William Whiston—Ɔwaefo Anaa Nhomanimfo Nokwaredifo?

SO WODE w’adwuma bɛbɔ afɔre esiane wo gyidi ahorow nti? William Whiston yɛɛ saa.

Ɔbɛyɛɛ obi a ne ho wɔ asɛm nyamesom mu wɔ afeha a ɛto so 18 no mfiase bere a ɔne Anglikan Asɔre no anyɛ adwene wɔ Bible no nkyerɛkyerɛ ho no. Esiane eyi nti, wobuu no sɛ ɔwaefo. Nea ɔyɛe no ma wodii ne ho fɛw na onyaa obu nso.

Hena ne William Whiston? Na dɛn na ɔyɛe?

Bible Nhomanimfo

Ná William Whiston yɛ Sir Isaac Newton yɔnko adesuani wɔ Cambridge Sukuupɔn mu. Sɛ wokenkan afeha a edi kan mu Yudani abakɔsɛm kyerɛwfo Flavius Josephus kyerɛwtohɔ a ɛwɔ Engiresi kasa mu a, ebia na ɛyɛ nea Whiston kyerɛɛ ase wɔ 1736 mu no a. Ɛwom sɛ nkyerɛase afoforo wɔ hɔ de, nanso ne nkyerɛase a edi mũ ne ne nkyerɛkyerɛmu no yɛ nea ɛkyɛn so na wɔda so tintim. Nnipa pii bu saa kyerɛwtohɔ yi sɛ ɛyɛ ade a ɛsen biara a Whiston tumi yɛe.

Nanso, ɛnsɛ sɛ wobu ani gu Primitive New Testament, Kristofo Hela Kyerɛwnsɛm a Whiston kyerɛɛ ase no so. Wotintim no 1745 mu, bere a na wadi mfe 77 no. Whiston kyerɛɛ Nsɛmpa anan no ne Asomafo no Nnwuma ase fii Codex Bezae mu, ne Paulo nkrataa a ɔkyerɛwee fii Clermont no mu, ne nkae no a Adiyisɛm ka ho no fi Alexandrine Nsaano Nkyerɛwee no mu. Ɔde ahwɛyiye yii 1 Yohane 5:7 no fã a ɛnka ho no fii mu. Whiston paw saa tete Hela nkyerɛwee yi sɛ ɛno ne nea eye sen biara a na ɛwɔ hɔ saa bere no.

Ɛda adi sɛ Bible no ho dɔ na ɛkanyan Whiston ma ɔyɛɛ saa. Wɔ ne bere so no, na nnipa pii gye nkyerɛkyerɛ a ɛne sɛ wobetumi agyina adanse a nyansa wom nkutoo so agye Onyankopɔn adi no tom. Sɛnea nhoma William Whiston—Honest Newtonian kyerɛ no, ogyee “wɔn a wɔbataa atetesɛm ho no adwene a ɛne sɛ Bible no mu nkutoo na tete abakɔsɛm a edi mu” wɔ no toom kɛse. Asɛmfua “Newtonian” no fa Isaac Newton a na wonim no yiye wɔ ne Principia a ɔde kyerɛkyerɛɛ amansan mu tumi a ɛtwe ade ba fam ho mmara mu no. Newton nsusuwii no nyaa William Whiston so nkɛntɛnso kɛse. Ɔkwan bɛn so?

Nipasu Ahorow a Ɛbɔ Abira

William Whiston yɛ Anglikan sɔfo bi ba, na wɔwoo no 1667 mu. Bere a wɔhyɛɛ no sɔfo 1693 akyi no, ɔsan kɔɔ Cambridge Sukuupɔn mu kosuaa nkontaabu, na ɔbɛyɛɛ Newton abadiakyiri. Wobenyaa ayɔnkofa a emu yɛ den. Bere a Newton gyaa ne dibea sɛ Nkontaabu ho ɔbenfo bɛyɛ mfe abiɛsa akyi no, ɔhwɛe sɛ wɔde Whiston besi n’ananmu. Wɔ Whiston adwuma no mu no, ɔkyerɛɛ ɔsoro abɔde ne nkontaabu ho ade, nanso Newton nkɛntɛnso no kanyan no ma obenyaa Bible mmerebu ne nkyerɛkyerɛ nso ho anigye kɛse.

Ná Newton ani gye nyamesom ho. Sɛ́ obi a na ogye Mfirihyia Apem Ahenni a Bible ka ho asɛm no di kɛse no, ɔkyerɛw nsɛm pii faa Daniel ne Adiyisɛm nkɔmhyɛ ahorow no ho. Nanso, wɔantintim saa nkyerɛwee yi mu biara wɔ ne nkwa nna mu. Ɔpow Baasakoro nkyɛrɛkyerɛ no. Nanso The New Encyclopædia Britannica se sɛ ɛba sɛ ɛsɛ sɛ otintim adanse a ɔwɔ tia Baasakoro no a, “na Newton twentwɛn ne nan ase sɛ ɔbɛyɛ saa efisɛ na osuro sɛ adwene a ɔwɔ tia Baasakoro no bɛda adi.” F. E. Manuel ka ho asɛm wɔ Isaac Newton, Historian mu sɛ: “Newton kuw no anna wɔn nsusuwii adi wɔ baguam anaa wosiw wɔn nkate ano. . . . Baabi a na Newton de nsɛm sie no, Whiston daa no adi wɔ baguam.” Enti na mmarima baanu no wɔ nipasu a ɛbɔ abira.

Wɔkwati No

Wɔ July 1708 no, Whiston kyerɛw krataa kɔmaa Canterbury ne York asɔfopɔn baanu no nyinaa, hyɛɛ wɔn sɛ wɔnyɛ nsakrae wɔ Anglikan Asɔre no nkyerɛkyerɛ mu esiane Baasakoro nkyerɛkyerɛ a ɛyɛ atoro a ɛda adi wɔ Athanasia Gyidikasɛm no mu nti. Sɛnea ntease wom no, wotuu no fo sɛ ɔnhwɛ yiye. Nanso Whiston annyae. Ɔkae sɛ: “Masua nsɛm yi akɔ akyiri, na migye di yiye sɛ wɔde adaadaa kristofo nyinaa kɛse bere tenten; na ɛdenam Onyankopɔn nhyira so no, sɛ minya tumi a, wɔnkɔ so nnaadaa asɔre no bio.”

Ná Newton suro sɛ asetra ne nhomasua mu dibea a ɔwɔ no befi ne nsa. Whiston de, wansuro. Bere a osiesiee ne gyidi ahorow a na etia Baasakoro wiei no, ɔkyerɛw nhomawa bi de daa n’adwene wɔ asɛm no ho adi. Nanso wɔ August 1708 no, Cambridge Sukuupɔn no pow sɛ wɔbɛma Whiston tumi krataa ma ɔde atintim ne nsɛm no, efisɛ wobuu no sɛ nea ɛmfata.

Wɔ 1710 mu no, wɔbɔɔ Whiston sobo sɛ ɔrekyerɛkyerɛ nneɛma a ɛne Anglikan Asɔre no gyidi bɔ abira. Wobuaa no fɔ, gyee dibea a ɔwɔ sɛ ɔbenfo no fii ne nsam, na wɔpam no fii Cambridge. Nanso, ɛmfa ho sɛ sobo a wɔbɔɔ Whiston no traa hɔ bɛyɛ mfe anum no, wɔammu no fɔ sɛ ɔwaefo da.

Ɛwom sɛ na adwene a Newton wɔ tia Baasakoro no ne Whiston de no di nsɛ de, nanso wannyina n’adamfo no akyi, na akyiri yi ɔtwee ne ho fii ne ho. Awiei koraa no, wotintim Newton nhoma a ɛkyerɛkyerɛ Bible mu a ɛpaa Baasakoro ho ntama no wɔ 1754 mu—ne wu akyi mfe 27. Nanso na aka akyiri dodow sɛ ebetumi aboa Whiston a na wawu mfe abien a na atwam no ɔkwan biara so.

Wogye di sɛ Newton ara na ɔmaa woyii Whiston fii Royal Society a na agye din no mu. Nanso Whiston abam ammu. Ɔne n’abusua tu kɔtraa London, na ɔtee Kuw bi a Wɔde Hyɛ Tete Kristosom Den. Ɔde n’ahoɔden nyinaa kyerɛw nhoma ahorow, na nhoma a ɛho hia sen biara a ɔkyerɛw no saa bere no ne Primitive Christianity Revived a ekura apo anan no.

Ná ne ho wɔ Asɛm Kosi Awiei

Sɛ́ nyansahufo no, Whiston faa akwan pii so pɛe sɛ ɔma po so hyɛnkafo hu baabi a wɔn ahyɛn ani kyerɛ. Ɛwom sɛ wɔannye n’adwene no antom de, nanso awiei koraa no, mmɔden a ɔkɔɔ so bɔe no maa wobenyaa biribi a po so ahyɛnkafo de hu bere ne faako a wɔadu pɛpɛɛpɛ. Ɛwom sɛ te sɛ ne mfɛfo no, ada adi sɛ Whiston nkyerɛkyerɛmu a ɛfa Bible nkɔmhyɛ ho no pii nyɛ nokware de, nanso ɔyɛɛ nea obetumi biara de hwehwɛɛ nokware no. Ne nkratawa ahorow a ɛfa sɛnea okyinnsromma ahorow no di kyinhyia ne nneɛma a ɔkyerɛ sɛ ebetumi aba sɛ afi Noa Nsuyiri no mu aba ho no ka nkratawa pii a ɔkyerɛw de gyinaa nyansahu ne Bible mu nokware ahorow akyi no ho. Nanso ne nhoma a ɛpa Baasakoro nkyerɛkyerɛ ho ntama sɛ ennyina Kyerɛwnsɛm so no sen afoforo a ɔkyerɛwee no.

Sɛnea na Whiston taa yɛ ade no, ofii Anglikan Asɔre no mu wɔ 1747 mu. Ofii asɔre no mu ankasa ne afei wɔ sɛnkyerɛnne kwan so denam sɔre a ɔsɔre fii asɔredan no mu bere a ɔsɔfo bi fii ase kenkan Athanasia Gyidikasɛm no. A Religious Encyclopædia ka Whiston ho asɛm sɛ: “Ɛsɛ sɛ wɔkyerɛ akokoduru a ɔde kaa nsɛm pefee ne ne nokwaredi, n’asetra mu nnyinasosɛm a ɛnsakra, ne n’abrabɔ a akontonkyesɛm nnim no ho anigye kɛse.”

Wɔ William Whiston fam no, na ontumi nnyae nokware mu nsiesie, na na nneɛma a n’ankasa gye di no som bo sen ayeyi a wonya fi nnipa hɔ. Ɛwom sɛ na Whiston yɛ obi a ne ho wɔ asɛm de, nanso na ɔyɛ nhomanimfo nokwaredifo a ɔde akokoduru gyinaa Bible no akyi sɛ Onyankopɔn Asɛm.—2 Timoteo 3:16, 17.

[Mfonini Fibea wɔ kratafa 26]

British Museum na wɔmaa hokwan