So Wote Nea Wuhu No Ase?

ABƆDE ho nyansahufo afrɛ afe 1976 sɛ abakɔsɛm mfe no mu nea enye koraa wɔ owu a efi asasewosow nti. Nnipa a asasewosow kum wɔn no dodow bɛyɛ 700,000. Afe biara nnipa ɔhaha kakra anaasɛ mpem dudu kakra wu wɔ asasewosow nti. So wunim saa?

Ebia wotee San Francisco asasewosow kɔkɔbɔ a wɔde mae April 18, 1980 no nka. Ɛno yɛ asasewosow a ɛsɛee hɔ 1906 no ho nkae a ɛto so 74. Dɛn nti na wɔbɔɔ eyi ho kɔkɔ? Efisɛ abɔde ho nyansapɛfo ka sɛ ebia kurow no behu asasewosow kɛse a ɛsɛe ade yi bio ansa na yɛn afeha a yɛwɔ mu yi aba awiei. Wɔ nokwarem no, wɔ United States Amerika no, wɔ afe 1978 mu no, wɔbɔɔ amanneɛ sɛ asasewosow 345 na esisii wɔ wɔn amantam 28 mu.

Sɛ wote beae bi a asasewosow nsii hɔ da de a ɛnde na w’ani begye. Nanso nyɛ anibiannaso. Adesua bi a wɔyɛe a wɔtoo no din sɛ: “Asasewosow” a wɔkyerɛw saa krataa yi wɔ Munich Reinsurance Company, a ɛwɔ Germany no bɔɔ amanneɛ sɛ: “Asasewosow akɛse ama yɛahu pefee wɔ nnansa yi mfe no mu sɛ yɛte bere a asasewosow a ɛdɔɔso rebɛba wɔ mu mu. . . . Mmeae horow wɔ hɔ a asasewosow pii bɛba hɔ na ɛbɛsɛe ade pii na mmeae ahorow nso wɔ hɔ a kakraa bi pɛ na ebesi wɔ hɔ. Nanso nea wɔkae obi yiye ne sɛ asasewosow betumi asi wɔ baabiara. Enti wɔrentumi nka sɛ asasewosow kɛse rentumi mma wɔ beae a ebi mmaa hɔ da.”

Nanso dɛn ne asasewosow “kɛse”? Wiɛ, wɔ obi a asasewosow sɛe n’agyapade anaasɛ n’abusua no muni wu no fam de ɛyɛ asasewosow kɛse a nea obi bɛka wɔ ho no mfa ho. Nanso ebia ɔpon a yɛayɛ wɔ kratafa a edi hɔ no bɛboa wo ma woate nea adebɔ ho nyansapɛfo akyerɛ denam akontaabu bi a wɔde adi dwuma wɔ hɔ no so.

Sɛ wopɛ a, susuw eyi ho hwɛ sɛ, sɛ asasewosow si wɔ faako a wote no a​—MPREMREN yi ara a anka wobɛyɛ dɛn! Sɛ ano yɛ den yiye a kar a wowɔ no nyinaa bɛsɛe koraa, wo fie bebubu agu kwa a worentumi nsiesie no bio na w’adɔfo bepira kɛse​—na ebia nea ɛkyɛn saa mpo bɛba wɔn so. Eyi ne ade a ɛto nnipa afe biara wɔ asase no afanan ahorow, na eyi rekɔ so bebree.

So mpɛn dodow a asasewosow sisi no akɔ anim? Italia nsɛmma nhoma Il Piccolo no kae sɛ: “Sɛnea akontaabu kyerɛ no yɛn awo ntoatoaso yi te bere a asasewosow ano yɛ den yiye wɔ mu mu.” Ɛno na afei ɛde akontaabu bi a ɛfa mfirihyia apem a atwam no ho no mae na ɛde dii ho adanse.

Dɛn na ne nyinaa kyerɛ? Dedadedaw na Bible no kaa amanaman ntam akodi ne aduankɔm ne “asasewosow bɛba mmeaemmeae” ho asɛm siei. (Mat. 24:7) Eyi rekɔ so mprempren wɔ ɔkwan a ɛso kɛse a ebi mmae saa da wɔ adesamma abakɔsɛm mu. Bible no bɔ asasewosow a ɛte saa din sɛ, ɛyɛ sɛnkyerɛnne a ɛhyɛ awiei bere no, nneɛma nhyehyɛe bɔne a ɛwɔ hɔ mprempren yi awiei bere no agyirae. Nea ɛka ho nso ne “ba” a Yesu Kristo “aba” a wonhu no, ne bere a obefi ase adi tumi a Onyankopɔn de ama no wɔ adesamma nyinaa so no.

Ɛwom sɛ nnipa suro nea wɔhwɛ a ɛreba wiase no so no de, nanso wɔn a wɔte nea eyi kyerɛ ase no ani gye. Bible no se: “Na nneɛma yi refi ase aba a, monhwɛ ɔsoro na momma mo ti so, efisɛ mo gye rebɛn. Sɛ muhu sɛ eyinom ba a, munhu sɛ Onyankopɔn ahenni abɛn.”​—Luka 21:10, 11, 28-31.

Nniso foforo, Onyankopɔn ahenni no rebɛsɛe adesamma nniso horow nyinaa na ɛde ɔmansodi ho nhyehyɛe a trenee wom asi ananmu. Nhyira bɛn na eyi bɛyɛ ama wɔn a wɔhwehwɛ sɛ wɔfa wɔn ho di fi nhyɛso ne ɔporɔw ase no sɛɛ, wiase bi a nnipa dɔ wɔn ho wɔn ho ankasa mu!

Enti, sɛ wote amanneɛbɔ ahorow a ɛfa “asasewosow a ɛbɛba mmeaemmeae” no ho a, kae sɛ ɛyɛ sɛnkyerɛnne a wɔaka asie sɛ wiase nsakrae abɛn no bi.