Yeriko Ɔko No​—Anansesɛm Anaasɛ Nokwasɛm?

MFE du du pii ni no, fam tutufo abɔ mmɔden sɛ wobegye Bible mu asɛm a ɛfa Yosua ne Yeriko ɔko no ho no ho akyinnye. Sɛnea Bible no kyerɛ no, Yosua ne Israelfo asraafo twaa Yeriko ho hyiae nnanson, kosii sɛ Onyankopɔn maa kurow no afasu a ɛyɛ den no bubu guu fam. Eyi maa Israelfo no nyaa kwan hyɛnee mu na ‘wɔde ogya hyewee, ɛne nea ɛwɔ mu nyinaa.’​—Yosua 6:1-24.

Nanso fam tutufo pii a Kathleen Kenyon adwuma a na wobu no kɛse wɔ 1950 mfe no mu anya wɔn so tumi no gye dii sɛ na Yeriko nni hɔ koraa wɔ Israelfo ntua no mu. Ɛdɛn, wɔkae sɛ na wɔasɛe kurow no dedaw bɛboro mfe ɔha! Enti, nnipa pii pow Bible asɛm a ɛfa Yosua ne Israelfo no ho no. Nanso, nnansa yi ara, Ɔbenfo Bryant G. Wood a ɔyɛ fam tutufo wo Toronto Sukuupɔn a ɛwɔ Canada mu no ahwɛ Yeriko adanse no ɔkwan foforo so. Sɛnea The New York Times kyerɛ no, ɔde aba awiei sɛ na Ɔbenfo Kenyon “hwehwɛ anwenne a ɛmfata wɔ mmeae a ɛmfata,” ne sɛ adanse no ne Bible no “hyia ɔkwan a ɛyɛ nwonwa so.”

Ɔbenfo Wood ka nsõ bi a emu dɔ yɛ anammɔn abiɛsa a nkuku a abobɔ, ntayaa asinasin a efi afasu a abubu mu, na nnua hyehyem, a ne nyinaa ayɛ tumm te sɛ nea ogya a ɛhyew kurow mũ na ɛyɛɛ no saa ho asɛm. Wɔakyerɛ sɛ wɔyɛɛ anwenne a abobɔ no afe 1410 mu ansa na Yɛn Bere yi reba (a wogye tom sɛ wɔde akwan a ɛnyɛ pɛpɛɛpɛ a wonim no na ebui), wobetumi de mfe 40 aka ho anaasɛ wɔatew afi so​—ɛne afe 1473 A.Y.B. a ɛne bere a wonya fi Bible mu sɛ wɔkoo Yeriko ɔko no ntam nware koraa.

Fam tutufo ahu sɛ na awi a wɔde asie pii ahyɛ tete Yeriko afi mama. Eyi kanyan anigye, efisɛ Bible da no adi sɛ Yeriko hwee ase fɛfɛw bere mu twa bere no akyi bere tiaa bi a wɔanka wɔn anhyem amma ɔkɔm anne wɔn. (Yosua 3:14-16) Abien no nyinaa yɛ ntease pa a enti na awi pii ahyɛ kurow no ma bere a wɔsɛee no no.

Sɛ ɛba pɛpɛɛpɛ a Bible no yɛ a wobegye atom mu a, nyansahufo mmom nwiinwii. Enti, Times faa nhomanimfo kɛse bi asɛm a ɔka faa nea Wood ahu no ho no kae sɛ: “Akyinnye biara nni ho sɛ nsɛm a ɛwɔ Bible mu no mu pii pa kura nokware kakra bi wom.” Nanso, bere a nnɛyi nyansahu ne fam tutu mu nneɛma a wohu kɔ so ara foa nea Kyerɛwnsɛm ka no nsɛmmoa no, ɛda adi pefee sɛ Bible no nyɛ atosɛm ahorow a wɔaboaboa ano a nokware kakra bi tuatua mu wɔ n’afã horow bi. Sɛnea Bible no ankasa ka no: “Ma Onyankopɔn nyɛ ɔnokwafo, na onipa biara nyɛ ɔtorofo.”​—Romafo 3:4.

Bere a yɛn ani betumi agye nea wɔka fa nea fam tutufo hu wɔ Yeriko no ho no, nokware Kristofo ‘nam gyidi mu, na ɛnyɛ ohu mu.’ (2 Korintofo 5:7) Wɔn gyidi nnyina fam tutu so. Sɛ́ fam tutufo adanse wɔ hɔ anaasɛ dabi no, Bible no kɔ so da no adi sɛ ɛyɛ tete, mprempren, ne daakye nsɛm fibea a wotumi de ho to so.​—Dwom 119:105; 2 Petro 1:19-21.

[Mfonini wɔ kratafa 7]

Yeriko amamfõ so, faako a Yehowa maa Israelfo dii nkonim

[Mfonini Fibea]

Pictorial archive (Near Eastern History) Est.