‘Nguanhwɛfo A Me Koma Pɛ’

1, 2. (a) Sɛ wɔammɔ nguankuw bi ho ban a, dɛn na ebetumi ato wɔn? (b) Wɔ mmere a na wɔrekyerɛw Bible no mu no, nnwuma bɛn na na oguanhwɛfo yɛ?

BERE a Hiroyasu a ofi Japan yɛ abarimaa kumaa no, ne maame tɔɔ odwennini ne oguammere. Ná Hiroyasu na ɔhwɛ nguan no so, na na oguammere no wo nguammaa abien afe biara, enti nguan no fii ase dɔɔso. Bere a odii mfe 12 no, na nguan no dodow adu 12 anaa 13. Ɔka sɛ: “Da koro anɔpa bi a na meda so da mpa mu no, metee sɛ nguan no resu. Mansɔre ankɔhwɛ wɔn ntɛm ara. Awiei koraa no, bere a mekɔhwɛɛ wɔn no, mihuu asakraman pii sɛ wɔreguan fi me nguammaa no ho a na wɔatutu wɔn nsono agu. Mehwehwɛɛ nguan no maame no denneennen. Mihuu no no, na ɔda mogya mu, na na ɔda so rehome. Odwennini no nkutoo na wanwu. Me werɛ how yiye. Ná anka ɛsɛ sɛ mekɔhwɛ nguan no bere a midii kan tee sɛ wɔresu no. Wɔantumi ne asakraman no anko.”

² Wɔ mmere a na wɔrekyerɛw Bible no mu no, ɛkame ayɛ sɛ na obiara nim adwuma a oguanhwɛfo yɛ. Ná oguanhwɛfo adwuma ne sɛ obedi nguankuw no anim akɔ adidibea na wahwɛ ma mmoa no adidi yiye. Ná ɔsan nso bɔ wɔn ho ban fi mmoa a wɔkyere wɔn we ho, na na ɔhwehwɛ wɔn a wɔyera no. (1 Sam. 17:34-36) Ná oguanhwɛfo no hwɛ ma ne nguan no da a ɔmma biribiara nnyigye wɔn, na sɛ nguan no rewo nso a, na ɔboa wɔn, na na ɔsan nso hwɛ nguammaa no. Bible akyerɛwfo pii a Yeremia ka ho de oguanhwɛfo gyinaa hɔ sɛ onipa a wɔde nkurɔfo hyɛ ne nsa sɛ ɔnhwɛ wɔn so, sɛ́ ebia ɔyɛ wɔn sodifo anaa wɔn hwɛfo wɔ Onyankopɔn som mu no.

 3. Bere a Yeremia de nsɛmfua “oguanhwɛfo” ne ‘nguanhwɛ’ dii dwuma no, na dɛn na ɔreka ho asɛm?

³ Ebia bere a Kristofo asafo no mufo binom bebu mpanyimfo no sɛ wɔyɛ ahwɛfo nkutoo ne bere a saa mmarima yi kɔsra wɔn nuanom kɔboa wɔn na wɔhyɛ wɔn nkuran no. Nanso, sɛ yɛhwɛ sɛnea Yeremia de nsɛmfua “oguanhwɛfo” ne ‘nguanhwɛ’ dii dwuma no a, yetumi hu sɛ ɔde kyerɛɛ abusuabɔ biara a Yudafo a wɔyɛ ahwɛfo no ne ɔmanfo no nyae. Mpɛn pii na Onyankopɔn kasa tiaa Yudafo mpanyimfo, adiyifo, ne asɔfo no sɛ wɔyɛ nguanhwɛfo bɔne, efisɛ na wonnwen ahiafo no yiyedi ho. (Yer. 2:8) Wɔhwehwɛɛ wɔn ankasa yiyedi, na wɔyɛɛ wɔn “nguan” no basabasa, wɔdaadaa wɔn, na wobuu wɔn ani guu wɔn so. Wɔmaa Onyankopɔn nkurɔfo no som bɛyɛɛ basaa. Yehowa kae sɛ saa atoro nguanhwɛfo no “nnue,” na ɔhyɛɛ ne nkurɔfo no bɔ sɛ ɔbɛma wɔn ahwɛfo a wɔbɛhwɛ nguankuw no so yiye na wɔabɔ wɔn ho ban ankasa.—Monkenkan Yeremia 3:15; 23:1-4.

 4. Henanom na wɔrehwɛ Onyankopɔn nguankuw no nnɛ, na su bɛn na ɛsɛ sɛ wɔda no adi?

⁴ Onyankopɔn bɔhyɛ no nyaa mmamu kɛse wɔ Yehowa nguan no Sohwɛfo Panyin, Yesu, a ɔbɛyɛɛ Kristofo asafo no Ti no so. Yesu frɛɛ ne ho “oguanhwɛfo pa no,” nea onyaa ayamhyehye ankasa maa wɔn a na odi wɔn anim no. (Yoh. 10:11-15) Ɛnnɛ, Yehowa de nguanhwɛfo a wɔhyɛ Yesu ase, anuanom mmarima a wɔasra wɔn a wɔka akoa nokwafo ne ɔbadwemma kuw no ho ne mpanyimfo a wɔyɛ nsi a wɔyɛ “nnipakuw kɛse” no mufo, na ɛredi dwuma de ahwɛ ne nguankuw a wɔwɔ asase so no so. (Adi. 7:9) Saa nguanhwɛfo yi bɔ mmɔden sɛ wɔbɛda ahofama a Yesu wɔ no bi adi. Wɔpɛ sɛ wɔma asafo no mufo aduan na wɔhwɛ wɔn yiye de suasua Kristo. Obiara a obebu n’ani agu ne nuanom so anaa obedi wɔn so bakoma anaa obedi wɔn so atirimɔden so anaasɛ ahantan so no nnue! (Mat. 20:25-27; 1 Pet. 5:2, 3) Dɛn na Yehowa hwehwɛ fi Kristofo a wɔyɛ ahwɛfo hɔ nnɛ? Dɛn na yebetumi asua afi nhoma ahorow a Yeremia kyerɛwee no mu nsɛm a ɛfa su ne adwene a ɛfata a ɛsɛ sɛ asafo mu mpanyimfo nya bere a wɔredi wɔn asɛyɛde ahorow ho dwuma no mu? Momma yɛnhwehwɛ nnwuma ahorow a wɔyɛ sɛ́ nkurɔfo a wɔboa afoforo na wɔbɔ wɔn ho ban, sɛ́ nkurɔfo a wɔkyerɛkyerɛ asafo no mufo ne wɔn a wonni asafo no mu, ne wɔn a wobu atɛn wɔ asafo no mu nhwɛ.

5-7. (a) Ɔkwan bɛn na Yehowa pɛ sɛ wɔfa so hwɛ ne nguan, na dɛn ntia? (b) Ɔkwan bɛn na asafo mu mpanyimfo betumi afa so ada ɔdɔ kann adi akyerɛ wɔn nuanom, a wɔn a wɔayera no nso ka ho?

⁵ Ɔsomafo Petro frɛɛ Yehowa sɛ ‘yɛn kra hwɛfo ne yɛn wɛmfo.’ (1 Pet. 2:25) Su bɛn na Onyankopɔn da no adi wɔ ne “nguan” ho? Sɛ yesusuw nea ɛkɔɔ so wɔ Yeremia bere so no ho a, yebenya mmuae. Bere a Yehowa kasa tiaa nguanhwɛfo bɔne a wɔbɔɔ nguankuw no hwetee na wobuu wɔn ani guu wɔn so no wiei no, ɔkae sɛ ‘ɔbɛboaboa’ ne nguan ano, na wasan de wɔn aba wɔn adidibea. Ɔhyɛɛ bɔ sɛ ɔbɛpaw nguanhwɛfo pa a ‘wɔbɛhwɛ wɔn so yiye’ ama wɔn, na wɔahwɛ abɔ ne nkurɔfo ho ban afi wɔn atamfo a wɔte sɛ nkekaboa no ho. (Yer. 23:3, 4) Nokwarem no, ná Yehowa nguan no som bo ma no. Saa ara na ne nguan a wɔwɔ hɔ nnɛ nso som bo ma no. Ɔde biribi a ɛsom bo paa bɔɔ afɔre sɛnea ɛbɛyɛ a ebesi ne nguan no yiye daa.—1 Pet. 1:18, 19.

⁶ Kristofo a wɔyɛ ahwɛfo te sɛ wɔn a wɔhwɛ nguan ankasa so, na ɛnsɛ sɛ wobu wɔn ani gu asafo no a wɔhwɛ so no so. Sɛ woyɛ asafo mu panyin a, so worebɔ mmɔden sɛ wobɛma w’ani ada hɔ na ama woahu biribi a ɛkyerɛ sɛ wo nuanom rehu amane, na wowɔ ɔpɛ sɛ wobɛboa wɔn ntɛm so? Ɔhene Solomon nyansafo no kyerɛwee sɛ: “Ohu na hu wo nguan yiye. Fa wo koma si wo nguankuw so.” (Mmeb. 27:23) Saa kyerɛwsɛm yi twe adwene si adwumaden a wɔn a wɔhwɛ nguan ankasa so yɛ so; nanso yebetumi aka nso sɛ ɛfa adwumaden a ahwɛfo a wɔwɔ asafo no mu yɛ de hwɛ asafo no mufo so no ho. Sɛ woyɛ asafo mu panyin a, so worebɔ mmɔden paa sɛ worenhyɛ afoforo so? Ka a Petro kaa “wɔn a wodi Onyankopɔn agyapade so bakoma” ho asɛm no kyerɛ sɛ asafo mu panyin bi betumi ayɛ saa. Wobɛyɛ dɛn atumi aboa ama asɛm a wɔaka wɔ Yeremia 33:12 no abam? (Monkenkan.) Ebia awofo a wonni ahokafo, akunafo, mmusua a mmanoma wom, nkwakoraa ne mmerewa, ne mmerante ne mmabaa wɔ ahiade soronko bi a ehia sɛ wɔboa wɔn ma wodi ho dwuma.

⁷ Sɛnea oguanhwɛfo tumi hwehwɛ ne nguan no, saa ara na ɛtɔ mmere bi a ɛsɛ sɛ ɔhwɛfo a ɔwɔ asafo no mu hwehwɛ asafo no mufo bi a biribi nti wɔayera afi nguankuw no mu no na ɔboa wɔn. Ɛho behia sɛ onya ahofama ne ahobrɛase na ama watumi ayɛ saa adwuma yi. Ogye bere de ntoboase di wɔn a wɔhyɛ n’ase no ahiade ho dwuma ma wɔn. Ɛyɛ papa sɛ asafo mu mpanyimfo fi wɔn komam bisa wɔn ho sɛ: ‘Mpɛn ahe na mebɔ mmɔden sɛ mɛhyɛ afoforo nkuran na mahyɛ wɔn den sen sɛ mɛkasa atia wɔn? So mepɛ paa sɛ meyɛ m’adwuma yiye?’ Ɛtɔ mmere bi a ebia ɛho behia sɛ wobɔ mmɔden boa obi mpɛn pii ansa na onii no ahu adwene a Onyankopɔn wɔ wɔ nneɛma ho. Sɛ onua anaa onuawa bi mpɛ sɛ ogye afotu a efi Kyerɛwnsɛm mu (a ɛnyɛ ɔpanyin no ankasa adwene) tom a, ɛsɛ sɛ ɔpanyin no kae Yehowa a ɔyɛ Oguanhwɛfo ne Ɔhwɛfo Pumpuni no. Yehowa de ntoboase ne ne nkurɔfo a na wɔn aso yɛ den no “kasae,” na ɔbɔɔ mmɔden sɛ ɔbɛboa wɔn. (Yer. 25:3-6) Onyankopɔn nkurɔfo a wɔwɔ hɔ nnɛ mu dodow no ara nyɛ nneɛma bɔne, nanso sɛ ɛho behia sɛ asafo mu panyin bi tu obi fo a, ɛsɛ sɛ ɔde afotu no ma sɛnea Yehowa yɛe no.

 8. Dɛn na ahwɛfo a wɔwɔ asafo no mu betumi ayɛ de asuasua Yeremia?

⁸ Bere a na anidaso da so wɔ hɔ sɛ Yeremia mfɛfo Yudafo betumi asan aba Yehowa nkyɛn no, ɔbɔɔ mpae maa wɔn. Ɔka kyerɛɛ Onyankopɔn sɛ: “Kae sɛnea migyinaa w’anim kaa wɔn ho asɛmpa sɛ dan w’abufuw fi wɔn so no.” (Yer. 18:20) Wubetumi ahu afi saa asɛm yi mu sɛ na Yeremia rehwehwɛ adepa a ɛwɔ ne nuanom ho, na na onni wɔn ho adwemmɔne. Ɛnnɛ, ɛsɛ sɛ Kristofo a wɔyɛ ahwɛfo suasua Yeremia na wɔda ne su no bi adi kosi sɛ onipa no bɛma ada adi pefee sɛ wasen ne kɔn sɛ ɔbɛyɛ bɔne. Nea ɛyɛ papa ne sɛ yɛbɛkamfo afoforo wɔ nneɛma pa a wɔreyɛ ho, na yɛne wɔn abom abɔ mpae na yɛabɔ bi ama wɔn.—Mat. 25:21.

9, 10. Dɛn nti na oguanhwɛfo pa (asafo mu panyin) a wobɛyɛ no hwehwɛ sɛ woyɛ ɔkyerɛkyerɛfo?

⁹ Sɛnea wɔaka ho asɛm wɔ Yeremia 3:15 no, ɛsɛ sɛ Kristofo a wɔyɛ ahwɛfo ‘de nimdeɛ ne nhumu yɛn afoforo,’ a nea ɛkyerɛ ne sɛ, wɔbɛkyerɛkyerɛ wɔn. (1 Tim. 3:2; 5:17) Yehowa hyɛɛ ne nkurɔfo bɔ sɛ wɔn a wɔyɛ ahwɛfo pa no bɛyɛ saa. Na ɔhyɛɛ Yudafo no nkuran sɛ wonnye nteɛso a ne diyifo Yeremia de rema wɔn no ntom. (Monkenkan Yeremia 6:8.) Ehia sɛ nguan didi yiye na ama wɔanya ahoɔden. Saa ara na sɛ Onyankopɔn nkurɔfo bɛkɔ so anya ahoɔden wɔ ne som mu a, ehia sɛ wɔde Kyerɛwnsɛm no kyerɛkyerɛ wɔn na wɔma wɔn akwankyerɛ.

¹⁰ Nkyerɛkyerɛ adwuma a asafo mu mpanyimfo yɛ no wɔ afã abien—wɔboa wɔn a wɔwɔ asafo no mu dedaw ne wɔn a wonnya mmɛyɛɛ nokware Kristofo no. Ɛdefa wɔn a wonnya mmɛyɛɛ nokware Kristofo a asafo mu mpanyimfo no bɛkyerɛkyerɛ wɔn ho no, ɛsɛ sɛ wɔkae sɛ: Nneɛma atitiriw nti a Kristofo asafo no wɔ hɔ mu biako ne sɛ wɔbɛka Onyankopɔn Ahenni no ho asɛmpa. Ɛno nti, ɛsɛ sɛ asafo mu mpanyimfo yɛ asɛmpakafo a wɔyɛ nsi. (Yer. 1:7-10) Ne saa nti, wodi asɛyɛde a wɔn ankasa wɔ wɔ Onyankopɔn anim ho dwuma, na wɔsan yɛ nhwɛso pa ma wɔn nuanom. Sɛ woyɛ asafo mu panyin a, so wunhu sɛ anuanom mmarima ne mmea ahorow a wo ne wɔn yɛ asɛnka adwuma no daa no ma wunya hokwan boa wɔn ma wɔn nkyerɛkyerɛ tu mpɔn na ɛma wo nso wo de tu mpɔn? Na sɛ wode nsi di asɛmpaka adwuma no anim a, na wode nkuranhyɛ a ɛho hia a ebetumi aboa asafo mũ no nyinaa ma wɔanya nkɔso rema.

11, 12. Dɛn na ɛsɛ sɛ asafo mu panyin a ɔpɛ sɛ ɔyɛ oguanhwɛfo pa no yɛ?

¹¹ Ɛsɛ sɛ asafo mu mpanyimfo de nsɛm a wɔka kyerɛ asafo no gyina Bible so; sɛ wɔyɛ saa a, ɛbɛma nsɛm a wɔka no ayɛ honhom fam aduan a ahoɔden wom. Ɛnde, wubetumi ahu sɛ, ɛsɛ sɛ ahwɛfo a wɔwɔ asafo no mu no yɛ nkurɔfo a wɔde nsi sua Onyankopɔn Asɛm no na ama wɔayɛ akyerɛkyerɛfo a wotu mpɔn. Hwɛ sɛnea eyi yɛ soronko wɔ nea Yeremia kae de kyerɛɛ nea enti a na wɔn a wodi ne nkurɔfo anim no nkyerɛkyerɛ ntu mpɔn no ho. Ɔkae sɛ: “Nguanhwɛfo adan agyimfo, na wɔnhwehwɛɛ Yehowa mpo. Ɛno nti na wɔanni nyansasɛm no, na wɔn mmoa a wɔkɔ adidi nyinaa ahwete.” (Yer. 10:21) Wɔn a na anka ɛsɛ sɛ wɔyɛ akyerɛkyerɛfo no amfa Kyerɛwnsɛm mu nnyinasosɛm anyɛ adwuma, na na wɔnhwehwɛ Onyankopɔn. Enti, wɔantumi anyɛ wɔn ade nyansam ankasa. Yeremia kaa atemmusɛm bi a emu yɛ den paa tiaa wɔn a na wɔkyerɛ sɛ wɔyɛ adiyifo no.—Monkenkan Yeremia 14:14, 15.

¹² Kristofo a wɔyɛ ahwɛfo sua ade, na wosuasua nea Yesu yɛe no, wɔnte sɛ saa nguanhwɛfo atorofo no. Enti, wobetumi asom sɛ nguankuw no so ahwɛfo a wonim nyansa. Esiane sɛ nneɛma ahorow pii gye asafo mu mpanyimfo bere nti, ebetumi ayɛ den ama wɔn sɛ wɔbɛyɛ nhyehyɛe asua ade daa. Nanso, sɛ wosom sɛ asafo mu panyin a, so wugye di paa sɛ, sɛ wugyina Onyankopɔn Asɛm no ne akwankyerɛ a akoa nokwafo ne ɔbadwemma kuw no de ma so kyerɛkyerɛ nkutoo a, ɛnna nimdeɛ ne nhumu bɛda adi wɔ wo nkyerɛkyerɛ mu ma ayɛ nokware na atumi ayɛ nea mfaso wɔ so? Sɛ wuhu sɛ wunni nhyehyɛe papa biara a w’ankasa wode sua ade sɛnea bere bi na woyɛ no a, dɛn na wobɛyɛ na amma woanyɛ sɛ nguanhwɛfo atorofo a na wɔwɔ Yeremia bere so no?

13. Dɛn na ɛboaa Yeremia ma ɔyɛɛ ɔkyerɛkyerɛfo pa, na dɛn na Kristofo a wɔyɛ ahwɛfo nnɛ betumi asua afi ne hɔ?

¹³ Ade a ɛmaa Yeremia yɛɛ ɔkyerɛkyerɛfo a otu mpɔn paa ne sɛnea na ɔde mfatoho ahorow di dwuma no. Ɛda adi sɛ, Yehowa na ɔmaa no akwankyerɛ. Sɛ na yɛwɔ hɔ na yehui sɛ Yeremia de ɔnwemfo ahina no bɔɔ fam kae sɛ saa ara na wobebubu Yerusalem ne emufo a, hwɛ sɛnea anka yɛn werɛ remfi da! (Yer. 19:1, 10, 11) Ade foforo a Yeremia yɛe ne kɔndua a ɔyɛ de too ne kɔn ho de kyerɛɛ sɛnea ɛsɛ sɛ ne nkurɔfo no brɛ wɔn ho ase hyɛ Babilon kɔndua a emu yɛ den no ase no. (Yer., ti 27-28) Ɛwom, Onyankopɔn nka nkyerɛɛ mpanyimfo a wɔwɔ w’asafo mu sɛ wɔnyɛ ɔyɛkyerɛ bi a ɛte saa mfa nkyerɛkyerɛ nsɛm mu. Nanso, sɛ wɔde mfatoho ne osuahu ahorow a ɛfata hyehyɛ wɔn nkyerɛkyerɛ mu a, so w’ani nnye ho? Mfatoho ahorow a wɔasusuw ho yiye na ɛfata ne nhwɛso ahorow a etu mpɔn betumi akanyan yɛn koma.

14. (a) Dɛn na ɛmaa Yeremia kaa ‘balsam a ɛwɔ Gilead’ no ho asɛm? (b) Dɛn na Kristofo asafo no mu mpanyimfo betumi ayɛ de aboa wɔn nuanom ma wɔanya honhom fam ahoɔden?

¹⁴ Hwɛ sɛnea ɛsɛ sɛ yɛma yɛn ani sɔ nkyerɛkyerɛ a Kristofo a wɔyɛ ahwɛfo de ma yɛn no! Wɔ Yeremia bere so no, ohui sɛ na ne nkurɔfo no hia honhom fam ayaresa. Obisae sɛ: “Balsam ngo nni Gilead anaa? Na ɔyaresafo biara nni hɔ anaa?” (Yer. 8:22) Ná balsam ankasa wɔ Gilead, Israel fã a na ɛwɔ Yordan apuei fam no. Ná wɔtaa de ngo a ɛyɛ huam a wonya fi afifide mu yi yɛ nnuru a wɔde to nkurɔfo akuru so ma edwo wɔn na ekum akuru no. Nanso, na honhom fam ayaresa biara nni hɔ. Dɛn ntia? Yeremia kae sɛ: “Adiyifo no hyɛ nkɔntoro; asɔfo no nso, wɔde wɔn ahoɔden di nkurɔfo so. Me man nso pɛ no saa.” (Yer. 5:31) Na ɛnnɛ nso ɛ? So wunnye ntom sɛ “balsam” ankasa “wɔ Gilead,” a nea ɛkyerɛ ne sɛ, honhom fam ayaresa wɔ w’asafo mu? Yebetumi de awerɛkyekye a Kristofo a wɔyɛ ahwɛfo nam ɔdɔ so de ma wɔn nuanom denam wɔn adwene a wɔtwe si Kyerɛwnsɛm mu nnyinasosɛm so, hyɛ wɔn den, bɔ mpae ma wɔn, na wɔne wɔn bom bɔ mpae no atoto sɛnea balsam ma nkurɔfo ho dwo wɔn fɔmm no ho.—Yak. 5:14, 15.

15, 16. Dɛn nti na ɛho hia sɛ wɔhwɛ nguankuw ankasa ne honhom fam de nyinaa so?

¹⁵ Wo de, susuw anigye a oguanhwɛfo ankasa a ɔde nnɔnhwerew pii yɛ adwumaden nya bere a ne nguan no wo nguammaa a wɔte apɔw no ho hwɛ! Nanso, onim sɛ sɛ saa nguammaa no bɛyɛ yiye a, gye sɛ ɔhwɛ wɔn. Ɛsɛ sɛ oguanhwɛfo no hwɛ sɛ ɔbɛma nguammaa no anya aduan pa adi. Nguammaa bi wɔ hɔ a wɔbɛwo wɔn no na wɔn dua yɛ atenten a etumi twiw fam tetew nguanbin ne dɔte. Esiane sɛ Oguanhwɛfo no pɛ sɛ ne mmoa no ho kɔ so tew na wonya apɔwmuden nti, ebia obetwitwa wɔn dua so, na ɔbɛyɛ saa ahokokwaw so a ɛremma mmoa no nte yaw pii. Honhom fam nguanhwɛfo nso hwɛ wɔn nguan a wɔne asafo no mufo no wɔ ɔdɔ mu. (Yoh. 21:16, 17) Sɛ asafo mu mpanyimfo no nso hu sɛ wɔn a wɔkyerɛ asɛm no ho anigye no atu anammɔn sɛ wɔbɛyɛ nokware Kristofo a, wodi ahurusi. Kristofo a wɔyɛ ahwɛfo pɛ sɛ nguammaa ne wɔn a wɔanyinyin no nyinaa yɛ wɔn a wɔte apɔw na wodidi yiye, enti wonnyi wɔn ani mmfi wɔn so, na sɛ ɛho hia sɛ wɔkɔboa wɔn a, wɔyɛ saa. Wɔn adwuma no bi ne sɛ wɔbɛkae wɔn nuanom “nea Yehowa aka,” a ɛno ne nea Kyerɛwnsɛm no kyerɛkyerɛ.—Yer. 2:2, 5; 7:5-7; 10:2; Tito 1:9.

¹⁶ Ná Yeremia hia akokoduru a ɔde bɛka Onyankopɔn asɛm no. Saa ara na ehia sɛ asafo mu ahwɛfo nya akokoduru, titiriw, wɔ tebea ahorow bi a ɛsɛ sɛ wɔka ho asɛm de bɔ wɔn nuanom ho ban no mu. Sɛ nhwɛso no, ebetumi aba sɛ honhom fam oguanhwɛfo bi behu sɛ ɛsɛ sɛ ɔyɛ biribi de bɔ ‘oguammaa a wɔawo no foforo’ anaa “oguan” a wanyin mpo ho ban sɛnea ɛbɛyɛ a Satan wiase no mu dɔte renyɛ no ho fĩ. Ebia na nea ɔwɔ asiane mu no nyɛɛ n’adwene sɛ ohia afotu mpo. Nanso, so ɔhwɛfo a n’ani da hɔ betumi agyina hɔ ahwɛ ma ne nguankuw no mu bi akɔtɔ asiane mu a ɔrenyɛ biribiara mfa mmɔ no ho ban? Ɔrenyɛ saa da! Saa ara nso na ɔremfa tebea a ɛte saa no sɛ ɛnyɛ hwee, na ɔremfa no sɛ biribiara rekɔ so yiye bere a ɛda adi pefee sɛ nneɛma nkɔ yiye, na nea ɛrekɔ so no betumi ama ne yɔnko a ɔne no resom no ne Yehowa ntam asɛe.—Yer. 8:11.

17. Bere bɛn na ɔhwɛfo bi betumi ama n’ani akũ oguan bi ho, na ɔbɛyɛ dɛn atumi ayɛ saa?

¹⁷ Sɛ biribi twetwe oguan bi a n’ani nna hɔ ma ofi nguankuw no mu a, oguanhwɛfo a n’ani da hɔ bɛyɛ ntɛm aka no ma wasan akɔ baabi a ahobammɔ wɔ. (Monkenkan Yeremia 50:6, 7.) Saa ara na bere bi wɔ hɔ a ɛho behia sɛ ɔhwɛfo bi fi ɔdɔ mu ne wɔn a wɔrekɔ tebea ahorow a ɛyɛ asiane mu no susuw nsɛm ho anibere so. Sɛ nhwɛso no, ebia obehu sɛ ɔbarima ne ɔbea bi a wɔayɛ nhyehyɛe sɛ wɔbɛware taa de bere pii kɔhyɛ mmeae bi a obiara nka wɔn ho a sɛ anhwɛ a wɔrentumi nni wɔn nkate so. Asafo mu panyin a ɔwɔ tema ne ntease betumi aboa nnipa baanu no ma wɔatwe wɔn ho afi tebea ahorow a ebetumi ama wɔayɛ bɔne no mu. Bere a asafo mu panyin no hwɛ yiye sɛ ɔrenkasa ntia wɔn no, obetumi atwe wɔn adwene asi tebea ahorow bi a ebetumi ama wɔayɛ nneɛma bi a Yehowa kyi so. Sɛnea Yeremia yɛe no, asafo mu mpanyimfo anokwafo kasa tia nneɛma a Onyankopɔn kasa tia. Wɔyɛ saa de suasua Yehowa a ɔwɔ tema ma enti ɔnam ne diyifo no so srɛɛ ne nkurɔfo no sɛ, “Mesrɛ mo, monnyɛ atantanne a mikyi yi” no. (Yer. 5:7; 25:4, 5; 35:15; 44:4) So w’ani sɔ sɛnea ahwɛfo a wɔwɔ ɔdɔ no dwen nguankuw no ho paa no?

18. Sɛ honhom fam ahwɛfo tu nguan no fo a, nneɛma pa bɛn na efi mu ba?

¹⁸ Nokwarem no, ɛnyɛ wɔn a Yeremia tuu wɔn fo no nyinaa na wotiee no. Nanso, ebinom tiee no. Sɛ nhwɛso no, bere a Baruk a na ɔyɛ Yeremia yɔnko dwumayɛni ne ne kyerɛwfo no hia afotu a emu yɛ den no, Yeremia fi ne pɛ mu de maa no. (Yer. 45:5) Dɛn na efii mu bae? Baruk nyaa Onyankopɔn anim dom, na onyaa ne ti didii mu wɔ Yerusalem sɛe no mu. Saa ara na ɛnnɛ nneɛma pa a efi afotu a asafo mu mpanyimfo de ma wɔn mfɛfo asomfo mu ba no betumi ahyɛ wɔn nkuran ma ‘wɔn ani aku afotu ne ɔkyerɛkyerɛ’ a egye nkwa no ho.—1 Tim. 4:13, 16.

19, 20. Asɛyɛde bɛn na asafo mu mpanyimfo wɔ wɔ sɛnea wɔne nnebɔneyɛfo di mu?

¹⁹ Adwuma foforo a ahwɛfo a wɔwɔ hɔ nnɛ yɛ ne sɛ wobu atɛn wɔ asafo no mu. Ɛwom wom a, ɛho behia sɛ asafo mu mpanyimfo di wɔn a wɔhyɛ da yɛ bɔne no asɛm, na wɔyɛ saa de boa wɔn sɛnea wobenya adwensakra. Yehowa fi ayamye mu ka kyerɛɛ nnebɔneyɛfo pefee sɛ wɔntwe wɔn ho mfi wɔn akwammɔne so. (Yer. 4:14) Nanso, sɛ asafo no muni bi annyae bɔne a ɔreyɛ no a, ɛsɛ sɛ ahwɛfo no yɛ ho biribi de bɔ nguankuw no ho ban fi nneyɛe bi a ebetumi asɛe wɔn abrabɔ no ho. Sɛnea Kyerɛwnsɛm no de akwankyerɛ ma no, ebia ɛho behia sɛ wotu ɔdebɔneyɛfo no fi asafo no mu. Yehowa hwɛ kwan sɛ asafo mu mpanyimfo no de Onyankopɔn atɛntrenee bɛyɛ adwuma wɔ nsɛm a ɛte saa mu. Ɔhene Yosia a na ɔyɛ ɔhene pa no yɛɛ nhwɛso pa wɔ eyi mu. “Odii mmɔborɔni ne ohiani asɛm maa no.” Ná ɔresuasua sɛnea Onyankopɔn dɔ atɛntrenee no. Enti, Yehowa tumi bisaa nea Yosia yɛe no ho asɛm sɛ: “Ɛnyɛ nim a onim me nti na ɔyɛɛ saa?” Esiane sɛ Yosia buu atɛntrenee na ɔyɛɛ adetrenee nti, “esii no yiye.” Sɛ mpanyimfo a wɔwɔ w’asafo mu bɔ mmɔden sɛ wobesuasua nea Yosia yɛe no a, so ɛmma wonte nka sɛ wowɔ ahobammɔ kɛse?—Yer. 22:11, 15, 16.

²⁰ Nya ahotoso sɛ Yehowa teɛ nnebɔneyɛfo so “sɛnea ɛfata.” (Yer. 46:28) Enti asafo mu mpanyimfo no betumi agyina sɛnea nsɛm tebea bi te ne suban a wɔn mfɛfo asomfo da no adi so de afotu anaa nkaanim ama wɔn. Na ebia ɛho behia mpo sɛ wotu ɔdebɔneyɛfo a onnu ne ho fi asafo no mu. Sɛ ɛba saa a, esiane sɛ onipa a wɔatu no no da so nam ne kwammɔne no so nti, mpanyimfo no remmɔ mpae wɔ baguam mma no; mfaso biara nni so sɛ wɔbɛyɛ saa.a (Yer. 7:9, 16) Nanso, wobesuasua Onyankopɔn na wɔakyerɛ nea wɔatu no no ɔkwan a obetumi afa so asan anya Onyankopɔn anim dom. (Monkenkan Yeremia 33:6-8.) Ɛwom sɛ tu a wotu obi no betumi ayɛ yaw de, nanso yebetumi anya awerɛhyem sɛ Onyankopɔn gyinapɛn teɛ na eye ma nnipa nyinaa.—Kwa. 1:18.

21. Asetena bɛn na ɛsɛ sɛ Onyankopɔn nguankuw no nya, na wobɛyɛ dɛn atumi aboa ma wɔanya asetena a ɛte saa?

²¹ Sɛ asafo mu ahwɛfo no hu Onyankopɔn gyinapɛn na wɔde di dwuma a, nguankuw no bedidi yiye, anya apɔwmuden, na wɔanya ahobammɔ a edi mũ. (Dw. 23:1-6) Asɛm a Yeremia ka kyerɛ yɛn no fa suban ne adwene a ɛfata ne nea ɛmfata nyinaa ho. Kristofo a wɔyɛ ahwɛfo no betumi anya saa nsɛm no so mfaso bere a wɔredi asɛyɛde a emu yɛ duru a ɛne Onyankopɔn nguan a wɔbɛhwɛ wɔn no ho dwuma no. Enti, yɛn mu biara betumi abisa ne ho sɛ, ‘So mɛkɔ so aboa ahwɛfo a “wɔde nimdeɛ ne nhumu” hwɛ nguankuw no de akyerɛ sɛ m’ani sɔ nhyehyɛe a Yehowa ayɛ de kyerɛkyerɛ ne nkurɔfo, de kyerɛ wɔn kwan, na ɔde bɔ wɔn ho ban no?’—Yer. 3:15; 23:4.