Wiase Nsɛm

Nneɛma Bo Kɔ Soro Ɔha Biara mu Nkyem Ɔpepem Biako

Sɛnea Federal Republic of Yugoslavia Nneɛma ho Akontaabu Asoɛe kyerɛ no, nneɛma bo kɔɔ soro wɔ ɔman no mu koduu ɔha biara mu nkyem ɔpepem biako wɔ December 1993 mu. Asetra mu yɛɛ den kɔɔ soro mpɛn 2,839 sen ɔsram a etwaam no, na na ɛboro afe no mfiase no de so ɔpepepepem 6. Ne saa nti sɛ wotwa sika a, ɛbɛyɛ nea ɛnsom bo wɔ nna kakraa bi mu. Nea ɛbɛyɛ na wɔatumi adi ho dwuma no, sikakorabea Kunini no reyi ohunu [0] a edidi dinar dodow bi akyi no afi hɔ. Dinars ɔpepepepem 5 so tew bɛyɛɛ dinars 5 pɛ wɔ asram abiɛsa mu.

Asɔrekɔ

Nhwehwɛmu bi a wɔyɛe mu no, bɛboro Amerikafo ɔha biara mu 90 na wɔkae sɛ wogye Onyankopɔn di, na bɛboro ɔha biara mu 40 na wɔkyerɛe sɛ wɔkɔ asɔre dapɛn biara. Akontaa bi a wobui wɔ 1992 mu daa no adi sɛ United States Protestantfo ɔha biara mu 45 ne Katolekfo ɔha biara mu 51 na wɔkɔ asɔre dapɛn pɔtee bi. Nanso, nhwehwɛmu foforo da no adi sɛ nnipa pii na wɔka no kɛkɛ sɛ wɔyɛ nyamesomfo na wɔkɔ asɔre daa. Sɛnea nhwehwɛmufo kuw bi kyerɛ no, Protestantfo ɔha biara mu 20 ne Katolekfo ɔha biara mu 28 pɛ na wɔkɔ asɔre dapɛn biara ankasa. Nhwehwɛmufo kuw foforo ahu sɛ Amerikafo mpanyimfo ɔpepem 36 pɛ—ɔha biara mu 19—na wɔkɔ wɔn asɔre daa, na nea ɛreyɛ adu Amerikafo a wɔadi boro mfe 18 mu abiɛsa biara mu biako ani nnye nyamesom ho koraa. Newsweek ka sɛ, “Bere a nyamesom kɔ so wɔ Amerika man mu no, nnipa kakraa bi pɛ na wɔn ani kũ ho. Amerikafo fã wɔ nyamesom bi a enni wɔn su anaa nneyɛe horow so tumi biara.”

Nsu ho Rebɛyɛ Nã

Science nsɛmma nhoma no ka sɛ, “Sɛ yɛbɛka a, esiane sɛ sukyerɛmma ne osu dodow a ɛtɔ ara na ɛkɔ so tɔ bere nyinaa nti, nsu foforo a ebesi nea ɛyow no ananmu yɛ kakraa bi. Ebedu afe 2025 no, na nnipa a wɔte aman a nsu ho yɛ nã wom dodow adu ɔpepepem 3,” na “ebedu afe 2000 no na nsu ho ayɛ nã kɛse wɔ Afrika ne Mfinimfini Apuei aman dodow mu dedaw.” Sɛnea amanneɛbɔ bi a efi Amanaman Ntam Kuw a Edi Asase so Nnipa a Wɔredɔɔso ho Dwuma no hɔ kyerɛ no, aman pii na wɔatwe wɔn fam nsu ma ɛreyɛ asa, na pii nso ntumi nhu nsonsonoe a ɛwɔ nsu a wontumi nnadan no nyɛ no foforo ne nea wobetumi adannan no ayɛ no foforo mu wɔ nneɛma ho nhyehyɛe a wɔyɛ to hɔ na wɔde adi dwuma bere tenten no mu. Ɛwom sɛ wɔabɔ mmɔden sɛ wɔbɛma nsu abu so de, nanso nnipa a wɔredɔɔso no ma mmɔden biara a wɔbɔ yɛ ɔkwa.

Aguanfo a Wosiw Wɔn Kwan

Sadako Ogata a ɔyɛ Amanaman Nkabom Asoɛe a Ɛhwɛ Aguanfo ho Nsɛm so Panyin ka sɛ, aguanfo dodow abu abɔ ho bɛboro mpɛn awotwe wɔ mfe aduonu a atwam yi mu, na eyi de “ɔtan ne ahɔho ho suro kɛse aba.” Eduu afe a etwaam no awiei no, na aguanfo ɔpepem 19.7 na wɔte aman afoforo so, na ɔpepem 24 foforo nso na wɔabɔ wɔn apansam wɔ wɔn ankasa aman mu. Wɔ wiase nyinaa no, nnipa 125 biara mu 1 na basabasayɛ, ɔmanko, anaa ɔtaa ahyɛ no ma watu afi ne fie a ɔte mu mu. Bere a The Washington Post reka wiase nyinaa aguanfo ho nhwehwɛmu yi ho asɛm no, ɛbɔ amanneɛ sɛ dodow no boro “wɔn ho dwuma a wiase no betumi adi” ne “ahɔhoyɛ su a nnipa wɔ no so.” Aman dodow bi a wɔwɔ sikasɛm mu ahokyere mu dedaw na akodi a ɛte sɛ nea wontumi nni so ama wɔabrɛ no afa akwan bi so sɛ wobesiw aguanfo a wɔba wɔn aman mu no kwan. Bere a nhwehwɛmu no rekamfo amanaman ntam mmara bi a wɔbɛyɛ ma ɛde amanko aba awiei no, ɛkae sɛ, “Ɛkame ayɛ sɛ akodi a ɛde aguanfo ba nyinaa a na ɛrekɔ so wɔ wiase . . . wɔ 1993 mu no yɛ nea na ɛrekɔ so wɔ aman no ankasa mu sen sɛ ɛbɛyɛ nea ɛkɔ so wɔ aman ntam.” Aguanfo a “wonnye wɔn fɛw so” bɛkɔ so ara.

Pope Hyɛ Afie Afie Adwuma ho Nkuran

Bere a nnipa dodow bi a wɔwɔ Katolekfo Kuw a Ɛresakra Nkurɔfo Ma Wɔaba Katoleksom Mu no mu gye John Paul II ahyɛde tom no, wɔapene so sɛ wɔbɛyɛ afie afie ne mmɔnten so asɛnka adwuma wɔ Rome ne ne mpɔtam. Sɛnea wɔbɔɔ ho amanneɛ wɔ atesɛm krataa La Repubblica mu no, saa “kasammrɛfo yi a wɔne Yehowa Adansefo nka no” bɛka “Yesu asetra ho nsɛm akyerɛ.” Mmusua 15 pɛ na wɔbom yɛ kuw a edi kan no, nanso pope no wɔ anidaso sɛ dwumadi no “betumi asow aba pii wɔ baabiara.” Dɛn nti na wɔrefi saa dwumadi foforo yi ase? Asetram nsɛm ho ɔdenimfo Maria Macioti ka sɛ, Katolek asɔre mpanyimfo hu sɛ “ahwere tumi a ɛwɔ a ɛde sakra nkurɔfo, ne nneɛma a ɛma nkurɔfo ani gye asɔre no ho no,” na pope no hyɛ akuw a ɛtete saa no nkuran sɛ “wɔmfa nkatede a emu yɛ den so nsakra nkurɔfo.” Katolekni kyerɛwfo Sergio Quinzio de ka ho sɛ: “Ɛte sɛ nea ɔmpɛ sɛ obu n’ani gu hokwan biara so, sɛ́ ɛyɛ nea anidaso wom anaasɛ ebedi huammɔ, sɛnea ɛbɛyɛ a biribiara bɛyɛ nea mfaso wɔ so.”

Nneɛma a Atwa Yɛn ho Ahyia ho Asiane wɔ Russia

German atesɛm krataa Frankfurter Allgemeine Zeitung bɔ amanneɛ sɛ, “Russia Soafo a ɔhwɛ Nneɛma a Atwa Yɛn ho Ahyia ho Nsɛm so Viktor Danilow-Daniljan, aka sɛ Russia asase no nkyekyem ɔha biara mu 15 yɛ nea aba asiane mu. Sɛnea amanneɛbɔ no kyerɛ no, Russia nsase a wɔyɛ so kuadwuma no mu fã yɛ mmeae a ɛmfata sɛ wɔyɛ mfuw, na nnipa bɛboro 100,000 tete mmeae a mfutuma a awuduru wom dɔɔso wɔ hɔ dodo. Afei nso, wɔbɔ amanneɛ sɛ awuduru a efi mfiridwuma a na wɔyɛ akode a wɔde awuduru yɛ mu ba akunkum nnipa mpempem pii. Lew Fjodorow a ɔyɛ Kuw a Ɛhwɛ Siw Asiane a Nnuru Betumi de Aba Ano no panyin kae sɛ: “Sɛ yegyina nea nnuruyɛfo ka so susuw asɛm no ho a, asiane kɛse na efii ɔkwan a yɛfaa so yɛɛ akode a yɛde awuduru yɛ a yɛde bedi ako no mu bae.”

Mmofra a Wɔyɛ Basabasa

Wohu mmofra a wodi awu, wowia ade, wɔto mmonnaa na wɔyɛ nkurɔfo ayayade wɔ nsase pii so, na basabasayɛ ne amumɔyɛsɛm renya nkɔanim. Awu a mmofra a wonnii mfe 18 di wɔ United States kɔɔ soro ɔha biara mu 85 wɔ mfe anum a atwam no mu. Ade a ɛhaw adwene saa ara nso ne animtiaabu su a saa mmofrabɔne no mu pii da no adi no. Dɛn na ɛde saa nsakrae yi aba? Germany nsɛmma nhoma Der Spiegel ka sɛ, “Yɛn anuɔden wiase yi ne emu gyinapɛn ahorow a wɔagow mu no ama basabasayɛ abɛyɛ biribi a wogye tom. Wonhu nsonsonoe a ɛwɔ . . . gyinapɛn ahorow a emu da hɔ pefee a ɛfa nea ɛteɛ ne nea ɛnteɛ, papa ne bɔne ho no bio.” Ɛde ka ho sɛ: “Mmofra a wodi nsɛmmɔne no nso yɛ amanehunufo. Ɛyɛ nneɛma a mpanyimfo a wɔne wɔn te yɛ na wɔda bi adi. . . . Abofra biara a ɔyɛ basabasa no ahwɛ basabasayɛ ahorow a ɛdɔɔso ma ɛyɛ nwonwa na wasua.” Mmofra nam TV so hu “basabasayɛ a ɛrekɔ so wɔ wiase nyinaa.” Video so basabasayɛ, kɔmputa so agodie, ne nnwom a ɛkamfo awudi ne basabasayɛ afoforo kyerɛ no nya wɔn so tumi. TV so dwumadi hyɛ basabasayɛ ho nkuran sɛ ɛyɛ ɔkwan a ɛfata a wɔnam so di ɔhaw ahorow ho dwuma na wosiesie akasakasa ahorow. Adwene ne nneyɛe ho ɔbenfo Stefan Schmidtchen a ɔwɔ Hamburg ka sɛ, “Yɛabɛyɛ atirimɔdenfo, na yɛn mma nso renya saa su no ara bi.”

Akokoaa a Wɔda Ne Nkyɛn

James McKenna, ɔbenfo a ɔwɔ Pomona Kɔlege, California ka sɛ, “Sɛ ɛnanom yɛ ade biako pɛ: Sɛ wɔne wɔn nkokoaa bom da mpa biako so afe a edi kan no sen sɛ wɔbɛtew wɔn ma wɔn nkutoo ada wɔn mpa so a, ɛnyɛ SIDS (Nkokoaa Ɔpatuwu Yare) nko so na ɛbɛtew na mmom yɛbɛtete mmofra a wɔte apɔw na wɔwɔ anigye.” The Dallas Morning News bɔ amanneɛ sɛ, da a akokoaa da ne wofo nkyɛn no “boa akokoaa no ma nkwaadɔm a ɛwɔ ne mu di dwuma yiye anadwo no nyinaa.” Nhwehwɛmu ahorow a wɔayɛ ada no adi sɛ sɛ akokoaa da ne maame nkyɛn a, ne “home, sɛnea ne koma bɔ ne sɛnea ɔda ne ne maame de di nsɛ.” Na esiane sɛ ɛna ne abofra taa da di nhwɛanim nti, akokoaa no tumi num bere biara a ɔpɛ. Owura McKenna ka sɛ, “Nkokoaa a wɔn nkutoo da wɔn mpa so hwere biribi wɔ nkate mu. Yesusuw sɛ eyi betumi ama onyin a akokoaa no adwene hia no atɔ sin, na ebia ama wakɔ tebea bi a ebetumi ama wanya SIDS mu.” Akontaabu da no adi sɛ, SIDS wɔ fam koraa wɔ aman a nkokoaa ne wɔn nanom da mpa biako so mu.

Israel ne Vatican Yɛ Apam

Mfe pii a wɔde powee ne asram 17 a wɔde yɛɛ nhyehyɛe akyi no, Vatican ne Israel ayɛ amammui mu apam. Afanu no nyinaa ananmusifo hyehyɛɛ kyɛw a ɛte sɛ tikoraa bere a Amannɔne ho Nsɛm Soafo Abadiakyiri Yossi Beilin de ne nsa hyɛɛ apam no ase maa Israel, na Ɔkyerɛwfo Panyin Abadiakyiri Monsignor Claudio Celli de ne nsa hyɛɛ ase maa Vatican no. Celli kae sɛ, “Ɔkronkroni no agye atom afei sɛ yɛbɛhyɛ Katolekfo ne Yudafo ntam nkitahodi ne biakoyɛ a obu wom ho nkuran foforo na emu ayɛ den wɔ Israel ne wiase nyinaa.” Apam no hyɛ Vatican sɛ wɔnko ntia Yudafo ho tan, na Israel nso pene so sɛ ɛbɛma asɔre no ɔkasa mu ahofadi ne hokwan a ɛde bedi nnipa nhyehyɛe ahorow ho dwuma wɔ Israel. Ɛho da so ara hia sɛ wosiesie nsɛm bi a ɛho hia te sɛ asɔre agyapade ahorow ho tow a ɛsɛ sɛ wotua wɔ Israel ne hokwan a wobenya de akɔ mmeae kronkron. Bere a wɔanka Yerusalem ho asɛm wɔ apam no mu no, Vatican wɔ anidaso sɛ afei de ebetumi aka biribi wɔ kurow no gyinabea koraa ho.

Abɔde a Nkwa Wom ho Apam Bɛyɛ Mmara

Apam bi a aman 167 de wɔn nsa hyɛɛ ase wɔ Brazil wɔ June 1992 mu no abɛyɛ amanaman ntam mmara wɔ afe yi mfiase. Apam a wɔato din Abɔde Horow a Nkwa Wom ho Nhyiam no hyɛ aman a wɔde wɔn nsa hyɛɛ ase no nyinaa sɛ wɔmfa akwan bi so nkora mmoa, afifide, ne mmoawa-mmoawa a ɛwɔ wɔn aman mu ne wɔn atrae a ehia no so. Wɔhwehwɛ sɛ aman a wɔde wɔn nsa hyɛɛ apam no ase no yɛ mmara de bɔ abɔde a nkwa wom a wɔretɔre wɔn ase no ho ban na wɔma amanfo ani ba wɔn ho so wɔ sɛnea wɔde abɔde a nkwa wom bedi dwuma ɔkwampa so ne hia a ehia sɛ wɔkora nneɛma so ho. Nea ɛma wɔyɛɛ apam yi ne hu a wɔahu sɛ wɔretɔre abɔde a nkwa wom ase ntɛmntɛm, ne suro a wosuro sɛ ebia ebedu afe 2050 no na wɔatɔre abɔde a nkwa wom nyinaa a aka no mu fã ase no. Wɔn a wɔde wɔn nsa hyɛɛ apam no ase no behyiam akyiri yi wɔ afe yi mu asi sɛnea apam no bedi dwuma ankasa ho gyinae.