Wɔyɛɛ Yehowa Apɛde

Paulo Di Asiane Mu Nkonim

PAULO wɔ ahoyeraw mu. Ɔne afoforo 275 wɔ hyɛn bi a ahyia Benkum-Apuei-Mframa a edi awu—ahum a ano yɛ den sen biara wɔ Mediterranea so—no mu. Ahum no ano yɛ den araa ma wontumi nhu owia adekyee, na na wontumi nhu nsoromma anadwo. Ntease wom sɛ, na ɛhyɛn no mufo suro wɔn nkwa ho. Nanso, Paulo kyekye wɔn werɛ denam nea Onyankopɔn yi kyerɛɛ no dae mu a ɔka kyerɛ wɔn no so: “Mo mu biara kra renyera, gye hyɛn yi.”—Asomafo no Nnwuma 27:14; 20-22.

Wɔ ahum no da a ɛto so 14 anadwo no, hyɛn mu adwumayɛfo no hu biribi a ɛyɛ nwonwa—nsu no dɔ bɛyɛ abasam 20 pɛ.a Bere a wɔkɔ akyiri kakra no, wosusuw nsu no bio. Saa bere yi de, na nsu no dɔ bɛyɛ abasam 15. Wɔabɛn asase! Nanso aniberesɛm bi bata saa asɛmpa yi ho. Bere a mframa no de hyɛn no di akɔneaba wɔ nsu a emu nnɔ yi so anadwo no, ɛhyɛn no betumi apempem abotan ma abubu. Nyansam no, hyɛn no mu adwumayɛfo no to hyɛn no sɛkyɛ. Wɔn mu binom pɛ sɛ wogyae ɔkorow to po no mu de hwɛ sɛ wobetumi adu asase kesee so anaa.b Nanso Paulo ma wogyae. Ɔka kyerɛ asraafo panyin ne asraafo no sɛ: “Sɛ eyinom antra hyɛn yi mu de a, morennya nkwa.” Asraafo panyin no tie Paulo, na afei hyɛn no mufo 276 no nyinaa de ahopere twɛn sɛ ade bɛkye.—Asomafo no Nnwuma 27:27-32.

Hyɛn no Bɔ

Ade kyee no, hyɛn no mufo no huu po faka bi a ɛho mpoano da hɔ. Bere a wɔn anidaso mu ayɛ den no, hyɛn mu adwumayɛfo no twa sɛkyɛ no nhama mu, na wosi abrannaa ma mframa no. Ɛhyɛn no fi ase kɔ mpoano—a akyinnye biara nni ho sɛ wɔteɛteɛm anigye so.—Asomafo no Nnwuma 27:39, 40.

Nanso, mpofirim ara, hyɛn no tim bɔnka bi mu. Nea enye koraa no, asorɔkye a ano yɛ den bi bɛbɔ hyɛn no to ma ebubu no pasaa. Ɛsɛ sɛ hyɛn no mufo no nyinaa fi mu! (Asomafo no Nnwuma 27:41) Nanso eyi de ɔhaw bi ba. Hyɛn no mufo pii—a Paulo ka ho—yɛ nneduafo. Wɔ Roma mmara mu no, sɛ ɔwɛmfo bi ma ne deduani guan a, wɔde asotwe a anka ɛsɛ sɛ wɔde ma deduani no bɛma no. Sɛ nhwɛso no, sɛ nea oguanee no yɛ owudifo a, ɛsɛ sɛ ɔwɛmfo a wanyɛ n’adwuma yiye no de ne nkwa si anan.

Esiane nneɛma a ɛtete saa ho suro nti, asraafo no si gyinae sɛ wobekum nneduafo no nyinaa. Nanso, asraafo panyin no a n’adamfo ne Paulo no de ne ho gye mu. Ɔhyɛ sɛ wɔn a wobetumi nyinaa ntɔ nsu no mu nguare nkɔ asase so. Ɛsɛ sɛ wɔn a wontumi nguare no suso ntaaboo anaa nneɛma foforo mu fi hyɛn no mu. Ɛhyɛn a abɔ no mufo no de nkakrankakra fi mu mmiako mmiako kɔ mpoano. Nea ɛne Paulo nsɛm no hyia no, obiako mpo anhwere ne nkwa!—Asomafo no Nnwuma 27:42-44.

Anwonwade Wɔ Malta

Kuw a wɔabrɛ no anya guankɔbea wɔ supɔw bi a wɔfrɛ no Malta so. Ɛhɔfo no yɛ “pɔtɔfo,” yɛbɛka paa a, wɔyɛ “ahamufo” (barbarians—Hela, barʹba·ros).c Nanso Maltafo no nyɛ atirimɔdenfo. Nea ɛne no bɔ abira no, Luka, Paulo akwantu mu hokafo no, bɔ amanneɛ sɛ ‘wɔyɛɛ yɛn adɔe a ɛnka; na osu a ɛretɔ ne awɔw no nti, wɔsɔɔ ogya gyee yɛn nyinaa.’ Paulo ankasa kɔka Maltafo no ho boaboa mmabaa ano de gu gya no so.—Asomafo no Nnwuma 28:1-3, ase hɔ asɛm.

Mpofirim ara, ahurutoa bi bɛkyekyere Paulo nsa ho! Supɔw no sofo no susuw sɛ ɛbɛyɛ sɛ Paulo yɛ owudifo. Akyinnye biara nni ho sɛ, wosusuw sɛ Onyankopɔn twe abɔnefo aso denam wɔn nipadua no fã a wɔde dii bɔne no a ɔtow hyɛ so no so. Nanso hwɛ! Nea ɛyɛɛ hɔfo no nwonwa kɛse no, Paulo pete ahurutoa no to gya mu. Sɛnea Luka kyerɛwtohɔ a aniwa tua no ka no, ‘na wɔhwɛ kwan sɛ Paulo bɛhonhon anaasɛ ɔbɛhwe ase awu mpofirim.’ Supɔw no sofo no sesa wɔn adwene, na wofi ase ka sɛ ɛbɛyɛ sɛ Paulo yɛ onyame bi.—Asomafo no Nnwuma 28:3-6.

Paulo di asram abiɛsa a edi hɔ no wɔ Malta, na saa bere no, ɔsa Publio, supɔw no so otitiriw a ogyee Paulo hɔho, no agya, ne afoforo a na wɔyare no yare. Bio nso, Paulo gu nokware aba no wɔ hɔ, na ɛde nhyira pii brɛ Maltafo a wɔwɔ ahɔhoyɛ su no.—Asomafo no Nnwuma 28:7-11.

Asuade Ma Yɛn

Bere a Paulo reyɛ ne som adwuma no, ohyiaa nsɛnnennen pii. (2 Korintofo 11:23-27) Wɔ atifi hɔ asɛm no mu no, na ɔyɛ deduani esiane asɛmpa no nti. Afei, na ɛsɛ sɛ ohyia sɔhwɛ ahorow a ɔnhwɛ kwan: ahum a ano yɛ den ne afei asugu. Wɔ eyi nyinaa mu no, Paulo anhinhim wɔ ne bo a wasi sɛ ɔbɛyɛ asɛmpa no ho ɔsɛnkafo a ɔyɛ nsi no mu da. Ofi suahu mu kyerɛwee sɛ: “Makokwaw ade biara ne ade nyinaa mu, ɔmee ne ɔkɔm ne taamu ne hiadi; mitumi ade nyinaa yɛ, nea ɔhyɛ me den no mu.”—Filipifo 4:12, 13.

Ɛnsɛ sɛ yɛma asetra mu haw ahorow brɛ gyinae a yɛasi sɛ yɛbɛyɛ Onyankopɔn nokware asomfo a wɔyɛ nsi no ase da! Sɛ sɔhwɛ bi a yɛnhwɛ kwan sɔre a, yɛdan yɛn adesoa to Yehowa so. (Dwom 55:22) Afei, yɛde boasetɔ twɛn no hwɛ sɛnea ɔbɛma yɛatumi agyina sɔhwɛ no ano. Ne nyinaa mu no, yɛkɔ so som no nokwaredi mu, a yɛwɔ ahotoso sɛ odwen yɛn ho. (1 Korintofo 10:13; 1 Petro 5:7) Sɛ yɛkɔ so gyina pintinn a, ɛmfa ho nea ɛbɛba biara no,—te sɛ Paulo no—yebetumi adi asiane so nkonim.

[Ase hɔ nsɛm]