Wɔn A Ade Tɔɔ Wɔn So Osuahu​—So Edi Ɔkra A Enwu Da Ho Adanse?

“Onipa kra no nwu da na wɔrentumi nsɛe no.”​—Plato, Helani nyansapɛfo wɔ bɛyɛ 428-348 A.Y.B. mu.

“Biakoyɛ a ɛte sɛɛ wɔ akra a enwu da mu.”​—William Shakespeare, Engiresini agoru kyerɛwfo wɔ 1564-1616 mu.

“Ɔkra no yɛ nea wontumi nsɛe no . . . ne dwumadi bɛkɔ so daa.”​—Johann Wolfgang von Goethe, Germani anwensɛm ne agoru kyerɛwfo, 1749-1832.

“Yɛn nipasu . . . kɔ so tra ase wɔ asetra a edi hɔ no mu.”​—Thomas Edison, Amerikani Ɔdenimfo, 1847-1931.

WƆ MFE mpempem pii mu no, onipa agye adi sɛ ɔwɔ ɔkra a enwu da wɔ ne mu. Tete Misrifo sodifo ahorow de asetra mu nneɛma pa ne afɛfɛde hyɛɛ wɔn aboda mu sɛnea ɛbɛyɛ a nipadua no benya nea ehia bere a ka, anaa ɔkra no asan abɛhyɛn mu no.

Enti onipa abɔ mmɔden sɛ obegye adi sɛ ɔkra anaa honhom bi a enwu da a ɛkɔ so tra ase ma owu a ɛwɔ hɔ no nyɛ nea ɛyɛ hu. Afoforo, te sɛ Engiresini anwensɛm kyerɛwfo a wɔfrɛ no Keats pɛ sɛ wogye di nanso wɔn adwene mu yɛ wɔn nãa. Keats kyerɛwee sɛ: “Mepɛ sɛ migye ɔkra a enwu da no di . . . Mepɛ sɛ migye ɔkra a enwu da no di.” Dɛn na wugye di wɔ onipa kra a wosusuw sɛ enwu da no ho?

Ebia, yɛwɔ nnyinasode tiawa bi wɔ Keats nsɛm no mu a ɛma yenya gyinae a nnuruyɛfo ne adwene ho abenfo ne nnipa a woanya osuahu yi bi bere a ade tɔɔ wɔn so resi no ho mmuae. Sɛ nhwɛso no, nhwehwɛmu ahorow a nnuruyɛfo ne aduruyɛ ho ɔdenimfo a wɔfrɛ no ɔbenfo Michael Sabom ayɛ wɔ wɔn a woanya osuahu yi bi bere a ade toɔ wɔn so no ho no kyerɛ se, “nnipa a wɔanya osuahu yi bi bere a ade tɔɔ wɔn so no mu fã kɛse no ara kae sɛ suro a wosuro owu no ano abrɛ ase na gyidi a wɔwɔ wɔ owu akyi asetra mu no ayɛ kɛse.”​—Yɛn na yɛde nkyerɛwde soronko akyerɛw afã bi no.

Adwene ho ɔdenimfo Elisabeth Kuble-Ross dɛ asɛm no baa awiei dɛn, bere a ɔhwehwɛɛ nsɛm a ɛboro apem a ɛfa wɔn a wɔanya osuahu no bi ho mu bere a ade tɔɔ wɔn so akyi no? Wɔ ne nhoma On Children and Death mu no, ɔkae sɛ: “Saa ara nso na owu te. . . awiei ba ansa na nhyɛase foforo aba. Owu na ɛde nsakrae kɛse yi ba.” Ɔde ka ho sɛ: “Bere a wɔkɔ so yɛ nhwehwɛmu na wɔkyerɛw nhoma ahorow no, nnipa ba behu sen sɛ wobegye adi mmom sɛ yɛn nipadua no te sɛ ɔsã a ɔdan afofantɔ ampa a ɛne adurade a ɛkata onipa ho no. Sɛnea yɛte ankasa wɔ yɛn mu, a ɛne afofantɔ no nwu da na wɔrentumi nsɛe no na efi kɔ ntɛm ara bere a yɛawu no.”

Ɔbenfo Kenneth Ring a ɔyɛ adwene ne nneyɛe ho ɔbenfo ne nhoma a wofrɛ no Life at Death kyerɛwfo no de asɛm no ba awiei sɛ: “Migye di . . . sɛ yɛkɔ so tra ase wɔ bere a yɛawu akyi.” Afei ɔde ka ho sɛ: “M’ankasa ntease a mewɔ wɔ wɔn a ade tɔ wɔn so osuahu ahorow a ɛtete sɛɛ ho no ma mibu eyinom sɛ ɛyɛ ‘nkyerɛkyerɛ ahorow.’ Wɔ me fam no, sɛnea eyinom te no kyerɛ sɛ ɛyɛ oyikyerɛ mu osuahu ahorow. . . . Wɔ eyi mu no, [wɔn a ade tɔ wɔn so] osuahu ahorow no te sɛ ahintasɛm anaa nyamesom mu osuahu ahorow. [Yɛn na yɛde nkyerɛwde soronko akyerɛw afã bi no.] . . . Esiane eyi nti, nne ahorow a yɛate ho asɛm wɔ nhoma [Life at Death] yi mu no yɛ adiyifo a wɔreka amansan nyinaa onuayɛ nyamesom ho asɛm nne.”

Adwene a Ɛbɔ Eyi Abira

Nanso dɛn na nhwehwɛmufo afoforo ka? Wɔkyerɛkyerɛ wɔn a ade tɔ wɔn so ne nipadua mu a wofi mu osuahu ahorow no mu dɛn? Adwene ne nneyɛe ho ɔbenfo Ronald Siege hu eyinom wɔ ɔkwan a ɛyɛ soronko so. “Saa osuahu ahorow a ɛte sɛɛ yi te sɛ nneɛma ahorow a ɛkanyan onipa adwene a LSD ne adwenemhaw a ano yɛ den ka ho. Adwenemhaw yi na ɛde mfonini ahorow ba adwene no mu. Saa ara na ɛte wɔ nnipa pii fam, efisɛ saa ara na wɔyɛɛ yɛn adwene no na ama ɛde nsɛm asie.”

Ɔbenfo Richard Blacher a ɔwɔ Boston Sukuupɔn a wɔfrɛ no Tufts a wosua nnuruyɛ ho ade wɔ hɔ no kyerɛwee sɛ: “Misusuw sɛ saa nnipa a wonyaa ‘owu ho osuahu ahorow’ a ɛtete sɛɛ no nni oxygen pii na wɔ tebea yi mu no, wɔbɔ mmɔden sɛ wɔde adwene no bedi ɔhaw ahorow ne ɔkwan a wɔfa so yɛ wɔn aduru ne kasa a wɔkasa no ho dwuma. . . . Ɛha no, yɛredi owu ho adwene ho dwuma na ɛnyɛ owu ankasa. Anisoadehu [a ɛwɔ ɔyarefo no adwene mu] yi yɛ anika yiye efisɛ edi nneɛma ahorow pii a ɛfa onipa no ho ho dwuma wɔ bere koro mu. . . . Ɛsɛ sɛ oduruyɛfo no hwɛ yiye wɔ nyamesom mu gyidi a obegye atom sɛ nyansahu mu nokwasɛm no ho.”

Siege ka asɛm afoforo a ɛyɛ anigye fa wɔn a ade tɔ wɔn so “anisoadehu ahorow” no ho sɛ: “Sɛnea ɛte wɔ oyikyerɛ ahorow ho no, asetra akyi anisoadehu ahorow yɛ nea wosusuw sɛ ɛte sɛ wiase yi mu asetra, sɛnea nsɛm ahorow a ayarefo ‘a wɔrewuwu ankasa de mae kyerɛ no.” Sɛ nhwɛso no, ɔbarima bi a wadi mfe 63 a ɔde n’asetra mu mfe pii atra Texas kaa ne “yikyerɛ” no ho asɛm sɛnea edi so yi: “Na mesɛn ban bi so. . . . Na asase a ɛwɔ ban no anim no so afuw nwura kusuu . . . Ná sare a misusuw sɛ ɛyɛ fɛ sen biara a mahu pɛn wɔ ban no akyi . . . [Na ɛyɛ] dade hama a wɔde agye ban.” So ɔyarefo yi huu dade hama a wɔde agye ban wɔ “ɔsoro” anaa wɔ owu akyi trabea bi ankasa? Ɛda adi sɛ mfonini ahorow a ɛtete sɛɛ a ohui yi yɛ n’asetra wɔ Texas mu nneyɛe ahorow a ɔkae​—gye sɛ ebia ɔpɛ sɛ yegye di sɛ wɔde dade gye ban wɔ ‘saa hɔnom’!

Wɔ nokwarem no, wɔn a ade tɔ wɔn so osuahu ahorow no mu pii fa ɔyarefo no osuahu ahorow ne asetra mu nsɛm ho ma enti ɛyɛ nea ntease nni mu sɛ yebegye adi sɛ wɔrehu owu akyi trabea bi wɔ bere tiaa bi mu. Sɛ nhwɛso no, so ayarefo a ade tɔɔ wɔn so a wohuu “hann nipa” bi no, huu onipa koro no ara a ɛmfa ho sɛ ebia wɔyɛ Kristofo, Yudafo, Hindufo anaa Nkramofo? Wɔ ne nhoma Life After Death mu no, Ɔbenfo Raymond Moody kyerɛkyerɛ mu sɛ: “Ɛsono sɛnea ankorankoro biara hu onipa no, na ɛte sɛ nea egyina sɛnea onipa a ohu no no nyamesom mu nsɛm tebea, ntetee anaa nneɛma ahorow a ogye di no te so. Enti wɔn mu pii a wɔyɛ Kristofo no . . . hu hann no sɛ ɛyɛ Kristo . . . Yudani ɔbarima ne ɔbea bi huu hann no sɛ ‘ɔbɔfo’ bi.”

Sɛ yɛfa no nyansahufo fam nkutoo a, Ɔbenfo Ring gye tom sɛ: “Mebɔ m’atiefo nkae sɛ nea masua ho ade no yɛ wɔn a ade tɔ wɔn so osuahu ahorow na ɛnyɛ owu akyi asetra ho osuahu ahorow. . . . Ɛda adi sɛ biribiara nni hɔ a yebegyina so aka sɛ saa osuahu ahorow yi bɛkɔ so ada adi wɔ ɔkwan bi a ɛne sɛnea efii ase no hyia so anaasɛ sɛ ɛbɛkɔ so ampa koraa mpo a. Migye di sɛ ɛno ne adwene a ɛteɛ a ɛsɛ sɛ nyansahu nya wɔ hia a saa osuahu ahorow yi ho hia no ho.”

Nyansa ne Bible No

Wɔ sɛnea owu te ho no, adwene ne nneyɛe ho ɔbenfo a wɔfrɛ no Siegel kyerɛ n’adwene sɛ: “Wɔ honam fam no, sɛnea owu te no nyɛ ahintasɛm biara. Wɔ owu akyi no, nipadua no porɔw na ɛfra nneɛma a nkwa nnim a atwa yɛn ho ahyia no mu. Onipa a wawu no hweree ne nkwa ne nea onim nyinaa. . . . Nsusuwii a ntease kɛse wom ne sɛ, nea onim ne amu no nyinaa wɔ awiei koro. Nea ɛyɛ ahodwiriw no, ɛnyɛ adwene a nyansa wom yi na wogye tom kɛse, na adesamma mu fã kɛse no ara . . . kɔ so bɔ ɔpɛ a wɔwɔ sɛ wɔbɛtra nkwa mu no ho mmɔden na wɔkyerɛkyerɛ nsɛm pii a wogye di a ɛfa onipa owu akyi asetra ho.”

Bɛyɛ mfe 3,000 a atwam ni no, ɔhene bi a ɔkyerɛwee sɛ: “Na ateasefo nim sɛ wobewuwu, na awufo de, wonnim biribiara, na wonni akatua bi bio, na wɔn werɛ afi wɔn nkae. Wɔn dɔ oo, wɔn tan oo, wɔn ninkuntwe oo, ayera dabidabi dedaw, na wonni nea wɔyɛ owia ase nyinaa mu kyɛfa bi bio da. Biribiara a wo nsa bɛka sɛ wobɛyɛ no, fa w’ahoɔden yɛ, na adwuma ne adwene ne nimdeɛ ne nyansa nni asaman a worekɔ hɔ no” kaa “adwene a nyansa wom” koro yi ara ho asɛm.​—Ɔsɛnkafo 9:5, 6, 10.

Nokwarem no, Bible no nka biribiara a ɛbɛma wɔagyina so asusuw sɛ wɔn a ade tɔ wɔn so osuahu ahorow no yɛ ade a edi owu akyi asetra anim. Ɔhene Salomo nkyerɛkyerɛmu a ɛfa owu ne nea efi mu ba ho no nkyerɛ sɛ ɔkra a enwu bi kɔ so tra ase wɔ asetra foforo bi mu. Wɔn a wɔawu no, ‘nnim biribiara.’

Nokwarem no, wɔn a wɔde wɔn ho hyɛ ahonhonsɛmdi ne nkitaho a wɔne “awufo” di mu no ani gye ho sɛ wobenya wɔn a ade tɔ wɔn so osuahu ahorow ɔhaha pii de adi ho adanse. Adwene ne nneyɛe ho ɔbenfo “a wɔfrɛ no Siegel fa ade a aniwa nhu ho ɔkyerɛkyerɛfo biako asɛm ka sɛ, “sɛ yɛde nokwaredi ne adwempa bɛhwehwɛ owu akyi asetra ho adanse no mu a, ɛsɛ sɛ yɛde yɛn ho fi nyansa ho nhyɛso no ho.” (Psychology Today, January 1981) Nea ɛyɛ anigye no, ɔkyerɛkyerɛfo koro yi ara “ka sɛ, nsamanfo ne ahonhom yɛ nyikyerɛ ahorow ampa, nanso wɔnam adwene no a wɔde di dwuma so yi eyinom fi nnipa a wɔawu no adwene mu de kɔhyɛ wɔn a wɔte ase no de mu!” Nokwarem no, ɛno ne Salomo asɛm a ɔde baa awiei sɛ awufo no awu na wonnim hwee no nhyia.

Wɔn a Ade Tɔ Wɔn So Osuahu Ahorow​—Wɔkyerɛkyerɛ Mu Dɛn?

Ɛnde, wɔbɛyɛ dɛn atumi akyerɛkyerɛ wɔn a ade tɔ wɔn so ne nipadua mu a wofi mu osuahu ahorow nyinaa no mu? Anyɛ yiye koraa no, wobetumi ayɛ saa wɔ akwan abien so​—biako ne nea adwene ne nneyɛe ho abenfo binom de ama sɛ onipa a ade atɔ no so adwene a ɛda so ara yɛ adwuma no kae nsɛm na ɛyɛ mfonini ahorow bere a ade atɔ no so no. Afei ayarefo ne nhwehwɛmufo binom kyerɛ ase sɛ ɛyɛ bere tiaa mu anisoadehu a ɛfa owu akyi asetra ho. Wɔ nokwarem no, sɛnea yɛahu afi Bible mu no, eyi rentumi mma saa efisɛ onipa nni ɔkra a enwu da na biribi a ɛte sɛ owu akyi asetra a wohui wɔ nsɛm a ɛtete sɛɛ mu no nyɛ ade a ɛwɔ hɔ.

Nanso ade a ɛto so abien wɔ hɔ a ɛsɛ sɛ yesusuw ho a ebia ɛbɛkyerɛkyerɛ osuahu ahorow a ɛtete sɛɛ binom mu. Ɛyɛ ade a nhwehwɛmufo pii rennye ntom. Sɛ nhwɛso no, Ɔbenfo Moody kyerɛkyerɛɛ mu wɔ ne nhoma a wɔfrɛ no Life After Life mu sɛ, “Ɛntaa mma sɛ obi . . . de ahonhommɔne nkyerɛkyerɛmu a ɛfa wɔn a ade tɔ wɔn so osuahu ahorow ho bɛma de akyerɛ sɛ osuahu ahorow no yɛ nea akyinnye biara nni ho sɛ ɛnam ahonhommɔne so na ɛbae.” Nanso onnye nsusuwii no ntom, efisɛ ɔte nka sɛ sɛ anka ayarefo no bɛte nka sɛ wɔabɛyɛ anyamesomfo pa wɔ osuahu no akyi mmom no, Satan bɛka akyerɛ n’asomfo sɛ wonni ɔkwan a ɛde ɔtan ne ɔsɛe ba akyi.” Ɔde ka ho sɛ, “Nokwarem no, wadi nkogu kɛse​—sɛnea metumi aka no​—wɔ nkurɔfo a ɔbɛdaadaa wɔn ma wɔadi ne nhyehyɛe ho dwuma no mu!”

Wɔ eyi mu no, Ɔbenfo Moody di mfomso kɛse wɔ akwan horow abien so. Nea edi kan no, ɛno nkyerɛ sɛ Satan bɛma nitan ne ɔsɛe akɔ so denam saa osuahu ahorow yi so. Dɛn ntia? Efisɛ Bible no ka sɛ: “Satan ankasa mpo dan ne ho sɛ hann bɔfo. Enti sɛ n’asomfo nso dan wɔn ho yɛ sɛ trenee asomfo a, ɛnyɛ ade kɛse bi.” (2 Korintofo 11:14, 15) Sɛ ɔbɛma mfitiase atoro a odii a wakɔ so akura mu bere nyinaa​—“Ɛnyɛ owu na mubewu”​—no akɔ so a, obetumi ayɛ saa wɔ ɔkwan a mfomso biara nni ho na ɛkanyan anigye so.​—Genesis 3:4, 5.

Nea ɛto so abien no, onnii nkogu kɛse wɔ nkurɔfo a ɔbɛdaadaa wɔn ma wɔadi n’atoro ho nhyehyɛe a ɛfa ɔkra a enwu da ho dwuma no mu! Nea ɛne eyi bɔ abira no, mprempren ɔwɔ nnuruyɛfo, adwene ne nneyɛe ho abenfo ne nyansahufo a wogyina atoro a wadi denam asɔfo ne nyansapɛfo so wɔ mfe pii mu no akyi. Hwɛ sɛnea Paulo asɛm a ɔka fa tebea no ho no fata, bere a ɔkae sɛ: “Sɛ yɛn asɛmpa no so kata a, ɛso kata wɔn a wɔyera no mu; wɔn mu na wi yi ase nyame afura wɔn a wonnye nni no adwene ani, na Kristo a ɔyɛ Onyankopɔn suban no anuonyam asɛmpa no hann anharan amma wɔn”!​—2 Korintofo 4:3, 4.

Nanso sɛnea yɛahu no, adwene ne nneyɛe ho abenfo binom gye di sɛ onipa tumi hu nea ɛkɔ so wɔ ne wu akyi. Wɔn ankasa nkyerɛkyerɛmu a wɔde ma wɔ sɛnea wɔn a ade tɔ wɔn so osuahu ahorow kyerɛ no ho no ka yɛn ma yebisa nsɛm ahorow a edidi so yi a ɛfa asɛm no ho tẽe ma wɔn a wogye Bible no di no: So asɛm bi wɔ Bible mu a wobegyina so aka sɛ onipa wɔ ɔkra a enwu da a efi nipadua no mu te sɛ nea afofantɔ fi ɔsã mu no? Kyerɛw nsɛm a ɛwɔ Bible mu a ɛde nsɛmfua “ɔkra” ne “enwu” di dwuma no nso ɛ?

[Asɛm a wɔafa aka wɔ kratafa 5]

Ɔbenfo Kubler-Ross: “Yɛn nipadua no yɛ ɔsã a ɔdan afofantɔ ampa . . . Sɛnea yɛte ankasa wɔ yɛn mu . . . nwu da”

[Asɛm a wɔafa aka wɔ kratafa 5]

Ɔbenfo Blacher: “Ɛha no, yɛredi owu ho adwene ara kwa ho dwuma na ɛnyɛ owu ankasa.”

[Kratafa 6 mfoni]

Pluto nyansapɛ asɛe asɔre pii nkyerɛkyerɛ ahorow

[Kratafa 7 mfoni]

Engiresini anwensɛm kyerɛwfo Keats ‘pɛe sɛ ogye ɔkra a enwu da di’