulaga e pelā eiloa me fakaasi atu ne koe ki sou taugasoa pili. Ke loto talitonu me ka “gasuesue a [Ieova] mō koe.” (Sala. 37:​3, 5) A te tumau faeloa i te ‵talo ka fesoasoani mai ke “kufaki i puapuaga.” (Loma 12:12) E iloa ne Ieova a mea e fe‵paki mo ana tino tapuaki—“e lagona ne ia te lotou ‵tagi mō se fesoasoani.”—Sala. 145:​18, 19. w23.05 5-6 ¶12-15

Kafai e isi ne fakaikuga tāua e ‵tau o fai, se mea ‵lei ke ‵sala tatou “me se a te loto o Ieova” ko gasue‵sue ei tatou e ‵tusa mo tena loto. (Efe. 5:17) Kafai e maua ne tatou a fakatakitakiga i te Tusi Tapu kolā e fetaui mo ‵tou fakanofonofoga, e fakamaoni mai ei me e ‵sala eiloa tatou ki mafaufauga o Ieova e uiga ki te mea tenā. Kae kafai ko fakagalue ne tatou ana fakatakitakiga, ka mafai eiloa o fai ne tatou a fakaikuga ‵lei. E manako a te “tino masei” telā ko te ‵tou fili ko Satani o fai tatou ke fakalave‵lave i mea o te lalolagi tenei, ko seai ei ne ‵tou taimi mō te galuega a te Atua. (1 Ioa. 5:19) Tenā ko faigofie ei ki se Kelisiano ke fakamuamua ne ia te ‵sala atu ki tupe e uke, kausaki ki akoakoga ma‵luga, io me ko tena galuega ‵togi i lō te tavini atu ki a Ieova. Kafai ko tupu te mea tenā, ko fakaasi mai me ko maua ne ia a mafaufauga o te lalolagi. E tonu, e se ma‵sei a mea konei, kae ke mo a fua ma fakamuamua ne tatou i ‵tou olaga. w24.03 24 ¶16-17