Nnwom

Nnwom Nhoma No​—Aduru A Ɛsa Koma No Yare

NNWOM nhoma no yɛ tete Hebri man no nnwom a wɔakyerɛw. Wɔde sankudwom kaa nsɛm no ho na wɔde dii dwuma wɔ Yehowa som mu wɔ Yerusalem asɔrefi hɔ, ne afei nso na ɛyɛ nnwom a wɔto wɔ afie horow mu ne afei nso nea Israelfo nkorɛnkorɛ nso to wɔ wɔn komam. Wɔanhyehyɛ nsɛm no wɔ ɔkwan a wɔfa so yɛ nnwom nnɛ a wɔma nsɛm a etwa to no ne wɔn ho wɔn ho hyia no so. Na mmom wɔma adwene a ɛwɔ nsɛm no mu no hyia, na ɛtɔ bere bi nso a wɔma ɛne ne ho bɔ abira. Eyi ma ɔkenkanfo no adwene ne ne koma di nea ɔrekenkan no akyi ma ɛkɔ yɔɔ na ɔte ase yiye ma ɛkanyan no nso. Nsɛm a Wotim ka ne nokware ahorow a wosi so dua no ma emu da hɔ pefee ma ntease. Kakraa bi a efi mpem bebree a yɛde yɛ mfatoho yi mu no bɛkyerɛkyerɛ mu yiye:

“Awurade [Yehowa] mmara yɛ pɛ, edwudwo ɔkra.

Awurade [Yehowa] adanse atim, ɛma ayemfo hu nyansa.”​—Dw. 19:7.

“Ɔbɔnefo fɛm, na ontua,

Na ɔtreneeni hu mmɔbɔ, na ɔma.”​—Dw. 37:21.

“Menam ahohia mu a, woma me nkwa,

Woteɛ wo nsa m’atamfo abufuw so,

Na wo nifa gye me.”​—Dw. 138:7.

Nnwom no yɛ nea ɛka koma no. Nkɛntɛnso a emu dɔ a enya no fi nokware a ɛyɛ sɛ Onyankopɔn nam Nnwom no mu yi sɛnea obi koma te no adi pefee, ɛka onii ko no nkate ne sɔhwɛ ahorow. Ɔdɔ, anigye ahurusi, ayeyi, awerɛhow, abasamtu, adwensakra, anidaso​—ɔkenkanfo no betumi afa Nnwom no so ahu eyinom nyinaa. Awerɛhow a ɛba esiane ɔyare, nitan a afoforo yi no adi, abasamtu a ɛba bere a obi adamfo a ogye no di no pa wɔ n’akyi, abawpa nka a wɔte ne suro a wosuro Onyankopɔn bere a obi a ayɛ bɔne, sɛnea ne koma di ahurusi bere onii no anya bɔne fafiri ho nimdeɛ​—eyinom nyinaa ne nkate ahorow ɔpepem bebree a asetra mu nneɛma a yehyia de ba no nyɛ nea ɔkenkanfo no kenkan nko, na mmom nea ɔte nka so.

Esiane saa atirimpɔw ahorow yi nti, Nnwom no yɛ Onyankopɔn Asɛm no fã a wontumi nyi mfi mu, a etumi ma Onyankopɔn nipa no ‘yɛ pɛ a wɔasiesie no koraa ama nnwuma pa nyinaa.’ (2 Tim. 3:16, 17) Nhoma no di ɔdesani su ne ne ban ho dwuma, na ɛde awerɛkyekye a ɛfa adesamma haw horow biara ho brɛ ɔkenkanfo no, na ɛma Nnwom no yɛ nea ɛwɔ hɔ bere nyinaa, nea wotumi de di nnɛ bere mu ɔhaw ahorow ho dwuma sɛnea na ɛte mfirihyia mpem bebree a atwam no.

ONYANKOPƆN ANUONYAM NE NE KƐSEYƐ

Nnwom no de ahoɔden da Onyankopɔn su horow no adi​—n’anuonyam ne ne pɛyɛ. Sɛnea daa hene a Yehowa yɛ ne sɛnea ɔyɛ kɛse na ɔwɔ tumi sen obiara no yɛ nea wɔada no adi fɛfɛɛfɛ wɔ Nnwom no mu. Yebetumi aka eyinom ho nsɛm kakraa wɔ abiɛsa a edidi so a yɛakyerɛw yi mu:

“Awurade [Yehowa], wo na woayɛ yɛn guankɔbea

Awo ntoatoaso nyinaa mu.

Wo de, wonnya nwoo mmepɔw

Na wonnya nyii asase ne wiase adi no

Na wufi tete akyirikyiri kosi daakye akyirikyiri yɛ Onyankopɔn. . . .

Na mfirihyia apem yɛ w’ani so sɛ nnɛra da a etwaa mu,

Ne anadwo mu dasu.”​—Dw. 90:1-4.

“Tete beeme na wohyɛɛ asase ase,

Na ɔsoro ne wo nsa ano adwuma.

Ɛno de, ɛbɛsɛe, na wo de, wugyina hɔ.

Wɔn nyinaa besuw sɛ atade,

Wɔbɛsakra wɔn sɛ atade, na wɔasakra.

Na wone wo ara, na wo mfe rensa da.”​—Dw. 102:25-27.

“Omununkum ne sum atwa ne ho ahyia, Trenee ne atemmu ne n’ahengua nnyinaso.

Ogya di n’anim,

Na ɛrehyew n’ahohiafo hyia.

N’anyinam haran wiase,

Asase hu na ɛpopo.

Mmepɔw nan sɛ hweawa Awurade [Yehowa] anim,

Asase nyinaa Awurade anim.”​—Dw. 97:2-5.

Saa ara nso na abusuabɔ a ɛda Onyankopɔn ne ne nkurɔfo ntam no yɛ nea wohu wɔ

Nnwom no nyinaa mu, sɛnea atiri nketewa a edidi so yi kyerɛ no:

NE NKURƆFO A OFI ƆDƆ MU HWƐ WƆN

“Na wo, Awurade [Yehowa] ne me guankɔbea,

Ɔsorosoroni no na wode no ayɛ wo trabea.

Bɔne renka wo,

Na ɔhaw remmɛn wo ntamadan.

Na wahyɛ n’abɔfo ama wo,

Sɛ wɔnhwɛ wo so w’akwan nyinaa mu.

Wɔbɛsoa wo wɔ wɔn nsam,

Na wo nan ampem ɔbo.”​—Dw. 91:9-12.

N’AYAMHYEHYE

“Sɛ agya yam hyehye no mma ho no,

Sɛ Awurade [Yehowa] yam yɛ no wɔn a wosuro no no ho ne no.

Na onim yɛn su,

Ɔkae sɛ yɛyɛ mfutuma.”​—Dw. 103:13, 14.

“Yah, sɛ wudi amumɔyɛde akyi a,

Awurade [Yehowa], hena na anka obegyina?

Na wo na fafiri wɔ wo fam,

Na wɔasuro wo.

Mehwɛ Awurade [Yehowa] kwan, me kra rehwɛ ɔkwan,

Na n’asɛm so na m’ani da.”​—Dw. 130:3-5.

ƆBƆNEFO A ONIPA YƐ NE SƐNEA EHIA NO ADWENSAKRA NE BƆNE FAFIRI

“Na mfa w’akoa nkɔ atemmu mu,

Na ɔteasefo biara renni w’anim bem.”​—Dw. 143:2.

“Awurade [Yehowa], ntwiw m’anim w’abufuw mu,

Na ntwe m’aso w’anibere mu;

Na w’agyan awowɔ me aka mu,

Na wo nsa aduru me so.

W’abohuru nti ahoɔden bi nni me honam mu,

Me bɔne nti akwahosan bi nni me nnompe mu;

Na me mfomso aboto me ti so,

Ɛdɛn me so sɛ adesoa duruduru.

M’akuru bɔn, na aporɔw

M’agyimisɛm nti.

Maponpono, na mapua koraa,

Da mu nyinaa mede awerɛhow menam foofoo.”​—Dw. 38:1-6.

“Hwɛ, wɔwoo me amumɔyɛ mu,

Na bɔne mu na me na nyinsɛn me.”

“Fa adwerɛ yi me ho bɔne, na me ho afi,

Guare me, na mayɛ fitaa asen nsukyerɛma.”

“Yi w’ani fi me bɔne ho hintaw,

Na popa m’amumɔyɛ nyinaa.”​—Dw. 51:5, 7, 9.

“Nhyira ne nea wɔde ne mmarato afiri no, na wɔakata ne bɔne so.

Nhyira ne onipa a Awurade [Yehowa] mmu

n’amumɔyɛ ngu no so,

Na nnaadaa nni ne honhom mu. . . .

Mekaa me bɔne mekyerɛɛ wo, na mankora

m’amumɔyɛ so.

Mekae sɛ: Mɛka me mmarato makyerɛ Awurade [Yehowa].

Na wo na wuyii me bɔne so mmusu.”​—Dw. 32:1-5.

ONYANKOPƆN MU ANIDASO NE AHOTOSO

“Nhyira ne Awurade [Yehowa] a ɔsoa yɛn adesoa ma yɛn daadaa,

Ɔno [nokware] Nyankopɔn no ne yɛn nkwagye Nyankopɔn,

Na Awurade [Yehowa] na owu mu fi wɔ no.”​—Dw. 68:19, 20.

“Hena na mewɔ no ɔsoro?

Na sɛ wowɔ me, menhwehwɛ asase so hwee.

Ma me honam ne me koma nwie sa,

Onyankopɔn ne me koma botan ne kyɛfa daa.

Na hwɛ, wɔn a wofi wo nkyɛn kɔ akyiri no bɛyera,

Wobɛsɛe wɔn a wofi wo nkyɛn kɔbɔ aguaman nyinaa.

Na me de, Onyankopɔn nkyɛn tra ye ma me,

Mede Awurade [Yehowa] mayɛ me guandɔbea,

Na maka wo nnwuma nyinaa.”​—Dw. 73:25-28.

“Onyankopɔn so na mede me ho mato, merensuro,

Nnipa betumi ayɛ me dɛn?​—Dw. 56:11.

“Sɛ saa Onyankopɔn yi yɛ yɛn Nyankopɔn daadaa,

Ɔbɛyɛ yɛn kwankyerɛfo de akosi wu mu.”​—Dw. 48:14.

MESIA AHENNI NO

Nnwom no wɔ pii ka fa Kristo Yesu ne Mesia ahenni no ho, ɛwom sɛ ɛmmɔ ne din, na mmom ɛkyerɛkyerɛ sɛnea ɔte, titiriw, sɛ anuonyam hene a odi asase mu no nyinaa so wɔ asomdwoe ne trenee mu. Nnwom no bi wɔ hɔ a ɛhyɛ nkɔm tee fa Mesia no ho, sɛ nhwɛso no, Nnwom 2 ne 110. Mpɛn horow pii no Nnwom no ka Mesia no ho asɛm a ɛnyɛ tee na mmom wɔ sɛnkyerɛnne ne mfonini kwan so. Ɛkyerɛ sɛ, Odwontofo no wɔ n’ankasa ne haw horow anaasɛ ɔman no haw horow wɔ n’adwene mu, na nea ɔka saa bere no fa n’ankasa ne bere sofo no ho. Nanso wɔ nnyinasosɛm anaasɛ wɔ ne mmamu a ɛto so abien anaa etwa to koraa mu no, wɔn a wɔkyerɛw Kristofo Hela Kyerɛwnsɛm no de nea ɛkae no to Kristo ho. Mpɛn pii no ɛte sɛ nea na Mesia no ho asɛm nni Odwontofo no adwene mu, na saa ara nso na ɔnte sɛnkyerɛnne kwan so mmamu a ɛfa ne ho no ase, sɛnea ɔsomafo Petro kae sɛ adiyifo no ante nneɛma a wɔn ankasa hyɛɛ ho nkɔm no pii ase no.​—1 Pet. 1:10-12.

Yehu oyi ho nhwɛso wɔ Dwom 102:25-27. Dwom no nkyekyem a edi kan kyerɛ sɛ Odwontofo no reka asɛm afa Yehowa ho. Nanso ɔsomafo Paulo de saa su horow yi too Yesu Kristo ho wɔ Hebrifo 1:10-12 efisɛ Yesu ne nea Onyankopɔn de no dii dwuma wɔ n’adebɔ nnwuma mu, na ɔno nso ne nea wɔde tumi nyinaa a ɛwɔ “ɔsoro ne asase so” ahyɛ ne nsa. (Mat. 28:18; Kol. 1:15-17) Yesu nam ne su horow ne n’adeyɛ nyinaa mu gyinaa Onyankopɔn ananmu maa yɛn.

Dwom 22 a wɔde to Dawid ho no fã bi fa Kristo amanehunu ahorow no ho wɔ sɛnkyerɛnne kwan so. (Fa Dwom 22:1 to Marko 15:34 ho; afei nso fa Dwom mu no nyinaa to nsɛm pa ahorow anan a wɔkyerɛw faa Yesu sɔhwɛ ne sɛn a wɔsɛn no no ho.) Sɛnea wɔkyerɛkyerɛɛ nsɛm mu fae no yɛ nea wohu ne mmamu a ewie du no wɔ Kristo asetra mu.

Enti Nnwom no ma Onyankopɔn ne ne Ba no so wɔ ɔkwan biara mu, na ɛboa yɛn ma yehu wɔn a wɔkaa eyi faa wɔn ho no yiye: “Na eyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.” (Yoh. 17:3) Nnwom no kyerɛɛ kyerɛ ɔhaw horow a ɛto yɛn no mu, na ɛkyerɛ yɛn ɔkwan a ɛsɛ sɛ yɛfa so bɔ mpae wɔ anigye mu ne afei nso wɔ ɔhaw bere nso mu. Wɔ ɔhaw biara a ebia yɛwɔ mu mu no, Dwom no bi wɔ hɔ a ebetumi aboa yɛn na ayɛ aduru a ɛsa yɛn koma yare.

Ɔsomafo Paulo kae sɛnea ohia mmoa wɔ mpaebɔ mu no sɛ: “Efisɛ sɛnea yɛbɛbɔ mpae a ɛsɛ no yennim.” (Rom. 8:26) Eyi taa yɛ nokware wɔ Kristoni biara ho. Yebetumi anya mmoa a ehia a yebetumi afa so ada yɛn nsusuwii no yɛn nkate horow no adi akyerɛ Onyankopɔn wɔ Nnwom nhoma no mu.​—Fa to Efesofo 5:19; Kolosefo 3:16 ho.

Esiane sɛ Nnwom no kanyan yɛn nkate horow nti, etumi kanyan yɛn kɛse. Ɔkenkanfo no betumi ahu n’ankasa ho na wate nka sɛ wɔrekasa akyerɛ no, anaasɛ wɔrekasa ama no. Ɛkanyan n’adwene mu nsusuwii ne ne nkate ahorow, na ɛpɛɛpɛɛ ne koma mu. Ɛka no ma ɔyɛ nsakrae wɔ n’asetra mu. Saa yɛ ma onya nkɔso na ɔbɛn Onyankopɔn ho nimdeɛ ho. Ɛsɛ sɛ obiara kenkan Nnwom no efi nea edi kan no so kosi nea etwa to no so. Obiara nni hɔ a ɔbɛkenkan a ɔrennya mfaso mfi mu mma n’ankasa ho.