So Wokae?
So w’ani gyee Ɔwɛn-Aban a ɛbaa nnansa yi akenkan ho? Sɛ saa a, hwɛ sɛ wubetumi abua nsɛmmisa a edidi so yi a:
• Dɛn nti na ɛho hia sɛ yesusuw nsɛmmisa a ɛkɔɔ so wɔ Hiob 38 no ho nnɛ?
Ɛnnɛyi nyansahufo mpo ntumi nte anwonwade pii a Onyankopɔn kaa ho asɛm wɔ hɔ no ase nwie. Nea ɛka eyinom ho ne sɛnea tumi a ɛtwe ade ba fam (gravity) no ma asase fa ne kwan so pɛpɛɛpɛ, nea hann kyerɛ ankasa, nea enti a sukyerɛmma gu ahorow, sɛnea osu a ɛtɔ te, ne sɛnea tumi ho hia ma aprannaa.—4/15, nkratafa 4-11.
• Bible mu nhwɛso bɛn na ebetumi aboa ma yɛagyina abasamtu ano?
Asaf, Baruk, ne Naomi, nyinaa hyiaa abasamtu ne ɔhaw afoforo, na sɛnea wotumi gyinaa tebea a ɛtete saa ano a wɔayɛ ho kyerɛwtohɔ wɔ Kyerɛwnsɛm mu no betumi aboa yɛn.—4/15, nkratafa 22-4.
• Akwampa bɛn na yebetumi afa so aboa Kristofo akunafo?
Nnamfo betumi afi wɔn pɛ mu aboa. Abusuafo betumi de sika anaa honam fam nneɛma afoforo ama akunafo a wohia mmoa ampa no. Mfɛfo Kristofo nso betumi afa wɔn adamfo, na wɔde honhom fam mmoa ne awerɛkyekye ama wɔn.—5/1, nkratafa 5-7.
• Dɛn nti na ɛho hia sɛ yɛware “Awurade mu nko,” sɛnea 1 Korintofo 7:39 de ho afotu ma no?
Ware a afoforo ware wɔn a wɔnyɛ gyidifo no taa de ɔhaw kɛse ba. Afei nso, afotu yi a efi Onyankopɔn hɔ a yebetie no kyerɛ sɛ yedi Yehowa Nyankopɔn nokware. Sɛ yedi Onyankopɔn Asɛm so a, yɛn koma mmu yɛn fɔ. (1 Yohane 3:21, 22)—5/15, nkratafa 20-1.
• Esiane sɛ Yehowa nkutoo na obetumi de yɛn bɔne afiri yɛn nti, adɛn nti na Kristofo ka bɔne a anibere wom ho asɛm kyerɛ asafo mu mpanyimfo no?
Yiw, Yehowa na ɛsɛ sɛ Kristofo hwɛ kwan sɛ ɔde wɔn bɔne a anibere wom befiri wɔn. (2 Samuel 12:13) Nanso, sɛnea odiyifo Natan boaa Dawid no, saa ara na asafo mu mpanyimfo a wɔn ho akokwaw no betumi aboa wɔn a wɔayɛ bɔne nanso wɔanu wɔn ho no. Mpanyimfo no a obi bɛkɔ akohu wɔn no ne asɛm a ɛwɔ Yakobo 5:14, 15 no hyia.—6/1, kratafa 31.
• Adanse bɛn na ɛwɔ hɔ a ɛkyerɛ sɛ ɛsɛ sɛ yɛhwɛ nyisaa ne akunafo a wohia mmoa no?
Abakɔsɛm kyerɛ sɛ na mmoa a ɛte saa a wɔde ma no yɛ nokware som a tete Hebrifo ne Kristofo a wodi kan no de mae no fã. (Exodus 22:22, 23; Galatifo 2:9, 10; Yakobo 1:27) Ɔsomafo Paulo de akunafo a Kristofo bɛhwɛ wɔn ho nyansahyɛ a emu da hɔ mae wɔ Kyerɛwnsɛm no mu. (1 Timoteo 5:3-16)—6/15, nkratafa 9-11.
• Dɛn na ebetumi ama yɛanya asetra a ɛyɛ anigye na atirimpɔw wom?
Ɛsɛ sɛ yɛne Yehowa, yɛn soro Agya no, nya abusuabɔ pa. Bible no a yebesua no yɛ ɔkwampa a yebetumi afa so ayɛ saa.—7/1, nkratafa 4-5.
• So onipa biara wɔ honhom a ɛtra ase daa wɔ owu akyi?
Ɛwom sɛ ebinom ka sɛ honhom no—na ɛnyɛ ɔkra—na ɛtra ase daa de, nanso Bible no mfoa adwene a ɛte saa so. Ɛkyerɛ sɛ sɛ obi wu a, ɔsan kɔ dɔte mu na onni nkwa mu bio. Nanso Onyankopɔn betumi asan de no aba nkwa mu, ma enti Onyankopɔn nkutoo na obetumi ama watra ase bio denam owusɔre no so. (Ɔsɛnkafo 12:7)—7/15, nkratafa 3-6.
• Na Daniel wɔ he bere a wɔsɔɔ Hebrifo baasa no hwɛe wɔ Dura tataw so no?
Bible nka. Ebetumi aba sɛ esiane Daniel dibea nti, wɔamma wankɔ bi, anaasɛ ebetumi aba sɛ na ɔhene no de adwuma bi ahyɛ ne nsa. Nanso, yebetumi anya awerɛhyem sɛ ɔkɔɔ so dii nokware maa Yehowa.—8/1, kratafa 31.