Abufuw​—Ɛyɛ Dɛn?

“SƐ WUSIW Onyankopɔn dom akyɛde a ɔde ama wo a ɛne abufuw no ano a, na worekum wo ho.” Saa na asɛm bi a wɔafa aka asɛm wɔ Newsweek nsɛmma nhoma no mu no bɔ kɔkɔ. Ɛda adi sɛ wɔ mfe pii mu no, adwene ne nneyɛe ho abenfo pii ama adwene a ɛkyerɛ sɛ abufuw a wɔnna no adi no betumi ama obi anya nyarewa te sɛ mogya mmoroso, komayare ne adwenemhaw na wanom nsa bebree no agye din.

Nea ɛne eyi bɔ abira no, Bible no de afotu ama wɔ mfe mpempem pii mu sɛ: “Ma abufuw ntwa, na gyae bo bɔne yɛ.” (Dwom 37:8) Nea Bible ka no teɛ: “Mma wo honhom mmpere abohuru ho, na nkwasea kokom na abohuru te.”​—Ɔsɛnkafo 7:9.

Hena na ne de teɛ, abenfo anaasɛ Bible no? Dɛn ne abufuw ankasa? So abufuw a woda no adi ye ma yɛn?

Abufuw A Wɔda No Adi

“Abufuw” yɛ asɛmfua a wode ka nkate a emu yɛ den anaasɛ nea obi yɛ wɔ biribi a n’ani nnye ho ne ɔtan ho asɛm. Nsɛmfua afoforo wɔ hɔ a ɛkyerɛ sɛnea abufuw no ano den te anaasɛ wɔda no adi. Bobɔne kyerɛ abufuw a ano yɛ den. Aboɔhyew betumi ayɛ nea ɛsɛe ade. Abohuru betumi ayɛ nea wɔde ka abufuw a wɔda no adi wɔ ɔkwan pa so ho asɛm. Na abufuwhyew taa kyerɛ aweretɔ anaasɛ asotwe.

Yɛda abufuw adi wɔ biribi pɔtee ho: Yɛn bo fuw wɔ biribi ho. Nanso sɛnea yɛda abufuw adi anaasɛ yedi ho dwuma no ho hia kɛse.

Nea ɛyɛ anigye no, ɛwom sɛ abenfo binom ka sɛ abufuw a wɔda no adi ye de, nanso adwene ho nhwehwɛmu a woayɛ nnansa yi kyerɛ sɛ nnipa pii a wɔda abufuw adi no ma obu a wɔwɔ ma wɔn ho ankasa no ano brɛ ase, wonya adwenemhaw, wɔte afobu nka na wɔkɔ so yɛ basabasa anaasɛ basaa. Afei nso, “yi a obi beyi afi ne bo so,” anaasɛ “da a ɔbɛda no adi” a abufusɛm a ɔbɛka, nteɛteɛm, osu, anaasɛ bɔ a ɔbɛbɔ obi ka ho taa de ɔhaw pii ba sen nea etumi di ho dwuma. Onii a ne bo afuw no bo kɔ so fuw kɛse na ɛma afoforo di yaw.​—Mmebusɛm 30:33; Genesis 49:6, 7.

Sɛ yɛde abufuw teɛteɛm a, yɛntaa nnya nea yɛhwɛ kwan no, efisɛ ɛtaa kanyan onipa foforo no ma ɔyɛ saa ara. Sɛ nhwɛso no, fa no sɛ bere a woreka wo kar no ofirikafo foforo yɛ biribi de hyɛ wo abufuw. Woteɛteɛm na wobɔ w’abɛn de di ho dwuma. Abufuw a wɔde teɛteɛm no betumi akanyan onii a wo bo afuw no no ma wayɛ bi atua wo so ka. Ɛtɔ bere bi a, awerɛhosɛm fi tebea a ɛte sɛɛ no mu ba. Sɛ nhwɛso no, wokum ɔbarima bi a ɔwɔ Brooklyn, New York, bere a na ɔregye baabi a wɔde kar si wɔ borɔn bi so ho akyinnye no. Bible no si ɔhaw no so dua bere a ɛka eyi no: “Obufufafo sɔ atutuw ano, na ɔbobɔnefo mmarato dɔɔso.” (Mmebusɛm 29:22) Hwɛ nyansa ara a ɛyɛ sɛ wubedi afotu yi akyi: “Mommfa bɔne nntua obiara bɔne so ka. . . . Sɛ ebetumi a, mo fam de, mo ne nnipa nyinaa ntra asomdwoe mu”!​—Romafo 12:17, 18.

Enti abufuw a yɛda no adi no mmoa yɛn wɔ asetra mu. Nanso so eye ma yɛn wɔ honam fam anaa? Nnuruyɛfo pii akyerɛ sɛ enye. Nhwehwɛmu ahorow ada no adi sɛ nnipa a wɔtaa da abufuw adi no yare mogya mmoroso sen biara. Ebinom bɔɔ amanneɛ sɛ abufuw maa wɔn koma yɛɛ wɔn yaw, wɔn ti paee wɔn, wɔpɔn ahwene, wɔn ani so birii wɔn anaasɛ wɔantumi ankasa. Nea ɛne eyi bɔ abira no, yɛn Nkwamafo no kyerɛkyerɛ mu sɛ: “Komam dwo yɛ ɔhonam nkwa.” (Mmebusɛm 14:30) Yesu kae sɛ: “Anigye ne wɔn a wɔpɛ asomdwoe, efisɛ wɔn na wɔbɛfrɛ wɔn ‘Onyankopɔn mma.’”​—Mateo 5:9, NW.

Nneɛma A Ɛde Abufuw Ba

Nneɛma a ɛde abufuw ba no bi ne obu a yɛwɔ ma yɛn ho a wɔkasa tia, kasa a wɔkasa tia obi, ɔyaw, di a wɔne obi di wɔ ɔkwan a ɛnteɛ so, ne abasamtu a ntease biara nnim. Sɛ nkurɔfo bo fuw a, na wɔreda asɛm pɔtee bi adi: “Worema m’anigye ne m’ahobammɔ ho aba asɛm! Woresɛe m’anuonyam! Woresɛe obu a mewɔ ma me ho! Worepɛ me ho mfaso!”

Na awarefo bi a wɔwɔ Carlifonia de abufuw kasa kyerɛ wɔn ho wɔn ho bere biara a ɔyere no bɛkɔ akɔsra n’adamfowa no. Okunu no abufuw su no san ne yere no. Bere a na wɔde afotu rema wɔn no, okunu no kaa biribi a ɔnnkaa ho asɛm nkyerɛɛ obi da no ho asɛm kyerɛɛ ne yere no. Sɛ ne yere no gyaw no hɔ kɔ baabi wɔ bere tiaa bi mu mpo a, na osuro sɛ obetumi agyaw no hɔ akɔ koraa esiane sɛ ne papa guan gyaw no bere a na ɔyɛ abofra no nti. Bere a ɔyere no tee ade titiriw nti a ɛma ne kunu bo fuw​—suro a osuro sɛ obeguan agyaw no​—ase no, ɛboaa no ma odii ne bo a ɛma ɛfuw ne kunu no so na ɔkaa ɔdɔ a ɔwɔ ma no no ho asɛm kyerɛɛ no.

Enti abufuw betumi ayɛ te sɛ ɔyare bi ho sɛnkyerɛnne. Wɔ nsɛm a ɛte sɛɛ mu no, yebetumi asua sɛnea yebedi ho dwuma yiye denam nea ɛde ba titiriw a yebehu no so.

[Mfonini wɔ kratafa 4]

Nnuruyɛfo pii akyerɛ sɛ abufuw a wɔda no adi nye