Wohia Wɔn Nnamfonom

KRISTONI bi gyee telefon no so wɔ ne da biara da adwuma no bi mu. Onii ko yɛ ne yɔnko Kristoni bi yere: “Oo, Onuabarima, oduruyɛfo no aka akyerɛ me sɛ me kunu bɛtra nkwa mu asram abiɛsa pɛ. Minnim ɔkwan a mɛfa so aka akyerɛ no. Mpofirim ara na misusuw wo ho. Mesrɛ wo so wobɛpɛ sɛ wokasa kyerɛ no?” Anibu kakraa bi akyi pɛ na mmuae no bae: “Yiw. Mewɔ anidaso sɛ mehu no ɔkyena anɔpa.”

Ade kyee anɔpa na mmarima baanu no de anigye kyiaa wɔn ho. Bere a wɔnom kɔfe kakraa pɛ na ɔhɔho no bisaa n’adamfo ɔyarefo no sɛ ne ho te dɛn. “Me ho ye. Opirehyɛn no ayɛ yiye. Nea ehia mprempren ne ahoɔden a menya.”

“Eyi ahyɛ me nkuran yiye. Eyi kyerɛ sɛ w’ani agye. Sɛ́ Onyankopɔn akoa no ɛsɛ sɛ w’ani gye bere biara, sɛ ahoɔden a wubenya no ntɛmntɛm no twentwɛn ase mpo a. Nanso wɔ nea ɛbɛba biara no, yebetumi atɔ yɛn bo ase wɔ nneɛma nyinaa mu wɔ tumi a yɛn soro Agya no de ma yɛn no mu, ɛnte saa?”

Ɔyarefo no a ɔno nso yɛ obi a wanyin wɔ mfe mu no yɛɛ komm hwɛɛ n’adamfo no anim. “‘Hwɛ, so wunim biribi fa me ho a m’ankasa minnim anaa? Nea wabɛsra no no de odwo maa mmuae sɛ: “Yiw, saa na ɛte. Oduruyɛfo no ne wo yere kasae, na nea ɔkae no yɛ aniberesɛm. Osusuw sɛ wo nkwa da asiane mu. Mmom, ɔno ne oduruyɛfo a wakyerɛ n’adwene wɔ eyi ho, na ɛkyerɛ sɛ ɛsɛ sɛ yɛyɛ biribi wɔ ho. So ɛrenyɛ nea nyansa wom sɛ yɛbɛhwehwɛ oduruyɛfo foforo a obetumi aboa wo denam ayaresa foforo bi so? Worenyɛ ɔyarefo a odi kan a ɔtraa ase kyɛe kyɛn sɛnea nnuruyɛfo no susuwii. Nanso so ɛrenyɛ papa sɛ yebefi ase ayɛ nhyehyɛe mprempren, sɛ ɛba sɛ wo yare no mu san yɛ den bio? Mepɛ sɛ meboa wo wɔ ɔkwan biara a wubebisa me sɛ menyɛ no no so.”

Saa nkɔmmɔbɔ yi kɔɔ so kyɛe kakra, nanso yɛatumi ate nsɛm pii ahu sɛnea wɔde nokwaredi yɛɛ adwuma ne sɛnea wɔfaa so boae. Ayarefo wɔ ho kwan sɛ wohu nokware a ɛfa wɔn tebea no ho, titiriw sɛ wobisa biribi fa ho a.

DƐN NTI NA YƐTAA TWENTWƐN YƐN ANAN ASE?

Ɛyɛ a yɛtaa twentwɛn yɛn anan ase sɛ yɛbɛkɔ akɔsra obi a ɛrenkyɛ na ne nkwa aba awiei. Yehu na yɛte sɛnea owu tumi no bɛn no nka, na eyi ma yɛbɔ hu. (Heb. 2:14, 15) Nanso, yɛsrɛ wo sɛ​—sɛnea ɛte wɔ nsɛm nyinaa mu bere a wo nnamfonom wɔ ɔhaw kɛse mu no​—nsusuw w’ankasa ho wɔ tebea horow a ɛtete sɛɛ mu. Mmebusɛm 17, nkyekyem 17 anka kwa sɛ: “Nokware adamfo dɔ bere nyinaa mu, na ɔyɛ onua a wɔwoo no maa hiada.” Efisɛ, sɛ́ Kristofo asafo no muni no, wo nuabarima anaa wo nuabea no hia wo pii mprempren kyɛn bere biara. Mma kwan na ɔhaw tebea a w’adamfo a ɔyare no aba mu no anni wo nkate so mmom kyɛn sɛ wubedi nneɛma a ehia no no ho dwuma. Susuw nneɛma a ehia no titiriw no ho na yɛ adamfo pa. Ebeyi wo suro no afi hɔ, na anigye kɛse a wonya fi afoforo a wɔsom wɔn mu ba no bɛsa w’awerɛhow no ama wo.

NEA WOBƐKA ANAA?

Sɛ worekɔsra obi a ɔyare yiye a, boa a wobɛboa pa ayɛ sɛ obi a ɔwɔ anigye no remmoa no. Asɛm a wode ayamye bebisa sɛ “So wobɛpɛ sɛ metra wo nkyɛn kakra?” no bɛyɛ mfiase pa. Asemmisa te sɛ “Wo ho te dɛn?” Anaasɛ “So metumi ayɛ biribi ama wo anaa?” betumi akyerɛ wo nea ɔyarefo no pɛ sɛ ɔka ho asɛm. Sɛ nneɛma anaa nsɛm a onim a ebia ɛbɛba no ama ehu aka no a, ɛbɛyɛ den sɛ wobɛkasa afa ho. Obi rentumi nkyerɛ nea ɛrekɔ so wɔ n’adwene ne ne koma. Nanso sɛ ɔyarefo no tumi ka nneɛma a enye a ɔhwɛ kwan sɛ ɛbɛba no so wɔ ne yare no mu no ho asɛm a, mmmɔ mmɔden sɛ wode nsɛm a ɛnyɛ nokware yi betwitwa n’asɛm no mu sɛ: “Oo, ɛnsɛ sɛ wususuw eyi ho! Wo ho bɛtɔ wo.” Ɛsɛ sɛ wo ne no yɛ adwene sɛ nneɛma betumi asɛe, nanso wɔ eyi mu mpo no, obetumi de ne ho ahyɛ ɔsoro Agya a otumi yɛ biribiara no nsam.​—Fil. 4:6, 7.

Wubetumi aka sɛ: ‘So wobɛpɛ sɛ mekenkan nsɛm bi a ɛyɛ dɛ fi Bible no mu ma wo?’ Saa awerɛkyekye nsɛm yi bɛhyɛ ne gyidi den. Ayarefo pɛ Nnwom no efisɛ sɛnea obi a wahaw te nka wɔ ne mu fa ne sɛnea osu frɛ Yehowa hɔ mmoa no yɛ nea wɔada no adi fɛfɛɛfɛ wɔ mu.

Nnipa a wɔn yare mu yɛ den no taa yɛ wɔn a mpɛn pii no na wɔabrɛ enti wonni ahoɔden a wɔde bɛbɔ nkɔmmɔ pii. Enti ɛho nhia pii sɛ wobɛka nsɛm pii wɔ tebea horow a ɛte sɛɛ mu. Sɛ́ wobɛtra ɔyarefo no mpa no nkyɛn komm na woaso ne ti anaa ne nsa mu no ankasa mpo betumi akyekye ne werɛ. Ɛwom sɛ ɔntaa mmisa mpaebɔ ase de, nanso esiane sɛ owu betumi aba wɔn so nti, wɔn ani bɛsɔ sɛ wɔn mfɛfo Kristofo de hokwan a ɛte sɛɛ a ɛyɛ mpaebɔ bedi dwuma. Sɛ wubetumi anya nsɛm a ɛkyerɛ gyidi a ɛdɔɔso a wowɔ wɔ Yehowa mu na wode aboa w’adamfo no wɔ ɔhaw bere yi mu a, ɛnde ɛbɛma mo baanu nyinaa anya honhom mu biakoyɛ mu anigye mu kyɛfa.

Ɛwom sɛ ɛnsɛ sɛ yɛhyɛ obi a ɔyare denneennen no so na wayɛ nhyehyɛe ama bere a na onni nkwa mu no de, nanso ɛsɛ sɛ wohwɛ bere a ɔbɛpɛ sɛ ɔka eyi ho asɛm no kwan. Ɛbɛhyɛ no nkuran kɛse sɛ ɔte sɛ ne Kristofo nnamfonom no ahyɛ no bɔ sɛ wɔbɛhwɛ biribiara so ama no wɔ bere a wada wɔ owu mu no a, titiriw no ne yere ne ne mma anaasɛ, wɔ ɔbea no fam no, ne kunu. Ebia ɛbɛyɛ papa sɛ ɔkyerɛw biribi to hɔ sɛ ɛba sɛ ɛsɛ sɛ onya obi a obetumi ahwɛ ne nneɛma so anaasɛ ɛsɛ sɛ wɔde hyɛ obi nsa a. Sɛ́ wobehu mmaranimfo wɔ eyi ho no bɛma wanya awerɛhyem sɛ wobedi n’apɛde a etwa to no nyinaa ho dwuma.

Mmom, ɛnyɛ bere nyinaa na nsrahwɛ no bɛyɛ nea anibere wom te sɛ nea yɛakyerɛkyerɛ mu wɔ atifi hɔ no. Ebegyina tebea a wuhu w’adamfo a ɔyare no wɔ mu no so. Ayarefo ayɛ wɔn a wɔpɛ sɛ wɔkae wɔn bere a na wɔwɔ ahoɔden wɔ asetra mu no. Sɛ wokae osuahu bi a ɛyɛ anigye a wo ne no nyinaa anya mu kyɛfa? Ka eyi kyerɛ no na wubetumi anya awerɛhyem sɛ bere a wokɔ no, ɔyarefo no besusuw saa mmere horow a ɛyɛ anigye a ɔkae yi ho yiye. Wubetumi afa eyi so de anigye ankasa a emu dɔ abrɛ obi a na ɔyɛ Onyankopɔn akoa a ɔyɛ nnam a afei de ontumi mfa ne ho nhyɛ “asɛmpa” no ka mu bio no. Kae no na onsusuw nea watumi ayɛ bere a atwam no nyinaa no ho. Kamfo ayarefo no wɔ wɔn boasetɔ ne wɔn nhwɛso a wɔyɛ bere a, wɔde gyidi ne anigye tɔ wɔn bo ase wɔ wɔn amanehunu ahorow mu no.​—Heb. 6:10.

DI WO SURO NO SO NKONIM

Wobɛpene so sɛ wɔn a wonim sɛ ɔyare anaasɛ asiane betumi de wɔn nkwa aba awiei no tumi boa afoforo ma wohyia owu a ɛreba wɔn so. Ɛyɛ honhom mu nyin ho adanse sɛ woremmu w’ani ngu nneɛma a ɛda hɔ pefee a ɛsɛ sɛ wuhyia no so.

Nanso sɛ owu ho suro adi yɛn so a, dɛn na yebetumi ayɛ na yɛde adi saa nkate horow a enye ne nneɛma a ɛmfata a yesusuw ho yi so nkonim? Nea edi kan koraa no, mmu w’ani ngu nneɛma a wusuro no so sɛ ebia enni hɔ. Gye bere susuw asetra yi mu nneɛma a ɛnte hɔ daa ne ano aduru a Onyankopɔn de ma no ho. Onyankopɔn, ɔsoro nkwa Fibea no namfonom no betumi de anidahɔ asusuw asɛm yi ho wɔ ɔkwan a ɛkari pɛ so. Wonim nea owu ankasa yɛ: nna a wonnim biribiara a ɛrekɔ so na wɔnte ɛyaw anaa ehu biara nka. (Yoh. 11:11-14) Yesu kyerɛe pefee sɛ awufo no bɛsɔre, sɛ: “Mommma eyi nnyɛ mo nwonwa, efisɛ dɔn no reba a wɔn a wɔwɔ ada mu nyinaa bɛte ne nne, na wɔafi adi.” (Yoh. 5:28, 29) Ɛwom sɛ wɔn a wɔsɔre tia Yesu no kum no de, nanso ne soro Agya no de no baa nkwa mu bio. Wɔ saa anwonwade yi akyi no, ɔsomafo Paulo kyerɛwee ɛ, “ɛno akyi ɔmaa anuanom bɛboro ahannum huu no prɛko; wɔn mu pii da so tete ase.” (1 Kor. 15:3-8) Yiw, wɔ nokwarem no, Kristo wusɔre no ho adanse pii wɔ hɔ.

Kristofo nim sɛ nkwa a wɔwom mprempren a wonya mu anigye no nyɛ nea ehia titiriw. Sɛ́ wobenya Onyankopɔn anim dom anaa ne mpeneso no na ɛsom bo, efisɛ, “ɛwɔ nkwa a ɛwɔ hɔ yi ne nea ɛrebɛba no ho bɔhyɛ.” (1 Tim. 4:8) Na hu sɛ Yehowa de ahoɔden a yebetumi de ahyia owu wɔ bere a ahia yɛn kɛse no bɛma yɛn.​—Dw. 46:1.

“WƆMPAA YƐN AKYI Ɛ”

Sɛ wote nka ankasa sɛ ɔyare a ekura wo no yɛ nea ebia ebekum wo a, ɛnde na ɛho hia yiye sɛ wokari pɛ wɔ honhom mu bere nyinaa. Ebia asemmisa bi te sɛ: ‘Na dɛn nti na eyi baa me so?’ rekɔ so wɔ wo mu. Osuro ne te a wote nka sɛ wɔagyaw wo, bɛhaw wo. Ko tia eyinom. Di w’adwene so nkonim na hyɛ so. ‘Woda so ara wɔ nkwa mu na Yehowa wɔ wo nkyɛn. Hu sɛ ɔbonsam bɛpɛ sɛ ɔfa wo mmerɛwyɛ so di dwuma na ɔde saa yɛ ama gyidi a wowɔ wɔ Onyankopɔn ne ne bɔhyɛ no mu no ayɛ mmerɛw. Nanso ɛnyɛ wo nkutoo na woreko. Yehowa ‘mpaa w’akyi ɛ.​—2 Kor. 4:9.

Hwehwɛ nnamfonom na wɔaboa wo, titiriw wɔn a wɔatumi adi ɔhaw horow a ɛte saa so nkonim wɔ Yehowa tumi mu no. Kura gyidi a wowɔ wɔ Onyankopɔn bɔhyɛ horow mu no mu denneennen. Hwɛ daakye a wobɛsan aba nkwa mu bio na woahu Yehowa nhyira horow nyinaa no kwan. Bere bɛn na eyi bɛyɛ sɛɛ! Sɛ́ wobɛtra ase de akosi daa a ɛyaw ne awerɛhow nni hɔ, a wo nnamfonom ankasa nso ka ho. Yehowa Nyankopɔn pɛ sɛ yɛn nyinaa tra nkwa mu de kosi daa. Yesu kae sɛ: “Mene sɔre ne nkwa; nea ogye me di no sɛ wawu mpo a, obenya nkwa.”​—Yoh. 11:25.

KAE WO NNAMFONOM A WƆREDI AWERƐHOW NO

Sɛ ɛba sɛ Kristoni bi a ɔyɛ onuabarima anaa onuabea ada wɔ owu mu a, mma wo werɛ mfi n’abusuafo no. Eyi ne bere a wode wo ho hyɛ tebea a wɔwom no mu. So wubetumi asusuw sɛnea wɔte nka fa no ho wɔ bere a owu a ɛte sɛɛ aba no? Ɛsɛ sɛ wɔkɔ wɔn nnwuma horow a, wɔyɛ da biara da no so, nanso eyi apira wɔn kɛse. Eyi ne bere a wɔn nnamfonom ho hia wɔn​—nanso nnamfonom a wotumi tie asɛm. Sɛ́ wubenya obi a obetie sɛnea okunu, ɔyere anaasɛ abofra no kãe anaa ɔyɛe bere bi no betumi akyekye wɔn werɛ. Wɔrentumi mma wɔn werɛ mfi wɔn adɔfo a wɔawuwu no nyinaa prɛko pɛ da. Nanso, wubetumi aboa wɔn ama wɔafi asetra ase foforo bio.

Wubetumi ayɛ bebree ama wo nnamfonom a wɔredi awerɛhow no. Telefon a wobɛfrɛ wɔn anaasɛ nsa a wobɛto afrɛ wɔn ama adidi yɛ nneɛma a wubetumi ayɛ no mu binom. So wubetumi ama wɔanya kyɛfa wɔ wo Bible mu adesua a wo ne afoforo yɛ no mu? So wɔwɔ sika a ɛdɔɔso a wɔde bɛtra ase, sɛ ɛnte saa a so yɛbɛpɛ sɛ yɛde nea Yehowa adom ama yɛn nsa aka no bi boa wɔn?

Yetumi hu bere a yɛn mmoa ho hia yɛn nnamfonom wɔ ɔkwan titiriw bi so no​—wɔ awerɛhow bere mu, ɔhaw ne osuro mpo mu. Yesu de ne bɛ a ɛfa Samariani a ohuu mmɔbɔ no ho no mae na ayɛ mfaso ama yɛn wɔ bere a ɛte sɛɛ mu. Mommma wɔnnkyerɛw mfa yɛn ho da sɛ: “Otwaa ne ho kɔe,” te sɛ nea ɔsɔfo no ne Lewini no yɛe wɔ Yesu abasɛm no mu no. (Luka 10:29-37) Yɛte nea wɔakyerɛw wɔ Ɔsɛnkafo, ti 7, nkyekyem 2 no ase yiye mprempren: “Nkɔmmɔdi fi kɔ ye sen asanom fi kɔ.” Na Yakobo kyerɛwee sɛ: “Onyankopɔn som a ɛho tew na ɛho nni fi agya Onyankopɔn anim ne sɛ obi kɔhwɛ nyisaa ne akunafo wɔn ahohia mu, na oyi ne ho fi wiase nkekae mu.” (Yak. 1:27) Ɛmmra sɛ Yehowa behyira yɛn wɔ saa yɛ mu!