Abakɔsɛm Mu Nkɔso a Wɔanya Wɔ Kasa Mu Ahofadi Mu

WƆ ABAKƆSƐM nyinaa mu no, nnipa adi apere sɛ wobenya kasa mu ahofadi. Wɔahyɛ mmara ahorow, wɔadi ako, na nnipa ahwere wɔn nkwa wɔ hokwan a wɔrepɛ de akyerɛ wɔn adwene wɔ baguam no ho.

Dɛn nti na ɛsɛ sɛ hokwan a ɛte sɛ nea nnipa wɔ fi awo mu no de ɔhaw ba, ma ekowie mogyahwiegu mpo mu? Dɛn nti na aman a na ɛwɔ hɔ tete ne nnɛ nyinaa ahu hia a ehia sɛ wɔto hokwan yi a obi de bedi dwuma ano hye anaa wɔbara mpo?

Nneyɛe a nkurɔfo da no adi wɔ kasa mu ahofadi a nnipa benya ho no dannan te sɛ dɔn kɛse bi a edi akɔneaba. Ɛtɔ mmere bi a, wobu kasa mu ahofadi sɛ ɛyɛ hokwan a ɛsɛ sɛ nnipa nya. Wɔ mmere foforo nso mu no, wobu no sɛ ɔhaw a ɛsɛ sɛ nniso anaa ɔsom ahorow no di ho dwuma.

Esiane sɛ wɔn a wɔperee hokwan a wɔde bɛkyerɛ wɔn adwene wɔ baguam, a mpɛn pii no, ɛma wɔtaa wɔn anaa wokunkum wɔn, ho nsɛm ayɛ abakɔsɛm mu mã nti, nsɛm yi bi mu nhwehwɛmu a yɛbɛyɛ no bɛma yɛanya ɔhaw no mu nhumu.

Ebia abakɔsɛm ho adesuafo bɛkae Helani nyansapɛfo Socrates (470-399 A.Y.B.) a na wobu n’adwenkyerɛ ne ne nkyerɛkyerɛ sɛ enyaa Atene mmofra abrabɔ so nkɛntɛnso bɔne no yiye. Eyi de huhuhuhu kɛse baa amammuifo ne nyamesom akannifo a wɔyɛ Helafo mpanyimfo no mu, na ɛkowiee ne wu mu. Asɛm a ɔka de yii ne ho ano wɔ atemmufo a awiei koraa wobuu no kumfɔ no anim no da so ara yɛ akwan a emu yɛ den sen biara a wɔafa so akasa ama kasa mu ahofadi no mu biako: “Sɛ munya ɔpɛ sɛ mubegyae me saa bere yi, a ahwehwɛde a ɛka ho ne sɛ ɛnsɛ sɛ mekyerɛ m’adwene bio wɔ nyansa a merehwehwɛ yi ho, ne sɛ sɛ mokyere me sɛ mereyɛ saa bio a mewu de a, ɛnde mema mo ate ase sɛ, ‘Atene mmarima, metie Onyankopɔn no asen mo. Bere tenten a mewɔ nkwa ne ahoɔden no, minnyae da sɛ medi nyansapɛ akyi, na mahyɛ mo mu biara a mehyia no nkuran atu no fo. Munnya awerɛhyem sɛ eyi na Onyankopɔn hyɛ sɛ yɛnyɛ . . .’ Na Atenefo, mɛkɔ so aka, ‘Sɛ mopɛ a munnyae me, mopɛ nso munnnyae me; nanso mema mo ate ase sɛ, sɛ ɛsɛ sɛ miwu wɔ ho mpɛn pii mpo a, merenyɛ biribi foforo biara.’”

Bere kɔɔ so no, tebea no sakrae maa na anohyeto kakraa bi na ɛwom wɔ Roma abakɔsɛm mfiase, na tebea no sakrae bio maa anohyeto no yɛɛ kɛse bere a ahemman no mu trɛwee no. Eyi na efii kasa mu ahofadi ho haw bere no ase. Wɔ Tiberio nniso mu (14-37 Y.B.) no, wɔannya wɔn a wɔkasa tiaa aban no anaa ne nhyehyɛe ahorow no ho koma. Na ɛnyɛ Rome nko na ɛsɔre tiaa kasa mu ahofadi; ɛyɛ saa bere yi na Yudafo akannifo no hyɛɛ Pontio Pilato ma okum Yesu esiane ne nkyerɛkyerɛ nti, na wɔhyɛɛ n’asomafo no nso sɛ wonnyae asɛm no ka. Ná eyinom nso pɛ sɛ wowu sen sɛ wobegyae.—Asomafo no Nnwuma 5:28, 29.

Wɔ abakɔsɛm mu mmere dodow no ara mu no, mpɛn pii na wɔyeyɛɛ nsakrae wɔ ahofadi a nniso horow no de maa ɔmanfo no mu anaa wosiw ano bere biara a wɔpɛ, na ɛmaa wɔkɔɔ so peree kasa mu ahofadi. Efi Mfinimfini Mmere no mu reba no, nnipa no binom kae sɛ wɔpɛ asɛm bi a wɔakyerɛw a ɛda ahofadi a wɔwɔ adi, a ɛde anohyeto ba tumi a aban no wɔ wɔ saa ahofadi no so no so. Nea efi mu bae ne sɛ, wofii ase yeyɛɛ ahofadi ho mmara horow titiriw. Nea na ɛka eyinom ho ne Magna Carta, ade a ɛde nnipa ahofadi mu nsakrae bae. Akyiri yi na hokwan ho mmara a wɔato din England Ahofadi Ho Mmara (1689), Virginia Ahofadi Ho Mmara (1776), Franse Nnipa Ahofadi Ho Mmara (1789), ne United States Ahofadi Ho Mmara (1791), no bae.

Wɔ mfeha a ɛto so 17, 18, ne 19 mu no, abakɔsɛm mu nnipa atitiriw kasa de peree kasa mu ahofadi. Wɔ 1664 mu no, Engiresini anwensɛm kyerɛwfo John Milton, a ebia nea wɔde bɛkae no yiye ne Paradise Lost no, kyerɛw nhomawa a agye din, Areopagitica de kasa tiaa anohyeto a wɔde aba nsɛm ho amanneɛbɔfo ahofadi so no.

Wɔ afeha a ɛto so 18 mu no, ɛwom sɛ na anohyeto ahorow da so wɔ hɔ de, nanso kasa mu ahofadi nyaa nkɔso wɔ England. Wɔ Amerika no, na amantam no rehwehwɛ sɛ wobenya kasa mu ahofadi hokwan, anofafa de ne nea wotintim nyinaa. Sɛ nhwɛso no Pennsylvania Ayɔnkoman Amanyɔ Mmara a wɔyɛɛ no September 28, 1776, no fã bi kae sɛ: “Nea ɛbɛyɛ na nkurɔfo anya kasa ne akyerɛw mu ahofadi hokwan, na wɔada wɔn nkate adi wɔ akyerɛw mu nti, ɛnsɛ sɛ yesiw ahofadi a nsɛm ho amanneɛbɔfo wɔ ano.”

Ná saa asɛm yi yɛ nkuranhyɛ a wogyinaa so yɛɛ U.S. Amanyɔ Mmara mu Nsiesiei a Edi Kan a wɔyɛe wɔ 1791, a ɛdaa adwene a na wɔn a wɔhyehyɛɛ Amerika Amanyɔ Mmara no kura wɔ hokwan a ɛsom bo a ɔmanfo wɔ ho adi no: “Bagua no renhyɛ mmara bi mfa ɔsom bi a wɔbɛtew ho, anaa nea wɔde besiw hokwan a obi wɔ sɛ odi akyi no ano; anaasɛ ɛde anohyeto bɛba kasa mu ahofadi, anaa nsɛm ho amanneɛbɔ so; anaa hokwan a ɔmanfo wɔ sɛ wohyiam asomdwoe mu na wɔsrɛ Aban no sɛ entie wɔn sufrɛ no.”

Engiresini nyansapɛfo John Stuart Mill a ɔtraa ase afeha a ɛto so dunkron mu no tintim n’asɛm bi a wato din “Ɛfa Ahofadi Ho,” wɔ 1859 mu. Wɔtaa fa ka asɛm na wɔakyerɛ sɛ ɛyɛ nsɛm akɛse a ɛsen biara a wɔka foa kasa mu ahofadi so no biako.

Nanso, ako a wɔredi apere hokwan a nnipa de bɛkasa baguam a anohyeto nnim no amma awiei bere a nea wɔkyerɛ sɛ ɛyɛ hann mfe no bae wɔ afeha a ɛto so 20 yi mu no. Sɛ nhwɛso no, esiane mmɔden a wɔabɔ sɛ wɔde anohyeto bɛba kasa mu ahofadi so wɔ Amerika nti, United States asɛnnibea nketewa ne Asɛnnibea Kunini no nyinaa aka nsɛm de agyina saa ahofadi no akyi.

Otemmufo Oliver Wendell Holmes Akumaa, a ɔwɔ U.S. Asɛnnibea Kunini no kaa gyidi a ɔwɔ wɔ kasa mu ahofadi mu ho asɛm wɔ asɛnnibea no gyinaesi pii mu. Bere a ɔreka nea ɛma wohu kasa mu ahofadi ho asɛm no, ɔkae sɛ: “Sɛ Amanyɔ Mmara no mu nnyinasosɛm bi wɔ hɔ a ɛhwehwɛ sɛ wokura mu sen biribi foforo biara a, ɛno ne nsusuwii mu ahofadi nnyinasosɛm no—ɛnyɛ nsusuwii mu ahofadi a wɔn a wɔne yɛn yɛ adwene no benya, na mmom nsusuwii mu ahofadi a wɔn a wɔne yɛn adwene nhyia benya.”—United States v. Schwimmer, 1928.

Ɛyɛ saa nnyinasosɛm yi a wɔabu ani agu so no na ɛde asɛnnibea mansotwe a ɛma dɔn no sakrasakra ma wonya ahofadi ne nhyɛso ba no. Mpɛn pii no, adwene a nkurɔfo nya ne, “Kasa mu ahofadi a menya—na ɛnyɛ nea wubenya.” Nat Hentoff ka nhwɛso ahorow bi ho asɛm wɔ ne nhoma a saa din yi da so no mu a ɛkyerɛ sɛnea wɔn a wogyina Nsiesiei a Edi Kan a wɔyɛe no akyi denneennen no sakraa wɔn nsusuwii kɔfaa adwene foforo sɛnea wɔn adwenkyerɛ te no. Ɔka nsɛm bi a U.S. Asɛnnibea Kunini no sakraa n’ankasa gyinaesi ahorow bi, a na ebinom yɛ nsɛm a ɛfa Yehowa Adansefo ne mfe pii a wɔde apere hokwan a wɔde bɛka wɔn nyamesom gyidi ahorow ho asɛm a anohyeto nnim no ho ho asɛm. Ɔkyerɛw wɔn ho asɛm sɛ: “Saa ɔsom no mufo aboa kɛse wɔ mfe dudu no mu wɔ ahonim mu ahofadi a wɔnam amanyɔ mmara mu nsɛm a wɔde kɔ asɛnnibea so ma enya nkɔso no ho.”

Ɛnyɛ Amerika nko na mmaranimfo ne nnɛyi abakɔsɛm akyerɛwfo pii akyerɛw nsɛm bebree afa asɛnnibea mansotwe pii a wɔde abɔ kasa mu ahofadi ho ban no ho wɔ afeha a ɛto so 20 yi mu, na mmom, wɔ aman foforo nso mu. Wontumi mfa wɔn ho nto kasa mu ahofadi so. Ɛwom sɛ ebia nniso ahorow no de ahofadi a wɔde ma wɔn nkurɔfo no bɛhoahoa wɔn ho de, nanso sɛnea osuahu kyerɛ no, wobetumi ahwere bere a nniso no anaa atemmufo asesã no. Yehowa Adansefo adi akoten wɔ ahofadi a ɛsom bo yi a wɔko pere no mu.

Ɔbenfo C. S. Braden kyerɛw wɔ ne nhoma These Also Believe mu sɛ: “[Yehowa Adansefo] nam apere a wodi de kora ɔman mu hokwan a wɔwɔ so ayɛ adwuma soronko wɔ dodow amammu mu, efisɛ wɔayɛ pii wɔ wɔn aperedi no mu ama kuw ketewa biara a ɛwɔ Amerika anya hokwan a ɛte saa no. Sɛ wɔtow hyɛ ɔman mu hokwan a kuw biako bi wɔ so a, na kuw a aka biara hokwan da asiane mu. Enti wɔaboa kɛse wɔ yɛn dodow amammu mu nneɛma a ɛsom bo sen biara no mu bi a wɔkora so no mu.”

Wɔn a wɔpɛ ahofadi no ntumi nte nea enti a nniso ne ɔsom ahorow bi de saa ahofadi yi kame wɔn nkurɔfo no ase. Ɛyɛ hokwan titiriw a ɛsɛ sɛ nnipa nya a wɔde kame wɔn, na wɔde saa ahofadi yi kame nkurɔfo pii wɔ wiase nyinaa ma wohu amane. So su a wɔda no adi wɔ kasa mu ahofadi ho no bɛkɔ so adannan te sɛ dɔn wɔ aman a wonya saa hokwan titiriw mpo mu? Wɔde kasa mu ahofadi ho adwene no bedi dwuma de akyerɛ sɛ kasa bɔne anaa kasafĩ yɛ nea ɛfata? Asɛnnibea ahorow no de ɔsɛmpɔw no repere wɔn ho dedaw.

[Kratafa 11 mfonini]

Socrates pere maa kasa mu ahofadi

[Asɛm Fibea]

Musei Capitolini, Roma