Nokware Atɛntrenee—Bere Bɛn Ne Ɔkwan Bɛn So?

ƐNSƐ sɛ obi a ne ho nni asɛm suro atɛntrenee. Nokwarem no, ɛkame ayɛ sɛ, sɛ ɔmamma a wɔwɔ mmaa nyinaa betumi anya mmara ho nhyehyɛe a ɛhwɛ ma atɛntrenee yɛ adwuma a, anka wɔn ani bɛsɔ. Nhyehyɛe a ɛte saa no hwehwɛ sɛ wonya mmara horow, polisifo kuw a wɔhwɛ ma nkurɔfo di so, ne asɛnni bagua ahorow a wobu atɛntrenee. Nokware Kristofo kyerɛ obu ma atemmu nhyehyɛe a ɛwɔ baabi a wɔte no, ma ɛne Bible afotu a ese ‘yɛmmrɛbrɛ yɛn ho ase mma atumfoɔ a wɔkorɔn’ no hyia.—Romafo 13:1-7.

Nanso, atemmu nhyehyɛe a ɛwɔ aman ahorow bi mu no adidi mfomso a ɛyɛ hu na ɛyɛ aniwu.a Sɛ́ anka wɔbɛtwe wɔn a wodi fɔ aso na wɔabɔ wɔn a wɔn ho nni asɛm ho ban no, nnipa a wɔn ho nni asɛm na ɛtɔ mmere bi a wɔtwe wɔn aso wɔ bɔne a wɔnyɛe ho. Afoforo nso adi mfe dodow bi wɔ afiase ma sɛ ɛba sɛ wontumi nhu sɛ ebia wodi fɔ anaasɛ wonni fɔ, ne sɛ ebia na ɛmfata sɛ wɔde wɔn tom a, woyi wɔn ansa na wɔn bere asõ. Enti, nnipa pii rebisa sɛ, So obiara benya atɛntrenee ankasa bi? Sɛ saa a, bere bɛn ne ɔkwan bɛn so? Hena na yebetumi anya ne mu ahotoso sɛ ɔbɛbɔ wɔn a wɔn ho nni asɛm no ho ban? Na anidaso bɛn na ɛwɔ hɔ ma wɔn a wobu wɔn ntɛnkyea no?

Atɛn a Wɔammu no Yiye

Wɔ 1980 mfe no mu no, “wiase ko no akyi asɛnnii a ani baa ho sen biara no biako” kɔɔ so wɔ Germany bere a wɔde ɛna bi kɔtoo afiase sɛ wakum ne mmabea baanu no. Nanso mfe bi akyi no, wɔsan susuw adanse a wogyinaa so buu no fɔ no ho, na woyii no sɛ wobedi asɛm no foforo. Die Zeit bɔɔ amanneɛ wɔ 1995 mu sɛ atemmu a edi kan no “betumi ayɛ asɛnni mu mfomso.” Ebeduu bere a yɛrekyerɛw asɛm yi no, na ɔbea yi ada afiase mfe akron, a wontumi nhu pefee sɛ odi fɔ anaa odi bem.

Wɔ November 1974 anwummere bi no, atopae abien towee wɔ Birmingham kurow a ɛwɔ England no mfinimfini ma ekunkum nnipa 21. Chris Mullen a na ɔka Mmarahyɛ Bagua no ho no kyerɛwee sɛ ɛyɛ asɛm a “obiara a ɔwɔ Birmingham werɛ remfi da.” Akyiri yi, “wobuu mmarima baasia a wɔn ho nni asɛm atɛn sɛ wodi fɔ wɔ awudi a ɛsen biara wɔ Britainfo abakɔsɛm mu no ho.” Bere bi akyi no, woyii sobo no fii wɔn so—nanso na mmarima no ada afiase mfe 16 dedaw!

Mmaranimfo Ken Crispin bɔɔ asɛm bi a “egyee ɔmanfo adwene wɔ ɔkwan soronko koraa so wɔ Australia atemmusɛm mu” ho amanneɛ. Ná abusua bi asi wɔn ntamadan wɔ baabi a ɛbɛn Ayers Rock bere a wɔn ba ketewa bi yerae a wɔanhu no bio no. Wɔbɔɔ ne maame sobo sɛ wadi awu, buu no fɔ, na wɔkae sɛ wɔmfa no nto afiase ne nkwa nna nyinaa. Wɔ 1987 mu, bere a na wada afiase bɛboro mfe abiɛsa no, ɔman mpanyimfo nhwehwɛmu daa no adi sɛ adanse a wɔde buu no fɔ no nyɛ nea wobetumi agyina so abɔ no sobo. Woyii no, na wogyaa no.

Obi kum ɔbea bi a wadi mfe 18 wɔ United States wɔ 1986 mu. Wɔbɔɔ ɔbarima abasiriwa bi sobo, buaa no kumfɔ. Odii mfe asia wɔ afiase dan a wɔde wɔn a wɔabu wɔn kumfɔ gu ansa na wɔrehu sɛ na onnim asɛm no ho hwee.

So eyinom yɛ asɛnni mu mfomso a ɛdeda mu mmiako mmiako? David Rudovsky a ɔwɔ Pennsylvania Sukuupɔn no Mmara Suabea no ka sɛ: “Matra adwuma no mu bɛyɛ mfe 25, na mahu nsɛnnii pii. Mahu nnipa a wɔabu wɔn fɔ a wɔn ho nni asɛm . . . Sɛ mede m’adwene rebu a, ɛbɛyɛ nnipa ɔha biara mu baanum anaa 10.” Crispin bisa asɛm a ɛkyere adwene yi sɛ: “So ebetumi aba sɛ nnipa afoforo a wɔn ho nni asɛm gu afiase mmɔbɔmmɔbɔ?” Ɛyɛ dɛn na wotumi di mfomso a anibere wom saa?

Nnipa Asɛnni Nhyehyɛe—A Nnipa Mmerɛwyɛ Bata Ho

Britain Asɛnnibea a Wɔde Asɛm Kɔdan Wɔn no sii so dua wɔ 1991 mu sɛ: “Nnipa atemmu nhyehyɛe biara nni hɔ a wobetumi ahwɛ kwan sɛ ɛbɛyɛ pɛ.” Sɛ asɛnni nhyehyɛe betumi ayɛ nea ebu atɛntrenee na wotumi de ho to so a, gye sɛ nnipa a wɔhyehyɛ na wodi ho dwuma no te saa. Nnipa di mfomso, wonni nokware, na wotumi nya adwemmɔne. Enti ɛnsɛ sɛ ɛyɛ yɛn nwonwa sɛ nnipa asɛnni nhyehyɛe da sintɔ a ɛtete saa ara adi. Susuw nea edidi so yi ho.

Sɛnea Ɔtemmufo Rolf Bender a ɔwɔ Germany kyerɛ no, nsɛmmɔne ho atemmu nyinaa mu ɔha biara mu 95 yɛ nea wogyina adansefo anom nsɛm so na esi ho gyinae. Nanso wobetumi agye wɔn a wodi adanse wɔ asɛnnibea a wɔte saa no adi bere nyinaa? Ɔtemmufo Bender nnye nni saa. Obu akontaa sɛ adansefo a wɔba asɛnnibea no fã twa nkontompo. Bernd Schünemann a ɔyɛ ɔbenfo a odi mũ wɔ nsɛmmɔnedi ho mmara mu wɔ Sukuupɔn a ɛwɔ Munich, Germany, no kaa biribi a ɛte saa. Bere a Die Zeit akyerɛwfo no bisabisaa Schünemann nsɛm no, ɔfoaa so sɛ adansefo anom nsɛm ne ɔkwan titiriw a wɔnam so nya adanse—ɛwom sɛ enni mũ. “Metumi aka sɛ nea ɛtaa ma wodi mfomso wɔ atemmu mu ne sɛ ɔtemmufo no de ne ho to adansefo a wotwa nkontompo anom nsɛm so.”

Adansefo tumi di mfomso; polisifo nso saa ara. Ɛnkanka sɛ obi adi asɛmmɔne ama ɔmanfo ani abere no, ɛma polisifo no te nka sɛ ɛsɛ sɛ wɔkyere obi. Wɔ tebea a ɛtete saa mu no, ɛsɔ polisifo ankorankoro bi hwɛ ma wɔbɔ wɔn tirim pɛ adanse bi anaa wɔhyɛ obi a wɔde bɔne no susuw no ma ogye tom sɛ ɔno na ɔyɛe. Bere a wogyaa mmarima baasia a wɔkyeree wɔn wɔ Birmingham atopae no ho no, wɔkyerɛw asɛm bi wɔ Britain atesɛm krataa The Independent mu a n’asɛmti ne sɛ: “Polisifo Nkontompofo na Ɛmaa Wɔde Nnipa Baasia Too Mu.” Sɛnea The Times kyerɛ no: “Polisifo dii atoro, wɔkaa wɔn tiri pam ho twaa nkontompo.”

Wɔ tebea horow bi mu no, afoforo ho adwemmɔne a polisifo ne ɔmanfo wɔ no tumi ma wɔde bɔne susuw ebinom a wofi mmusua, ɔsom, anaa ɔman bi mu. Sɛnea U.S.News & World Report kyerɛ no, sɛ wɔrehwehwɛ nsɛmmɔnedi bi mu a, asɛm no tumi sɛe bɛdan “mmusua mu nyiyim mmom sen sɛ anka ɛbɛyɛ asɛm a egyina adanse so.”

Sɛ asɛm bi nya du asɛnnibea a, ɛnyɛ nea adansefo ka nko na ebetumi anya gyinaesi no so tumi, na mmom nyansahu mu adanse nso. Bere a akwan a wɔnam so hwehwɛ nsɛm mu renya nkɔanim kɛse no, ebetumi aba sɛ ɔtemmufo anaa asɛnni baguafo begyina sɛnea tuo aboba tow anaa obi nsatea ano nsesanee, nkyerɛwee, mogya su, ti nhwi su, atade mu nhama, anaasɛ awosu mu nneɛma bi so akyerɛ sɛ obi di fɔ anaa odi bem. Mmaranimfo bi kae sɛ asɛnni baguafo tie “nyansahufo bebree a wɔkyerɛkyerɛ sɛnea nneɛma te mu hwanyann.”

Bio nso, Nature nsɛmma nhoma no ka sɛ ɛnyɛ nyansahufo nyinaa na wɔn adwene hyia wɔ ɔkwan a wɔfa so kyerɛkyerɛ nsɛm a wogyina so di adanse wɔ asɛnnibea no mu. “Nyansahufo a wɔde nneɛma di adanse wɔ asɛnnibea betumi agye nneɛma bi ho akyinnye ma afata.” Awerɛhosɛm ne sɛ, “nyansahu mu adanse a enni mũ ama wɔabu nnipa pii fɔ wɔ ɔkwan a ɛmfata so dedaw.”

Ɛmfa ho baabi a yɛte no, atemmu nhyehyɛe a ɛwɔ hɔ nnɛ nyinaa da nnipa sintɔ adi. Enti hena na yebetumi de yɛn ho ato ne so sɛ ɔbɛbɔ nnipa a wɔn ho nni asɛm ho ban? Anidaso bi wɔ hɔ sɛ yebenya atɛntrenee da bi? Na anidaso bɛn na ɛwɔ hɔ ma wɔn a wɔnam asɛnni mu mfomso so abu wɔn ntɛnkyea no?

“Me, Yehowa, Medɔ Atɛntrenee”

Sɛ wɔnam asɛnni mu mfomso so bu wo anaa wo busuani bi ntɛnkyea a, Yehowa Nyankopɔn ne ne Ba, Yesu, te nea ato wo no ase. Wobuu ntɛnkyea a ɛsen biara wɔ abakɔsɛm mu bere a wokum Kristo wɔ asɛndua so no. Ɔsomafo Petro ka Yesu ho asɛm kyerɛ yɛn sɛ “wanyɛ bɔne.” Nanso, adansekurumfo bɔɔ no sobo, wobuu no fɔ, na wokum no.—1 Petro 2:22; Mateo 26:3, 4, 59-62.

Hwɛ sɛnea ɛbɛyɛ sɛ Yehowa tee nka wɔ ayayade a ɛte saa a wɔde yɛɛ ne Ba no ho! Atɛntrenee yɛ Yehowa su atitiriw no biako. Bible ka kyerɛ yɛn sɛ: “N’adeyɛ yɛ pɛ.”—Deuteronomium 32:4; Dwom 33:5.

Yehowa maa Israel asɛnni nhyehyɛe soronko bi. Sɛ wokum obi na wɔanhu nea ɔyɛɛ saa a, na wɔbɔ afɔre de pata ne wu no. Ná biribiara nhyɛ wɔn sɛ wommu obi a ne ho nni asɛm fɔ mfa nni asɛmmɔne biara ho dwuma. Ná wontumi mmɔ obiara sobo sɛ wadi awu bere a enni nnyinaso anaa egyina nyansahu mu adanse bi nkutoo so; anyɛ hwee koraa no, na ehia adansefo baanu. (Deuteronomium 17:6; 21:1-9) Saa nhwɛso horow yi kyerɛ sɛ Yehowa wɔ gyinapɛn a ɛkorɔn na ɔpɛ sɛ wobu atɛn yiye. Nokwarem no, ɔka sɛ: “Me, Yehowa, medɔ atɛntrenee.”—Yesaia 61:8.

Ampa, na Israel asɛnni nhyehyɛe no wɔ nnipa a wɔwɔ sintɔ te sɛ yɛn ara nsam. Nsɛm bi sisii a wɔde mmara no dii dwuma ɔkwammɔne so. Ɔhene Salomo kyerɛwee sɛ: “Sɛ wuhu ɔbrɛfo so hyɛ ne atemmu ne trenee anidan asase bi so a, mma wo ho nnnwiriw wo saa asɛm no ho.”—Ɔsɛnkafo 5:8.

Yehowa tumi siesiee ntɛnkyea a wobuu ne Ba no. Esiane sɛ na Yesu wɔ ho awerɛhyem nti, ɛhyɛɛ no den, na “ɔhwɛɛ anigye a ɛda n’anim . . . huu asɛndua ho amane.” Ɔkwan a ɛte saa ara so no, anigye a ɛbɛyɛ sɛ yɛbɛtra paradise asase so wɔ Mesia nniso ase, a atɛntrenee kɔ so wom no betumi ahyɛ yɛn den bere a yɛte ntɛnkyea ho nsɛm anaa wɔde bi di yɛn ankasa mpo wɔ saa nhyehyɛe dedaw yi mu no. Ɔhaw anaa amanehunu biara nni hɔ a Yehowa ntumi nsiesie wɔ ne bere a ɛsɛ mu. Wɔn a wɔnam ntɛnkyea so hwere wɔn nkwa mpo betumi anya owusɔre.—Hebrifo 12:2; Asomafo no Nnwuma 24:15.

Sɛ wobu yɛn ntɛnkyea a, yebetumi de aseda ama sɛ asɛnni nhyehyɛe pii wɔ mmara horow a ebetumi ama yɛasiesie tebea no. Kristofo betumi de saa mmara horow no ayɛ adwuma. Nanso, wɔma nokwasɛm yi tra wɔn adwene mu: Atemmu nhyehyɛe ahorow a sintɔ wom no yɛ adanse a ɛkyerɛ sɛ nnipa nhyehyɛe hia nsiesie kɛse. Wobesiesie no nnansa yi ara—wɔ Onyankopɔn nsam.

Ɛrenkyɛ, Yehowa beyi nneɛma nhyehyɛe a atɛntrenee nnim yi afi hɔ de nhyehyɛe foforo a “trenee te mu” aba. Yebetumi anya ahotoso a edi mũ sɛ yɛn Bɔfo no nam ne Mesia Hene, Yesu Kristo, so bebu atɛntrenee saa bere no. Atɛntrenee a obiara benya abɛn! Hwɛ aseda ara a yebetumi de ama wɔ saa anidaso yi ho.—2 Petro 3:13.

[Ase hɔ asɛm]

[Asɛm a wɔafa aka wɔ kratafa 27]

Atemmu nhyehyɛe ahorow a sintɔ wom—ne nniso a aporɔw, atoro som, ne aguadi bɔne—no di adanse sɛ nnipa nhyehyɛe no hia nsiesie kɛse

[Kratafa 28 adaka]

Awerɛkyekye A Efi Kyerɛw Kronkron No Mu

Wɔ November 1952 no, Derek Bentley ne Christopher Craig buu adekoradan bi ani kɔɔ mu wɔ Croydon, a ɛbɛn London, England. Ná Bentley adi mfe 19, na Craig adi mfe 16. Obi frɛɛ polisifo bae, na Craig bɔɔ polisifo no biako tuo kum no. Wɔde Craig too afiase mfe akron, na wɔsɛn Bentley wɔ January 1953 mu sɛ wadi awu.

Bentley nuabea Iris twee ho manson mfe 40 sɛ ɔde resan ne din ho sɛ wanni awu. Wɔ 1993 mu no, Ɔmampanyin no kae sɛ Derek Bentley di bem wɔ atemmu no mu, na ogye toom sɛ ɛnsɛ sɛ anka wɔsɛn no da. Iris Bentley kyerɛw ho asɛm baa nhoma a ɛne Let Him Have Justice (Mummu no Atɛn a Ɛteɛ) mu sɛ:

“Bɛyɛ afe biako ansa na awudi no reba no, Derek hyiaa Yehowa Ɔdansefo bi wɔ abɔnten . . . Ná Onuawa Lane te bɛn yɛn wɔ Fairview Road na na ɔtaa to nsa frɛ Derek ma obetie Bible mu nsɛm. . . . Nea na eye wɔ ho ne sɛ na Bible mu nsɛm a na Onuawa Lane ka no wɔ mpaawa so, na ɔde maa no tiee bi [efisɛ na Derek akenkan nye]. . . . Sɛ ɔsan ba fie a, na ɔtaa ka nea ɔbea no aka akyerɛ no no kyerɛ me, a ebi ne sɛ sɛ yewuwu a, yɛn nyinaa bɛsan aba bio.”

Iris Bentley kɔsraa ne nuabarima no wɔ afiase dan a wɔde wɔn a wɔabu wɔn kumfɔ gu ansa na wɔakum wɔn no mu. Ne nua no tee nka dɛn? “Nsɛm a Onuawa Lane ka kyerɛɛ no no boaa no wɔ ne nna kakraa bi a na aka no mu.”—Yɛn na yɛasi ɔfã bi so dua no.

Sɛ wobu wo ntɛnkyea ma wuhu amane a, ɛbɛyɛ papa sɛ wobɛkenkan Bible mu nokwasɛm ahorow na woadwennwen ho. Eyi betumi ama wo awerɛkyekye kɛse, efisɛ Yehowa Nyankopɔn yɛ “awerɛkyekye nyinaa Nyankopɔn a ɔkyekye yɛn werɛ yɛn ahohia nyinaa mu.”—2 Korintofo 1:3, 4.

[Kratafa 29 mfonini]

Wobuu ntɛnkyea kɛse bere a wokum Kristo no