Wɔn Kanea Annum

WƆ BIBLE mmere mu no, na Yehowa Adansefo anokwafo wɔ hɔ a wohyia akwanside horow ne nsɛnnennen. Wohyiaa ɔtaa ne tebea horow a na ayɛ sɛ huammɔdi. Nanso wɔamfi abasamtu mu ampa abaw. Sɛnea yɛbɛka no no, wɔn kanea annum.

Sɛ nhwɛso no, wɔmaa odiyifo Yeremia dwumadi sɛ ɔnyɛ Onyankopɔn diyifo mma Yuda man a awae no. Ɔbɔɔ Yerusalem sɛe a na ɛreba no ho kɔkɔ. (Yeremia 1:11-19) Ne saa nti, Yeremia ne ne man mufo a na wobu no sɛ ɔhoguanfo no dii asi mpɛn pii.

Da koro, ɔsɔfo Pashur a ɔyɛ Onyankopɔn fi so titiriw no, boroo Yeremia esiane nea ɔhyɛɛ ho nkɔm no nti, na ɔde no bɔɔ duam. Esiane tebea a na ayɛ sɛ akwanside yi nti, Yeremia kae sɛ: “Madan aserede daa adesae; wɔn nyinaa di me ho fɛw. Na daa merekasa a, ɛma meteɛm, akakabensɛm ne ɔsɛe na ɛma misu mefrɛ, na Awurade asɛm adan me ahohora ne nsopa daa adesae.” Odiyifo no abam bui duu baabi a ɔkae mpo sɛ: “Merenkae no na meremmɔ Awurade [Yehowa, NW] din menkasa bio.”—Yeremia 20:1, 2, 7-9.

Nanso Yeremia amma abasamtu amfa ne so. Ɔreka biribi afa ‘Yehowa asɛm’ ho no, ɔkae sɛ: “Na ɛyɛ me koma mu sɛ ogya a ɛredɛw a wɔato mu me nnompe mu; miso mu a mebrɛ ho, na mintumi.” (Yeremia 20:8, 9) Wɔkanyan Yeremia yiye maa ɔkaa Onyankopɔn anom asɛm, na honhom kronkron no wowaw no ma owiee ne dwumadi no.

Ná ɔsomafo Paulo nso wɔ nneɛma pii a, sɛ ɔmaa ho kwan a, anka ɛbɛma n’abam abu. Ogyinaa asiane horow, asugu, ɔtaa, ne ɔhwe horow ano. Nea ɛka ho no, ‘nea ɛkyeree ne so daa ne asafo no nyinaa ho dadwen.’ (2 Korintofo 11:23-28) Yiw, na Paulo wɔ nsɛnnennen a ohyia da biara da, na na ɔwɔ asafo horow a ɔboa maa wɔtee no ho dadwen. Bio, na ɔnyɛ pɛ, na na ɔwɔ ɔhonam mu “nsɔe” bi a na ebetumi ayɛ ani so wusiwusiyɛ.(2 Korintofo 12:7; Romafo 7:15; Galatifo 4:15) Ebinom mpo kasa tiaa Paulo bere a na onni hɔ, na ɔtee.—2 Korintofo 10:10.

Ne nyinaa akyi no, Paulo amma abasamtu ammunkam ne so. Dabi, na ɔnyɛ onipa soronko bi. (2 Korintofo 11:29, 30) Dɛn na ɛma ɔkɔɔ so “yɛɛ hyew”? Ade biako ne sɛ, na ɔwɔ ayɔnkofo a wɔboa no, a ebinom mpo dii n’akyi kɔɔ Roma, beae a na ɔsraani hwɛ ne so wɔ fie no. (Asomafo no Nnwuma 28:14-16) Nea ɛto so abien no, ɔsomafo no de adwene a ɛkari pɛ na ɛhwɛɛ ne tebea no. Ná ɛyɛ n’ataafo ne asɔretiafo no na wɔafom, ɛnyɛ Paulo. Ɛde rekɔ n’asase so asetra awiei no, osusuw ne som adwuma no ho wɔ ɔkwan a eye so kae sɛ: “Nea aka a ɛda me hɔ ne trenee abotiri a Awurade, ɔtemmufo trenee no, de bɛma me.”—2 Timoteo 4:8.

Nea ɛsen biara no, Paulo bɛnee Yehowa Nyankopɔn wɔ mpaebɔ mu bere nyinaa, na ‘Awurade gyinaa n’akyi, na ɔhyɛɛ no den.’ (2 Timoteo 4:17) Paulo kae sɛ: “Mitumi ade nyinaa yɛ, nea ɔhyɛ me den no mu.” (Filipifo 4:13) Nkitaho a Paulo ne Nyankopɔn ne mfɛfo Kristofo nyae, ne adwempa a onyae wɔ ne som adwuma ho no boaa no ma ɔkɔɔ so wɔ Yehowa som mu.

Onyankopɔn de honhom kaa Paulo ma ɔkyerɛwee sɛ: “Mommma yɛmmmrɛ papayɛ mu; na sɛ yɛampa abaw a, yebetwa so aba ne bere mu.” (Galatifo 6:7-9) Yebetwa dɛn? Daa nkwa. Ɛnde, yɛ sɛ Yeremia, Paulo, ne Yehowa adansefo anokwafo a aka a wɔaka wɔn ho asɛm wɔ Kyerɛwnsɛm mu no. Yiw, yɛ sɛ wɔn, na ɛmma abasamtu mmfa wo so. Ɛmma wo kanea nnnum.—Fa toto Mateo 5:14-16 ho.

[Kratafa 25 mfonini ahorow]

Paulo ne Yeremia amma wɔn kanea annum