Hena Ne Yehowa?

YEHOWA ka kyerɛɛ n’asomfo anokwafo no mu biako sɛ: “Onipa renhu m’anim nnya nkwa.” (Exodus 33:20) “Onyankopɔn yɛ honhom,” ma enti nnipa ntumi mfa wɔn anikan nhu no. (Yohane 4:24) Sɛnea sɛ yɛhwɛ owia tẽẽ owigyinae a, ebetumi asɛe yɛn ani no, saa ara nso na hwɛ a yɛbɛhwɛ tumi Fibea kɛse a ɔbɔɔ yɛn owia a ɛhyerɛn ne afei amansan yi mu nneɛma afoforo a ɛhyerɛn a enni ano no nso renyɛ papa mma yɛn.

Anigyesɛm ne sɛ enhia sɛ yehu Onyankopɔn anikan ansa na yɛahu nipa ko a ɔyɛ. Bible no ma yehu Onii ko a osiesiee asase, amenade fɛfɛ no, maa yɛn, na ɛda ne nipasu adi. Enti ɛyɛ papa sɛ yɛhwɛ Bible no mu hwehwɛ Agya a ɔmaa yɛn nkwa na ɔmaa yɛn ofie a ɛyɛ anigye a yebetumi adi yɛn nkwa nna wom no ho nsɛm.

Nea Ne Din no Kyerɛ

Edin biara wɔ nea ɛkyerɛ, ɛmfa ho mpo sɛ ebia nnɛ, nnipa pii nnim no. Sɛ nhwɛso no, Engiresi din David, a abu so no fi Hebri asɛmfua a ɛkyerɛ “Ɔdɔfo” mu. Ɔbɔadeɛ no din, Yehowa, no nso wɔ nea ɛkyerɛ. Ɛkyerɛ dɛn? Wɔ mfitiase kasa a wɔde kyerɛw Bible, Hebri mu no, wɔde nkyerɛwde anan, YHWH, na ɛkyerɛw Onyankopɔn din, na epue bɛyɛ mpɛn 7,000 wɔ Bible no fã a ɛyɛ Hebri kasa no mu. Onyankopɔn din no asekyerɛ ne “Nea Ɔma Ɛyɛ Hɔ.” Ɛkyerɛ sɛ Yehowa fi nyansam dan ne ho sɛnea ehia na ama wadi n’atirimpɔw ahorow ho dwuma. Ɔyɛ Ɔbɔadeɛ, Ɔtemmufo, Ogyefo, ne Nkwamafo, ma enti obetumi adi ne bɔhyɛ ahorow so. Bio nso, wɔ Hebri mu no, edin Yehowa no yɛ adeyɛsɛm bi a ɛkyerɛ biribi a wɔreyɛ awie. Yiw, Yehowa da so ara yɛ ne ho nea ɔma n’atirimpɔw ahorow ba mu. Ɔyɛ Nyankopɔn teasefo!

Yehowa Su Ahorow a Edi Akoten

Bible ka Ɔbɔadeɛ no ho asɛm sɛ “Onyankopɔn mmɔborohunufo ne ɔdomfoɔ, nea n’abodwo kyɛ na n’adɔeyɛ ne ne nokware dɔɔso pii, nea ɔkora adɔeyɛ ma mpem mpem, na ɔde amumɔyɛ ne mmarato ne bɔne firi.” (Exodus 34:6, 7) Asɛm ‘adɔeyɛ’ no yɛ nea wɔkyerɛ ase fi Hebri asɛmfua bi a ne nkyerɛase mu dɔ paa mu. Ɛkyerɛ ayamye a ɛbata biribi ho wɔ ɔdɔ mu kosi sɛ ɛbɛyɛ ho ade awie. Wobetumi akyerɛ ase nso sɛ “nokware dɔ.” Yehowa ayamye bata n’abɔde ho wɔ ɔdɔ mu na edi n’atirimpɔw a ɛyɛ anigye no ho dwuma. So worenkyerɛ ɔdɔ a ɛte saa a efi Onii a wama wo nkwa hɔ no ho anisɔ?

Yehowa bo kyɛ fuw na ɔntwentwɛn ne nan ase sɛ ɔde yɛn mfomso befiri yɛn. Ɛyɛ anigye sɛ yɛbɛbɛn obi a ɔte saa. Nanso ɛno nkyerɛ sɛ ɔpene bɔne so. Ɔkae sɛ: “Me [Yehowa, NW], medɔ atemmu, mikyi atirimɔden so dwowtwa.” (Yesaia 61:8) Sɛ́ atɛntrenee Nyankopɔn no, ɔrennya abɔnefo a wɔasen wɔn kɔn a wɔkɔ so wɔ wɔn abɔnefosɛm mu no ho koma daa. Ne saa nti, yebetumi anya awerɛhyem sɛ wɔ Yehowa bere a ɛsɛ mu no, obesiesie wiase mu ntɛnkyea nyinaa. Ɔremmu n’ani ngu amanehunufo so.

Ɛnyɛ mmerɛw sɛ obi bɛkari pɛ wɔ ɔdɔ ne atɛntrenee mu. Sɛ woyɛ ɔwofo a, so ɛyɛ den ma wo sɛ wubehu bere ne ɔkwan a wobɛfa so ateɛ wo mma so, ne baabi a ɛsɛ sɛ ɛkodu bere a wɔyɛ nea ɛmfata no? Egye nyansa a ɛkɔ akyiri na obi atumi ama atɛntrenee ne ɔdɔ akari pɛ. Yehowa da su a ɛte saa adi ma ɛboro so bere a ɔne nnipa di nsɛm no. (Romafo 11:33-36) Nokwarem no, yebetumi ahu Ɔbɔadeɛ no nyansa wɔ baabiara, sɛ nhwɛso no, wɔ abɔde a ɛyɛ nwonwa a atwa yɛn ho ahyia no mu.—Dwom 104:24; Mmebusɛm 3:19.

Nanso, nyansa nkutoo nnɔɔso. Nea ɛbɛyɛ na Ɔbɔadeɛ no atumi adi n’apɛde ho dwuma no, ohia tumi nso, na Bible da no adi sɛ ne tumi sõ: “Momma mo ani so nhwɛ ɔsoro, na monhwɛ nea ɔbɔɔ eyinom. Ɔno na obu wɔn dɔm ano yi wɔn adi, na ɔbobɔ wɔn nyinaa din frɛfrɛ wɔn; ne tumi dodow ne n’ahoɔden kɛse nti obiara nka akyiri.” (Yesaia 40:26) Esiane Yehowa “tumi dodow” nti, otumi yɛ biribiara. So su a ɛte saa nka wo mmɛn no?

Amanaman Nyinaa Nyankopɔn

Nanso ebia wubebisa sɛ, ‘So Yehowa nyɛ “Apam Dedaw” no Nyankopɔn, tete Israel Nyankopɔn?’ Ɛyɛ nokware sɛ Yehowa daa ne ho adi kyerɛɛ Israelfo no. Nanso esiane sɛ Yehowa na ɔbɔɔ nnipa baanu a wodi kan no nti, ɔno ne Nyankopɔn a “wofi no mu frɛ abusua biara a ɛwɔ . . . asase so.” (Efesofo 3:15) Sɛ wugye di sɛ eye sɛ wubedi wo nananom ni a, ɛnde so ɛrenyɛ papa sɛ wobɛkotow Onii a ɔmaa onipa a odi kan, yɛn nyinaa nana a mmusua a ɛwɔ asase so nnɛ nyinaa fi ne mu, nkwa no?

Adesamma Bɔfo no nyɛ obi a n’ani si faako. Ɛwom, bere bi na ɔne Israel man no wɔ abusuabɔ titiriw bi. Nanso ne nyinaa akyi no, ogyee wɔn a wɔbɔɔ ne din nyinaa tom. Israel hene nyansafo bi bɔɔ Yehowa mpae sɛ: “Ɔhɔho a omfi wo man Israel mu na wo din nti ofi akyirikyiri asase bi so aba, . . . wo ara tie ɔsoro, wo trabea hɔ, na yɛ sɛ ɔhɔho no sũ frɛ wo no nyinaa, nea ɛbɛyɛ na asase so aman nyinaa ahu wo din.” (1 Ahene 8:41-43) Ɛde besi nnɛ no, nnipa a wofi aman nyinaa mu betumi abehu Yehowa na wɔne no anya abusuabɔ a mfaso wɔ so. Nanso ɔkwan bɛn so na ɛno ka wo?

Mfaso a Ɛwɔ Hu a Yebehu Yehowa So

Sɛ yɛbɛsan akɔ asɛm a edi eyi anim no mu mfatoho no so a, sɛ wo nsa aka amenade bi a wɔakyekyere ho fɛfɛɛfɛ a, wo ho bɛpere wo sɛ wubehu nea enti a wɔde brɛɛ wo. Ɔkwan bɛn so na ɛsɛ sɛ wode di dwuma na wohwɛ so? Saa ara na ɛsɛ sɛ yehu nea na ɛwɔ Onyankopɔn adwenem bere a ɔyɛɛ asase maa yɛn no. Bible ka sɛ “wammɔ no hunu,” na mmom “ɔnwenee sɛ wɔntra so,” kyerɛ sɛ, nnipa ntra so.—Yesaia 45:18.

Nanso nnipa dodow no ara nhwɛɛ Ɔbɔadeɛ no akyɛde no so yiye. Wɔreyɛ asɛe asase no, na Yehowa ani nnye ho koraa. Nanso, nea ɛne ne din hyia no, Yehowa asi ne bo sɛ ɔbɛma ne mfitiase atirimpɔw ma asase ne nnipa no abam. (Dwom 115:16; Adiyisɛm 11:18) Obesiesie asase no de ama wɔn a wɔpɛ sɛ wɔtra ase sɛ ne mma asoɔmmerɛfo no sɛ apɛgyade.—Mateo 5:5.

Bible mu nhoma a etwa to no kyerɛkyerɛ sɛnea nneɛma bɛyɛ bere a aba saa no mu sɛ: “Hwɛ, Onyankopɔn ntamadan wɔ nnipa mu, na ɔbɛtra mu wɔ wɔn mu, na wɔayɛ ne man. . . . Na ɔbɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.” (Adiyisɛm 21:3, 4) Saa bere no, obi dɔfo nwu na wate nusu anaa wadi yaw. Obiara mfa ahoyeraw nsu nhwehwɛ mmoa anaa ɔnte owuyare mu yaw. ‘Wobetu owu mpo agu.’ (1 Korintofo 15:26; Yesaia 25:8; 33:24) Eyi kyerɛkyerɛ asetra ko a mfitiase no na Yehowa pɛ sɛ yenya bere a ɔbɔɔ yɛn nananom a wodi kan no.

Nokwarem no, wubetumi ahu sɛnea paradise tebea a ɛte saa no bɛyɛ wɔ Yehowa asomfo mu nnɛ. Ɔka kyerɛ wɔn sɛ: “Me [Yehowa, NW], wo Nyankopɔn, mene nea ɔkyerɛ wo nea eye ma wo, na ogya wo kɔ ɔkwan a fa so no so.” (Yesaia 48:17) Yehowa yɛ Agya ɔyamyefo a ɔkyerɛkyerɛ yɛn a yɛyɛ ne mma no ɔkwan pa a yɛbɛfa so atra ase. N’akwankyerɛ ma nnipa no nka yɛn nhyɛ, na mmom ɛyɛ ahobammɔ a efi ɔdɔ mu. Ɛsodi de nokware ahofadi ne anigye na ɛbɛbrɛ yɛn sɛnea wɔakyerɛw sɛ: “Na [Yehowa, NW] ne Honhom no; na nea [Yehowa, NW] honhom wɔ no, ɛhɔ na ahofadi wɔ.” (2 Korintofo 3:17) Ɛdenam Bible mu akwankyerɛ horow a wodi akyi so no, mprempren wɔn a wogye ne tumidi tom no wɔ asomdwoe a daakye ɛbɛtrɛw aka nnipa a wɔwɔ wiase nyinaa no bi.—Filipifo 4:7.

Hwɛ sɛnea Yehowa yɛ Agya ɔyamyefo! So wowɔ ɔpɛ sɛ wubesua Onii a abɔde mu anwonwade nyinaa fi no no ho ade pii? Wɔn a wɔyɛ saa no nya mfaso a ɛsom bo mprempren mpo. Na daakye nso, nhyira a wobenya no bɛyɛ daa de.

[Kratafa 5 mfonini]

Wobetumi ahu Onyankopɔn din a wɔde Hebri nkyerɛwde anan akyerɛw no wɔ tete asɔredan pii ho