Nsoromma Ne Onipa—So Wɔwɔ Abusuabɔ Bi?

NSOROMMA a wɔhwɛ nyɛ ade foforo. Sɛnea The World Book Encyclopedia kyerɛ no, akuafo a wɔtraa ase mfe mpempem pii a atwam no “hwɛɛ nsoromma de huu bere a ɛfata sɛ wodua wɔn nnɔbae. Akwantufo suaa sɛnea wɔde nsoromma bedi dwuma ma akyerɛ wɔn kwan.” Wɔda so ara de nsoromma di dwuma sɛ ade a ɛkyerɛ kwan wɔ ahunmu akwantu mu nnɛ mpo. Tetefo nso hyehyɛɛ anansesɛm ahorow faa nnipa ne mmoa a wɔtee nka sɛ nsoromma akuwakuw yɛ wɔn ho mfonini ho. Bere kɔɔ so no, nnipa bɛtee nka sɛ nsoromma betumi anya wɔn asetra so tumi.

Nsoromma Ahorow Pii

Nsoromma dodow ne n’akɛse nko ara tumi kanyan ehu. Wobu akontaa sɛ nsoromma akuw, anaa nsoromma akuw akɛse bɛyɛ ɔpepepem 100 na ɛwɔ amansan yi mu! The International Encyclopedia of Astronomy ka sɛ: “Ɛno bɛyɛ sɛ ɛmo aba mfuamfua a wobetumi aboa ano agu asɔredan kɛse bi mu.” Wobu akontaa sɛ anyɛ yiye koraa no, nsoromma dodow a ɛte saa na ɛwɔ Milky Way nsorommakuw a yɛn okyinnsoromma yi ka ho no mu. Nsoromma a ɛbɛn yɛn Asase pɛɛ (sɛ yeyi Owia to nkyɛn a) ne nsoromma akuw a wɔfrɛ no Alpha Centauri no mu biako no ntam kwan bɛyɛ sɛ hann mfe 4.3. Hann afe yɛ kwan tenten a hann twa wɔ afe biako mu. Eyi kyerɛ sɛ, sɛ yɛhwɛ saa nsoromma no a, hann a yehu no fii nsoromma no mu mfe 4.3 a etwaam no, saa bere no nyinaa na mmirika a ɛretu wɔ ahunmu no yɛ kilomita 299,792 wɔ anibu biako mu. Ɛbɛyɛ yɛn den sɛ yebetumi abu kilomita dodow a etwa no ho akontaa. Nanso, ɛno mpo ne nsoromma a ɛbɛn pɛɛ. Efi nsoromma binom so reba yɛn nsorommakuw yi so yɛ hann mfe ɔpepepem pii. Ɛnyɛ nwonwa sɛ Onyankopɔn diyifo bi kae sɛ: “Hwɛ, amanaman te sɛ bokiti ho nsukoko a ɛresosɔ, na wobu wɔn sɛ nsenia mu mfutumawa bi. Hwɛ, ɔmoma mmepɔw so sɛ mfutuma fekɔfekɔ.” (Yesaia 40:15) Hena na mfutumawa bi ho asɛm hia no?

Ɔsoro abɔde a ɛbɛn asase sen biara ne ɔsram, a ɛwɔ tumi bi wɔ yɛn asase yi so no, na ne tumi a ɛtwe nneɛma kɔ ho no mpo ma po bɔ asorɔkye kɔ soro bɛyɛ mita 15 wɔ mmeae bi. Sɛnea Fransefo nyansahufo baasa bi kyerɛ no, wogye di mprempren sɛ ɔsram no tumi a ɛtwe nneɛma bɛn ho no ne ade a ɛma asase no kɔ so kyea digriis 23 wɔ ne nnyinaso so, na ɛma yɛkɔ so nya ewim nsakrae horow. (Nature, February 18, 1993) Esiane sɛ ɔsram no wɔ yɛn okyinnsoromma no so tumi a aniwa tua saa nti, ntease wom sɛ yebebisa sɛ, Nsoromma ɔpepepem pii no nso ɛ? Nanso nea edi kan no, dɛn na tete nhoma ahorow te sɛ Bible no ka wɔ nsoromma no ho kyerɛ yɛn?

Nsoromma ho Nsɛm a Ɛwɔ Kyerɛwnsɛm no Mu

Bible no ka nsoromma ankasa ne sɛnkyerɛnne kwan so de ho nsɛm pii nso. Sɛ́ nhwɛso no, sɛnea odwontofo bi kae no, Ɔbɔadeɛ no yɛɛ “ɔsram ne nsoromma, sɛ enni anadwo so” sɛnea ɛbɛyɛ a nsoromma no bɛboa ma hann aba asase no so. (Dwom 136:9) Akyiri yi, bere a Onyankopɔn ne Abraham reyɛ apam no, Ɔkae sɛ: “Hwɛ ɔsoro ɛ, na kan nsoromma sɛ wubetumi akan anaa? Na ɔka kyerɛɛ no sɛ: Sɛ w’asefo bɛyɛ nen.” (Genesis 15:5) Ɔsomafo Paulo daa no adi sɛ nsoromma gu ahorow bere a ɔkae sɛ: “Owia anuonyam nko, ɔsram anuonyam nko, nsoromma anuonyam nko; na ɛsonsono nsoromma mmiako mmiako anuonyam.”a (1 Korintofo 15:41) Bere koro no ara no, saa nsoromma huhaa no ne wɔn anuonyam mpa Nea Ɔbɔe no ani so anaasɛ ɛnyɛ nea ontumi nni so: “Ɔkyerɛ nsoromma dodow, ɔtoto wɔn nyinaa din.”—Dwom 147:4.

Nanso, yehu wɔ Kyerɛwnsɛm mu sɛ wɔde nsoromma di dwuma mpɛn pii de gyina hɔ ma nnipa, sodifo, ne abɔfo. Yakob ba Yosef soo dae bi a “owia ne ɔsram” yɛɛ n’awofo ho mfonini, na “nsoromma” gyinaa hɔ maa ne nuabarimanom. Wɔfrɛ abɔfo sɛ “adekyee nsoromma.” Wɔka Babilon hene ho asɛm sɛ ɔrema ne ho so asen “Onyankopɔn nsoromma,” Israel man no sodifo a wofi Dawid ase no. Wɔde nnipa a wonni nnyinaso a wɔwɔ Kristofo asafo no mu toto “nsoromma a ekyinkyini” ho, bere a wɔka asafo mu mpanyimfo akuw a wodi nokware no ho asɛm sɛ “nsoromma” a wɔwɔ Kristo nsa nifa mu.—Genesis 37:9, 10; Hiob 38:7; Yesaia 14:13; Yuda 13; Adiyisɛm 1:16.

Bible mu asɛm bi ka sɛ “nsoromma fifii wɔn akwan so ne Sisera,” Kanaan hene Yabin safohempanyin a ɔhyɛɛ Israel man so mfe 20 no “koe.” Yehowa de hyɛɛ Ɔtemmufo Barak a ofi Israel nsa sɛ onnye Israel mfi nkoasom mu, na ɔmaa no dii Sisera so nkonim kɛse, ɛwom sɛ na Sisera wɔ nteaseɛnam ahankron a nnade hyehyɛ ne ntwahonan ho de. Wɔ nkonimdi dwom no mu no, Israelfo no too dwom sɛ: “Wofi soro bedii ako, nsoromma fifii wɔn akwan so ne Sisera koe.” Wɔnkyerɛkyerɛ ɔkwan pɔtee a nsoromma no faa so koe no mu. Sɛ́ anka yebesusuw sɛ nsoromma no nyaa kyɛfa tee wɔ ɔko no mu no, ntease wom kɛse sɛ yebegye atom sɛ nea asɛm no kyerɛ ne sɛ Onyankopɔn de ne ho gyee asɛm no mu maa Israel wɔ ɔkwan bi so.—Atemmufo 5:20.

Betlehem “Nsoromma No”

Ebia nsoromma a wɔaka ho asɛm wɔ Bible mu a wonim no kɛse no biako ne Betlehem “nsoromma no” a ɛkyerɛɛ nsoromma mu ahwɛfo a wofi “apuei” no kwan baa ofie a na Yesu awofo de no afi baabi a wɔwoo no a ɛyɛ mmoa adididaka mu akɔ hɔ no. Ná ɛyɛ nsoromma bɛn? Nokwarem no, na ɛnyɛ nsoromma biara kɛkɛ, esiane sɛ, na ɛwɔ fam araa ma nsoromma mu ahwɛfo no tumi dii akyi twaa bɛyɛ kilomita 1,600. Nea edi kan no, “nsoromma no” dii wɔn anim kɔɔ Yerusalem. Bere a Ɔhene Herode tee eyi ho asɛm no, obisaa wɔn ho asɛm na afei osii gyinae sɛ obekum abofra Yesu. Afei “nsoromma no” dii nsoromma mu ahwɛfo no anim kɔɔ ofie pɔtee a na Yesu te mu no mu. Ɛyɛ nokware sɛ nsoromma ankasa biara ntumi nyɛ saa. So na ade a ɛte sɛ nsoromma yi fi Onyankopɔn hɔ? Esiane sɛ nsoromma mu ahwɛfo no nsrahwɛ no na ɛkɔfaa ‘mmarimaa a wokunkum wɔn wɔ Betlehem ne n’ahye so a wɔadi mfe abien ne wɔn a wonnya nnii nyinaa’ bae nti, so ntease nnim sɛ yɛbɛka sɛ “nsoromma no” yɛ ade a Onyankopɔn Tamfo, Satan na ɔde dii dwuma de bɔɔ mmɔden sɛ ɔbɛsɛe Onyankopɔn Ba no?—Mateo 2:1-11, 16.

Ɛsɛ sɛ yɛkae nso sɛ, ná nsoromma mu ahwɛfo no fi Apuei Fam, ebia na wofi Babilon a na ɛyɛ tete kurow titiriw a na woyi nkonyaa, yɛ asumansɛm, na wɔhwɛ nsoromma mu wɔ hɔ no. Wɔde Babilon anyame din atoto ɔsoro abɔde dodow bi. Wɔ Ɔhene Nabukadnesar nna no mu no, wɔnam adebisa so na ɛboaa no ma osii ɔkwan a na ɔfa so kodi ako ho gyinae.—Hesekiel 21:20-22.

Odiyifo Yesaia twaa Babilon afotufo mpoa, kae sɛ: “Wo [Babilon], wunni tumi biara, ɛmfa ho afotu a wunya. Ma wo nsoromma mu ahwɛfo nsɔre nnyina na wonnye wo nkwa—saa nkurɔfo a wɔhwɛ nsoromma mu, a wɔkyekyɛ ɔsoro mu na daa ɔsram wɔka nea ɛbɛba wo so kyerɛ wo no. Wɔbɛyɛ sɛ sare nketenkete na ogya bi bɛhyew wɔn! Wɔrentumi nnye wɔn ho mpo . . . na obiara nni hɔ a ɔbɛka na wagye wo nkwa.” Sɛnea Yesaia hyɛɛ nkɔm no, ampa Babilon a ɛwɔ tumi kɛse no hwee ase wɔ Kores Ɔkɛseɛ no nsam wɔ afe 539 A.Y.B. mu. Akwankyerɛ a saa Babilon nsoromma mu ahwɛfo no kyerɛe sɛ wonya fi nsoromma mu no bɛyɛɛ asiane maa wɔn a na asɛm no fa wɔn ho nyinaa.—Yesaia 47:13-15.

So eyi kyerɛ sɛ yentumi nsua biribiara mfi nsoromma mu?

[Ase hɔ nsɛm]

[Kratafa 22 adaka]

Nsɛm a Nnipa Bi Akeka

NSOROMMA MU HWƐ: “nsoromma ho nimdeɛ hokafo ne ne boafo.”—Johannes Kepler (1571-1630) Germanni nsoromma ho nimdefo.

“Nsoromma mu hwɛ yɛ yare, ɛnyɛ nyansahu. . . . Ɛyɛ dua a ne nwini ase na gyidihunu ahorow nyinaa kɔ so.”—Moses Maimonides (1135-1204), Yudani nhomanimfo bi a ɔtraa ase Mfinimfini Mmere mu.

“Nyansahu bi a egyina atetesɛm so a ɛkyerɛ sɛ etumi hwehwɛ ankorankoro su ne wɔn nneyɛe mu na egyina ɔsoro abɔde horow hwɛbea so tumi ka nea daakye bɛyɛ ne nsɛm a ebesisi. . . . Sɛnea wɔkyerɛ no, ebia bɛyɛ afeha 6 A.Y.B. mu mu—na Kaldeafo a wɔte Iraq kesee fam de ankorankoro awo nsoromma gyinabea ho nsɛm bae. Ná eyi fa nkɛntɛnso a nsoromma bafan, Owia, Ɔsram ne okyinnsoromma anum nya wɔ obi so bere a wɔwo no no ho. . . . Akwan a wɔfa so di nsoromma mu hwɛ ho dwuma ne awo nsoromma ho nkyerɛkyerɛmu no gyina adwenhorow a nsoromma ho animdefo ne nyansahufo afoforo mu fa kɛse no ara bu no sɛ adwenkyerɛ hunu na wonnye ntom no so.”—C. A. Ronan, East Asian History of Science Trust, Cambridge, England nnwuma sohwɛfo, ne obi a ɔboa ma wɔkyerɛw The International Encyclopedia of Astronomy a emu na wɔfaa asɛm yi fii no.

Bere a Ronan reyɛ adwenkyerɛ hunu yi ho mfatoho no, ɔkyerɛkyerɛ mu sɛ bere a Atɔe Famfo bu okyinnsoromma kɔkɔɔ Mars sɛ ɛne akodi ne atutupɛ na ɛnam no, Chinafo nso bu ade kɔkɔɔ sɛ kɔla a ɛyɛ fɛ, na wobu Mars sɛ ɛwɔ nkɛntɛnso pa. Nea ɛne eyi bɔ abira no, Atɔe Famfo atetesɛm kyerɛ sɛ Venus yɛ fitaa na ɛyɛ fɛ. Chinafo fam no, “wobu . . . fitaa sɛ ɛyɛ owu, ɔporɔw ne ɔsɛe kɔla; enti wɔfrɛɛ Venus sɛ ‘ɔko okyinnsoroma a ne tirim yɛ sum.’”

Ronan toa so sɛ: “Ɛmfa ho sɛ nsoromma mu hwɛ yɛ nyansahu a egyina atetesɛm so no, edii dwuma a mfaso wɔ so de hyɛɛ nsoromma ho nimdeɛ a wonyae ho nkuran wɔ tete mmere mu, na ɛso na wɔnam nyaa sika de dii ho dwuma.”

Nnipa dunkron a wɔagye Nobel akyɛde, ne nyansahufo foforo ka boom de mpaemuka bi too gua wɔ 1975 mu a n’asɛmti ne sɛ: “Nsoromma Mu Hwɛ ho Kasatia Horow—Nyansahufo Akunini 192 Asɛm a Wɔde To Gua.” Ɛkae sɛ: “Tete no na nnipa . . . nni akwan atenten a ɛdeda asase ne okyinnsoromma ahorow ne nsoromma ntam ho adwene biara. Afei a yetumi bu akwan yi ho akontaa na yɛabu no, yetumi hu sɛnea tumi a ɛtwe ade ba fam ne tumi afoforo a efi okyinnsoromma a ɛwowɔ akyirikyiri ne nsoromma a ɛwowɔ akyirikyiri sen saa mu ba no yɛ ketewaa koraa no. Ɛyɛ mfomso koraa sɛ yebesusuw sɛ tumi ahorow a efi nsoromma ne okyinnsoromma mu ba bere a wɔwo yɛn no betumi akyerɛ nea yɛn daakye bɛyɛ wɔ ɔkwan bi so.”b

[Ase hɔ nsɛm]