Oketopa

E mata e faigata ki a koe ke fakalogo? Ne faigata ki te tupu ko Tavita, tenā ne ‵talo ei a ia ki te Atua: “Fakamalosi aka i loto i a au te loto fiafia o fakalogo ki a koe.” (Sala. 51:12) Ne alofa Tavita ki a Ieova. Kae i nisi taimi ne faigata ki a Tavita ke fakalogo, kae penā foki tatou. Kaia? Muamua la, ne fa‵nau mai tatou mo te uiga se fakalogo. Te lua, e taumafai faeloa a Satani o fakamalosi tatou ke se faka‵logo, e pelā mo ia. (2 Koli. 11:3) Te tolu, e sikomia tatou ne te uiga ‵teke o te lalolagi nei, “ko te agaga telā e galue nei i tino sē faka‵logo.” (Efe. 2:2) E ‵tau o ga‵lue malosi tatou o taua atu ki ‵tou tulaga agasala kae ke ‵teke foki a fakamalosiga a te Tiapolo mo te lalolagi tenei ke fai ei tatou ke se faka‵logo. E ‵tau o taumafai malosi tatou o faka‵logo ki a Ieova mo tino kolā ne ‵tofi ne ia ke fai te takitakiga. w23.10 6 ¶1

Se a te akoakoga e tauloto ne tatou mai te vavega a Iesu ke ‵fuli a vai ki uaina? Ko te akoakoga e uiga ki te loto maulalo. Ne seki faipati fakamatamata a Iesu e uiga ki te vavega tenā; a te ‵tonuga loa, ne seki faipati fakamatamata eiloa a ia ki so se mea ‵lei ne fai ne ia. I lō te fai penā, ne loto maulalo a ia kae avatu faeloa ne ia a vikiga mo tavaega ki tena Tamana. (Ioa. 5:​19, 30; 8:28) Kafai e fakatumau ne tatou se kilokiloga loto maulalo ki a tatou eiloa e pelā mo Iesu, ka se fai‵pati fakamata‵mata eiloa tatou ki so se mea e fai ne tatou. Ke mo a eiloa ma fai‵pati fakamata‵mata e uiga ki a tatou eiloa, kae ki te ‵tou Atua gali telā e tavini tatou ki ei. (Iele. 9:​23, 24) Ke na avatu eiloa ne tatou a vikiga kolā e ‵tau fua o maua ne ia. E tonu, e seai se mea ‵lei e mafai o fai ne tatou e aunoa mo te fesoasoani o Ieova. (1 Koli. 1:​26-31) Kafai e loto maulalo tatou, e se ‵tau o tavae ne tatou a tatou eiloa ona ko mea ‵lei e fai ne tatou ki nisi tino. E lotoma‵lie tatou ke iloa atu me e lavea kae fakatāua ne Ieova a ‵tou mea e fai. (Fakatusa ki te Mataio 6:​2-4; Epe. 13:16) E tonu, a te fakaasi atu o te loto maulalo e pelā mo Iesu e fakafiafia eiloa ki a Ieova.—1 Pe. 5:6. w23.04 4 ¶9; 5 ¶11-12

E auala i te takitakiga a te agaga tapu, ne fakamalosi atu te apositolo ko Paulo ki Kelisiano ke onoono ki mea e ‵lei ei a nisi tino. E fakagalue pefea ne tatou a pati fakatonutonu konā i taimi o fakatasiga? Māfai e masaua ne tatou, me e ma‵nako foki a nisi tino ke fai olotou tali. Ke mafaufau ki ei penei. Kafai e sau‵tala koe mo ou taugasoa, e mata, ka faipati faeloa koe ko seai ei se avanoaga o latou ke fai‵pati? Ikai! E manako koe ke fai‵pati foki latou. E penā foki i fakatasiga, e ma‵nako tatou o tuku atu se avanoaga ki tino e tokouke ke fai olotou tali. E tonu, a te auala magoi e tasi ke fakamalosi ei ‵tou taina mo tuagane ko te tuku atu se avanoaga ki a latou ke fakaasi mai te lotou fakatuanaki. (1 Koli. 10:24) Tela la ke fakatoe‵toe a ‵tou tali ko te mea ke maua ne nisi tino te avanoaga ke fai olotou tali. Kafai foki loa e toetoe tau tali, ‵kalo keatea mai te faiga o manatu e uke. Kafai e tali ne koe a manatu katoa i te palakalafa ka se uke a tali e mafai o fai ne nisi tino. w23.04 22-23 ¶11-13

Ke mo a ma puli a te tāua ke fesoasoani atu ki nisi tino, maise loa te faiga o te galuega talai. E ‵tau o uiga faigofie tatou i ‵tou galuega talai. E fetaui tatou mo tino kolā e kese‵kese olotou talitonuga, kilokiloga, mo olaga ne ‵mai ei latou. Ne uiga faigofie te apositolo ko Paulo, kae mafai o tauloto tatou mai i a ia. Ne ‵tofi ne Iesu a Paulo ke fai “mo apositolo mō fenua fakaa‵tea.” (Loma 11:13) Tenā ne talai atu ei a Paulo ki tino Iutaia, tino Eleni, tino ‵poto, tino ma‵tiva, tino ma‵luga, mo tupu. Ko te mea ke oko atu te munatonu ki loto o tino kese‵kese konā, ne fai eiloa ne Paulo “a mea katoa kolā e fai ne vaegā tino kese‵kese katoa.” (1 Koli. 9:​19-22) Ne mafaufau faka‵lei a ia ki tuu mo aganuu, olaga, mo talitonuga o ana tino fakalogo‵logo kae fulifuli te auala e talai ei a ia. E mafai foki o magoi te faiga o ‵tou galuega talai māfai e mafaufau faka‵lei ki manakoga o ‵tou tino fakalogo‵logo kae fai a fakama‵fuliga ke fetaui mo mea konā. w23.07 23 ¶11-12

A te tino agamalu e malosi, e se ‵seva. E manakogina ke ma‵losi tatou o fakaasi atu te uiga filemu māfai e fakafesagai atu ki se tulaga faigata. A te agamalu se vaega e tasi o “fuataga o te agaga tapu.” (Kala. 5:​22, 23) A te pati Eleni telā ne ‵fuli ki te “agamalu” ne fakaaoga i nisi taimi ke fakamatala atu ei se solofanua vao telā ne akoako faka‵lei ke lata. Fakaataata aka la se solofanua vao telā e uiga filemu. E tiga loa e uiga filemu, kae koi malosi loa. E pelā me ne tino, e mafai pefea o ati aka ne tatou a te agamalu mo te malosi i te taimi e tasi? E se i ‵tou malosi totino. A te kī ki ei ko te ‵talo atu mō te agaga o te Atua, kae fakamolemole atu ke ati aka ne tatou a te uiga gali tenei. E tokouke a tino ko oti ne tauloto ke iloa o agama‵lu. E tokouke a Molimau ko oti ne tali atu i se leo agamalu i te taimi ne fakafesagai atu ki tino ‵teke, kae tuku atu ne latou se molimau ‵lei ki tino kolā e kilo‵kilo mai ki a latou.—2 Timo. 2:​24, 25. w23.09 15 ¶3

I se fakaasiga fakaofoofogia, ne lavea ne te apositolo ko Ioane a toeaina e toko 24 i te lagi e tapuaki ki a Ieova. E tavae ne latou a te Atua, kae fai atu me e ‵tau o maua ne ia a “te vikiga mo te ‵malu mo te malosi.” (Faka. 4:​10, 11) E uke foki a pogai e ‵tau ei o avatu ne agelu fakamaoni a vikiga mo te ‵malu ki a Ieova. E ‵nofo fakatasi latou mo ia i te lagi kae e iloa faka‵lei ne latou a ia. E lavea faka‵lei ne latou ana uiga e auala i ana mea e fai. Kafai e lavea ne latou a galuega ‵gali a Ieova, e fakamalosi ei latou ke ‵viki atu ki a ia. (Iopu 38:​4-7) E ma‵nako foki tatou o aofia a vikiga ki a Ieova i ‵tou ‵talo, mai te fakaasi atu a mea ‵gali e uiga ki a ia. I te taimi e faitau kae sukesuke koe ki te Tusi Tapu, taumafai ke lavea a uiga ‵gali o Ieova kolā e ‵gali ‵ki ki a koe. (Iopu 37:23; Loma 11:33) Ko fai atu ei ki a Ieova a ou lagonaga e uiga ki ei. E mafai foki o avatu ne tatou a vikiga ki a Ieova ona ko tena fesoasoani ki a tatou mo ‵tou kāiga faka-te-agaga katoa.—1 Samu. 2:​1, 2. w23.05 3-4 ¶6-7

I te 1919, ne seki toe mafai o pule atu a Papelonia te Sili ki luga i tino o te Atua. I te tausaga tenā, ne kamata ei o fakagalue a te “tavini fakamaoni kae poto” ko te mea ke mafai ne tino loto ‵lei o sa‵sale atu i te “Ala Tapu” fou telā ne fatoa matala mai. (Mata. 24:​45-47; Isa. 35:8) Fakafetai ki tino fakamaoni kolā ne ga‵lue ki te “faitega o te auala” i aso mua, ko mafai ne latou kolā e sa‵sale atu i te auala lasi tenā o momea aka te lasi o te lotou iloa e uiga ki fuafuaga a Ieova. (Faata. 4:18) Ko mafai foki o fakafetaui olotou olaga e ‵tusa mo mea e manako a Ieova ke fai ne latou. E seki fakamoemoe a Ieova ke fai fakavave ne ana tino a ‵fuliga kolā e manakogina. I lō te fai penā, ne fulifuli malielie ne ia ana tino. Ko oko eiloa i te gali ke mafai o fakafiafia ne tatou a te ‵tou Atua i mea katoa e fai ne tatou! A auala katoa e manakogina ke toe faka‵lei faeloa. Talu mai te 1919, ne tumau faeloa a te faitega o “te Ala Tapu” ko te mea ke mafai ne tino e tokouke o tiakina a Papelonia te Sili. w23.05 17 ¶15; 19 ¶16

Ne akoako foki ne te Potukau Pule a taina fesoasoani i komiti kese‵kese a te Potukau Pule. Ko ‵saga atu nei mo te fakamaoni a taina fesoasoani konei o fai a tiute tāua e uke i te fakapotopotoga kātoa. Ko toka ‵lei latou o faka‵soko a te galuega ki te tausiga o mamoe a Keliso. Kafai ko olo aka a toe tino fakaoti o te kau fakaekegina ki te lagi i te fakaotiotiga o te fakalavelave lasi, ka tumau eiloa te tapuakiga ‵ma i lalo i te lalolagi nei. Fakafetai ki te takitakiga a Iesu Keliso, me ka se gata eiloa te tapuaki atu o tino o te Atua mo te fakamaoni ki a ia. E tonu, i te taimi tenā, ka taua mai ki a tatou a Koka mai Makoka, se potukau kaitāua o atufenua ‵kaufakatasi. (Eseki. 38:​18-20) Kae ka se manuia a te taua tenā; ka se mafai o taofi aka ne latou a tino o te Atua mai te tapuaki atu ki a Ieova. Ka faka‵sao eiloa ne ia latou! Ne lavea ne te apositolo ko Ioane i se fakaasiga a te “vaitino e tokouke” o nisi mamoe a Keliso. Ne fakailoa atu ki a Ioane me i te “vaitino e tokouke” tenei ka ‵sao atu “i te fakalavelave lasi.” (Faka. 7:​9, 14) Ao, ka tausi faka‵lei eiloa latou! w24.02 5-6 ¶13-14

Ne a mea e mafai o fai ne tatou ke maua te agaga tapu? Ko te ‵talo, sukesuke ki te Muna fakaosofia a te Atua, kae ‵kau fakatasi mo tena fakapotopotoga telā e takitaki ne tena agaga. Ka fesoasoani mai a te fai penā, ke ati aka ne tatou a “fuataga o te agaga.” (Kala. 5:​22, 23) E tuku atu ne te Atua tena agaga ki a latou fua kolā e ‵ma olotou mafaufauga mo amioga. Ka se tuku mai ne ia tena agaga ki a tatou māfai e mafau‵fau kae fai faeloa ne tatou a mea se ‵ma. (1 Tesa. 4:​7, 8) Ko te mea ke maua faeloa ne tatou te agaga tapu, e se ‵tau foki mo tatou o “manatu māmā ki valoaga.” (1 Tesa. 5:20) I te fuaiupu tenei, e fakasino atu a “valoaga” ki fekau mai te Atua kolā e tuku mai ne ia e auala i tena agaga, e aofia i ei a fekau e uiga ki te aso o Ieova mo te tāua o te taimi ko ola tatou i ei. E se mafai o fakapuli ne tatou i ‵tou mafaufau a te aso tenā, kae manatu aka me ka se oko mai a Amaketo i te taimi koi ola ei tatou. I lō te fai penā, e mafau‵fau faeloa tatou ki ei, mai te “tapuaki fakamaoni ki te Atua” kae tumau i te tausiga o ‵tou amioga ke ‵ma.—2 Pe. 3:​11, 12. w23.06 12 ¶13-14

E pelā me ne Kelisiano, ne a ‵tou mea e ‵tau o fai māfai e sae aka se ata masei i ‵tou tivaisi? E ‵tau o ‵teke fakavave ne tatou te ata tenā. Ka faigofie ke fai te mea tenā māfai e masaua ne tatou me i ‵tou fesokotakiga mo Ieova ko te ‵toe mea tāua eiloa. Nisi ata kolā e se ma‵sei e mafai o fakamalosi aka ne ia a lagonaga ke fai a amioga fakatauavaga sē ‵tau. Kaia e ‵tau o ‵kalo kea‵tea tatou mai i ei? Me e se ma‵nako eiloa tatou ke fai se tamā mea telā ka iku atu ki te mulilua o te loto. (Mata. 5:​28, 29) Ne fai mai a David, se toeaina i Thailand, penei: “Ne fesili ifo au: ‘Kafai foki loa a ata e se ma‵sei, e mata ka fiafia a Ieova māfai e onoono faeloa au ki ei?’ E fesoasoani mai eiloa te manatu tenā ke fai ne au te mea poto.” A te atiakaga o te mataku tonu ke mo a ma fakafanoanoa a Ieova ka fesoasoani mai ke fai ne tatou te mea poto. A te mataku ki te Atua ko “te kamataga,” io me ko te fakavae, “o te poto.” w23.06 23 ¶12-13

A “potu tafa ki loto” e mafai o fakasino ki ‵tou fakapotopotoga. I te taimi o te fakalavelave lasi, ne tauto mai a Ieova me ka puipui ne ia tatou māfai e tumau tatou i te tavini fakatasi atu mo ‵tou taina mo tuagane. Tela la, e ‵tau o ga‵lue malosi tatou i te taimi nei o fa‵ki a mea e fai ne ‵tou taina mo tuagane kae ke momea aka foki te lasi o te ‵tou a‵lofa ki a latou. E mafai eiloa o faka‵na ki ei a ‵tou ola! “A te aso lasi o Ieova” se aso faigata ki tino. (Sefa. 1:​14, 15) Ka fe‵paki foki a tino o Ieova mo mea faiga‵ta. Kae kafai e fakatoka tatou ki ei i te taimi nei, ka se manavase tatou kae toka o fesoasoani ki nisi tino. Ka kufaki ne tatou so se tulaga faigata e fepaki mo tatou. Kafai e logo‵mae ‵tou taina tali‵tonu, ka fai ne tatou te ‵toe mea e mafai ke fakaasi atu te alofa atafai mai te fesoasoani ki a latou kae tausi atu ki olotou manakoga. Kae ka ‵piki ‵mau tatou ki ‵tou taina mo tuagane, kolā ko oti ne kamata o fakaasi atu ne tatou te alofa ki a latou. Tenā ko taui mai ei ne Ieova tatou ki te ola se-gata-mai i se lalolagi telā ka se toe manatua atu eiloa a fakalavelave mo tulaga faiga‵ta katoa.—Isa. 65:17. w23.07 7 ¶16-17

E masani o fakamatala mai i te Muna a te Atua, me i tāgata fakamaoni e ma‵losi. Kae ke oko foki loa ki te ‵toe tino mafi i a latou e se maua faeloa ne ia te malosi. E pelā mo nisi taimi, ne mafaufau a te tupu ko Tavita me i a ia e “malosi e pelā me se mauga,” kae i nisi taimi ko “polepole i te mataku.” (Sala. 30:7) E tiga eiloa ne maua ne Samasoni se malosi tu ‵kese i te taimi ne fakamalosigina a ia ne te agaga o te Atua, ne iloa ne ia me e aunoa mo te malosi mai i te Atua, a ia ka “gasolo o vāivāi e pelā mo nisi tāgata katoa.” (Fama. 14:​5, 6; 16:17) Ne maua ne tāgata fakamaoni konei a te malosi, me ko Ieova ne tuku atu ne ia ki a latou. Ne iloa ne te apositolo ko Paulo me ne manakogina foki ne ia te malosi mai i a Ieova. (2 Koli. 12:​9, 10) Ne masaki sāle a ia. (Kala. 4:​13, 14) I nisi taimi, ne taumafai foki a ia o fai a te mea tonu. (Loma 7:​18, 19) Kae i nisi taimi ko manavase kae mataku me se a te mea ka tupu ki a ia. (2 Koli. 1:​8, 9) Kae i te taimi ne vāivāi ei a Paulo, ne maua ne ia te malosi. E pefea la? Ne tuku atu ne Ieova a te malosi telā ne seki maua ne ia. Ne fai ne ia ke malosi a Paulo. w23.10 12 ¶1-2

Kafai e oko mai ki a tatou i nisi taimi a lagonaga me ko seai ne ‵tou aoga, ke masaua me ko Ieova eiloa e ‵taki atu ne ia tatou ki a ia. (Ioa. 6:44) E lavea ne ia a ‵tou uiga ‵lei kolā kāti e se lavea ne tatou, kae iloa ‵lei ne ia a mea i ‵tou loto. (2 Nofo. 6:30) Tela la, kafai e fai mai a ia me e tāua tatou ki a ia, ke na tali‵tonu eiloa tatou ki ei. (1 Ioa. 3:​19, 20) Mai mua o tauloto ki te munatonu, ne fai ne nisi tino i a tatou a mea kolā kāti koi fai loa i ei ke se ‵lei a ‵tou loto lagona. (1 Pe. 4:3) Ke oko foki loa ki Kelisiano fakamaoni, koi taua atu eiloa latou ki olotou vāivāiga. E mata, e mafaufau koe i nisi taimi me e se mafai o fakamagalo ne Ieova a koe? Kafai e penā loa, e fakamafanafana loto ke iloa atu me ne penā foki a lagonaga o nisi tavini fakamaoni a Ieova. E pelā mo te apositolo ko Paulo, ne mafaufau me ko oko loa a ia i te fakaalofa ona ko ana vāivāiga. (Loma 7:24) E tonu, ne salamō a Paulo ki ana agasala kae papatiso. Kae ui ei, ne kilo ifo a ia ki a ia eiloa e pelā me ko te “‵toe apositolo fatauva” mo te “tino agasala tafasili i te masei.”—1 Koli. 15:9; 1 Timo. 1:15. w24.03 27 ¶5-6

Tasi o akoakoga e mafai o tauloto ne tatou mai te fakaikuga sē ‵lei a te Tupu ko Ioasa, ko te tāua ke filifili a taugasoa kolā e fai mo fakamalosiga ‵lei ki a tatou—taugasoa kolā e a‵lofa ki a Ieova kae ma‵nako o fakafiafia a ia. E se ‵tau o fakatapula a ‵tou vā fakataugasoa mo latou fua kolā e kautama mo tatou. Masaua, a Ioasa e foliki ‵ki ki tena taugasoa ko Ieoiata. E uiga ki filifiliga o ou taugasoa, fesili ifo ki a koe: ‘E mata, e fesoasoani mai latou o fakamalosi a toku fakatuanaki ki a Ieova? E mata, e fakamalosi mai latou ke ola au e ‵tusa mo tulaga o te Atua? E mata, e fai‵pati latou e uiga ki a Ieova mo ana muna‵tonu tāua? E mata, e fakaasi atu ne latou te āva ki tulaga o te Atua? E mata, e fai mai fua ne latou a mea kāti e manako ke lagona ne au, io me maua ne latou te loto malosi ke fakatonu au māfai ko tai tapeapea kea‵tea?’ (Faata. 27:​5, 6, 17) A te ‵tonuga loa, kafai ou taugasoa e se a‵lofa ki a Ieova, e se manakogina ne koe latou. Kae kafai e isi ne ou taugasoa e a‵lofa ki a Ieova, ke ‵piki ‵mau ki a latou—ka aoga a latou ki a koe!—Faata. 13:20. w23.09 9-10 ¶6-7

A te alefa ko te mataimanu kamata o mataimanu Eleni, kae ko te omeka ko te mataimanu fakaoti. Mai te fakaaogaga o te tugapati “te Alefa mo te Omeka,” e fakaasi mai ne Ieova me kafai e kamata ne ia se mea, ka galue eiloa a ia ki ei ke oko ki te taimi ko taunu ei. I te otiga ne faite ne Ieova a Atamu mo Eva, Ne fai atu a Ia: “Ke fanafanau kae ke fakatokouke, faka‵fonu te lalolagi kae pule atu ki ei.” (Kene. 1:28) I te taimi eiloa tenā, ko pelā loa me ne fai atu a Ieova penei, “Alefa.” Ne taku faka‵lei mai ne ia tena fuafuaga: Ka oko mai te taimi ka faka‵fonu ei ne tino ‵lei katoatoa kae faka‵logo, kolā ne ‵tupu mai i a Atamu mo Eva, a te lalolagi kae ‵fuli ne latou ki se palataiso. I te taimi tenā, ko pelā loa me ko fai atu a Ieova penei, “Omeka.” I te otiga ne faite a “te lagi mo te lalolagi, e pelā foki mo mea katoa i ei,” ne fakamautinoa mai ne ia me ka fakataunu eiloa a tena fuafuaga. Ne fakamautinoa mai ne Ia me ka galue eiloa a ia o fakataunu tena fuafuaga mō tino mo te lalolagi. Ka taunu katoatoa eiloa te mea tenā i te fakaotiga o te fitu o aso.—Kene. 2:​1-3. w23.11 5 ¶13-14

A te malaga faigata tenā mai Papelonia ki Isalaelu e mafai o nofo ki se fa masina, kae ne tauto atu a Ieova me ka puipui eiloa ne ia latou mai so se mea faigata telā e mafai o fakatalave ei a te lotou malaga. Ne iloa ne tino Iutaia fakamaoni, me ka uke atu fakafia a mea aoga ka maua ne latou ma toe ‵foki ki Isalaelu. A te ‵toe fakamanuiaga sili ka maua ne latou e aofia i ei te lotou tapuakiga. E seki ai loa se faletapu o Ieova i Papelonia. Ne seki ai se fatafaitaulaga ke mafai ne tino Isalaelu o ofo atu a taulaga e ‵tusa mo te mea telā ne fakatonu mai i te tulafono faka-Mose, kae seai foki ne faitaulaga ne fakatoka faka‵lei ke ofo atu ne latou a taulaga konā. E se gata i ei, e tokouke atu a tino i te fakai tenā e tapuaki ki atua ‵se i lō tino o Ieova. Tela la, ne olioli eiloa a te fia afe o tino Iutaia kolā e ma‵taku ki te Atua ke toe ‵foki atu ki te lotou fenua ko te mea ke mafai o toe fakatu aka te tapuakiga ‵ma. w23.05 14-15 ¶3-4

E manakogina ne tatou a te fesoasoani o te agaga tapu o te Atua ko te mea ke tumau tatou i te amio e “pelā me ne tama‵liki o te mainaga.” Kaia? Me e se faigofie ke tumau te ‵ma o ‵tou amioga i te lalolagi tenei e ‵fonu i amioga ma‵sei. (1 Tesa. 4:​3-5, 7, 8) E mafai o fesoasoani mai te agaga tapu ke ‵teke atu tatou ki mafaufauga o te lalolagi, e aofia i ei a poto faka-te-lalolagi mo kilokiloga kolā e ‵teke atu ki mafaufauga o te Atua. E mafai foki o fesoasoani mai te agaga tapu ke ati aka ne tatou a “vaega katoa o te aga‵lei mo te amiotonu.” (Efe. 5:9) A te auala e tasi e mafai o maua ne tatou a te agaga tapu, ko te ‵talo. Ne fai mai a Iesu me ka tuku atu ne Ieova a “te agaga tapu ki a latou kolā e fakamolemole atu ki a ia.” (Luka 11:13) E maua foki ne tatou a te agaga tapu, māfai e ‵viki fakatasi atu tatou ki a Ieova i fakatasiga Kelisiano. (Efe. 5:​19, 20) A fakamalosiga ‵lei kolā e maua mai te agaga tapu o te Atua ka fesoasoani mai ke ola tatou i se auala telā e fakafiafia atu ki a ia. w24.03 23-24 ¶13-15

E mata, e manako koe ke mumea aka tou kufaki? Kafai e penā, ‵talo ke maua ne koe. Te kufaki se vaega o fuataga o te agaga. (Kala. 5:​22, 23) Tela la, e mafai o ‵talo tatou ke maua te agaga tapu kae akai atu ki a Ieova ke fesoasoani mai ke ati aka ne tatou ana fuataga. Kafai e fe‵paki tatou mo se tulaga telā e tofotofo aka i ei ‵tou kufaki, ke “tumau i te fakamolemole atu” mō te agaga tapu ke fesoasoani mai ke kufaki tatou. (Luka 11:13) E mafai foki o fakamolemole tatou ki a Ieova ke fesoasoani mai ke maua ne tatou tena kilokiloga ki mea. Kafai ko oti ne ‵talo, ko taumafai malosi ei tatou o fakaasi atu te kufaki i aso takitasi. Ko te uke o taimi e ‵talo tatou mō te kufaki, ko te ‵mautakitaki foki o te uiga tenei i ‵tou loto ko fai ei pelā me se uiga totino o tatou. Ka fesoasoani atu foki a te mafaufau ‵loto ki fakaakoakoga i te Tusi Tapu. E maua i te Tusi Tapu a fakaakoakoga e uke o tino kolā ne kufaki. Mai te mafaufau ‵loto ki tala konā, ko tauloto ne tatou a auala ke fakaasi atu te kufaki. w23.08 22 ¶10-11

Ne fakamautinoa atu ne Iesu ki te apositolo ko Petelu me ka tausi atu a Ieova ki a ia. Ne toe fai ne Iesu ki a Petelu mo ana apositolo se vavega ke maua a ika e uke. (Ioa. 21:​4-6) E seai se fakalotolotolua me ne fakamaoni atu i te vavega tenei ki a Petelu me faigofie ki a Ieova ke tausi atu ki a ia i te feitu faka-te-foitino. Tenā ne masaua ei ne te apositolo a pati a Iesu me ka tausi atu a Ieova ki a latou kolā e ‘‵sala muamua faeloa te Malo.’ (Mata. 6:33) E ‵tusa mo pati konā, ne fakamuamua ei ne Petelu a te faiga o te galuega talai, kae e se ko tena pisinisi faika. Ne talai atu a ia mo te loto toa i te aso o te Penitekoso i te 33 T.A., kae fesoasoani atu ki te fia afe o tino ke talia te tala ‵lei. (Galu. 2:​14, 37-41) Mai tua ifo, ne fesoasoani atu a ia ki tino Samalia mo tino mai Fenua Fakaa‵tea ke talia ne latou te Keliso. (Galu. 8:​14-17; 10:​44-48) Ao, ne fakaaoga eiloa ne Ieova a Petelu i se auala magoi ke ‵futi mai a vaegā tino kese‵kese katoa ki loto i te fakapotopotoga. w23.09 20 ¶1; 23 ¶11

Kāti se lua tausaga mai tua o te fakaseaiga ne Papelonia a Ielusalema, ne isi se moemiti fakamataku a te tupu o Papelonia ko Nepukanesa e uiga ki te tupua lasi ‵ki. Ne fakatonu atu a ia ke tamate ana tāgata ‵poto katoa e aofia i ei a Tanielu, māfai e se mafai o fakamatala mai ne latou tena moemiti mo tena uiga. (Tani. 2:​3-5) Ne ‵tau o gasuesue fakavave a Tanielu i te mea ma ‵mate a tino e tokouke. Ne fanatu a Tanielu kae “fakamolemole atu ki te tupu ke fakaavanoa mai se taimi ke fakamatala atu ki te tupu a te uiga o te moemiti.” (Tani. 2:16) Ne manakogina a te loto malosi mo te fakatuanaki i te taimi tenā. E seai eiloa se mea e fakaasi mai me ne fakamatala sāle ne Tanielu a uiga o moemiti mai mua atu. Ne fakamolemole atu a ia ki ana taugasoa “ke ‵talo mō te alofa fakamagalo mai te Atua o te lagi e uiga ki te mea ‵funa tenei.” (Tani. 2:18) Ne tali eiloa ne Ieova a olotou ‵talo. Mai te fesoasoani o te Atua, ne fakamatala atu ne Tanielu te uiga o te moemiti o Nepukanesa. Ne ‵sao i ei a ola o Tanielu mo ana taugasoa. w23.08 3 ¶4

Mafaufau ki te aoga o te kufaki. Kafai tatou e kufaki, e fai ei ke fia‵fia malosi atu kae ke tokagamalie tatou. Tenā ko fai ei ne te kufaki ke momea aka te ‵lei o te ola ‵lei o ‵tou mafaufau pelā foki mo te ola ‵lei o tatou i te feitu faka-te-foitino. Kafai e kufaki tatou i nisi tino, ka maua foki ne tatou a vā fakataugasoa ‵lei mo latou. Ka fai ei ke ‵kau fakatasi ‵tou fakapotopotoga. Kafai e fai ne se tino ke kaitāua tatou, a te ‵tou tuai o ita ka fai ei ke se gasolo o lasi te fakalavelave. (Sala. 37:​8, fml.; Faata. 14:29) Kae sili i mea katoa, ko fakaakoako tatou ki te ‵tou Tamana i te lagi kae fai ei ke gasolo o ‵pili atu ‵tou vā mo ia. A te kufaki se uiga gali kae aoga! E tiga loa e se faigofie i taimi katoa ke kufaki tatou, kae mai te fesoasoani o Ieova, e mafai o kufaki faeloa tatou. Kae i te taimi e ‵nofo fakatalitali tatou mo te kufaki ki te lalolagi fou, e mafai o tali‵tonu tatou me i “mata o Ieova e kilokilo ki a latou kolā e ma‵taku ki a ia, ki a latou kolā e fakatali‵tali ki tena alofa fakamaoni.” (Sala. 33:18) Ke na fakaiku aka ne tatou katoa ke fakapei faeloa ki luga i a tatou a te kufaki. w23.08 22 ¶7; 25 ¶16-17

Ne fai mai a Iakopo me mafai o fai mai se tagata penā i a ia e fakatuanaki, kae e se lavea atu te mea tenā i ana galuega. (Iako. 2:​1-5, 9) Ne faipati foki a Iakopo ki se tino ne lavea ne ia ‘se taina io me se tuagane e se lava ana gatu mo meakai’ kae ne seki fesoasoani atu ki a ia. Kafai foki loa e fai mai te tino tenā i a ia e fakatuanaki, kae ne seki lavea atu te mea tenā i ana faifaiga; tena uiga e seai se aoga. (Iako. 2:​14-16) Ne fakasino atu a Iakopo ki a Lahapa e pelā me se fakaakoakoga ‵lei o se tino fakatuanaki e auala i ana galuega. (Iako. 2:​25, 26.) Ne logo tou fafine i tala e uiga ki a Ieova mo tena fesoasoani ki tino Isalaelu. (Iosu. 2:​9-11) Ne fakaasi mai ne ia i ana faifaiga a tena fakatuanaki—ne puipui ne ia a sipai Isalaelu e tokolua i te taimi ne ‵tu ei lā ola i se tulaga fakamataku. Ona ko te mea tenā, ne taku amiotonugina te fafine sē ‵lei katoatoa tenei, telā e sē se tino Isalaelu, e pelā eiloa mo Apelaamo. A tena fakaakoakoga e fakaasi faka‵lei mai ei a te tāua ke lavea atu i ‵tou galuega a te ‵tou fakatuanaki. w23.12 5-6 ¶12-13

E pelā me ne Kelisiano, e se ma‵nako tatou ke gata fua te ‵tou malamalama i akoakoga kamata i te Tusi Tapu. Mai te fesoasoani o te agaga tapu o te Atua, e fia tauloto foki tatou “ki mea ‵loto a te Atua.” (1 Koli. 2:​9, 10) Kaia e se kamata ei o fai ne au sukesukega totino ki se mataupu ko te mea ke fakapilipili atu ei koe ki a Ieova? E pelā mo te iloilo ne koe a auala ne fakaasi atu ne ia tena alofa ki ana tavini i aso mua mo te auala e fakamaoni atu ne te mea tenā me e alofa foki a ia ki a koe. E mafai o iloilo ne koe te fakatokaga a Ieova ki te tapuakiga i Isalaelu kae ‵pau pefea te mea tenā mo te fakatokaga faka-Kelisiano i aso nei. Io me mafai o sukesuke ‵loto koe ki valoaga kolā ne fakataunu e auala i a Iesu i te taimi ne ola ei i te lalolagi mo te faiga o tena galuega talai. Ka fiafia malosi eiloa koe ma sukesuke ki mataupu penā fakatasi mo te fesoasoani o te Watch Tower Publications Index io me ko te Research Guide for Jehovah’s Witnesses. A te faiga o sukesukega ‵loto ki te Tusi Tapu e mafai o fakamalosi i ei tou fakatuanaki kae fesoasoani atu ke “maua ne koe te iloaga o te Atua.”—Faata. 2:​4, 5. w23.10 18-19 ¶3-5

A te pati “fakatau a‵lofa” malosi telā ne fakaaoga ne te apositolo ko Petelu i konei, e fakauiga eiloa ki te “fakalauefa atu.” A te vaega i te lua o te fuaiupu e fakamatala mai ei te aoga o te fakatau a‵lofa ki a tatou. E ‵tao ne ia a agasala katoa a ‵tou taina. E mafai o fakaataata ne tatou i te auala tenei: E taofi ‵mau ne tatou a te alofa ki ‵tou lima e lua, e pelā eiloa māfai e taofi ne tatou se laugatu kae tala ne tatou ke mafai o ‵tao ki ei e sē se agasala fua e tasi io me lua, kae ko “te ukega o agasala.” A te pati “‵tao” e fakauiga eiloa ki te fakamagalo. E pelā me se laugatu telā e mafai o ‵tao ne ia se mea telā e pisia, a te alofa e mafai o ‵tao ne ia a vāivāiga io me ko mea ‵se a nisi tino. E ‵tau malosi a te ‵tou a‵lofa ki nisi tino, ke mafai o fakamagalo a mea ‵se a ‵tou taina tali‵tonu—maise loa māfai e manakogina a taumafaiga ke fai penā i nisi taimi. (Ko. 3:13) Kafai e fakamagalo ne tatou a nisi tino, ko fakaasi atu ne tatou a te malosi o te ‵tou alofa kae ka ma‵nako tatou o fakafiafia atu a Ieova. w23.11 11-12 ¶13-15

I te taimi ko 26 ana tausaga, ne kamata o toe fakafou ne te tupu ko Iosia a te faletapu. I te taimi o te galuega, ne maua aka ei a “te tusi o te Tulafono a Ieova telā ne tuku atu e auala i a Mose.” I te lagonaga ne te tupu a pati i ei, ne gasuesue fakavave a ia o fakalogo ki pati i ei. (2 Nofo. 34:​14, 19-21.) E mata, e fiafia koe o faitau ki te Tusi Tapu i aso katoa? Kafai ko oti ne taumafai koe ki ei, e a e fiafia koe ki ei? E mata, e fakamailoga faeloa ne koe se fuaiupu telā e mafai o fesoasoani atu ki a koe? I te taimi ko 39 tausaga o Iosia, ne fai ne ia se mea ‵se telā ne iku atu ki tena mate. Ne talitonu a ia ki a ia eiloa i lō te ‵sala atu ki te takitakiga a Ieova. (2 Nofo. 35:​20-25) E tauloto ne tatou se akoakoga i konei. Faitalia te ma‵tua io me ko te leva ne suke‵suke ei tatou ki te Tusi Tapu, e ‵tau o tumau tatou i te ‵sala atu ki a Ieova. E aofia i ei a te ‵talo atu faeloa mō tena takitakiga, sukesuke ki tena Muna, kae fakalogologo ki manatu fesoasoani mai Kelisiano ma‵tua ‵lei. Mai te fai penā, ka se mafai o fai ne tatou a mea ‵se matagā kae ka fia‵fia eiloa tatou.—Iako. 1:25. w23.09 12 ¶15-16

E taku mai i te Tusi Tapu a igoa o fāfine ‵gali e tokouke kolā ne a‵lofa kae tavini ki a Ieova. A latou e “‵lei olotou uiga” kae “fakamaoni i mea katoa”. (1 Timo. 3:11) E se gata i ei, e mafai foki o maua ne tuagane i olotou fakapotopotoga a fāfine Kelisiano ma‵tua ‵lei kolā e fai pelā me ne fakaakoakoga ‵lei. Tuagane talavou, kaia e se ‵sala ei koutou ki nāi fāfine Kelisiano ma‵tua ‵lei kolā e mafai o fakaakoako koutou ki ei? Onoono ki olotou uiga ‵gali, ko mafaufau ei ki te auala ke fakaasi atu ne koe a uiga konā. Te vaega tāua o te faiga pelā me se Kelisiano matua ‵lei ko te loto maulalo. Kafai e loto maulalo se fafine, ka maua ne ia se va fakataugasoa ‵lei mo Ieova pelā foki mo nisi tino. E pelā me se fakaakoakoga, a te fafine telā e alofa ki a Ieova ka ‵lago katoatoa atu mo te loto maulalo ki te fakatakitakiga e uiga ki te ulu o te kāiga telā ne fakatonu mai ne tena Tamana faka-te-lagi. (1 Koli. 11:3) E aoga eiloa te fakatakitakiga tenā i loto i te fakapotopotoga mo te kāiga. w23.12 18-19 ¶3-5

E manako a Ieova ke alofa te tagata ki tena avaga kae tausi atu ki ana manakoga i te feitu faka-te-foitino, mea tau lagonaga mo te feitu faka-te-agaga. Ati aka ke malosi te mafaufau, ke āva ki fāfine, kae ke fakatuagagina, ka aoga ki a koe e pelā me se tino avaga. Ka oti koe ne avaga, kāti ka fai koe pelā me se tamana. Ne a mea e mafai o tauloto ne koe mai i a Ieova e uiga ki te fai pelā me se tamana ‵lei? (Efe. 6:4) Ne fai ‵tonu atu a Ieova ki tena Tama, ko Iesu, me alofa a ia ki a Iesu kae ko talia ne ia a tou tagata. (Mata. 3:17) Kafai ko fai koe pelā me se tamana, ke fakamautinoa me fakatalitonu atu faeloa koe ki au tama‵liki i a koe e alofa ki a latou. Ke fakamālō atu faeloa mō mea ‵lei ne fai ne latou. A tamana kolā e fakaakoako ki a Ieova ko fesoasoani atu eiloa ki te faiga o olotou tama‵liki ke fai pelā me ne tāgata mo fāfine Kelisiano ma‵tua ‵lei. E mafai o fakatoka koe mō te tiute tenei mai te tausi atu mo te alofa ki tino i tou kāiga mo te fakapotopotoga kae tauloto ke fakaasi atu tou alofa mo tou loto fakafetai ki a latou.—Ioa. 15:9. w23.12 28-29 ¶17-18

E tiga loa e tavini fakamaoni tatou ki a Ieova, e fe‵paki tatou mo mea faiga‵ta mo famai kolā e pokotia i ei a tino katoa. E se gata i ei, kāti e ‵tau foki o kufaki tatou i ‵tekemaiga io me ko fakasauaga mai i a latou kolā e takalia‵lia ki tino o te Atua. E tiga eiloa e se puipui ne Ieova tatou mai vaegā fakalavelave penā, kae ne tauto mai me ka fesoasoani mai a ia ki a tatou. (Isa. 41:10) Ona ko tena fesoasoani, ka mafai o tumau tatou i te fia‵fia, fai a fakaikuga ‵lei, kae tumau i te fakamaoni ki a ia i toe tulaga faiga‵ta. E tauto mai a Ieova me ka tuku mai ne ia a te mea telā e taku i te Tusi Tapu me ko “te filemu o te Atua.” (Fili. 4:​6, 7.) A te filemu tenei e fakasino ki te tulaga tokagamalie o te mafaufau mo te loto telā e maua ne tatou ona ko te pili o te ‵tou fesokotakiga mo ia. A te filemu tenei e “sili fakafia atu i mea katoa kolā e malamalama i ei a tino”; e gali atu fakafia i lō te mea e mafau‵fau tatou ki ei. Kai maua aka eiloa ne koe a lagonaga tokagamalie mai tua o tau ‵talo telā ne fai mo te loto kātoa ki a Ieova? A te lagonaga tenā ko “te filemu o te Atua.” w24.01 20 ¶2; 21 ¶4

A tino kolā e a‵lofa ki te Atua e ma‵nako o ‵viki atu ki tena igoa mo olotou loto kātoa. Ne iloa ne te tupu ko Tavita me kafai e ‵viki atu tatou ki te igoa o Ieova ko avatu foki loa i ei ne tatou a vikiga ki a Ieova eiloa. Kafai e lagona ne tatou te igoa o Ieova, e masaua ne tatou me ko ia se vaegā tino pefea, ana uiga ‵gali mo ana faifaiga fakaofoofogia. Ne manako a Tavita ke faka‵malu te igoa o tena Tamana kae ke ‵viki atu foki ki ei. Ne manako a ia ko “mea katoa i loto i a” ia ke fai penā—ko tena uiga, ke ‵viki atu mo te loto kātoa. E penā foki a tino Levi, ne fai ne latou te takitakiga i te avatuga o vikiga ki a Ieova. Ne fai ‵tonu mai latou mo te loto maulalo me e seai ne pati e mafai o fakamatala katoatoa atu i ei a vikiga kolā e ‵tau o avatu ki te igoa tapu o Ieova. (Nee. 9:5) E mautinoa me ne fiafia eiloa te loto o Ieova ki vikiga kolā ne fai atu mo te loto maulalo mo te loto kātoa. w24.02 9 ¶6

Ka se mafaufau eiloa Ieova me ko seai sou aoga māfai ne seki mafai o taunu se fakamoemoega telā ne kausaki koe ki ei. (2 Koli. 8:12) Ke tauloto mai se mea telā ne fakalavelave atu ki te fakataunuga o tou fakamoemoega. Ke mo a ma puli a mea ko oti ne fakataunu ne koe. E fai mai te Tusi Tapu me “i te Atua e sē se tino sē amiotonu ke puli i a ia otou galuega.” (Epe. 6:10) Tela la, e se ‵tau foki o puli i a tatou a mea. Ke mafaufau ‵loto ki au mea ko oti ne fakataunu—kāti ko te fakamalosiakaga o tou va fakataugasoa mo Ieova, te faipati atu ki nisi tino e uiga ki a ia, io me ko te fakamoemoega ke papatiso. Kafai ne mafai o gasolo koe ki mua kae fakataunu ou fakamoemoega i aso mua, e mafai foki o tumau koe i te gasolo ki mua o fakataunu tou fakamoemoega i te taimi nei. Mai te fesoasoani o Ieova, e mafai eiloa o fakataunu ne koe tou fakamoemoega. I te taimi e tumau koe i te galue ke fakataunu tou fakamoemoega faka-te-agaga, ke mo a ma puli o onoono ki te auala ne fesoasoani kae fakamanuia ne Ieova koe i te taimi tenā. (2 Koli. 4:7) Kafai e se ‵fiu vave koe, ka maua ne koe a fakamanuiaga e uke atu.—Kala. 6:9. w23.05 31 ¶16-18

E fiafia a Ieova o fakaasi atu me talia ne ia a tino kolā e alofa a ia ki ei. E fakamatala mai i te Tusi Tapu a taimi e lua ne fai atu a Ieova ki a Iesu me i a ia ko Tena Tama fagasele, telā ko oti ne talia ne ia. (Mata. 3:17; 17:5) E mata, e fia lagona ne koe a Ieova e fai ‵tonu atu ki a koe me ko talia ne ia koe? E se mafai o faipati ‵tonu mai a Ieova ki a tatou mai te lagi, kae e faipati mai a ia e auala i tena Muna. Kafai e fai‵tau tatou ki pati a‵lofa a Iesu ki ana soko, e fai eiloa pelā me ko “lagona” ne tatou a Ieova e faipati mai me ko talia ne ia a tatou. Ne fakaata mai ne Iesu a uiga o tena Tamana i se auala ‵lei katoatoa. Tela la, kafai e fai‵tau tatou ki pati a Iesu me ko talia ne ia ana soko fakamaoni faitalia te lotou se ‵lei katoatoa, ko fakaataata eiloa ne tatou a Ieova e fai mai ne ia a pati konā ki a tatou. (Ioa. 15:​9, 15) Kafai e ‵tupu a mea faiga‵ta, e se fakauiga i ei me ko se talia tatou ne te Atua. I lō te fai penā, e tuku mai i ei se avanoaga ke fakamaoni atu a te ‵poko o te ‵tou a‵lofa mo te ‵tou loto tali‵tonu ki te Atua.—Iako. 1:12. w24.03 28 ¶10-11