Ho a Wɔde Bɔ Afɔre Honhom a Yɛde Bɛsom Yehowa

“Sɛ obi pɛ sɛ odi m’akyi a, ma ɔmpa ne ho akyi, na ɔmma n’asɛndua so, na onni m’akyi daa.”​—MATEO 16:24.

 1. Ɔkwan bɛn so na Yesu kaa ne wu a ɛreba no ho asɛm kyerɛɛ n’asuafo no?

YESU KRISTO a ɔwɔ Bepɔw Hermon a sukyerɛmma akata so nkyɛn no abɛn n’asetram ade titiriw bi. Ná ne nkwa nna nnu afe. Onim saa; n’asuafo no nnim. Afei na bere aso sɛ wohu. Ɛyɛ nokware sɛ Yesu aka ne wu ho asɛm pɛn de, nanso eyi ne bere a edi kan a ɔka ho asɛm pefee. (Mateo 9:15; 12:40) Mateo kyerɛwtohɔ no kenkan sɛ: “Efi hɔ na Yesu Kristo fii ase kyerɛɛ n’asuafo no sɛ ɛsɛ sɛ ɔkɔ Yerusalem kohu amane pii mpanyimfo ne asɔfo mpanyin ne kyerɛwfo nsam, na wɔakum no, na da a ɛto so abiɛsa no wanyan.”​—Mateo 16:21; Marko 8:31, 32.

 2. Dɛn na Petro yɛe wɔ Yesu nsɛm a ɛfa Ne daakye amanehunu no ho, na Yesu buaa dɛn?

² Aka bere tiaa bi ma Yesu awu. Nanso Petro bo fuw wɔ adwene a ɛte sɛ nea ɛyɛ hu no ho. Ontumi nnye ntom sɛ wobekum Mesia no ampa. Enti Petro ka ne Wura anim. Bere a ntease pa na ɛkanyan no no, ofi nkate mu hyɛ sɛ: “Wo ne wo ho nni ayamye so, Awurade; eyi remma wo so koraa.” Nanso Yesu pow Petro ayamye a ɛmfata no ntɛm so, wɔ ahotoso mu sɛnea obi bɛbɔ ɔwɔ a ne ho yɛ hu ti no. “Fi me so, Satan! Woyɛ hintidua ma me, efisɛ wunnwen Onyankopɔn de, na mmom nnipa de na wudwen yi.”​—Mateo 16: 22, 23, New World Translation.

 3. (a) Ɔkwan bɛn so na Petro yɛɛ ne ho Satan dwumayeni a onnim? (b) Ɔkwan bɛn so na na Petro yɛ hintidua ma ho a wɔde bɔ afɔre asetra?

³ Petro ayɛ ne ho Satan dwumayeni a onnim. Yesu mmuae no yɛ pintinn te sɛ bere a obuaa Satan wɔ sare no so no. Ɛhɔ na Ɔbonsam bɔɔ mmɔden sɛ ɔde asetra a ahotɔ wom, ahenni a ɔmmrɛ ho, bɛsɔ Yesu ahwɛ. (Mateo 4:1-10) Afei Petro hyɛ no nkuran sɛ ɔne ne ho nni brɛbrɛ. Yesu nim sɛ eyi nnyɛ n’Agya apɛde. Ɛsɛ sɛ otumi de ne ho bɔ afɔre wɔ n’asetram, ɛnyɛ sɛ ɔbɛhwehwɛ ahotɔ ama ne ho. (Mateo 20:28) Petro abɛyɛ hintidua ama asetra kwan a ɛte saa; ne mmɔborohunu a efi adwempa mu no abɛyɛ afiri.a Nanso Yesu hu no pefee sɛ sɛ ɔma asetra a afɔrebɔ nnim ho kwan a, ɔbɛhwere Onyankopɔn dom denam Satan afiri a ɛyɛ hu bi a ɔbɛhwe mu so.

 4. Dɛn nti na na asetra a anigyede a ɛtra so wom mfata Yesu ne n’akyidifo no?

⁴ Enti, na ehia sɛ wosiesie Petro nsusuwii. Ná ne nsɛm a ɔka kyerɛɛ Yesu no yɛ onipa adwene, ne ɛnyɛ Onyankopɔn de. Ná Yesu mpɛ asetra a wɔyɛ nneɛma ntraso de gye ani, ɔkwan tiawa a wɔde fi ɔhaw mu; na na ɔmpɛ sɛ n’akyidifo nso benya asetra a ɛte saa, efisɛ afei Yesu ka kyerɛ Petro ne asuafo a aka no sɛ: “Sɛ obi pɛ sɛ odi m’akyi a, ma ɔmpa ne ho akyi, na ɔmfa n’asɛndua, na onni m’akyi daa.”​—Mateo 16:24, NW.

 5. (a.) Dɛn ne asɛnnennen a ɛwɔ tra a obi betra ase sɛ Kristoni mu? (b) Ɛsɛ sɛ Kristoni yɛ krado ma ahiade abiɛsa bɛn?

⁵ Yesu tĩ asɛmti titiriw yi mu ka mpɛn pii: Kristofo asetra ho asɛnnennen no. Sɛnea ɛbɛyɛ na Kristofo ayɛ Yesu akyidifo no, ɛsɛ sɛ wɔde ho a wɔde bɔ afɔre honhom som Yehowa sɛnea wɔn Kannifo no yɛe no. (Mateo 10:37-39) Enti, ɔbobɔ ahiade abiɛsa a ɛsɛ sɛ Kristoni yɛ krado sɛ ɔbɛyɛ din: (1) ɔmpa ne ho akyi, (2) ɔmfa n’asɛndua, na (3) onni n’akyi daa.

“Sɛ Obi Pɛ sɛ Odi M’akyi A”

 6. (a) Ɔkwan bɛn so na obi pa ne ho akyi? (b) Hena na ɛsɛ sɛ yɛsɔ n’ani sen sɛ yɛbɛsɔ yɛn ankasa ani?

⁶ Dɛn na sɛ obi bɛpa ne ho akyi no kyerɛ? Ɛkyerɛ sɛ ɛsɛ sɛ obi pow ne ho korakora, owu bi a obi de ba ne ho so. Nea Hela asɛmfua a wɔkyerɛ ase ‘pa ho akyi’ no kyerɛ titiriw ne “sɛ wobɛka dabi”; ɛkyerɛ “sɛ wɔbɛpa akyi korakora.” Enti sɛ wugye Kristofo asetra ho asɛnnennen no tom a, wufi wo pɛ mu de wo botae ahorow, w’ahotɔ, w’akɔnnɔde horow, w’anigye, ne anigyede horow bɛbɔ afɔre. Sɛnea ɛte no, wode wo nkwa nyinaa ne nea ɛka ho nyinaa ma Yehowa Nyankopɔn daa. Obi ho akyi a ɔbɛpa no kyerɛ pii sen anigyede ahorow a ɔde kame ne ho bere ne bere mu. Mmom no, ɛkyerɛ sɛ ɛsɛ sɛ obi de n’ankasa ho ma Yehowa. (1 Korintofo 6:19, 20) Obi a wapa ne ho akyi no nsɔ n’ankasa ani, na mmom Onyankopɔn. (Romafo 14:8; 15:3) Ɛkyerɛ sɛ n’asetram bere biara no ɔka dabi kyerɛ pɛsɛmenkominya akɔnnɔ ahorow, na ɔka yiw kyerɛ Yehowa.

 7. Dɛn ne Kristoni asɛndua no, na ɔkwan bɛn so na ɔsoa?

⁷ Enti, sɛ wobɛfa w’asɛndua no yɛ aniberesɛm. Asɛndua a obi so no yɛ adesoa ne owu ho sɛnkyerɛnne. Kristoni no wɔ ɔpɛ sɛ, sɛ ɛho behia sɛ ohu amane, anaa n’anim gu ase, anaa wɔyɛ no ayayade, anaa wokum no mpo esiane sɛ ɔyɛ Yesu Kristo akyidini nti a, ɔbɛma aba saa. Yesu kae sɛ: “Nea ɔmfa n’asɛndua na onni m’akyi no, ɔnsɛ me.” (Mateo 10:38) Ɛnyɛ wɔn a wohu amane nyinaa na wɔafa asɛndua no. Amumɔyɛfo “yaw” dɔɔso nanso wonkura asɛndua biara. (Dwom 32:10) Nanso, Kristofo asetra yɛ asetra a wokura asɛndua wɔ ɔsom a wɔde ma Yehowa a afɔrebɔ wom mu.

 8. Asetra nhwɛso bɛn na Yesu yɛ maa n’akyidifo?

⁸ Nea etwa to a Yesu kae sɛ yɛnyɛ ne sɛ yenni n’akyi daa. Ɛnyɛ sɛ Yesu hwehwɛ sɛ yegye nea ɔkyerɛkyerɛe no tom na yɛkyerɛ mu gyidi nko, na mmom sɛ yebedi nhwɛso a ɔyɛe no akyi daa nso. Na dɛn ne n’asetram nhwɛso atitiriw a ɛdaa adi no? Bere a ɔde ahyɛde a ɛtwa to no maa n’akyidifo no, ɔkae sɛ: ‘Enti monkɔ nkɔyɛ asuafo, na monkyerɛkyerɛ wɔn sɛ wonni nea m’ahyɛ mo no nyinaa so.’ (Mateo 28:19, 20) Yesu kaa Ahenni no ho asɛmpa, na ɔkyerɛkyerɛɛ ho ade. Saa ara na n’asuafo a wɔbɛn no, ne nokwarem no, Kristofo asafo a edi kan no nyinaa yɛe. Adwuma yi a wɔde nsi yɛe ne wiase no fã a wɔanyɛ no maa wiase no de ɔtae ne ɔsɔretia baa wɔn so, na ɛmaa wɔn asɛndua no mu yɛɛ duru yiye sɛ wɔbɛsoa.​—Yohane 15:19, 20; Asomafo no Nnwuma 8:4.

 9. Ɔkwan bɛn so na Yesu ne afoforo dii?

⁹ Nhwɛso foforo a ɛda adi yiye wɔ Yesu asetra mu ne ɔkwan a ɔfaa so ne afoforo dii no. Ná ɔwɔ ayamye na na ‘odwo na ɔbrɛ ne ho ase koma mu.’ Enti, n’atiefo tee nka sɛ wɔayɛ den wɔ honhom mu, na wɔn nkyɛn a na ɔwɔ no hyɛɛ wɔn nkuran. (Mateo 11:29) Wanhunahuna wɔn ma wɔanni n’akyi, anaa wanhyehyɛ ɔkwan a wɔbɛfa so ayɛ saa ho mmara pii; wankanyan afobu nkate bi nso wɔ wɔn mu na ahyɛ wɔn ma wɔayɛ n’asuafo. Ɛmfa ho sɛ na wɔn asetra yɛ ho a wɔde bɔ afɔre de no, wɔdaa nokware anigye adi. Wiase honhom a wɔyɛ ade tra so, na ɛhyɛ “nna a edi akyiri” agyirae no bɔ eyi abira dɛn ara!​—2 Timoteo 3:1-4.

Nya Yesu Ho a Ɔde Bɔɔ Afɔre Honhom no bi na Kura Mu

10. (a) Sɛnea Filipifo 2:5-8 kyerɛ no, ɔkwan bɛn so na Kristo paa ne ho akyi? (b) Sɛ yɛyɛ Kristo akyidifo a, dɛn adwene na ɛsɛ sɛ yɛda no adi?

¹⁰ Yesu ankasa yɛɛ nhwɛso wɔ ho akyi a wɔpa mu. Ɔfaa n’asɛndua na ɔsoaa no daa denam n’Agya apɛde a ɔyɛe no so. Paulo kyerɛw Kristofo a wɔwɔ Filipi no sɛ: “Momma adwene a ɛwɔ Kristo Yesu mu no ntra mo mu bi. Ɔno na ɔwɔ Onyankopɔn tebeam de, nanso wammu no mfasode sɛ ɔne Nyankopɔn sɛ, na mmom oyii ne mu guu hɔ faa akoa tebea too ne ho so dan nnipa sɛso, na sɛ ɔyɛɛ n’ade fae no, wohuu no sɛ onipa, ɔbrɛɛ ne ho ase yɛɛ osetie de kosii wu mu, asɛndua ho wu po.” (Filipifo 2: 5-8) Hena na obetumi apa ne ho akyi korakora asen saa? Sɛ woyɛ Kristo dea na woyɛ n’akyidifo no mu biako a, ɛsɛ sɛ adwene koro yi ara tra wo mu.

11. Obi ho a ɔde bɔ afɔre wɔ asetra mu no kyerɛ sɛ ɔtra ase ma hena?

¹¹ Ɔsomafo foforo, Petro, ka kyerɛ yɛn sɛ esiane sɛ Yesu huu amane na owu maa yɛn nti, ɛsɛ sɛ Kristofo de honhom a na Kristo wɔ no ara bi hyehyɛ wɔn ho sɛ asraafo a wɔasiesie wɔn ho yiye. Ɔkyerɛw sɛ: “Na afei, sɛ Kristo ahu amane ɔhonam mu yi, mo nso momfa adwenkoro no ara mmia mo ho, efisɛ nea wahu ɔhonam mu amane no agyae bɔneyɔ, na ɔhonam mu asetra bere a aka no, wantra ase amma nnipa akɔnnɔ bio, na mmom watra ase ama Onyankopɔn apɛde.” (1 Petro 3:18; 4:1, 2) Yesu ho a ɔde bɔɔ afɔre asetra no daa sɛnea ɔte nka wɔ Onyankopɔn apɛde ho no adi pefee. Ná n’ahofama no di mu, na ɔde n’Agya apɛde dii n’ankasa de anim bere nyinaa, kosii animguase wu mpo mu.​—Mateo 6:10; Luka 22:42.

12. So na Yesu bu ho a wɔde bɔ afɔre asetra sɛ enye? Kyerɛkyerɛ mu.

¹² Ɛwom sɛ na Yesu ho a ɔde bɔɔ afɔre no yɛ den na egyee mmɔdenbɔ de, nanso wammu no sɛ biribi a enye. Mmom no, Yesu de anigye brɛɛ ne ho ase maa ɔsoro apɛde. Ná n’Agya apɛde a ɔbɛyɛ no te sɛ aduan ma no. Onyaa abotɔyam ankasa fii mu, te sɛ nea obi nya fi aduan a ɛyɛ dɛ mu no. (Mateo 4:4; Yohane 4:34) Enti, sɛ wopɛ sɛ w’asetra yɛ anigye ankasa a, nea ɛsɛ sɛ woyɛ ara ne sɛ wubedi Yesu nhwɛso no akyi denam n’adwene a wubenya bi no so.

13. Ɔkwan bɛn so na ɔdɔ ne ade titiriw a ɛkanyan ho a wɔde bɔ afɔre honhom?

¹³ Dɛn ankasa na ɛkanyan ho a wɔde bɔ afɔre honhom? Ne tiaa mu no, ɔdɔ. Yesu kae sɛ: “Dɔ [Yehowa] wo Nyankopɔn koma nyinaa mu ne wo kra nyinaa mu ne w’adwene nyinaa mu. Eyi ne mmara no mu kɛse ne nea edi kan. Na nea etia abien te sɛ ɛno: Dɔ wo yɔnko sɛ wo ho!” (Mateo 22:37-39) Kristoni bi ntumi nhwehwɛ n’ankasa apɛde, na bere koro no ara wadi saa nsɛm no so. Ɛsɛ sɛ ɔdɔ a ɔwɔ ma Onyankopɔn ne nea ɔwɔ ma ne yɔnko titiriw na ɛkyerɛ n’ankasa anigye ne n’apɛde kwan. Ɛno ne ɔkwan a Yesu faa so traa ase, na ɛno na ɔhwehwɛ fi n’akyidifo hɔ.

14. (a) Asɛyɛde ahorow bɛn na wɔakyerɛkyerɛ mu wɔ Hebrifo 13:15, 16? (b) Dɛn na ɛhyɛ yɛn nkuran ma yɛde nsi ka asɛmpa no?

¹⁴ Ná ɔsomafo Paulo te ɔdɔ ho mmara yi ase. Ɔkyerɛw sɛ: “Enti momma yɛmfa no so mmɔ Onyankopɔn ayeyi afɔre daa, ɛne anofafa a ɛbɔ no abodin no aba. Na yiyeyɛ ne adekyɛ na mommma mo ani mmpa so, efisɛ saa afɔrebɔ no sɔ Onyankopɔn ani.” (Hebrifo 13:15, 16) Kristofo mfa mmoa ne nea ɛtete saa mmɔ afɔre mma Yehowa; enti, wonhia nnipa asɔfo wɔ honam fam asɔrefi bi mu na wɔadi wɔn anim wɔ wɔn som mu. Kristo Yesu so na yɛnam bɔ yɛn ayeyi afɔre no. Na ɛnam saa ayeyi afɔrebɔ no, ne din a wɔbɔ no baguam, no so tititiw na yɛkyerɛ sɛ yɛdɔ Onyankopɔn. Honhom a yɛda no adi a pɛsemenkominya nnim no titiriw hyɛ yɛn nkuran ma yɛde nsi ka asɛmpa no, na yɛbɔ mmɔden sɛ yɛbɛyɛ krado bere nyinaa sɛ yɛde yɛn anofafa aba bɛma Onyankopɔn. Saa kwan yi so no yɛkyerɛ ɔdɔ ma yɛn yɔnko nso.

Ho a Wɔde bɔ Afɔre de Nhyira Horow Pii Ba

15. Ho a wɔde bɔ afɔre ho nsɛm a wɔde hwehwɛ koma mu bɛn na yebetumi abisa yɛn ho?

¹⁵ Gye bere susuw nsemmisa a edidi so yi ho hwɛ: So me mprempren asetra kwan no da ho a wɔde bɔ afɔre adi? So me botae horow ne asetra a ɛte saa hyia? So m’abusua mufo renya honhom mu mfaso fi me nhwɛso mu? (Fa toto 1 Timoteo 5:8 ho.) Na nyisaa ne akunafo nso ɛ? So wɔn nso wonya mfaso fi ho a wɔde bɔ afɔre honhom a meda no adi no mu? (Yakobo 1:27) So metumi ama bere a mede bɔ baguam ayeyi afɔre no adɔɔso? So metumi apere adu akwampae, Betel, anaa asɛmpatrɛw ɔsom adwuma hokwan no ho, anaa metumi akɔsom wɔ baabi a wohia Ahenni adawurubɔfo wɔ hɔ kɛse?

16. Ɔkwan bɛn so na nyansa betumi aboa yɛn ma yɛde yɛn ho abɔ afɔre wɔ asetra mu?

¹⁶ Ɛtɔ mmere bi a, nyansa kakraa bi ho hia na ama woatumi de ho a wɔde bɔ afɔre honhom ayɛ nea wubetumi biara wɔ Yehowa a wosom no no mu. Sɛ́ nhwɛso no, na Janet a ɔyɛ daa ɔkwampaefo wɔ Ecuador no yɛ bere nyinaa honam fam adwuma. Ankyɛ na ne bere nhyehyɛe maa ɛyɛɛ den sɛ ɔde anigye honhom bedu daa akwampae nnɔnhwerew no ho. Osii gyinae sɛ ɔbɛkyerɛkyerɛ asɛm no mu akyerɛ n’adwumawura, na ɔsrɛe sɛ ɔntew nnɔnhwerew a ɔde yɛ adwuma no so. Esiane sɛ wampene sɛ ɔbɛtew bere a ɔde yɛ adwuma no so nti, afei ɔfaa Maria a na ɔrehwehwɛ adwuma a wɔde bere fã yɛ na ama watumi ayɛ ɔkwampaefo ne no kɔe. Wɔn baanu kae sɛ wɔde bere fã bɛyɛ adwuma, na wɔakyɛ da mu adwuma. Adwumawura no penee wɔn abisade no so. Mprempren, anuanom mmea baanu nyinaa yɛ akwampaefo. Bere a Kaffa a na ɔno nso brɛ wɔ adwuma a wɔde bere nyinaa yɛ wɔ adwuma koro no ara mu, na ne ho kyere no ansa na watumi adu n’akwampae nnɔnhwerew no ho no huu mfaso a afi mu aba no, ɔfaa Magali ne no kɔɔ hɔ, na wobisaa hokwan saa ara. Wɔpenee ɛno nso so. Enti, anuanom mmea baanan na wɔatumi ayɛ akwampae adwuma, sen sɛ anka baanu a wɔreyɛ agyae bɛyɛ. Nyansa ne nneɛma a wofi ɔpɛ mu yɛ de mfaso bae.

17-21. Ɔkwan bɛn so na awarefo bi susuw wɔn asetram atirimpɔw ho bio, na dɛn na efii mu bae?

¹⁷ Afei, susuw ho a wɔde bɔ afɔre asetra kwan a Evonne adi akyi mfe du ni no ho. Ɔkyerɛw nea edi so yi kɔmaa Ɔwɛn Aban Asafo no wɔ May 1991 mu:

¹⁸ “Wɔ October 1982 no, me ne m’abusuafo kɔhwehwɛɛ Brooklyn Betel. Ɛhɔ a mihui no ma minyaa ɔpɛ sɛ mede me ho bɛma ayɛ adwuma wɔ hɔ. Mekenkan abisade kratasin bi, na mibuu asɛmmisa titiriw bi, ‘Wɔ asram asia a atwam ni no, nnɔnhwerew nkyekyem ahe na wode ayɛ ɔsom adwuma no ɔsram biara? Sɛ nnɔnhwerew dodow no nnu du a, kyerɛ nea enti a ɛte saa.’ M’annya anoyi a ntease wom biara, enti mede botae bi sii hɔ na mede asram anum duu ho.

¹⁹ “Ɛwom sɛ minyaa anoyi ahorow bi maa nea enti a na minnyɛ akwampae adwuma no de, nanso bere a mekenkan 1983 Yearbook of Jehovah’s Witnesses no, migye toom sɛ afoforo adi nsɛnnennen a ɛso sen me de no so na wɔatumi ayɛ akwampae adwuma no. Enti, wɔ April 1, 1983 mu no, migyaee me bere nyinaa adwuma a na sika wom pii no, na mebɛyɛɛ ɔkwampaefo boafo, na mede me ho hyɛɛ daa akwampae adwuma no mu wɔ September 1, 1983 mu.

²⁰ “Minyaa hokwan waree asafo mu ɔsomfo bi a ɔyɛ nsi wɔ April 1985 mu. Mfe abiɛsa akyi no, ɔmantam nhyiam ase ɔkasa bi a ɛfa akwampae adwuma ho no kaa me kunu ma ɔka guu m’asom sɛ, ‘So ntease bi hɔ a enti ɛnsɛ sɛ ebedu September 1 no na mafi akwampae adwuma ase anaa?’ Ɔbɛkaa me ho wɔ adwuma yi mu mfe abien a edii hɔ no mu.

²¹ “Me kunu de ne ho mae nso sɛ ɔbɛyɛ ɔdansi adwuma adapɛn abien wɔ Brooklyn Betel, na obisaa Amanaman Ntam Ɔdansi Nhyehyɛe no ho kwan. Enti wɔ May 1989 mu no yɛkɔɔ Nigeria kɔboaa baa dwumadibea ɔdansi ɔsram biako. Ɔkyena, yebetu kwan akɔ Germany, a wɔbɛyɛ tumi krataa a ɛma wotumi kɔ aman afoforo so ho nhyehyɛe ma yɛatumi akɔ Poland. Ɛyɛ yɛn anigye sɛ yɛrenya ɔdansi adwuma a ɛho hia yiye saa mu kyɛfa, na yɛrenya bere nyinaa ɔsom adwuma no fã foforo yi mu kyɛfa.”

22. (a) Ɔkwan bɛn so na te sɛ Petro no, yebetumi ayɛ hintidua a yennim? (b) Yehowa a yɛde ho a wɔde bɔ afɔre honhom bɛsom no no nnyina dɛn so?

²² Sɛ w’ankasa wuntumi nyɛ akwampae adwuma no a, so wubetumi ahyɛ wɔn a wɔwɔ bere nyinaa ɔsom adwuma no mu nkuran ma wɔakɔ so akura wɔn hokwan no mu, na ebia woaboa wɔn ma wɔayɛ saa anaa? Anaa wobɛyɛ te sɛ abusuafo anaa nnamfo a wɔwɔ adwempa, a te sɛ Petro no, ebia wɔbɛka akyerɛ bere nyinaa ɔsomfo sɛ ɔnnhaw ne ho pii, ɔne ne ho nni ayamye so, a wonhu sɛnea ɛno betumi ayɛ hintidua no anaa? Nokwarem no, sɛ ɔkwampaefo bi akwahosan da asiane kɛse mu anaa sɛ ɔrebu n’ani gu Kristofo asɛyɛde ahorow so a, ebia ebehia sɛ ogyae bere nyinaa ɔsom adwuma no kakra. Yehowa a yɛde ho a wɔde bɔ afɔre honhom bɛsom no no nnyina abodin bi te sɛ ɔkwampaefo, Betelni, anaa afoforo so. Mmom no, egyina nnipa ko a yɛyɛ so​—sɛnea yesusuw nsɛm ho, nea yɛyɛ, sɛnea yɛne afoforo di, sɛnea yɛbɔ yɛn bra.

23. (a) Yɛbɛyɛ dɛn akɔ so anya anigye wɔ Onyankopɔn mfɛfo adwumayɛfo a yɛyɛ no mu? (b) Awerɛhyem bɛn na yenya wɔ Hebrifo 6:10-12?

²³ Sɛ yɛwɔ ho a wɔde bɔ afɔre honhom ampa a, yebenya anigye sɛ yɛyɛ Onyankopɔn mfɛfo adwumayɛfo. (1 Korintofo 3:9) Yebenya ahotɔ a efi nim a yenim sɛ yɛrema Yehowa koma atɔ ne yam mu ba no. (Mmebusɛm 27:11) Na yɛwɔ awerɛhyem sɛ Yehowa werɛ remfi yɛn anaa ɔmpow yɛn da bere tenten a yɛkɔ so di no nokware no.​—Hebrifo 6:10-12.

[Ase hɔ asɛm]

Dɛn ne W’adwene?

◻ Ɔkwan bɛn so na Petro bɛyɛɛ hintidua maa ho a wɔde bɔ afɔre asetra a onnim?

◻ Dɛn na obi ho akyi a ɔbɛpa no kyerɛ?

◻ Ɔkwan bɛn so na Kristoni soa n’asɛndua?

◻ Ɔkwan bɛn so na yebetumi anya ho a wɔde bɔ afɔre honhom na yɛama atra hɔ?

◻ Dɛn titiriw na ɛkanyan ho a wɔde bɔ afɔre honhom?

[Mfonini wɔ kratafa 10]

Wowɔ ɔpɛ sɛ wopa wo ho akyi, wofa w’asɛndua, na wudi Yesu akyi daa?