“Hwɛ! Yuda Abusuakuw Mu Gyata” No

1-3. Asɛm bɛn na na ɛrebɛto Yesu, na sɛn na ɔyɛɛ n’ade?

NÁ BASABASAYƐFO bi rehwehwɛ Yesu akyere no. Ná wɔyɛ nnipadɔm a wɔkurakura sekan ne nkontimmaa, na na asraafodɔm nso ka wɔn ho. Wɔn nyinaa gyee bum faa sum mu wɔ Yerusalem mmɔnten so, na wɔkɔfaa Kidron Bon no mu kopuee Ngodua Bepɔw no so. Ná ɛyɛ bere a bosome no apae, nanso na wɔkurakura agyatɛn ne nkanea. Ná omununkum akata bosome no so nti na na wɔkurakura agyatɛn no anaa? Anaasɛ na wɔsusuw sɛ Yesu de ne ho besie sum no mu? Yɛrentumi nkyerɛ, nanso nea yebetumi aka ne sɛ: Sɛ na obi susuw sɛ ehu bɛka Yesu a, ɛnde na onnim Yesu yiye.

² Ná Yesu nim asɛm a ɛrebɛto no no. Nanso wanguan, ogyinaa hɔ twɛn wɔn. Bere a basabasayɛfo no beduu hɔ no, Yuda a bere bi na ɔyɛ Yesu yɔnko paa no na na odi wɔn anim. Yuda ani ammu no dwɛ; mmom oyii Yesu a bere bi na ɔyɛ ne wura no mae a wamfɛre. Ɔyɛɛ ne ho te sɛ obi a ɔpɛ Yesu asɛm, na ofew n’ano de yii no mae. Nanso wei nyinaa amma Yesu ho ampopo. Okogyinaa basabasayɛfo no anim bisaa wɔn sɛ: “Hena na morehwehwɛ no?” Wɔbuaa no sɛ: “Nasaretni Yesu.”

³ Nnipa pii na basabasayɛfo a wɔkurakura akode baa wɔn so saa a, anka wɔn ho bɛpopo paa. Ebia na nnipadɔm no rehwɛ kwan sɛ Yesu nso ho bɛpopo. Nanso wansuro, wanguan, na wanni atoro amfa antwitwa annye ne ho. Mmom, Yesu kaa sɛ: “Mini.” Ɔne wɔn ampere, na ne koma nso antu; mmom ɔdaa akokoduru adi ma ɛyɛɛ wɔn nwanwa. Wɔpinii wɔn akyi, na wɔhwehwee ase!—Yohane 18:1-6; Mateo 26:45-50; Marko 14:41-46.

4-6. (a) Wɔde Onyankopɔn Ba no toto dɛn ho, na adɛn ntia? (b) Akwan mmiɛnsa bɛn na Yesu faa so daa akokoduru adi?

⁴ Ɛyɛɛ dɛn na Yesu tumi gyinaa asɛnkɛse a ɛte saa ano a ne koma antu anaa ne ho ampopo ketewaa bi mpo? Mmuae no ara ne sɛ, na ɔwɔ akokoduru. Suban a ehia paa sɛ ɔkannifo nya na ama nnipa pii ani agye ne ho no, akokoduru yɛ emu baako. Nanso obiara nni hɔ a watumi ada Yesu akokoduru no bi adi pɛpɛɛpɛ, na kampɛsɛ wada akokoduru a ɛsen Yesu de no bi adi. Yeduu Ti 3 no, yehuu sɛnea na Yesu dwo na ɔbrɛ ne ho ase. Enti sɛ Bible frɛɛ no ‘Oguammaa no’ a, na ɛyɛ ne kwan so. (Yohane 1:29) Nanso akokoduru a Yesu daa no adi nti, wɔsan de edin foforo koraa frɛ no. Bible ka Onyankopɔn Ba no ho asɛm sɛ: “Hwɛ! Yuda abusuakuw mu Gyata” no.—Adiyisɛm 5:5.

⁵ Ɛba akokoduru a, aboa a wɔtaa bɔ ne din ka ho asɛm ne gyata. Woagyina gyatanini a wanyin anim pɛn? Sɛ woayɛ saa a, ebia na ɔda buw mu wɔ mmoa yɛmmea nti na woansuro no. Ne nyinaa akyi, sɛ wuhu gyata no a, wo ho betumi apopo wɔ n’anim. Bere a worehwɛ aboa kɛse a ne ho yɛ den yi anim, na ɔno nso rehwɛ wo hãã no, wubehu sɛ biribiara nni hɔ a ebetumi ahunahuna gyata no ama waguan. Bible ka sɛ, ‘gyata yɛ mmoa mu ɔhoɔdenfo a ɔnnan ne ho mfi obiara anim.’ (Mmebusɛm 30:30) Akokoduru wei ara bi na Kristo wɔ.

⁶ Ma yɛnhwɛ akwan mmiɛnsa bi a Yesu faa so daa akokoduru adi te sɛ gyata. Akwan yi ne: sɛnea ogyinaa nokware no akyi pintinn, sɛnea ɔdaa atɛntrenee adi, ne sɛnea ogyinaa ɔsɔretia ano. Yebehu nso sɛ, sɛ yɛyɛ akokodurufo oo, sɛ yesuro ade oo, yɛn nyinaa betumi asuasua sɛnea Yesu daa akokoduru adi no.

7-9. (a) Bere a Yesu dii mfe 12 no, dɛn na esii, na sɛ ɛyɛ wo a, dɛn na anka ɛbɛma ehu aka wo saa bere no? (b) Bere a Yesu ne akyerɛkyerɛfo no rekasa wɔ asɔrefie hɔ no, dɛn na ɔyɛe a ɛkyerɛ sɛ na ɔwɔ akokoduru?

⁷ Wiase a “atoro agya,” Satan, di so yi mu no, mpɛn pii egye akokoduru na obi atumi agyina nokware no akyi. (Yohane 8:44; 14:30) Yesu antwɛn sɛ obenyin ansa na wagyina nokware no afã. Bere a Yesu dii mfe 12 a ɔne n’awofo kɔɔ Twam Afahyɛ ase wɔ Yerusalem no, na wɔnhu baabi a ɔwɔ. Maria ne Yosef de nnansa hwehwɛɛ abarimaa no denneennen. Ewiee ase no, wɔkohuu no wɔ asɔrefie hɔ. Dɛn na na ɔreyɛ wɔ hɔ? “Ná ɔte akyerɛkyerɛfo no mfinimfini retie wɔn, na na ɔrebisabisa wɔn nsɛm.” (Luka 2:41-50) Wo de, susuw nea ɛkɔɔ so no ho hwɛ.

⁸ Abakɔsɛm akyerɛwfo bi ka sɛ, sɛ wɔdi afahyɛ bi wie a, na nyamesom akannifo no mu atitiriw taa tena asɔrefie no abrannaa akɛse no bi so kyerɛkyerɛ. Ná nkurɔfo taa tenatena wɔn nan ase tie wɔn, na na wɔbisabisa wɔn nsɛm. Ná akyerɛkyerɛfo no nim nhoma yiye. Ná wɔaben wɔ Mose Mmara no mu, na na mmara ne atetesɛm bebrebe a nnipa ahyehyɛ no mfe pii no nso, wɔnim mu yiye. Sɛ ɛyɛ wo na na wote wɔn mfinimfini a, anka dɛn na wobɛyɛ? Anka ehu bɛka wo anaa? Sɛ ehu ka wo a, ntease wom. Na sɛ woadi mfe 12 pɛ nso ɛ? Mmofra pii fɛre ade. (Yeremia 1:6) Ebinom bɔ mmɔden paa sɛ, sɛ wɔwɔ sukuu mu a, wɔremma wɔn akyerɛkyerɛfo adwene mma wɔn so. Wɔsuro sɛ anhwɛ a akyerɛkyerɛfo no bɛfrɛ wɔn ama wɔayɛ biribi anaa wɔama mmuae, anaa wɔbɛtwe adwene asi wɔn so, na wɔsuro nso sɛ ebia wɔn ani bewu anaa wɔbɛserew wɔn.

⁹ Nanso Yesu de, na ɔte mmarima a wɔnim nhoma yi mfinimfini rebisabisa wɔn nsɛm a emu dɔ a ne ho mpopo. Ɛnyɛ ɛno nko ara na ɔyɛe. Kyerɛwtohɔ no ka sɛ: “Sɛnea na n’adwenem dɔ na oyi nsɛm ano nti, wɔn a na wɔretie no no nyinaa ho dwiriw wɔn yiye.” (Luka 2:47) Nea Yesu kaa no saa bere no de, Bible nkyerɛ, nanso yebetumi anya ahotoso sɛ wanka atosɛm a na nyamesom akyerɛkyerɛfo no taa keka no bi. (1 Petro 2:22) Mmom no, ɔkaa nokwasɛm a ɛwɔ Onyankopɔn Asɛm mu, na ɛda adi sɛ wɔn a na wɔretie no no ho dwiriw wɔn sɛ abarimaa a wadi mfe 12 pɛ de akokoduru ne nhumu rekasa saa.

10. Dɛn na Kristofo mmofra a wɔwɔ hɔ nnɛ yɛ de suasua Yesu akokoduru no?

¹⁰ Ɛnnɛ, Kristofo mmofra pii redi Yesu anammɔn akyi. Ɛwom, na abofra Yesu yɛ pɛ, nanso wɔn de bɔne wɔ wɔn ho. Wɔsuasua Yesu, enti wɔntwɛn sɛ wɔbɛyɛ mpanyimfo ansa na wɔagyina nokware no akyi. Wɔde anifere bisabisa nkurɔfo nsɛm, wɔtie nea wɔka, na wɔfi obu mu ka nokware no ho asɛm kyerɛ wɔn wɔ sukuu mu ne baabi a wɔte. (1 Petro 3:15) Kristofo mmofra pii boa wɔn mfɛfo sukuufo, wɔn akyerɛkyerɛfo, ne wɔn afipamfo ma wɔbedi Kristo akyi. Yehowa ani gye wɔn akokoduru no ho paa! Onyankopɔn Asɛm de mmofra a wɔte saa no toto obosu ho. Wɔma n’ani gye, wɔma ne koma tɔ ne yam, na wɔyɛ dɔm kɛse nso.—Dwom 110:3.

11, 12. Bere a Yesu nyinii no, dɛn na ɔyɛ de kyerɛe sɛ ɔde akokoduru gyina nokware no akyi?

¹¹ Bere a Yesu nyinii nso, onyaa akokoduru de gyinaa nokware no akyi mpɛn pii. Bere a ɔrefi ne som adwuma no ase pɛɛ na biribi sii. Nea esii no, nnipa pii na ɛtoo wɔn a, anka wɔbɛbɔ hu paa. Saa bere no, na Yesu nyɛ ɔbɔfo panyin, na mmom na ɔyɛ onipa a ɔwɔ honam ne mogya. Nanso, na ɛsɛ sɛ ɔne Satan a ɔyɛ Yehowa tamfo a ne ho yɛ hu sen biara na ne ho yɛ den no di asi. Yesu ansosɔ Satan so koraa, na bere a Satan kyinkyim Kyerɛwnsɛm no nso, Yesu bɔ gui. Yesu twaa nkɔmmɔ no so, na ɔde akokoduru kaa no pen kyerɛɛ Ɔbonsam sɛ: “Fi me so kɔ, Satan!”—Mateo 4:2-11.

¹² Saa na Yesu fii ne som adwuma no ase. Efi saa bere no rekɔ nyinaa, wampene amma nkurɔfo ankyinkyim Onyankopɔn Asɛm no. Mmom, ɔde akokoduru kaa mu asɛm sɛnea ɛte pɛpɛɛpɛ. Saa bere no, na ɔsom mu mpanyimfo kyerɛkyerɛ atosɛm, na saa ara na ɛte nnɛ. Yesu ka kyerɛɛ nyamesom mpanyimfo a ɛwɔ ne bere so no sɛ: “Mode mo amammerɛ a mokyerɛkyerɛ no sɛe Onyankopɔn asɛm.” (Marko 7:13) Ná nkurɔfo de obu soronko ma nyamesom mpanyimfo no, nanso Yesu de akokoduru kasa tiaa wɔn sɛ wɔyɛ akwankyerɛfo anifuraefo ne nyaatwomfo.a (Mateo 23:13, 16) Sɛnea Yesu daa akokoduru adi yi, yɛbɛyɛ dɛn asuasua?

13. Bere a yɛresuasua Yesu no, dɛn na ehia sɛ yɛkae, nanso hokwan bɛn na yɛanya?

¹³ Nea ɛwom ne sɛ, Yesu de otumi hu nkurɔfo komam na otumi bu atɛn, nanso ɛsɛ sɛ yɛkae sɛ yɛn de, yɛrentumi nhu nkurɔfo komam, na saa ara nso na yɛrentumi mmu atɛn. Nanso, yebetumi asuasua sɛnea ɔde akokoduru gyinaa nokware no akyi no. Sɛ nhwɛso no, sɛ yɛpa atoro nkyerɛkyerɛ ho ntama, kyerɛ sɛ, atosɛm a wɔka fa Onyankopɔn, n’atirimpɔw, ne n’Asɛm ho no a, na yɛrema Onyankopɔn Asɛm ahyerɛn wɔ wiase a Satan nnaadaasɛm ama aduru sum no mu. (Mateo 5:14; Adiyisɛm 12:9, 10) Atoro nkyerɛkyerɛ a ama ehu ahyɛ nkurɔfo koma mu ma, na ama wɔne Onyankopɔn ntam asɛe no, yɛboa wɔn ma wɔde wɔn ho fi ho. Ɛyɛ hokwan kɛse paa na yɛanya no, efisɛ yɛahu sɛnea Yesu bɔhyɛ yi aba mu: “Nokware no beyi mo afi nkoasom mu”!—Yohane 8:32.

14, 15. (a) Dɛn ne ɔkwan baako a Yesu faa so maa nkurɔfo huu “nea atɛntrenee kyerɛ pefee”? (b) Bere a Yesu ne Samariani bea bi kasae no, nnipa mu nyiyim bɛn na na ɛrekɔ so a wamfa ne ho anhyem?

¹⁴ Bible nkɔmhyɛ ma yehu sɛ, na Mesia no bɛma amanaman no ahu “nea atɛntrenee kyerɛ pefee.” (Mateo 12:18; Yesaia 42:1) Akyinnye biara nni ho sɛ, bere a Yesu wɔ asaase so no, ɔdaa atɛntrenee adi. Ɔde akokoduru kyerɛe sɛ ɔnhwɛ nnipa anim, na obu atɛntrenee. Sɛ́ nhwɛso no, wanyɛ nyiyim, na wannya nnipa ho adwemmɔne sɛnea na nkurɔfo a wɔwɔ ne bere so taa yɛ no.

¹⁵ Bere a Yesu ne Samariani bea bi kasae wɔ Sikar asubura ho no, ɛyɛɛ n’asuafo no nwanwa. Adɛn ntia? Efisɛ saa bere no, na Yudafo kyi Samariafo no korakora. Ná saa ɔtan yi atena wɔn ntam mfe pii ansa na Yesu reba asaase so. (Esra 4:4) Afei nso, na rabifo no bi bu mmea animtiaa. Rabifo mmara a akyiri yi wɔkyerɛwee no ma ɛyɛɛ den sɛ ɔbarima ne ɔbea bɛbɔ nkɔmmɔ, na na wɔkyerɛ mpo sɛ ɛmfata sɛ wɔde Onyankopɔn Mmara kyerɛkyerɛ mmea. Samariafo mmea mpo de, na wɔbu wɔn sɛ wɔn ho ntew. Yesu ansosɔ nyiyim a ɛte saa so koraa, na mmom ɔkyerɛkyerɛɛ Samariani bea (a na ne bra asɛe) no wɔ petee mu, na mpo ɔka kyerɛɛ ɔbea no sɛ ɔno Yesu ne Mesia no.—Yohane 4:5-27.

16. Adɛn nti na ɛsɛ sɛ Kristofo nya akokoduru na wɔanyɛ nyiyim?

¹⁶ Wo ne nnipa bi a wɔnni afoforo ho adwempa koraa abɔ pɛn? Ebia wɔyi nsɛnkwaa de di afoforo a wɔfi abusua anaa ɔman foforo so ho fɛw, anaa wɔyɛ mmea a wɔka mmarima ho nsɛmmɔne, anaasɛ wɔyɛ mmarima a wɔka mmea ho nsɛmmɔne, anaasɛ wɔbu wɔn a wɔnni dibea anaa wɔyɛ ahiafo animtiaa. Kristo akyidifo nsosɔ nyiyim a ɛte saa so koraa, na mmom wɔbɔ mmɔden sɛ wɔbeyi nnipa ho adwemmɔne biara afi wɔn koma mu. (Asomafo Nnwuma 10:34) Ɛsɛ sɛ yɛn mu biara nya akokoduru, na yɛanyɛ nyiyim.

17. Dɛn na Yesu yɛɛ wɔ asɔrefie hɔ, na adɛn ntia?

¹⁷ Akokoduru a Yesu wɔ no nso boaa no ma ɔtew Onyankopɔn nkurɔfo ne nokwaresom ho. Ne som adwuma mfiase no, ɔkɔɔ Yerusalem asɔrefie hɔ, na okohui sɛ aguadifo ne sikasesafo de hɔ ayɛ aguadi fi. Ɛyɛɛ no nwanwa paa. Ná Yesu wɔ ɔpɛ a emu yɛ den sɛ ɔbɛyɛ adetrenee, enti nea ɔkɔtoo so no hyɛɛ no abufuw ma ɔpamoo mmarima adifudepɛfo no, na ɔma wɔyiyii wɔn nneɛma fii hɔ. (Yohane 2:13-17) Ɔsan yɛɛ biribi a ɛte saa bere a ɔde ne som adwuma no reba awiei no. (Marko 11:15-18) Akyinnye biara nni ho sɛ nea ɔyɛe no ma onyaa atamfo paa, nanso wei amma wampa abaw. Adɛn ntia? Efisɛ efi ne mmofraase pɛɛ na ɔfrɛɛ asɔrefie no n’Agya fie, na ɔde ne nneyɛe kyerɛɛ sɛ ɛyɛ nokware. (Luka 2:49) Ná ɔrentumi ntena hɔ nhwɛ mma wɔnyɛ nneɛma bɔne mfa nsɛe nokwaresom a ɛkɔ so wɔ asɔrefie hɔ no da. Ná ɛnyɛ ade a ɔbɛsosɔ saa adebɔne no so koraa. Nsi ne ahokeka a na ɔwɔ nti, onyaa akokoduru de yɛɛ nea na ehia sɛ ɔyɛ.

18. Kristofo a wɔwɔ hɔ nnɛ bɛyɛ dɛn ada akokoduru adi de atew asafo no ho?

¹⁸ Kristo akyidifo a wɔwɔ hɔ nnɛ nso ani gye ho paa sɛ wɔbɛma Onyankopɔn nkurɔfo ne nokwaresom ho atew. Sɛ wɔhu sɛ wɔn yɔnko Kristoni bi ayɛ bɔne a emu yɛ duru a, wɔmmu wɔn ani ngu so. Wɔde akokoduru ka ho asɛm. (1 Korintofo 1:11) Wɔhwɛ sɛ wɔbɛma asafo mu mpanyimfo aso ate. Asafo mu mpanyimfo betumi aboa wɔn a wɔyare wɔ honhom mu no, na wɔbetumi nso aboa ama Yehowa nguan no ho akɔ so atew.—Yakobo 5:14, 15.

19, 20. (a) Ntɛnkyea bɛn na na abu so wɔ Yesu bere so, na nhyɛso bɛn na na ɛsɛ sɛ Yesu gyina ano? (b) Adɛn nti na Kristo akyidifo mfa wɔn ho nhyehyɛ amanyɔsɛm ne basabasayɛ mu, na mfaso bɛn na afi saa a wɔayɛ no mu aba?

¹⁹ Wohwɛ a, yebetumi aka sɛ Yesu de sii n’ani so sɛ ɔbɛpere atu ntɛnkyea ase wɔ wiase anaa? Ɛda adi sɛ na ntɛnkyea atwa ne ho ahyia. Ná ɔman foforo na edi ne manfo so. Romafo no de asraafo a na wɔyɛ den bɛhyɛɛ Yuda mã, wɔgyee wɔn tow akɛse, na wɔde wɔn ho gyigyee wɔn som mu amanne mu. Ɛnyɛ nwanwa sɛ na nnipa pii pɛ sɛ Yesu de ne ho hyehyɛ amanyɔsɛm a na ɛrekɔ so no mu. (Yohane 6:14, 15) Wei mu nso, na ɛsɛ sɛ ɔda akokoduru adi.

²⁰ Yesu kyerɛkyerɛɛ mu sɛ, n’Ahenni mfi wiase. Basabasayɛ a na ɛrekɔ so wɔ amanyɔsɛm mu wɔ Yesu bere so no, ɔnam ne nhwɛso so kyerɛkyerɛɛ n’akyidifo no sɛ ɛnsɛ sɛ wɔde wɔn ho hyehyɛ mu, na mmom wɔmfa wɔn adwene nsi Onyankopɔn Ahenni no so. (Yohane 17:16; 18:36) Bere a basabasayɛfo no bae sɛ wɔrebɛkyere no no, ɔmaa n’asuafo no asuade bi a ehia paa, na ɛma wɔhuu nea enti a ɛnsɛ sɛ wɔgyina ɔfã biara wɔ wiase no nsɛmnsɛm mu. Basabasayɛfo no bae no, ntɛm ara na Petro twee ne sekan de piraa obi. Ɛnyɛ den koraa sɛ yebenya adwene sɛ nea Petro yɛe no yɛ ne kwan so. Ade yi, Onyankopɔn Ba a ɔnyɛɛ bɔne biara na na wɔrebɛkyere no saa anadwo no. Enti sɛ obi twe sekan de bɔ ne ho ban a, sɛ́ anka ɛyɛ ne kwan so a? Nanso Yesu anhu no saa. Mmom, ɔmaa n’akyidifo nyinaa huu nea ɔpɛ sɛ wɔyɛ. Ɔka kyerɛɛ Petro sɛ: “San fa wo sekan no hyɛ nea ɛhyɛ, na wɔn a wɔtwe sekan nyinaa bewu sekan ano.” (Mateo 26:51-54) Saa bere no, na egye akokoduru ansa na Kristo akyidifo atumi atwe wɔn ho afi basabasayɛ ho, na ɛnnɛ nso saa ara na ɛte. Esiane sɛ Kristofo nnyina ɔfã biara akyi wɔ wiase nsɛmnsɛm mu nti, ɔko pii a akɔ so wɔ yɛn bere yi so, nnipakuw a wɔtɔre wɔn ase, basabasayɛ, ne nsɛmmɔnedi a akɔ so no, Onyankopɔn nkurɔfo a wɔwɔ hɔ nnɛ no nni ho fɔ kwan biara so. Akokoduru a wɔwɔ nti na wɔatumi ayɛ saa.

21, 22. (a) Mmoa bɛn na Yesu nyae ansa na ɔrehyia sɔhwɛ a emu yɛ den sen biara no? (b) Ɔkwan bɛn so na Yesu daa akokoduru adi kosii awiei?

²¹ Ansa na Yehowa Ba no reba asaase so no, na onim paa sɛ obehyia ɔsɔretia a emu yɛ den wɔ asaase so. (Yesaia 50:4-7) Wɔde owu hunahunaa no mpɛn pii, na ekowiee basabasayɛ a yɛkaa ho asɛm wɔ adesua yi mfiase no mu. Dɛn na ɛboaa Yesu ma ɔkɔɔ so nyaa akokoduru de gyinaa nsɛnnennen a ɛte saa ano? Ansa na basabasayɛfo no reba abɛkyere Yesu no, dɛn na na Yesu reyɛ? Ná ɔrebɔ Yehowa mpae denneennen. Dɛn na Yehowa nso yɛe wɔ ho? Bible ka sɛ, ‘otiee’ Yesu. (Hebrifo 5:7) Yehowa somaa ɔbɔfo fi soro ma ɔbɛhyɛɛ ne Ba kokodurufo no den.—Luka 22:42, 43.

²² Bere a ɔbɔfo no hyɛɛ Yesu den wiei no, ankyɛ koraa na ɔka kyerɛɛ n’asomafo no sɛ: “Monsɔre, momma yɛnkɔ.” (Mateo 26:46) Asɛm a Yesu kae yi kyerɛ sɛ na ɔwɔ akokoduru paa! Ná onim sɛ ɔbɛka ama basabasayɛfo no agyaa ne nnamfonom no, na na onim nso sɛ ne nnamfo no beguan agyaw no. Afei nso, na onim sɛ sɔhwɛ a emu yɛ den sen biara a ɛda n’anim no, ɔno nko ara na obegyina ano. Nanso ne nyinaa akyi, ɔde akokoduru kaa sɛ, “momma yɛnkɔ.” Bere a ɛkaa ɔno nko ara no, wɔfaa kwatikwan so dii n’asɛm buu no atɛnkyea, wɔdii ne ho fɛw, wɔyɛɛ no ayayade, na owuu owu yayaayaw. Ne nyinaa mu no, ɔkɔɔ so daa akokoduru adi.

23. Sɛ asiane bi reba, anaa nkurɔfo bɔ Yesu ntrɛnee a, na Yesu de akokoduru gyina ano. Adɛn nti na wei nkyerɛ sɛ na ogye ne ho di dodo? Kyerɛkyerɛ mu.

²³ Ná Yesu gye ne ho di dodo anaa? Daabi, efisɛ sɛ obi wɔ akokoduru a, ɛnkyerɛ sɛ ogye ne ho di dodo. Nokwasɛm ne sɛ, Yesu kyerɛkyerɛɛ n’akyidifo no sɛ wɔmma wɔn ani nna hɔ, na wɔhu sɛ asiane reba nso a, wɔmmɔ wɔn ho ban mfi ho, sɛnea ɛbɛyɛ a wɔbetumi akɔ so ayɛ Onyankopɔn apɛde. (Mateo 4:12; 10:16) Nanso saa bere yi de, na Yesu nim sɛ ɔkwan biara so, ɛnsɛ sɛ ɔtwe ne ho fi nea ɛreba ne so no ho. Ná onim nea Onyankopɔn pɛ sɛ ɔyɛ. Ná Yesu asi ne bo sɛ ɔbɛkɔ so ama n’abrabɔ adi mu, enti nea na ɛsɛ sɛ ɔyɛ ara ne sɛ ɔbɛfa sɔhwɛ no mu.

24. Adɛn nti na yebetumi anya awerɛhyem sɛ, sɛ yehyia sɔhwɛ biara a, yebetumi anya akokoduru agyina ano?

²⁴ Sɛnea Yesu akyidifo taa de akokoduru yɛ wɔn ade de di wɔn Wura no anammɔn akyi no, ɛyɛ fɛ paa! Wɔdi wɔn ho fɛw, wɔtan wɔn ani, wɔkyere wɔn, wɔde wɔn gu afiase, wɔyɛ wɔn ayayade, na wɔkum wɔn mpo, nanso ne nyinaa mu wɔgyina wɔn nan so, wɔnhinhim. Ɛba no sɛn na nnipa a bɔne wɔ wɔn ho tumi nya akokoduru a ɛte sei? Emfi wɔn ankasa. Sɛnea Yesu nyaa mmoa fii Onyankopɔn hɔ no, saa ara na n’akyidifo nso nya mmoa. (Filipifo 4:13) Enti, ɛnsɛ sɛ wusuro nea ɛbɛba biara. Si wo bo sɛ wobɛkɔ so ama w’abrabɔ adi mu, na Yehowa nso bɛma wo akokoduru a wuhia. Ma yɛn Kannifo Yesu nhwɛso no ne asɛm a ɔkae yi nkɔ so nhyɛ wo den. Ɔkaa sɛ: “Munnya akokoduru! Madi wiase so nkonim.”—Yohane 16:33.