Mommma Obiara Nnsɛe Mo Bra Pa No

“Mommma wɔnnnaadaa mo! [Fekubɔne] sɛe ɔbra pa.” ​—1 KORINTOFO 15:33.

 1, 2. (a) Ɔsomafo Paulo tee nka dɛn wɔ Kristofo a na wɔwɔ Korinto no ho, na dɛn ntia? (b) Afotu pɔtee bɛn na yebesusuw ho?

NKATE a tumi wom bɛn ara na awofo dɔ yɛ sɛɛ yi! Ɛka awofo ma wodwen wɔn mma ho sen nneɛma afoforo, ɛma wɔkyerɛkyerɛ wɔn na ɛma wotu wɔn fo. Ɛwom sɛ ebia ɔsomafo Paulo ankasa anwo de, nanso ɔkyerɛw kɔmaa Kristofo a na wɔwɔ Korinto no sɛ: “Sɛ mowɔ ahwɛfo pedu Kristo mu mpo a, munni agyanom bebree; na me na Kristo Yesu mu menam asɛmpa no so mewoo mo.”​—1 Korintofo 4:15.

² Ná Paulo adikan akɔ Korinto, faako a ɔkaa asɛm no kyerɛɛ Yudafo ne Helafo no. Ɔboa ma wɔtee Korinto asafo no. Wɔ Paulo krataa foforo mu no, ɔde dwen a odwen wɔn ho no totoo ɔbagyigyefo ho, nanso na ɔte sɛ agya ma Korintofo no. (1 Tesalonikafo 2:7) Paulo tuu ne honhom mu mma no fo sɛnea agya ankasa a ɔwɔ ɔdɔ yɛ no. Wubetumi anya mfaso afi n’afotu a ɛte sɛ agya de a ɔde maa Kristofo a na wɔwɔ Korinto no mu: “Mommma wɔnnnaadaa mo! [Fekubɔne] sɛe ɔbra pa.” (1 Korintofo 15:33) Dɛn nti na Paulo kyerɛw eyi kɔmaa Korintofo no? Ɔkwan bɛn so na yebetumi de afotu no adi dwuma?

Afotu ma Wɔn ne Yɛn

 3, 4. Dɛn na yenim wɔ afeha a edi kan Korinto ne emu nnipa ho?

³ Wɔ afeha a edi kan mu no, Helani asase ho nsɛm ho ɔbenfo Strabo kyerɛwee sɛ: “Wɔka sɛ ‘sika’ wɔ Korinto efisɛ wodi gua wɔ hɔ, ɛda asasekɔn so, na ɛwɔ hyɛn gyinabea abien a biako kɔ Asia tee na ɔfoforo no kɔ Italy; na ɛma ɛyɛ mmerɛw sɛ wɔne aman abien no nyinaa bedi gua.” Mfe abien biara no, ná Isthmia Agumadi a agye din yiye no ma nnipa dɔm pii ba Korinto.

⁴ Ná kurow a ɛyɛ tumidi ahenkurow ne beae a wɔsom Helafo nyamewa Aphrodite kɛse wɔ hɔ yi mu nnipa te dɛn? Ɔbenfo T. S. Evans kyerɛkyerɛɛ mu sɛ: “Ebetumi aba sɛ [ná] nnipa a wɔwɔ hɔ dodow bɛyɛ 400,000. Ná wɔn ani abue, nanso na wɔn bra asɛe, kɛse mpo. . . . Nea ɛdaa adi kɛse wɔ Helafo a na wɔte Acha’ía ho ne sɛ, wɔde wɔn bere nyinaa hwehwɛɛ nyansa na wɔde ahopere hwehwɛɛ nneɛma foforo denneennen. . . . Ná wɔn ahopɛ su no betumi de fekusɛm aba ntɛm.”

 5. Ɔhaw bɛn na Korinto anuanom no hyiae?

⁵ Bere bi akyi no, wɔn a na wɔda so ara wɔ ahomaso adwene no de mpaepaemu baa asafo no mpo mu. (1 Korintofo 1:10-31; 3:2-9) Nea na ɛhaw adwene kɛse ne sɛ, ebinom kae sɛ: “Awufo sɔre nni hɔ.” (1 Korintofo 15:12; 2 Timoteo 2:16-18) Sɛnea na wɔn gyidi ankasa (anaa gyidi a ɛnteɛ) te biara no, na ɛsɛ sɛ Paulo de nkyerɛkyerɛmu a emu da hɔ ma wɔn ma wohu sɛ ‘wɔanyan Kristo afi awufo mu.’ Enti na Kristofo betumi agye adi sɛ Onyankopɔn ‘nam Awurade Yesu Kristo so de nkonim bɛma wɔn.’ (1 Korintofo 15:20, 51-57) Sɛ na wowɔ hɔ a, so anka mpaepaemu honhom no betumi anya wo so nkɛntɛnso?

 6. Ná Paulo afotu a ɛwɔ 1 Korintofo 15:33 no fa henanom ho titiriw?

⁶ Bere a Paulo de adanse a emu yɛ den a ɛkyerɛ sɛ wobenyan awufo rema no, ɔka kyerɛɛ wɔn sɛ: “Mommma wɔnnnaadaa mo! [Fekubɔne] sɛe ɔbra pa.” Adwene a ɛwɔ afotu yi akyi no fa wɔn a na wɔwɔ asafo no mu a na wonnye owusɔre nkyerɛkyerɛ no ntom no ho. So na wɔn adwenem na ɛyɛ wɔn nãã wɔ biribi a wɔnte ase ho ara kwa? (Fa toto Luka 24:38 ho.) Dabi. Paulo kyerɛwee sɛ, “mo mu binom ka sɛ owusɔre biara nni hɔ,” enti na wɔn a ɛfa wɔn ho no rekyerɛ sɛ wonnye ntom, na na ebetumi de ɔwae aba. Ná Paulo nim pefee sɛ wobetumi asɛe afoforo bra pa ne wɔn adwene.​—Asomafo no Nnwuma 20:30; 2 Petro 2:1.

 7. Ɔkwan biako bɛn so na yebetumi de 1 Korintofo 15:33 adi dwuma?

⁷ Ɔkwan bɛn so na yebetumi de Paulo kɔkɔbɔ a ɛfa fekubɔ ho no adi dwuma? Wanka sɛ ɛnsɛ sɛ yɛboa asafo no muni bi a ɛyɛ no den sɛ ɔbɛte Bible nkyekyem anaa nkyerɛkyerɛ bi ase. Nokwarem no, Yuda 22, 23 hyɛ yɛn nkuran sɛ yemfi mmɔborɔhunu mu mmoa komapafo a wɔwɔ adwenem naayɛ a ɛte saa no. (Yakobo 5: 19, 20) Nanso ɛda adi sɛ ɛsɛ sɛ yɛde Paulo afotu a ɛte sɛ agya de yi di dwuma bere a obi kɔ so kasa tia nea yenim sɛ ɛyɛ Bible mu nokware anaa ɔkɔ so ka nsɛm a ɛmfata a ɛkyerɛ sɛ onnye nni no. Ɛsɛ sɛ yɛhwɛ yiye wɔ fekuw a yɛne onipa a ɔte saa bɛbɔ ho. Akyinnye biara nni ho sɛ, sɛ obi pirim ne koma bɛyɛ ɔwaefo a, honhom mu nguanhwɛfo no bɛyɛ biribi de abɔ nguankuw no ho ban.​—2 Timoteo 2:16-18; Tito 3:10, 11.

 8. Sɛ obi ne yɛn nyɛ adwene wɔ Bible nkyerɛkyerɛ bi ho a, ɔkwan bɛn so na yebetumi de nhumu adi dwuma?

⁸ Yebetumi de Paulo afotu a ɛwɔ 1 Korintofo 15:33 a ɛte sɛ agya de no adi dwuma wɔ wɔn a wonni asafo no mu a wɔma atoro nkyerɛkyerɛ nya nkɔso no fam nso. Ɛbɛyɛ dɛn na ebia yɛne wɔn abɔ fekuw? Sɛ yɛanyɛ nyinyim wɔ wɔn a yebetumi aboa wɔn ma wɔasua nokware no ne wɔn a wogye akyinnye kwa na ama wɔatumi atrɛw atoro nkyerɛkyerɛ mu ho a, ebetumi aba saa. Sɛ́ nhwɛso no, yebetumi ahyia obi wɔ asɛnka mu a ɔne yɛn nyɛ adwene wɔ asɛm bi ho nanso ɛte sɛ nea ɔpɛ sɛ ahwehwɛ mu bio. (Asomafo no Nnwuma 17:32-34) Ɛnsɛ sɛ ɛno haw yɛn, efisɛ yɛde anigye kyerɛkyerɛ Bible mu nokwasɛm mu kyerɛ obiara a ofi ne komam pɛ sɛ ohu, na yɛsan kɔ ne nkyɛn kɔkyerɛ no ɛho adanse a ntease wom mpo. (1 Petro 3:15) Nanso, ebinom wɔ hɔ a wɔn ani nnye ho sɛ wɔbɛhwehwɛ Bible mu nokwasɛm.

 9. Sɛ obi gye yɛn akyinnye wɔ yɛn gyidi horow ho a, dɛn na ɛsɛ sɛ yɛyɛ wɔ ho?

⁹ Nnipa pii de nnɔnhwerew anaa adapɛn pii begye akyinnye, nanso ɛnyɛ wɔn adwene ne sɛ wɔrepɛ nokware no ahu. Wɔpɛ sɛ wɔsɛe obi gyidi ara kwa bere a wɔma nnipa hu sɛ wɔwɔ Hebri, Hela, anaa adannandi ho nimdeɛ. Adansefo binom a wɔne nnipa a wɔte sɛɛ ahyia ate nka sɛ wɔagye wɔn kyim na ama wɔne wɔn abɔ atoro som gyidi, nyansapɛ anaa nyansahu mu nnaadaa ho nkɔmmɔ akyɛ dodo. Ɛsɛ sɛ yɛhyɛ no nsow sɛ Yesu amma biribi a ɛte saa anto no, ɛwom sɛ anka obetumi adi nkonim wɔ ɔne nyamesom akannifo a na wɔasua ade wɔ Hebri ne Hela mu no akyinnyegye mu de. Sɛ obi gye Yesu akyinnye a, ná ɔma no mmuae tiawa bi, na afei ɔdan n’adwene kɔ ahobrɛasefo a wɔyɛ nguan ankasa no so bio. ​—Mateo 22:41-46; 1 Korintofo 1:23-2:2.

10. Dɛn nti na ɛfata sɛ Kristofo a wɔwɔ kɔmputa, na wotumi ne afoforo di nkitaho no yɛ ahwɛyiye?

¹⁰ Ɛnnɛ mmere mu kɔmputa ahorow abue akwan ama fekubɔne. Aguadifo akuw bi ma wɔn aguadifo a wɔwɔ komputa ne telefon kwan ma wɔde wɔn nsɛm kɔ nea wɔfrɛ no electronic bulletin, board [kɔmputa mu ade bi a wɔkora nsɛm wɔ so] so ma wɔkora so; enti obi betumi de asɛm a ɔpɛ sɛ wɔn a wɔne aguadikuw no di dwuma nyinaa bu no akɔ saa bulletin board no so ma wɔnam komputa anaa telefon so ahu. Eyi de nea wɔfrɛ no nyamesom mu nsɛm a wosusuw ho wɔ komputa so aba. Ebia Kristoni bi de ne ho bɛhyɛ nkɔmmɔbɔ a ɛte saa mu, na ebia ɔne ɔwaefo bi a ebia wɔatu no afi asafo no mu abɔ nkɔmmɔ nnɔnhwerew pii. Akwankyerɛ a ɛwɔ 2 Yohane 9-11 no ma Paulo afotu a ɛte sɛ agya de a ese yɛnkwati fekubɔne no mu da hɔ pefee.a

Mma Wɔnnnaadaa Wo

11. Aguadi a na ɛkɔ so wɔ Korinto no de hokwan bɛn na ɛbae?

¹¹ Sɛnea yɛahu no, na Korinto yɛ aguadibea a mmeae a wɔtɔn ade ne nnwuma pii wɔ hɔ. (1 Korintofo 10:25) Nnipa a wɔbɛhwɛɛ Isthmia Agumadi no bi no pii traa ntamadan mu, na saa bere no, na aguadifo tɔn ade wɔ mpata a wotumi tutu kɔ baabi foforo anaa nea wɔakuruw so mu. (Fa toto Asomafo no Nnwuma 18:1-3 ho.) Eyi maa Paulo tumi nyaa adwuma yɛɛ ntamadan wɔ hɔ. Na otumi de adwumayɛbea hɔ trɛw asɛmpa no mu. Ɔbenfo J. Murphy- O’Connor kyerɛw sɛ: “Esiane sɛ na Paulo wɔ adetɔnbea bi a ɛwɔ gua bi a nnipa pii wom mu . . . na ɛne borɔn bi a nnipa wɔ so pii di nhwɛanim nti, na ɛnyɛ ne yɔnko adwumayɛfo ne adetɔfo nko na onya wɔn, na mmom nnipadɔm a wɔwɔ abɔnten no nso. Sɛ aguadi no ano brɛ ase kakra a, na otumi gyina ɔkwan ano kasa kyerɛ wɔn a osusuw sɛ wobetie no . . . Ɛyɛ den sɛ yebesusuw sɛ ne suban pa ne ne gyidi a emu yɛ den no amma wanyɛ ‘onipa titiriw’ ntɛm wɔ mpɔtam hɔ, anka eyi bɛtwetwe wɔn a wɔpɛ asɛm, ɛnyɛ wɔn a wonni biribi yɛ nko, na mmom wɔn a wofi komam repɛ biribi ahu nso. . . . Ná mmea awarefo a wɔn mmaawa ka wɔn ho a wɔate ne ho asɛm tumi to brada sɛ wɔrekɔtɔ biribi, nanso na wɔrekɔ ne nkyɛn. Sɛ edu ahokyerɛ mmere mu na sɛ ɔtaa anaa ɔhaw bi ara kwa reba a, na gyidifo tumi ne no kasa sɛ wɔn a wɔtɔ ne hɔ ade. Adwumayɛbea no maa ohuu kurow no mu mpanyimfo nso.”

12, 13. Ɔkwan bɛn so na yebetumi de 1 Korintofo 15:33 adi dwuma wɔ adwumayɛbea ma afata?

¹² Nanso anka Paulo behu nea ebetumi ayɛ “fekubɔne” wɔ adwumayɛbea hɔ. Ɛsɛ sɛ yɛn nso yetumi hu. Sɛnea ɛsɛ no, Paulo faa asɛm a na ebinom taa ka sɛ: “Momma yennidi na yɛnnom, na ɔkyena na yɛawu” no kaa asɛm. (1 Korintofo 15:32) Ntɛm ara na ɔde n’afotu a ɛte sɛ agya de no toaa so sɛ: “Mommma wɔnnnaadaa mo! [Fekubɔne] sɛe ɔbra pa.” Ɔkwan bɛn so na adwumayɛbea ne anigye a yɛbɛhwehwɛ betumi ayɛ asiane?

¹³ Kristofo pɛ sɛ wɔtew wɔn anim ma wɔn yɔnko adwumayɛfo, na osuahu pii ada no adi sɛ eyi yɛ ɔkwan a etu mpɔn a etumi bue hokwan ma wodi obi adanse. Nanso ebia yɛn yɔnko dwumayɛfo bi rente adamfofa su no ase, na obesusuw sɛ yɛpɛ sɛ yɛne no bɔ fekuw na yɛbom gye yɛn ani. Ebia ɔbɛto nsa afrɛ wo nnakoro nnakoro bi sɛ monkodidi, monkɔtra baabi nnom nsa bere tiaa bi bere a moapɔn adwuma, anaasɛ monkogye mo ani dapɛn no awiei. Ebia onipa yi bɛyɛ sɛ nea ne yam ye na n’adwenem tew, na ebia ɔfrɛ no bɛyɛ sɛ nea asɛm biara nni ho. Nanso, Paulo tu yɛn fo sɛ: “Mommma wɔnnnaadaa mo!”

14. Ɔkwan bɛn so na wɔnam fekubɔ so adaadaa Kristofo binom?

¹⁴ Wɔadaadaa Kristofo binom. Wɔde nkakrankakra gow wɔn ho mu ne wɔn yɔnko adwumayɛfo bɔɔ fekuw. Ebia agorudi bi anaa biribi a wɔn nyinaa ani gye ho na ɛma efii ase. Anaasɛ ebia na obi a ɔnyɛ Kristoni bi wɔ adwuma mu hɔ a ne yam ye na odwen afoforo ho kɛse, na ɛno na ɛmaa ɔkɔɔ so de bere pii ne saa onipa no bɔe a n’ani begyee ne fekubɔ ho sen ebinom a wɔwɔ asafo no mu mpo de ho. Afei fekubɔ no nti ebia adesua biako pɛ bɛpa ne ti so. Ebetumi aba sɛ wɔmmɛda ntɛm anadwo bi ma ɛno nti sɛ ade kye a ontumi nkɔ asɛnka anɔpa sɛnea ɔyɛ daa no. Ebetumi akowie sɛ wɔbɛhwɛ sini anaa video bi a sɛ ɛnyɛ fekubɔ no a anka Kristoni no renhwɛ. Ebia yebesusuw sɛ ‘O, ebi rento me da.’ Nanso ebia saa ara na wɔn a wɔadaadaa wɔn no mu dodow no ara kae mfiase no. Ɛsɛ sɛ yebisa yɛn ho sɛ, ‘Ɛhe koraa na masi me bo akodu sɛ mede Paulo afotu no bedi dwuma?’

15. Su a nyansa wom bɛn na ɛsɛ sɛ yeyi no adi kyerɛ afipamfo?

¹⁵ Nea yeasusuw ho mprempren ara wɔ adwumayɛbea ho no fa fekuw a yɛne yɛn afipamfo bɛbɔ nso ho. Ɛda adi sɛ na Kristofo a wɔwɔ tete Korinto no wɔ afipamfo. Wɔ mmeae bi no, ɛnyɛ nwonwa sɛ wubeyi adamfofa su adi akyerɛ afipamfo na woaboa wɔn. Wɔ nkuraase no, esiane sɛ afipamfo no atew wɔn ho nti, wɔdan wɔn ho wɔn ho. Wɔ aman bi mu no, abusuabɔ a ɛwɔ abusuafo ntam no mu yɛ den yiye, na ɛma wɔto nsa frɛ yɛn mpɛn pii sɛ yemmedidi. Akyinnye biara nni ho sɛ ahwɛyiye ho hia sɛnea Yesu yɛe no. (Luka 8:20, 21; Yohane 2:12) Wɔ yɛne afipamfo ne abusuafo nkitahodi mu no, so ɛyɛ a yenya adwene sɛ yɛbɛkɔ so ayɛ yɛn ade sɛnea na yɛyɛ ansa na yɛrebɛyɛ Kristofo no? So ɛnsɛ sɛ yɛhwehwɛ nkitahodi ahorow no mu hwɛ na yɛde ahwɛyiye hu baabi a ɛsɛ sɛ yɛyɛ ade kodu mmom?

16. Ɛsɛ sɛ yɛte Yesu nsɛm a ɛwɔ Mateo 13:3, 4 no ase dɛn?

¹⁶ Bere bi Yesu de Ahenni ho asɛm no totoo aba a ‘ekoguu kwankyɛn, na nnomaa bae bɛsosɔwee’ no ho. (Mateo 13:3, 4, 19) Saa bere no, esiane sɛ na nnipa pii di akɔneaba wɔ asase a ɛda kwankyɛn so nti, na ɛso yɛ den. Ɛte saa wɔ nnipa pii fam. Afipamfo, abusuafo ne afoforo a wodi akɔneaba ahyɛ wɔn asetram ma, na egye wɔn bere nyinaa. Sɛnea yɛbɛka no no, eyi tiatia wɔn komam asase no so, na ɛma ɛyɛ den sɛ nokware no aba benyin wɔ mu. Biribi a ɛnsow aba saa ara betumi ato obi a ɔyɛ Kristoni dedaw.

17. Ɔkwan bɛn so na afipamfo ne afoforo fekubɔ betumi anya yɛn so nkɛntɛnso?

¹⁷ Ɛwom sɛ afipamfo ne abusuafo binom a wɔyɛ wiasefo akɔ so akyerɛ sɛ wɔn ani nnye honhom fam nneɛma ho na wɔnnɔ trenee de, nanso ebia wobeyi adamfofa su adi akyerɛ yɛn na wɔaboa yɛn. (Marko 10:21, 22; 2 Korintofo 6:14) Kristofo a yɛabɛyɛ no nkyerɛ sɛ ɛnsɛ sɛ yeyi adamfofa su adi kyerɛ yɛn afipamfo na yesusuw wɔn ho. Yesu tuu yɛn fo sɛ yemfi yɛn komam nkyerɛ afoforo ho anigye. (Luka 10: 29-37) Nanso afotu a efi honhom mu na ɛho hia saa ara ne nea Paulo de mae sɛ yɛnhwɛ yiye wɔ fekubɔ ho no. Bere a yɛde afotu a edi kan no di dwuma no, ɛnsɛ sɛ yɛn werɛ fi akyiri yi de no nso. Sɛ yɛamma nnyinasosɛm abien no nyinaa antra yɛn adwenem a, ebetumi akã yɛn suban. Sɛ wode wo suban toto w’afipamfo anaa w’abusuafo de ho wɔ nokwaredi anaa Kaesare mmara a wodi so ho a, ɛte dɛn? Sɛ́ nhwɛso no, sɛ edu towtua so a, ebia wobɛte nka sɛ sɛ wɔanka wɔn sika anaa mfaso a wonya nyinaa ho asɛm a, ɛnyɛ hwee, na ehia sɛ wɔyɛ saa mpo na ama wɔatumi atra ase. Ebia wɔbɛka sɛnea wɔte nka wɔ nneɛma ho akyerɛ wo wɔ ɔkwan a ɛdan adwene so, bere a mudidi na mobɔ nkɔmmɔ anaa bere a wɔabɛsra wo bere tiaa bi no. Ɔkwan bɛn so na ebetumi akã wo nsusuwii ne wo suban pa no? (Marko 12:17; Romafo 12:2) “Mommma wɔnnnaadaa mo! [Fekubɔne] sɛe ɔbra pa.”

Mmofra Suban Nso

18. Dɛn nti na 1 Korintofo 15:33 fa mmofra nso ho?

¹⁸ Nea mmofra hu na wɔte titiriw na enya wɔn so nkɛntɛnso. So wonhyɛɛ no nsow sɛ mpɛn pii no, sɛnea mmofra binom totow wɔn nsa ne sɛnea wɔyɛ wɔn ade te sɛ wɔn awofo anaa wɔn nuanom? Ɛnde ɛnsɛ sɛ ɛyɛ yɛn nwonwa sɛ nnamfo anaa sukuufo betumi anya mmofra so nkɛntɛnso kɛse. (Fa toto Mateo 11:16, 17 ho.) Sɛ mmofra a wɔka wɔn awofo ho nsɛmmɔne na atwa wo mma ho ahyia a, dɛn nti na ɛsɛ sɛ wususuw sɛ entumi nnya wo mma no so nkɛntɛnso? Na sɛ wɔtaa te sɛ mmofra afoforo ka kasafi nso ɛ? Na sɛ wɔn atipɛnfo a wɔwɔ sukuu mu anaa mpɔtam hɔ ani gye mpaboa anaa agode foforo bi a aba so ho nso ɛ? So ɛsɛ sɛ yesusuw sɛ nneɛma a ɛtete saa ntumi nnya Kristofo mmofra so nkɛntɛnso? So Paulo kae sɛ wɔn a wɔadi mfe dodow bi nkutoo na 1 Korintofo 15:33 fa wɔn ho?

19. Adwene bɛn na ɛsɛ sɛ awofo bɔ mmɔden de dua wɔn mma mu?

¹⁹ Sɛ woyɛ ɔwofo a, so wudwen saa afotu no ho bere a wo ne wo mma susuw nsɛm ho na wusi wɔn ho gyinae ahorow no? Sɛ wugye tom sɛ eyi nkyerɛ sɛ mmofra afoforo a wo mma te wɔn mu wɔ sukuu mu anaa mpɔtam hɔ no nyinaa nyɛ mmofra pa a, ebetumi aboa. Sɛnea w’afipamfo, w’abusuafo ne wo yɔnko adwumayɛfo binom wɔ adamfofa su na wɔn ho tew no, saa ara na mmɔfra no binom nso te. Bɔ mmɔden ma wo mma nhu eyi na wɔnte ase sɛ, sɛ wode Paulo afotu a nyansa wom na ɛte sɛ agya de a ɔde kɔmaa Korintofo no redi dwuma a, woyɛ no wɔ nyansam. Sɛ wɔbɛte sɛnea wususuw nsɛm ho yiye no ase a, ebetumi aboa wɔn ma wɔasuasua wo.​—Luka 6:40; 2 Timoteo 2:22.

20. Mmofra, dɛn ho na ɛsɛ sɛ mobɔ mmɔden?

²⁰ Mo a moda so ara yɛ mmofra no, mommɔ mmɔden nhu sɛnea mode Paulo afotu no bedi dwuma nyansam, na munhu sɛ ɛho hia ma Kristoni biara, sɛ́ ɔyɛ ɔpanyin anaa abofra. Eyi begye mmɔdenbɔ kɛse, nanso dɛn nti na wunya ɔpɛ sɛ wobɛbɔ mmɔden adi ho dwuma? Hu sɛ nim a wunim mmofra afoforo no mu binom fi wɔn mmofraberem ara kwa no nkyerɛ sɛ wontumi nnya wo suban so nkɛntɛnso nsɛe suban pa a wurenya sɛ́ Kristoni abofra no.​—Mmebusɛm 2:1, 10-15.

Akwampa a Yɛbɛfa so Abɔ Yɛn Suban ho Ban

21. (a) Yɛn ahiade wɔ fekubɔ ho ne dɛn? (b) Dɛn nti na yebetumi agye adi sɛ fekubɔ binom betumi ayɛ asiane?

²¹ Yɛn nyinaa hia fekubɔ. Nanso ɛsɛ sɛ yɛkae nokwasɛm yi sɛ wɔn a yɛne wɔn bɔ fekuw no betumi anya yɛn so nkɛntɛnso pa anaa nkɛntɛnso bɔne. Eyi baa saa wɔ Adam ne obiara a watra ase mfehaha no mu fi saa bere no fam. Sɛ́ nhwɛso no, Yuda ɔhempa Yehosafat nyaa Yehowa anim dom ne ne nhyira. Nanso bere a ɔmaa kwan maa ne ba barima waree Israel Hene Ahab babea akyi no, Yehosafat fii ase ne Ahab bɔɔ fekuw. Saa fekubɔne no nti, anka Yehosafat rehwere ne nkwa. (2 Ahene 8: 16-18; 2 Beresosɛm 18:1-3, 29-31) Sɛ yɛamfi nyansa mu ampaw wɔn a yɛne wɔn bɛbɔ fekuw a, ebetumi ayɛ asiane saa ara.

22. Dɛn na ɛsɛ sɛ ɛho hia yɛn yiye, na dɛn ntia?

²² Ɛnde momma afotu a ɔdɔ wom a Paulo de ma yɛn wɔ 1 Korintofo 15:33 no ho nhia yɛn yiye. Ɛnyɛ nsɛm a ebia yɛate no mpɛn pii ma enti yebetumi akae afi yɛn tirim ara kwa. Ɛda ɔdɔ a ɛte sɛ agya de a na Paulo wɔ ma ne nuanom Korintofo no adi, na sɛ wɔtrɛw mu a, ɛka yɛn nso bi. Na akyinnye biara nni ho sɛ ɛyɛ afotu a efi yɛn soro Agya no nkyɛn, efisɛ ɔpɛ sɛ yedi nkonim wɔ mmɔden a yɛbɔ no mu.​—1 Korintofo 15:58.

[Ase hɔ asɛm s]

So Wokae?

◻ Dɛn titiriw nti na Paulo kyerɛw 1 Korintofo 15:33?

◻ Ɔkwan bɛn so na yebetumi de Paulo afotu no adi dwuma wɔ aduwmayɛbea?

◻ Adwene a ɛkari pɛ bɛn na ɛsɛ sɛ yenya wɔ afipamfo ho?

◻ Dɛn nti na 1 Korintofo 15:33 yɛ afotu a ɛfata ma mmofra titiriw?

[Mfonini wɔ kratafa 17]

Paulo de adwumayɛbea hɔ trɛw asɛmpa no mu

[Mfonini wɔ kratafa 18]

Mmofra afoforo betumi asɛe Kristofo suban a wowɔ no