Ɔkwan a Ɛkɔ Paradise

ESIANE Paradise ho akɔnnɔ a nnipa wɔ ne mmɔden akɛse ne nketewa a wɔabɔ sɛ wɔbɛsan ayɛ bi nti, obi besusuw sɛ sesɛɛ de anka ɛsɛ sɛ asase dan paradise ankasa. Nanso ɛnte saa.

Mmom no, adesamma de wɔn adwene asi adifudepɛ so, na mpɛn pii no ɛma nneɛma a atwa yɛn ho ahyia ne emu abɔde a nkwa wom a egu ahorow no ho kam.

Esiane sɛ nnipa pii gye di sɛ ahonyade na ebedi nkonim nti, wɔahwere anidaso biara a wɔwɔ sɛ saa asase yi bɛdan Eden paradise da bi no. Mmom no, wɔhwɛ owu akyi asetra wɔ soro kwan sɛ Paradise ho anidaso koro pɛ a wɔwɔ. Nea edi kan no, saa adwene yi kyerɛ sɛ akɔnnɔ a nnipa wɔ ma Eden no bɛyɛ basaa daa, na nea ɛto so abien ne sɛ Onyankopɔn apo okyinnsoromma yi ahyɛ onipa nkwaseasɛm ne adifudepɛ. Eyi yɛ nokware anaa? Dɛn koraa na ɛwɔ hɔ daakye? Na ɛhe na yebenya saa daakye no?

Paradise—Ɛwɔ Soro Anaasɛ Asase So?

Bɛyɛ mfe 2,000 a atwam ni, bere a na Yesu Kristo ne owifo bi a wɔasakra a wɔabɔ no duam wɔ ne nkyɛn rekasa no, ɔkae sɛ: “Wobɛka me ho Paradise hɔ.” (Luka 23:43) So na Yesu repɛ akyerɛ sɛ owifo no bɛka ne ho akɔ soro? Dabi.

Ná saa adwene no remma ɔbɔnefo no tirim mpo. Dɛn ntia? Efisɛ akyinnye biara nni ho sɛ, na onim Hebri Kyerɛwnsɛm a na ɛwɔ hɔ wɔ ne bere so no mu nsɛm, te sɛ Dwom 37:29 no fã a edi kan no: “Treneefo benya asase no adi.” (Yɛn na yɛasi ɔfã bi so dua no.) Yesu kyerɛkyerɛɛ saa nokwasɛm no ara, na ɔkae sɛ: “Anigye ne wɔn a wodwo, efisɛ wɔn na wobenya asase no adi.” (Mateo 5:5, NW) Saa kyerɛwsɛm yi ne nea wɔtaa frɛ no Awurade Mpaebɔ, a ɛka sɛ: “Nea wopɛ nyɛ asase so, sɛnea ɛyɛ ɔsoro,” no hyia.—Mateo 6:9, 10.

Bible kyerɛkyerɛ sɛ asase na Onyankopɔn bɔe sɛ ofie maa adesamma abusua no, na ɛnyɛ ɔsoro. N’asɛm ka sɛ “wammɔ [asase] no hunu” na mmom, “ɔnwenee sɛ wɔntra so.” (Yesaia 45:18) Kosi bere tenten bɛn? “[Ɔde] asase atim ne nnyinaso so, na anhim da biara da.” (Dwom 104:5) Yiw, “asase de, etim hɔ daa.”—Ɔsɛnkafo 1:4.

Ɛyɛ Onyankopɔn atirimpɔw sɛ wɔn a wɔsom no no mu fã kɛse no ara de asase yi bɛyɛ wɔn fie daa. Hyɛ sɛnea Onyankopɔn Asɛm, Bible no, ka wɔ eyi ho no nsow. Dwom 37:11 hyɛ nkɔm sɛ: “Ahobrɛasefo benya asase no adi, na wɔagye wɔn ani asomdwoe bebree mu.” Bere tenten bɛn? Dwom 37:29 ka sɛ: “Treneefo benya asase no adi, na wɔatra so daapem.” (Yɛn na yɛasi ɔfã bi so dua no.) Saa bere no, kyerɛwsɛm a ɛka nea edi so yi no bɛbam sɛ: “[Wo Onyankopɔn] wubue wo nsam, na woma ateasefo nyinaa nya nea wɔpɛ di mee,” kyerɛ sɛ, nea wɔpɛ a ɛne Onyankopɔn apɛde hyia.—Dwom 145:16.

Na wɔn a wonni ɔpɛ biara sɛ wɔbɛyɛ Onyankopɔn apɛde no nso ɛ? Mmebusɛm 2:21, 22 ka sɛ: “Tẽefo na ɛbɛtra asase no so, na wɔn a wɔyɛ pɛ no na ɛbɛtra mu; na wobegu abɔnefo ase afi asase so, na wɔatu nkontompofo afi so.”

Paradise a Wɔbɛsan De Aba

Ɛrenkyɛ koraa na Onyankopɔn abu wiase bɔne yi atɛn. (Mateo 24:3-14; 2 Timoteo 3:1-5, 13) Nanso Onyankopɔn bɛkora “nnipakuw kɛse” bi so wɔ saa ɔsɛe a ɛreba no mu akɔ wiase foforo bi a ɔbɛyɛ mu.—Adiyisɛm 7:9-17.

Afei, Onyankopɔn bɛkyerɛ adwuma a anigye wom a nnipa a obedi wɔn so no bɛyɛ de adan asase no nyinaa paradise fie ama adesamma no kwan. Bible hyɛ bɔ sɛ: “Sare so ne nkyerekyerewa benya anika, na anhwea pradada adi ahurusi, na ahan sɛ nhwiren; . . . na nsu betue sare so, na nsuwansuwa asen anhwea pradada so.”—Yesaia 35:1, 6.

Wɔ saa Paradise a wɔbɛtrɛw mu no mu no, yɛrenhu ɔkɔm, ohia, nnipa nkyereso, nnipa a wonnya baabi nna, anaa mmeae a basabasayɛ wɔ bio. ‘Aduan bebu so wɔ asase so.’ (Dwom 72:16) “Petee mu nnua bɛsow n’aba, na asase ama ne nnɔbae.” (Hesekiel 34:27) “Wobesisi adan atra mu, na wɔayeyɛ bobe nturo adi mu aba. Wɔrensisi adan mma obi ntra mu, na wɔrennua mma obi nni.” (Yesaia 65:21, 22) “Wɔbɛtratra wɔn bobe ne wɔn borɔdɔma ase, na obi bi renyi wɔn hu, efisɛ asafo Awurade [Yehowa, NW] ano na aka.”—Mika 4: 4.

Nea Enti a Ebinom Kɔ Soro

Ebia nnipa dodow no ara begye atom sɛ wɔwɔ asase so paradise bi ho akɔnnɔ. Ɛno yɛ awosu, efisɛ Onyankopɔn amfa ɔsoro tra ho akɔnnɔ anhyɛ wɔn mu; wɔrentumi mfa wɔn adwene mpo mmu sɛnea ɔsoro asetra te mpo. Sɛ nhwɛso no, bere a Pat ne England Asɔre a na ɔkɔ no sɔfo rebɔ nkɔmmɔ no, ɛmfa ho sɛ na ɔyɛ asɔre no muni a ɔyɛ nsi no, ɔkae sɛ: “Minnyaa ɔsorokɔ ho adwene biara da. Mempɛ sɛ mekɔ hɔ, na dɛn koraa na merekɔyɛ wɔ hɔ?”—Fa toto Dwom 115:16 ho.

Ɛyɛ ampa sɛ Bible kyerɛkyerɛ sɛ nnipa kakraa bi, 144,000, bɛkɔ soro. (Adiyisɛm 14:1, 4) Ɛkyerɛkyerɛ nea enti a ɛte saa nso mu sɛ: “Woayɛ wɔn ahemman ne asɔfo ama yɛn Nyankopɔn, na wobedi asase so ahene.” (Adiyisɛm 5:9, 10; yɛn na yɛasi ɔfã bi so dua no.) Eyinom ne wɔn Hene, Yesu Kristo, na wɔbom yɛ ‘ahenni’ no, asase so nniso foforo a ɛwɔ soro a Kristofo bɔ ho mpae no. Saa nniso yi bɛhwɛ ma wɔayɛ asase ne adesamma foforo koraa.—Daniel 2:44; 2 Petro 3:13.

Nanso, esiane sɛ wɔamfa ɔpɛ a wobenya sɛ wɔbɛtra soro ammɔ nnipa nti, Onyankopɔn honhom di dwuma soronko de “di adanse” wɔ 144,000 no so sɛnea ɛbɛyɛ a wobehu saa “ɔsoro frɛ” soronko yi. (Romafo 8:16, 17; Filipifo 3:14) Nanso, ɛda adi sɛ, ɛnyɛ adesamma nyinaa na ehia honhom kronkron no dwumadi a ɛte saa no efisɛ asase so paradise na ɛbɛyɛ wɔn fie.

Honhom mu Paradise Bɔ Ɔkwan No

Ɔkwan bɛn so na obi fata ma daa nkwa wɔ Paradise wɔ asase so? Yesu kae sɛ: “Eyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.” (Yohane 17:3) Bere a Yesaia 11:9 de nnipa abusuabɔ a asomdwoe wom rebata Onyankopɔn ho nimdeɛ ho no, ɛka sɛ: “Wɔrenyɛ bɔne na wɔrensɛe ade bio, me bepɔw kronkron no nyinaa so, na Awurade [Yehowa, NW] hu bɛyɛ asase ma, sɛ nsu kata po so no.”—Fa toto Yesaia 48:18 ho.

Nokwarem no, saa nimdeɛ yi nyɛ biribi a egu obi tirim kɛkɛ. Enya obi nipasu so nkɛntɛnso, na ɛde su pa te sɛ “ɔdɔ, anigye, asomdwoe, abodwokyɛre, ayamye, papayɛ, gyidi, odwo, anidahɔ” ba. (Galatifo 5:22, 23) Yehowa Adansefo bɔ mmɔden sɛ wobenya saa su ahorow yi, ma enti seesei mpo, wɔde honhom mu paradise bi a edi mu ahyira wɔn.—Yesia 65:13, 14.

Hwɛ sɛnea wɔn honhom fam tebea no ne wiase a ɛrenya nkɔanim kɛse wɔ amumɔyɛ ne ɔporɔw mu no de bɔ abira! Nanso, ɛrenkyɛ Onyankopɔn bɛsɛe saa wiase bɔne yi. Enkosi saa bere no, Yehowa Adansefo to nsa frɛ wo sɛ bra—yiw, bɛhwɛ—honhom mu paradise a wɔwom no. W’ankasa bɛhwɛ sɛ mprempren Yesu, ɔsoro Hene a aniwa nhu no no, regye wiase foforo no mufo no taataa wɔ ɔkwan hihiaa no so akɔ asase so Paradise ne daa nkwa mu!—Mateo 7:13, 14; Adiyisɛm 7:17; 21:3, 4.

[Mfonini wɔ kratafa 8, 9]

Wɔn a wobenya wɔn ti adidi mu wɔ wiase yi awiei no ani begye sɛ wobenya asase no a wɔdan no Paradise no mu kyɛfa