Nsemmisa A Efi Akenkanfo Hɔ

● Sɛnea Hebrifo 12:22, 23 kyerɛ no ɔsomafo Paulo ka “atreneefo a wɔayɛ pɛ ahonhom” ho asɛm. So saa ‘nnipa’ yi betumi ayɛ atreneefo a Paulo kyerɛw wɔn ho asɛm wɔ Hebrifo ti 11 no?

Ka a wɔka sɛ saa asɛm yi betumi afa nnipa gyidifo ne anokwafo a wɔtraa ase ansa na Kristofo mmere no reba araa besi Osuboni Yohane so ho no nyɛ asɛm foforo. Ná, Ɔwɛn-Aban a ɛbae August 15, 1913, nkratafa 248 ne 249 aka eyi anifere kwan so dedaw, na ɛkɔɔ so kuraa eyi mu mfe pii. Wɔ saa nkyekyem yi mu no asɛmfua ‘nnipa’ no mpue wɔ tete Hela nkyerɛwee no mu. Ɛno nti na New World Translation no kenkan sɛ, “wɔn a wɔteɛ a wɔayɛ pɛ no honhom mu asetra” no.​—Hwɛ Jerusalem Bible, Emphatic Diaglott, Rotherham, Westminster Version, Kingdom Interlinear Translation.

Hebrifo 11:8-10 dan adwene kɔɔ Abraham, Isak ne Yakob so na ɛkyerɛe sɛ Abraham fii Kaldea kurow Ur mu na ɔne Isak ne Yakob dii atutra kosii sɛ Yakob tu kɔɔ Misraim asase so wɔ ne babarima Yosef nna no mu. Enti saa bere no mu no wɔantra beae pɔtee bi te sɛ kurow bi mu. Biribiara nni Hebri Kyerɛwnsɛm no mu a ɛka sɛ Onyankopɔn hyɛɛ saa mmarima baasa yi “kurow a ɛwɔ nhyɛase a ne kyekyefo ne yɛfo ne Nyankopɔn” ho bɔ. Ɛno ne nea Paulo kae wɔ asɛm no ho. Akyinnye biara nni ho sɛ saa asɛm no fa Onyankopɔn nniso a ɔnam ‘Abraham aseni’ so de asi hɔ, nniso a saa agyanom mpanyimfo baasa yi bɛtra ase wɔ asase so na wɔanya ɔdesani pɛyɛ wɔ mfirihyia apem no awiei, no ho.​—Gal. 3:16.

Bere a Onyankopɔn de Abraham asefo, Isak ne Yakob fii Misraim asase so na ɔde wɔn kɔɔ asase a na wahyɛ Abraham ho bɔ no so no, wɔtratraa Kanaanfo nkurow mu, na Yeriko nkutoo na wɔnam Onyankopɔn tumi so sɛee no. Ɛno akyi no, adiyifo anokwafo ne mmea anokwafo a wɔtraa ase tete mmere mu no nyaa nkurow pɔtee bi a na wɔtete mu. Ne nyinaa akyi no, wɔantumi anka wɔn ho asɛm sɛnea wɔka faa Abraham, Isak ne Yakob ho no, sɛ na wɔrehwehwɛ kurow bi a ɛbɛba daakye wɔ asase so. Wɔsɛee Yerusalem afe 70 Y.B. mu, bere a wotwaa Osuboni Yohane ti akyi mfe 39. Enti Yudafo Kristofo mpo traa saa kurow a aniwa hu yi mu kosii sɛ ɔsahene Gallus twee ne ho fii Yerusalem, bere a Kristofo tiee Yesu nkɔmhyɛ ahyɛde a ese womfi no mu no.​—Mat. 24:15-22.

Hebrifo 13:12-14 ka Yesu ho asɛm sɛ wɔbɔɔ no asɛndua mu wɔ Yerusalem afasu akyi, anaasɛ “kurow pon akyi.” Wɔ saa tebea no ho no Paulo kɔ so ka sɛ, “Momma yemfi adi nkɔ nsra no akyi [te sɛ ɔpapo a ɔsoa ahohora no anaasɛ “ɔpapo ma Asasel” a wokogyaa no sare so mpata da no (Lev.16:10)], nsoa n’ahohora; na yenni kurow a ɛtra hɔ daa ɛha, na mmom nea ɛbɛba no akyi kwan na yɛhwehwɛ. “Kurow” yi gyina hɔ ma ɔsoro ahenni no, Yerusalem Foforo no, nea Paulo bɔ din wɔ Hebrifo 12:22 no.

Na tete mmarima anokwafo no, titiriw efi Abraham so besi Osuboni Yohane so no, nhwehwɛ sɛ wɔbɛkɔ soro na wɔakɔhyɛn saa ɔsoro Yerusalem no mu. Na wonni biribi a ɛte saa ho adwene. (Mat. 11:11) Na wontumi nnya saa anidaso no efisɛ na wɔmfaa Onyankopɔn honhom kronkron nwoo wɔn. Yohane 7:39 da eyi adi, na ɛka sɛ: “Na eyi de, ɔkae honhom a wɔn a wogye no di rebenya no ho; na honhom kronkron nnya mmae ɛ, efisɛ wonnya nhyɛɛ Yesu anuonyam ɛ.” Honhom a wɔde wo Kristofo mmarima ne mmea amfi ase kosi Pentekoste 33 Y.B. Wɔn a wɔde honhom kronkron awo wɔn fi saa bere no hwɛɛ nkwa a wobenya wɔ ɔsoro kurow a asase so Yerusalem yɛɛ ho mfonini no mu no kwan. Ɛno nti na Paulo rekyerɛw akɔma Hebrifo Kristofo no otumi kaa no nokwarem kyerɛɛ wɔn wɔ Hebrifo 12:22 sɛ, “Na mmom, moaba bepɔw Sion, [ɛnyɛ Bepɔw Sinai a ɛwɔ Arabia no] ne Onyankopɔn teasefo kurow, ɔsoro Yerusalem, ho, ne ɔsoro abɔfo mpempem nhyiam.” Wɔ Paulo bere so no na “mmakan a wɔakyerɛw wɔn din wɔ soro asafo” no mu no nnii mfe 30 ɛ, enti na ɛwɔ ne mfiase, na na wɔn dodow nnu 144,000 koraa. 144,000 a wɔyɛ “mmakan a wɔakyerɛw wɔn din wɔ soro” no dodow a ebewie du no ba awiei wɔ nea wɔfrɛ no Kristofo Mmere, a ɛba awiei wɔ “ahohiahia kɛse” a wɔaka ho asɛm wɔ Adiyisɛm 7:14 ne Mateo 24:21, 22 mu no mu. Enti na Paulo ne Hebrifo Kristofo a ɔkyerɛw wɔn no reba saa “asafo” a na emufo nyinaa si 144,000 no mu.

Afei, Hebrifo 12:23, 24 ka sɛ “ne nnipa nyinaa Ɔtemmufo, Onyankopɔn, ne treneefo a wɔayɛ pɛ no ahonhom, ne apam foforo ntamgyinafo Yesu, ne mogya a wɔpete a ɛkasa yiye sen Habel de no.” Enti Onyankopɔn ne nnipa nyinaa temmufo, a 144,000 a wɔakyerɛw wɔn din no ka ho. Enti ɛsɛ sɛ wɔn a wɔyɛ “asafo” no mufo fa atemmu bere bi mu ansa na Yehowa Ɔtemmufo Kɛse no agye wɔn atom. Ɛno nti na, ɔbɔɔ ne din akyi ɛhɔ ara no, nkyekyem no kɔ so ka sɛ, “ne atreneefo a wɔayɛ pɛ no honhom mu asetra” no. Ɛyɛ Kristofo a wɔde honhom awo wɔn no “asafo” no mufo a wɔnam gyidi so abu wɔn trenee no. (Rom. 5:1; 8:1-4) Esiane eyi nti wɔka wɔn ho asɛm sɛ “atreneefo a wɔayɛ pɛ.”

Enti wotu wɔn fo sɛ ‘wɔmfa wɔn nipadua nsi hɔ sɛ afɔre a ɛte ase a ɛyɛ kronkron a ɛsɔ Onyankopɔn ani a ɛne wɔn nyamesom a emu wɔ adwene no.’ (Rom. 12:1) Saa nti ‘wofi adi kɔ ne nkyɛn nsra no akyi soa n’ahohora.’ (Heb. 13:13) Saa Kristofo a wɔde honhom awo wɔn no wɔ “honhom mu asetra” ankasa wɔ asase so mprempren na wotu wɔn fo sɛ wɔnnantew sɛnea honhom a wɔde woo wɔn no kwan te.

Ɔsomafo Paulo ka saa Kristofo a wɔabu wɔn trenee no “honhom mu asetra” ho asɛm wɔ ti koro no ara mu wɔ Hebrifo 12:9: “So yɛremfa yɛn ho nhyɛ ahonhom agya no ase nkyɛn saa pii mmom, na yɛatra ase?” Wɔ Hela mu ankasa no ɛkenkan sɛ, “ahonhom no Agya.” Ɔyɛ asafo a wɔde honhom awo no a na Paulo rekyerɛw wɔn no agya, na enti New World Translation no kyerɛ ase sɛ “yɛn honhom mu asetra Agya.” Saa asɛm yi di Hebrifo 12:23 anim nkyekyem 14.

Wɔ Hebrifo 12:1 no ɔsomafo Paulo dan adwene fi mmarima ne mmea anokwafo a wɔtraa ase ansa na Kristofo mmere reba no so na ɔde n’adwene kɔ Kristofo a wɔde honhom awo wɔn no asafo ne ɔsoro dwumadi a ɛda Kristofo a wɔde honhom awo wɔn yi anim no so. Enti wɔ Hebrifo 12:23 no, ɛnyɛ sɛ na ɔresan akyiri akɔ nea na waka ho asɛm wɔ Heb ti 11 mu no so. Esiane saa nokwasɛm ahorow yi nti asɛm “atreneefo a wɔayɛ pɛ no honhom mu asetra” no de “mmakan a wɔakyerɛw wɔn din wɔ soro asafo” no mu no ho adwene foforo ba, na enti ɛnyɛ nea na waka wɔ Heb 12 nkyekyem 22 no a ɔsan ti mu ara kwa. Na enti ɛho nhia sɛ obi bɔ mmɔden sɛ ɔbɛkyerɛ sɛ ɛfa kuw foforo a nnipa a wosuro Onyankopɔn wom, te sɛ tete mmere no mu mmarima ne mmea anokwafo no a efi Habel so besi Osuboni Yohane so, no ho.

Akyiri yi, bere a ɔrema ada adi sɛ Hebrifo 12:22, 23 no fa Kristofo asafo a wɔde honhom awo wɔn no ho no, Paulo kɔ so ka sɛ, “ne apam foforo ntamgyinafo Yesu, ne mogya a wɔpete a ɛkasa yiye sen Habel de.” (Heb. 12:24) Asafo a wɔde honhom awo no no wɔ saa apam foforo no mu, na Yesu na ɔyɛ wɔn ntamgyinafo. Wɔn na wɔde Yesu Kristo “mogya” apete wɔn so honhom mu ma enti ɛde mfaso horow ba wɔn so sen nea anka Habel a owuu mogya dansefo wu no mogya bɛyɛ. (Heb. 11:4) Eyi kyerɛ sɛ, wɔabu wɔn bem ankasa anaasɛ wɔabu wɔn trenee mprempren denam gyidi a wɔwɔ wɔ saa mogya no mu no so.​—Rom. 5:9.

Nea ɛne eyi nyinaa hyia no, Paulo kɔ so kasa kyerɛ asafo a wɔde honhom awo no no wɔ Hebrifo 12:25-28, na otu wɔn fo sɛ wɔnna wɔn ho adi sɛ wɔfata wɔn soro ahenni no, a ɛne “Onyankopɔn teasefo kurow, ɔsoro Yerusalem,” a wɔaba mu no. Asafo a wɔde honhom awo no no nkaefo 144,000 no abɛn nneɛma a Paulo bobɔɔ din wɔ Heb 12nkyekyem 22 ne 23 no afei sen sɛnea na ɛte wɔ afeha a edi kan no mu Hebrifo Kristofo no fam. Na “nguan foforo” nnipakuw kɛse no ne wɔn redi ahurusi sɛ saa na asɛm no te. Nokwarem no “nnipakuw kɛse” no renantew gyidi mu nnɛ sɛnea mmarima ne mmea anokwafo a wɔtraa ase ansa na Kristofo mmere so reba no yɛe no ara.