Yehowa Nguan a Wɔsom Bo a Wɔyɛn Wɔn Brɛbrɛ

MPANYIMFO no yɛɛ komm tiei. Ná wɔatwa bɛyɛ kilomita 50 afi Efeso aba Mileto rebegye ahyɛde ahorow afi ɔsomafo Paulo hɔ. Afei wɔn werɛ howee sɛ wɔtee sɛ eyi ne bere a etwa to a wobehu no. Enti na wonim sɛ nsɛm a ebedi akyi no bɛyɛ nea ɛho hia kɛse: “Monhwɛ mo ho ne nguankuw nyinaa a honhom kronkron de mo asiei wɔn so ahwɛfo sɛ monyɛn Onyankopɔn asafo a ɔde n’ankasa [Ba] mogya anya wɔn no yiye.”​—Asomafo no Nnwuma 20:25, 28, 38.

Ɛda adi sɛ nguanhwɛfo ho asɛm tiawa a Paulo kae no de nsɛm pii maa saa Efesofo mpanyimfo no. Ná wonim sɛnea wɔyɛ nguanhwɛ adwuma wɔ nkuma a ɛtwa hɔ ahyia no ase. Ná wonim nguanhwɛfo ho nsɛm pii a ɛwɔ Hebri Kyerɛwnsɛm no mu no nso. Na na wonim sɛ Yehowa yɛɛ ne ho sɛ ne nkurɔfo Guanhwɛfo.​—Yesaia 40:10, 11.

Paulo kaa wɔn ho asɛm sɛ “nguankuw” no mu “ahwɛfo,” ne ‘asafo no’ “ahwɛfo.” Bere a asɛmfua “ahwɛfo” kyerɛ nea wɔn dwumadi yɛ no, asɛmfua “oguanhwɛfo” kyerɛ ɔkwan a ɛsɛ sɛ wɔfa so yɛ ɔhwɛ adwuma no. Yiw, na ɛsɛ sɛ ahwɛfo yɛn asafo no muni biara sɛnea oguanhwɛfo bɛhwɛ ne nguankuw so ara pɛ.

Ɛnnɛ, mpanyimfo kakraa bi na wɔwɔ nguanhwɛ ankasa mu osuahu. Nanso Bible no ka nguan ne nguanhwɛfo ho nsɛm pii, titiriw wɔ sɛnkyerɛnne kwan so araa ma tumi wɔ Paulo nsɛm no mu bere nyinaa. Na yebetumi asua pii afi tete nguanhwɛfo a na wɔwɔ Onyankopɔn anim dom ho kyerɛwtohɔ ahorow mu. Wɔn nhwɛso a ɛda nsow no betumi aboa nnɛyi mpanyinfo ma wɔahu su horow a ɛsɛ sɛ wonya na ama wɔatumi ahwɛ Onyankopɔn asafo no so.

Oguanhwɛfo Kokodurufo Dawid

Sɛ yesusuw Bible mmere so nguanhwɛfo ho a, ɛda adi sɛ yɛbɛkae Dawid, efisɛ osii so sɛ oguanhwɛfo. Asuade ahorow a yedi kan nya fi Dawid asetram no mu biako ne sɛ, oguanhwɛfo a obi yɛ no nyɛ dibea bi a anuonyam wom. Nokwarem no, bere a odiyifo Samuel bae sɛ ɔrebɛsra Yisai ba bi sɛ nea obedi Israel so hene daakye no, mfiase no wobuu wɔn ani guu aberante Dawid so koraa. Yehowa pow ne nuanom mmarima mpanyimfo no ansa na wɔreka Dawid, a na ɔwɔ afuw mu ‘rehwɛ nguan’ no ho asɛm. (1 Samuel 16:10, 11) Nanso, mfe a Dawid dii sɛ oguanhwɛfo no siesiee no maa Israel man sohwɛ a na ɛyɛ adwumaden no. Dwom 78: 70, 71 ka sɛ: ‘Yehowa yii n’abofra Dawid, na ɔfaa no fii nguannan mu sɛ ɔmmɛyɛn Yakob ne ne nkurɔfo.’ Sɛnea ɛfata no, Dawid kyerɛw Dwom a ɛto so 23 a emu nsɛm yɛ dɛ na agye din no, na ɔde nsɛm yi fii ase sɛ: “[Yehowa] ne me hwɛfo.”

Te sɛ Dawid no, ɛsɛ sɛ mpanyimfo a wɔwɔ Kristofo asafo no mu no som sɛ ahwɛfo nkumaa a wɔwɔ ahobrɛase, na ɛnsɛ sɛ wɔhwehwɛ anuonyam a ɛnsɛ. Sɛnea Paulo kyerɛw kɔmaa Timoteo no, wɔn a wɔpere du ɔhwɛ asɛyɛde ho no ‘pɛ adwuma pa,’ na ɛnyɛ anuonyam.​—1 Timoteo 3:1.

Ɛwom sɛ na Dawid adwuma sɛ oguanhwɛfo ankasa no ba fam de, nanso na ɛtɔ da bi a, egye akokoduru kɛse. Sɛ́ nhwɛso no, bere a da koro bi gyata, ne bere foforo nso, sisi bɛkyeree Dawid papa nguan no, ɔde akokoduru tow hyɛɛ mmoa akɛse no so kum wɔn. (1 Samuel 17:34-36) Sɛ yesusuw sɛ gyata tumi kum mmoa a wɔyɛ akɛse koraa sen ɔno ankasa no ho a, na eyi yɛ akokoduru kɛse a ɔdaa no adi. Na Siriafo asisi nnodowee a na wɔwɔ Palestina a wɔn mu duru bɛyɛ kilogram 140 no betumi de wɔn tɔte a ahoɔden wom no abɔ ɔforote pɛnkoro ma wawu.

Sɛnea na Dawid de akokoduru dwen ne papa nguan ho no yɛ nhwɛso fɛfɛ ma ahwɛfo a wɔwɔ Kristofo asafo no mu. Ɔsomafo Paulo bɔɔ Efesofo mpanyimfo no kɔkɔ wɔ “mpataku bɔne” a “wɔrenkyɛe nguankuw no so” ho. (Asomafo no Nnwuma 20:29) Wɔ nnɛ bere yi mu nso, ɛtɔ mmere bi a ebehia sɛ Kristofo ahwɛfo da akokoduru adi na wɔatumi abɔ Yehowa nguan honhom mu yiyedi ho ban.

Bere a ɛsɛ sɛ wɔde akokoduru bɔ nguan no ho ban no, ɛsɛ sɛ wɔne wɔn di brɛbrɛ nso de suasua oguanhwɛfo a ɔwɔ ɔdɔ Dawid ne Oguanhwɛfo Pa, Yesu Kristo. (Yohane 10:11) Bere a mpanyimfo nim sɛ nguankuw no yɛ Yehowa dea no, ɛnsɛ sɛ wɔhyɛ nguan no so katee, na ‘wodi Onyankopɔn asafotow no so bakoma.’​—1 Petro 5:2, 3; Mateo 11:28-30; 20:25-27.

Akontaa a Wobu Kyerɛ

Ná tete agya Yakob nso yɛ oguanhwɛfo foforo a wonim no yiye. Ná obu ne ho ankasa sɛ oguan biara a wɔde no ahyɛ ne nsa ho asɛyɛde da no so. Ná Yakob de nokwaredi ahwɛ n’asebarima Laban nguankuw so araa ma mfe 20 a ɔde yɛɛ adwuma maa no akyi no, otumi kae sɛ: “Wo nguammere ne wo mmirekyi ampɔn, na wo nguan mu adwennini nso, manni bi. Wɔn a mmoa kum wɔn no mamfa mammrɛ wo, me na mituaa so ka. Nea wowiaa no awia ne nea wowiaa no anadwo, me nsam na wubisae.”​—Genesis 31:38, 39.

Kristofo ahwɛfo dwen nguan a yɛn kra Hwɛfo no, Yehowa Nyankopɔn, ‘de n’ankasa ne Ba mogya atɔ wɔn no’ ho kɛse sen saa koraa. (Asomafo no Nnwuma 20:28; 1 Petro 2:25; 5:4) Paulo sii asɛyɛde a emu yɛ duru yi so dua bere a ɔkaee Hebrifo Kristofo no sɛ mmarima a wodi asafo no anim no “na wɔwɛn mo kra sɛ wɔn a wobebu ho akontaa” no.​—Hebrifo 13:17.

Yakob nhwɛso no kyerɛ nso sɛ oguanhwɛfo adwuma nni bere pɔtee a wɔde yɛ. Ɛyɛ adwuma a wɔyɛ no bere nyinaa, na ɛtaa gye ho a wɔde bɔ afɔre. Ɔka kyerɛɛ Laban sɛ: “Sɛ ɛyɛɛ me ni: ahohuru den me awia, na awɔw dee me anadwo, na m’ani saree dwe.”​—Genesis 31:40.

Ɛda adi sɛ eyi te saa wɔ Kristofo mpanyimfo pii a wɔwɔ ɔdɔ fam nnɛ sɛnea osuahu a edi so yi kyerɛ no. Wogyee onua bi too ayaresabea fã bi a wɔhwɛ ɔyare a emu yɛ den wɔ hɔ, bere a wohyiaa nsɛnnennen wɔ oprehyen a wɔyɛe n’amemene a ahon ho akyi no. N’abusuafo yɛɛ nhyehyɛe sɛ wɔbɛtra ne nkyɛn wɔ ayaresabea hɔ awia ne anadwo. Sɛnea ɛbɛyɛ na mpanyimfo a wɔwɔ hɔ no mu biako de denhyɛ ne nkuranhyɛ ama no no, ɔsesaa ne bere nhyehyɛe a na ɛmma onnya adagyew no na watumi akɔsra ɔyarefo no ne n’abusua da biara. Nanso esiane ayaresabea no ayaresa nhyehyɛe a ɛkɔ akyiri no nti, antumi anyɛ yiye bere nyinaa sɛ ɔbɛkɔ hɔ awia bere. Ná eyi kyerɛ sɛ ɛsɛ ɔpanyin no taa kɔ ayaresabea hɔ ɔdasum. Nanso ɔde anigye kɔɔ hɔ anadwo biara. Ɔpanyin no kae sɛ: “Mihui sɛ ɛsɛ sɛ mekɔ hɔ bere a eye ma ɔyarefo no, na ɛnyɛ bere a eye ma me.” Bere a onua no ho tɔɔ no sɛnea ɛsɛ na wɔde no kɔɔ ayaresabea no fã foforo no, ɔpanyin no toaa ne da biara nsrahwɛ a ɛhyɛ nkuran no so.

Nea Mose Suaa sɛ Oguanhwɛfo

Bible no ka Mose ho asɛm sɛ “odwo pii sen nnipa a wɔwɔ asase so nyinaa.” (Numeri 12:3) Nanso, kyerɛwtohɔ no kyerɛ sɛ na ɔnte saa bere nyinaa. Bere a na ɔyɛ aberante no, na wakum Misrini bi esiane sɛ na wabɔ ne yɔnko Israelni bi nti. (Exodus 2: 11,12) Obi a odwo renyɛ saa da! Nanso, na Onyankopɔn de Mose bedi dwuma akyiri yi ma wadi ɔman a nnipa ɔpepem pii wom afa sare no so akɔ Bɔhyɛ Asase no so. Ɛnde ɛda adi pefee sɛ na Mose hia ntetee pii.

Bere a na wanya wiase ntetee dedaw wɔ “Misrifo nyansa nyinaa” mu no, na pii ho hia na watumi ayɛn Yehowa nguankuw no. (Asomafo no Nnwuma 7:22) Ntetee foforo yi betumi ayɛ ntetee bɛn? Onyankopɔn maa Mose som sɛ oguanhwɛfo a ɔba fam wɔ Midian asase so mfirihyia 40. Bere a Mose hwɛɛ n’asebarima Yetro nguankuw no, onyaa su pa ahorow te sɛ boasetɔ, odwo, ahobrɛase, abodwokyɛre ne ahosodi. Osuae nso sɛ ɔbɛtwɛn Yehowa. Yiw, nguan ankasa a Mose hwɛɛ wɔn so no maa ɔfatae sɛ Israel man no hwɛfo pa.​—Exodus 2:15-8:1; Asomafo no Nnwuma 7:29, 30.

So eyinom nyɛ su koro no ara a ɔpanyin hia na watumi ahwɛ Onyankopɔn nkurɔfo so nnɛ? Yiw, efisɛ Paulo kaee Timoteo sɛ ‘ɛsɛ sɛ Awurade akoa dwo ma nnipa nyinaa, ohu kyerɛkyerɛ, ɔbrɛ ne ho ase bɔne ho, na ɔde odwo kɛse kyerɛ wɔn a wɔne no di asi nsɛm mu.’​—2 Timoteo 2:24, 25.

Ɛtɔ mmere bi a, ebia ɔpanyin bi bɛte huammɔdi nka esiane sɛ ɛyɛ den ma no sɛ obenya saa su horow yi sɛnea ɛfata nti. Nanso, ɛnsɛ sɛ n’abam bu. Sɛnea ne ɛte wɔ Mose fam no, ebia ebegye bere tenten na obi atumi anya su horow a ehia na wayɛ ɔhwɛfo pa no sɛnea ɛfata. Nanso bere bi akyi no, obenya mmɔdenbɔ a ɛte saa a efi komam no so akatua.​—Fa toto 1 Petro 5:10 ho.

Ebia sɛ́ ɔpanyin no, wɔmfa wo nni dwuma kɛse te sɛ afoforo. So ebia te sɛ Mose no, Yehowa rema wo kwan ma woanya su horow a ɛho hia bi sɛnea ɛfata? Ɛnsɛ sɛ wo werɛ fi da sɛ Yehowa ‘dwen wo ho.’ Nanso, ɛsɛ sɛ ɛtra yɛn adwene mu sɛ ehia sɛ ‘yɛbrɛ yɛn ho ase ma yɛn ho yɛn ho, efisɛ Onyankopɔn siw ahantanfo kwan, na ɔdom ahobrɛasefo.’ (1 Petro 5:5-7) Sɛ wode wo ho ma na wugye ntetee a Yehowa ma ho kwan no tom a, obetumi de wo adi dwuma kɛse sɛnea ɔyɛɛ Mose no ara pɛ.

Yehowa Nguan Nyinaa Som Bo

Ná Bible mmere so nguanhwɛfo a wotumi de ho to wɔn so, na wɔwɔ ɔdɔ no ani ku nguan no mu biara ho. Ɛsɛ sɛ honhom mu nguanhwɛfo yɛ sɛɛ ara. Eyi da adi pefee wɔ Paulo nsɛm yi mu: “Monhwɛ . . . nguankuw no nyinaa.” (Asomafo no Nnwuma 20:28) Ná “nguankuw no nyinaa” bɛfa henanom ho?

Yesu maa mfatoho bi faa ɔbarima bi a na ɔwɔ nguan ɔha nanso ɔyɛɛ ntɛm kɔhwehwɛɛ biako bi a wayera, na wasan de no aba nguankuw no mu ho. (Mateo 18:12-14; Luka 15:3-7) Saa ara na ɛsɛ sɛ ahwɛfo dwen asafo no muni biara ho. Asɛnka adwuma anaa Kristofo nhyiam horow a oguan bi nnya mu kyɛfa no nkyerɛ sɛ ɔnka nguankuw no ho bio. Ɔda so ara ka “nguankuw no nyinaa” a ɛsɛ sɛ mpanyimfo ‘bu wɔn ho akontaa’ kyerɛ Yehowa no ho.

Ebinom a na anka wɔne asafo no bɔ nanso wɔayɛ mmerɛw ho asɛm haw mpanyimfo kuw bi. Wɔkyerɛw saafo yi din, na wɔyɛɛ nhyehyɛe titiriw sɛ wɔbɛkɔ akɔsra wɔn na wɔaboa wɔn ma wɔasan aba Yehowa nguankuw no mu. Aseda bɛn ara na saa mpanyimfo yi de maa Onyankopɔn sɛ wɔ mfe abien ne fã ntam no, wotumi boaa nnipa 30 ma wɔyɛɛ hyew wɔ Yehowa som mu bio. Ná wɔn a wɔboaa wɔn sɛɛ yi mu biako ayɛ mmerɛw bɛyɛ mfe 17!

Nokwasɛm a ɛne sɛ wɔde ‘Onyankopɔn ankasa Ba no mogya’ na ɛtɔɔ nguan no nso si sɛnea asɛyɛde no mu yɛ duru no so dua. (Asomafo no nnwuma 20:28) Ɛbo kɛse biara nni hɔ a anka wobetumi de atɔ nguan a wɔsom bo yi asen eyi. Na susuw bere ne mmɔdenbɔ nyinaa a wɔde yɛ asɛnka adwuma no na wɔatumi ahu obiara a ɔte sɛ oguan aboa no no ho! So ɛnsɛ sɛ wɔbɔ mmɔden saa ara de kora wɔn nyinaa so wɔ Onyankopɔn nguankuw no mu? Nokwarem no, oguan biara a ɔwɔ asafo no mu som bo.

Sɛ nguankuw no muni de ne ho hyɛ bɔne a anibere wom mu mpo a, mpanyimfo no asɛyɛde nsakra. Wɔda so ara yɛ ahwɛfo a wodwen afoforo ho, wɔyɛ brɛbrɛ na wɔde odwo bɔ mmɔden sɛ ebetumi ayɛ yiye a, wobegye ɔbɔnefo no. (Galatifo 6:1, 2) Nea ɛyɛ awerɛhow no, wɔ tebea ahorow bi mu no, ɛbɛda adi sɛ asafo no muni bi mfi komam nni bɔne a anibere wom a wayɛ no ho awerɛhow. Sɛ ɛba saa a, ahwɛfo a wɔwɔ ɔdɔ wɔ Kyerɛwnsɛm mu asɛyɛde sɛ wɔbɔ nguankuw a aka no ho ban fi nkɛntɛnso bɔne yi ho.​—1 Korintofo 5:3-7, 11-13.

Nanso, Yehowa Nyankopɔn de nhwɛso a ɛyɛ pɛ ma de hu nguan a wɔayera mmɔbɔ. Yɛn Guanhwɛfo mmɔborohunufo no ka sɛ: “Nea wayera no, mɛhwehwɛ no, na nea wɔapam no no, mɛkɔ makɔfa no aba, na nea wabubu no, mɛkyekyere no, na nea ɔyare no, mɛhyɛ no den.” (Hesekiel 34:15, 16; Yeremia 31:10) Wɔayɛ nhyehyɛe a ɔdɔ wom bi de adi nhwɛso fɛfɛ yi akyi, na ama nnɛyi honhom mu nguanhwɛfo akɔsra wɔn a wɔatu wɔn, a ebia wobegye wɔn mmoa atom nnɛ no. Saa mmoborohunu a wɔde bɔ mmɔden hwehwɛ nguan a wɔayera no asow aba pa. Onuawa bi a wɔagye no aba asafo no mu bio kae sɛ: “Bere a mpanyimfo no bae no, na ɛno ne nkuranhyɛ a mihia na matumi asan aba.”

Akyinnye biara nni ho sɛ nsɛm a Paulo ka kyerɛɛ Efesofo mpanyimfo no wɔ Mileto no kyerɛ pii​—ma wɔne nnɛ ahwɛfo. Nguanhwɛfo ho asɛm a ɔkae no bɔɔ nkae wɔ su pa ahorow a ɛsɛ sɛ ɛda adi wɔ ahwɛfo ho no ho ​—su horow te sɛ ahobrɛase ne akokoduru, sɛnea ɔhene ne oguanhwɛfo Dawid yɛɛ ho nhwɛso no; asɛyɛde a obi ani beku ho ne ohwɛ a ahobammɔ wom, a ɛda adi wɔ sɛnea Yakob som awia ne anadwo mu no; ne ɔpɛ mu a wofi gye ntetee afoforo tom wɔ ahobrɛase mu, sɛnea Mose daa no adi no. Nokwarem no, Bible nhwɛso ahorow yi bɛboa asafo mpanyimfo ma wɔanya su horow a ehia na woatumi ‘ayɛn Onyankopɔn asafo a ɔde n’ankasa ne Ba mogya atɔ wɔn no,’ na wɔada no adi.