So Onyankopɔn Dwen Yɛn Ho?

SO WOTE nka sɛ nneɛma hyɛ wo so esiane w’abusua mu haw ahorow, yare bi a ɛhaw wo, adwuma ho nsɛnnennen anaa asɛyɛde ahorow bi a emu yɛ duru nti? Nnipa pii te nka saa. Na hena na obetumi aka sɛ atɛnkyea, amumɔyɛ ne basabasayɛ mfa ne ho nnɛ? Nokwarem no, ɛne nea Bible no ka di nsɛ: “Abɔde nyinaa penepene, na ɛko awo bedu nnɛ yi.” (Romafo 8:22) Ɛnyɛ nwonwa sɛ nnipa pii bisa sɛ: ‘So Onyankopɔn dwen yɛn ho? Na ɔbɛboa yɛn anaa?’

Ɔhene Salomo nyansafo no ka kyerɛɛ Onyankopɔn wɔ mpaebɔ mu sɛ: “Wo ara wo nko na wunim nnipa mma koma mu.” Ná Salomo wɔ ahotoso sɛ ɛnyɛ nim nko na Onyankopɔn nim yɛn na mmom odwen yɛn mu biara ho nso. Ɔka kyerɛɛ Onyankopɔn sɛ omfi ‘ɔsoro hɔ ntie’ obiara a osuro Onyankopɔn na ɔka “ne haw ne ne yaw” ho asɛm kyerɛ no no mpaebɔ.—2 Beresosɛm 6:29, 30.

Ɛnnɛ, Yehowa Nyankopɔn da so dwen yɛn ho na ɔto nsa frɛ yɛn sɛ yɛmmra ne nkyɛn wɔ mpaebɔ mu. (Dwom 50:15) Ɔhyɛ bɔ sɛ obetie mpaebɔ a efi komam a ɛne n’apɛde hyia no. (Dwom 55:16, 22; Luka 11:5-13; 2 Korintofo 4:7) Yiw, Yehowa tie ‘mpaebɔ biara, ne nkotɔsrɛ biara a onipa biara anaa ne nkurɔfo nyinaa de ba n’anim.’ Enti sɛ yɛde yɛn ho to Onyankopɔn so, na yɛbɔ mpae sɛ ɔmmoa yɛn, na yɛbɛn no a, yebehu sɛ ofi ɔdɔ mu dwen yɛn ho na yebenya n’ahobammɔ. (Mmebusɛm 3:5, 6) Bible kyerɛwfo Yakobo ma yɛn awerɛhyem sɛ: “Mommɛn Onyankopɔn, na ɔbɛbɛn mo.”—Yakobo 4:8.