Nea Bible Wɔ Ka

‘Abrabɔ Pa Ahorow No Mu Nea Ɛba Fam Sen Biara’ Anaasɛ Nea Wobu No Sɛ Ɛsom Bo Kɛse?

WILLIAM Hazlitt, Engiresi ɔkyerɛwfo a ɔtraa ase wɔ afeha a ɛto so 19 no mu no kae sɛ, “Ahobrɛase ne abrabɔ pa ahorow no mu nea ɛba fam sen biara na edi adanse sɛ ennu nea wɔhwehwɛ no ho. Nea ommu ne ho sɛ ɔsom ho no dan obi a afoforo nso mmu no sɛ ɔsom bo.”

So Bible akyerɛwfo a honhom ka wɔn no pene adwene a ɛte sɛɛ a ɛfa ahobrɛase ho no so anaa? So ahobrɛase di adanse kyerɛ sɛ onii ko a ɔte saa no nnu nea wɔhwehwɛ wɔ ne ho no ho, “abrabɔ pa ahorow no mu nea ɛba fam sen biara” no a ɛyɛ mmerɛwyɛ ho sɛnkyerɛnne? Wobu obi a ɔyɛ ahobrɛasefo no sɛ ɔte dɛn?

Mpɛn pii no wɔtaa de asɛmfua “ahobrɛase” di dwuma na wɔde to nea ɛfata wɔ atadehyɛ, anaasɛ ahosiesie mu no ho. Eyi mu na ɔsomafo Paulo tuu fo na ɔde kasa tiaa atade a wɔbɛhyɛ de akyerɛ, sɛ: “Saa ara nso na mmea nhyɛ ntade a ɛsɛ, mfa ani a ewu ade ne adwenemtew nkeka wɔn ho, ɛnyɛ mmɛsawɔw anaa sika anaa nhene pa anaa ntade a ɛwɔ ɛbo mu, na mmom nnwuma pa a ɛsɛ mmea a woyi Onyankopɔn som pa kyerɛ mu.” (1 Tim. 2:9, 10) Afotu a ɛwɔ ha no fa mmarima ne mmea nyinaa ho. Ɛnkasa ntia ahotew, na mmom esi sɛnea ‘biribi mfata so dua, wɔ Kristoni no ani so no, nneɛma a enye, ahuhude ne ntade ne ahosiesie a wɔyɛ de kyerɛ. Ahosiesie a ehia sen biara no mmom ne obi “nnwuma pa.”

Asɛmfua “ahobrɛase” no ase nyɛ nea wɔde to sɛnea obi siesie ne ho nkutoo ho. Sɛ wɔde to su a ɛfa adwene no ne koma no ho a, na ɛkyerɛ sɛ obi besusuw sɛnea n’ankasa te no ho yiye, sɛ ɔbɛma n’ani aba ne sintɔ ahorow no so. Ahobrɛase kyerɛ sɛ obi afa ne ho adi afi ahomaso, ahantan, ahuhude, nnaadaa ne ahohoahoa ho. Obi a ɔyɛ ɔhobrɛasefo no de nsɛm a ɛwɔ Mmebusɛm 27:2 a ɛka sɛɛ no tra ase: “Ma obi nyi wo ayɛ, na nyɛ w’ano, ɔhɔho, na ɛnyɛ w’anofafa.” So woremmu adamfo bi a oyi su a ɛte sɛɛ adi kyerɛ no sɛ ɔsom bo?

Sɛ́ ɔbɛbrɛ ahobrɛase ase mmom no, tete odiyifo Mika kaa eyi ho asɛm sɛ ɛyɛ Onyankopɔn ahwehwɛde. “Wɔaka nea eye akyerɛ wo onipa ne nea Awurade hwehwɛ wo hɔ: . . . ahobrɛase a wode ne Onyankopɔn nantew.”​—Mika 6:8.

Ahobrɛase a wɔde ne Onyankopɔn nantew nyɛ mmerɛwyɛ ho sɛnkyerɛnne, na mmom ɛfa sɛnea obi akari dibea a ɔwom no ahwɛ yiye wɔ ɔbɔadeɛ no anim no ho. Ahobrɛase fi hu a obi hu sɛ ɔde ne ho to Nyankopɔn so no mu, hu a ohu sɛ ɔyɛ ɔbɔnefo na Onyankopɔn na ɔyɛ kronn ne ɔhotewfo. Sɛ́ obeyi ahotoso a n’ankasa wɔ wɔ ne mu a ɛmfata adi no, ɔhobrɛasefo no de “osuro ne ahopopo” yɛ n’ankasa ne nkwagye ho adwuma.​—Fil. 2:12.

Sɛnea abɔde ahorow sosoe na ɛyɛ fɛ fa no yɛ ɔhobrɛasefo no nwonwa na ɔte nka sɛ ɛsɛ sɛ ɔbrɛ ne ho ase koraa. Nea ɛyɛ anigye ne sɛ wiase nyansapɛfo a wagye din a wawu a ɔne Albert Einstein yii saa su yi ara adi kyerɛe, na ɔkae sɛ: “Obiara a ɔde anibere di nyansapɛ akyi no gye tom sɛ Amansan mmara yi honhom bi adi​—honhom bi a ɔso koraa kyɛn onipa, nea ɛsɛ sɛ yɛde yɛn tumi a ɛba fam yi brɛ yɛn ho ase koraa wɔ n’anim.” Saa asɛm yi remma obi nnye nni sɛ Einstein susuw sɛ ahobrɛase yɛ “abrabɔ pa ahorow no mu nea ɛba fam sen biara.”

Sɛ obi wɔ nea obegyina so ahoahoa ne ho wɔ abusuabɔ a ɛda ɔne Yehowa Nyankopɔn ntam no mu a, ɛnde na nokwarem no, onii ko no ne Yesu Kristo. “Onyankopɔn abɔde mfiase no,” “odwumayɛfo nyansafo” no, “ne ba a ɔwoo no koro” no ne Onyankopɔn kyeame no. (Adi. 3:14; Mmeb. 8:30, NW; Yoh. 3:16; 1:1) Nanso Yesu de ahobrɛase powee sɛ ɔbɛpene abodin ahorow a ɛma no so no so. Bere a ɔrepene tumi a n’Agya no wɔ no so no ɔkae sɛ: “Me de, mintumi menhyɛ me ho menyɛ hwee na menhwehwɛ nea m’ankasa mepɛ, na mmom nea ɔsomaa me no apɛde.” (Yoh. 5:30) Yesu maa sodifo bi a ɔfrɛɛ no “kyerɛkyerɛfo pa” no mmuae sɛ: “Adɛn na wofrɛ me papa? Obiara nyɛ papa gye obiako, ɔne Nyankopɔn.” (Luka 18:18, 19) So wususuw saa nsɛm yi ho sɛ eyi nipasu ne ban bi a ennu nea wɔhwehwɛ no ho wɔ Yesu Kristo mu? Wɔ nokwarem no, saa ahobrɛase su a na okura wɔ Onyankopɔn ho no na ɛma ɔbɛyɛɛ obi a ɔsen afoforo nyinaa, nea ɔwɔ ɔdesani nipadua a edi mu no mu su horow a eye no.

Nanso, ahobrɛase wɔ adesamma abusuabɔ mu nso ɛ? Bere a ɔreto nsa afrɛ asuafo no na wɔaba ne nkyɛn no, Yesu kae sɛ: “Midwo na mebrɛ me ho ase komam.” (Mat. 11:28-30) Ɔsomafo Paulo kyerɛw kɔmaa Kristofo asafo a ɛwɔ Roma no sɛ: “Na menam ɔdom a wɔde adom me no so meka mekyerɛ mo mu biara sɛ onnnwen nntra nea ɛsɛ sɛ odwen, na mmom onnwen anidahɔ adwene sɛnea Onyankopɔn asusuw gyidi akyekyɛ de ama obiara no.”​—Rom. 12:3.

Sɛ́ ahobrɛase yɛ su a eye na wɔhwehwɛ wɔ ayɔnkobɔ a wɔne mfɛfo abɔde ahorow nya mu no yɛ nea ɔsomafo Paulo yii no adi kyerɛe wɔ ɔkwan a ɔfaa so ne ne mfɛfo gyidifo a wɔwɔ Korinto asafo no mu no dii yi so. Bere a ɔreka sɛnea Onyankopɔn bu ahobrɛasefo fa no ɔkyerɛwee sɛ:

“Na, anuanom, monhwɛ mo frɛ no, sɛ ɛnyɛ honam fam anyansafo pii, ɛnyɛ atumfo pii, ɛnyɛ adehye pii, na mmom wiase nkwaseade na Onyankopɔn apaw sɛ ɔde bɛhyɛ anyansafo aniwu. Na wiase ade a ɛyɛ mmerɛw no na Onyankopɔn apaw sɛ ɔde bɛhyɛ nea ɛyɛ den no aniwu. Na wiase nneɛma a ɛmfra ne nea wommu na Onyankopɔn apaw, ne nea enni hɔ, sɛ ɔde betu nea ɛwɔ hɔ, na ɔhonam biara anhoahoa ne ho n’anim. . . . sɛnea wɔakyerɛw no sɛ: Nea ɔhoahoa ne ho no ɔnhoahoa ne ho Awurade [Yehowa] mu. Na me nso, anuanom, mebaa mo nkyɛn no mamfa asɛm anaa nyansa a ɛtra so mammɛka mo Onyankopɔn adansesɛm no. Na mebɔɔ me tirim sɛ merenhwehwɛ biribi wɔ mo hɔ, sɛ Yesu Kristo, ne sɛ wɔbɔɔ no asɛndua mu no. Na me de, mmerɛw ne ehu ne ahopopo bebree mu na me ne mo trae. Na me kasa ne m’asɛnka amfa nnipa nyansa adɛfɛdɛfɛ kwan so, na mmom ɛnam honhom tumi yikyerɛ mu, na mo gyidi annyina nnipa nyansa so, na mmom agyina Onyankopɔn tumi so.”​—1 Kor. 1:25-2:5.

Sɛ na anka woyɛ saa Korinto asafo no muni a, anka wɔremfa anigye mpene ahobrɛase kwan a Paulo faa so kasae yi so anaa? Wɔ ɔkwan foforo so no, sɛ anka ɔde ahomaso, ahantan, ahohoahoa​—obi a onni ahobrɛase su kasae a anka wobɛte nka dɛn?

Yiw, ebia na ɛyɛ ebinom su sɛ wɔde nokwaredi nyinaa bɛbrɛ Kristoni no abrabɔ pa a ɛyɛ ahobrɛase no ase anaa wobedi ho fɛw. Nanso sɛ obi de nokwaredi pɛɛpɛɛ asɛm no mu a, nea ɔbɛka ara ne asɛm wofi honhom mu kae yi: “Ɛrenkyɛ na wɔagu nnipa a wɔyɛ ahantan no anim ase. Ɛyɛ nea nyansa wom sɛ wobɛbrɛ wo ho ase.”​—Mmeb. 11:2, Today’s English Version.