Asasewosow, Bible Nkɔmhyɛ, ne Wo

ANSA na Yesu rewu no, ɔka siei sɛ nsɛm ne tebea bi besisi a ɛbɛkyerɛ sɛ saa wiase yi ahyɛn ‘nneɛma nhyehyɛe awiei’ no mu. Ɔkae sɛ nneɛma te sɛ ɔyaredɔm, ɔkɔm, ne akokoakoko bɛhyɛ saa bere no agyirae. Ɔkae nso sɛ “asasewosow kɛse” bɛba “mmeaemmeae.” (Mateo 24:​3, 7; Luka 21:10, 11) So na Yesu reka yɛn bere yi ho asɛm?

Nnipa pii ka sɛ ɛnte saa. Wɔkyerɛ sɛ asasewosow a esisi no nyɛɛ kɛse koraa nnansa yi. Nokwarem no, U.S. Ɔman Asasewosow Ho Nsɛm Asoɛe no bɔ amanneɛ sɛ asasewosow a n’akɛse yɛ 7.0 ne nea ɛsen saa na esisii “daa” wɔ afeha a ɛto so 20 no nyinaa mu.a

Nanso, hyɛ no nsow sɛ Yesu nkɔmhyɛ no mmamu nhwehwɛ sɛ asasewosow dodow anaa anoden no benya nkɔanim. Nea Yesu kae ara ne sɛ asasewosow akɛse besisi mmeaemmeae. Bio nso, ɔkae sɛ saa nneɛma yi bɛyɛ “awoko yaw mfiase.” (Mateo 24:8) Ɛnyɛ asasewosow dodow anaa sɛnea anoden te wɔ Richter nsenia so no na ɛma yɛka sɛ ahohia aba, na mmom ɔhaw a ɛde ba nkurɔfo so no.

Asasewosow ama ahohia kɛse aba yɛn bere yi mu ankasa. Nokwarem no, wɔ afeha a ɛto so 20 mu no, nnipa ɔpepem pii na saa asiane yi akunkum wɔn anaasɛ ama wɔahwere wɔn afie. Animdefo ka sɛ saa owu yi mu pii yɛ nea anka wobetumi asiw ano. BBC Amanneɛbɔ bi ka sɛ: “Wɔ aman a wonnyaa nkɔso pii mu no, adan a ne bo yɛ mmerɛw a wɔpɛ sɛ wosisi no ntɛm de di nnipa a wɔredɔɔso wɔ nkurow akɛse mu ho dwuma no taa ma wobu ani gu adansi ho mmara so.” Bere a Ben Wisner a ɔyɛ nkurow akɛse mu asiane ho nimdefo reka asiane abien a esisii nnansa yi ho asɛm no, ɔkae sɛ: “Ɛnyɛ asasewosow na ekunkum saa nnipa yi. Ɛyɛ nnipa mfomso, anibiannaso, dwowtwa, ne adifudepɛ, na ekunkum wɔn.”

Yiw, ɛtɔ mmere bi a, ade titiriw a ɛma asasewosow di awu kɛse ne nnipa pɛsɛmenkominya ne anibiannaso. Anigyesɛm ne sɛ wɔka su a ɛte saa ho asɛm wɔ Bible nkɔmhyɛ foforo a ɛfa nneɛma nhyehyɛe yi “nna a edi akyiri” ho no mu. Bible ka sɛ, saa bere no, nnipa bɛyɛ “ahopɛfo, sikapɛfo,” ne “atirimɔdenfo.” (2 Timoteo 3:​1-5, The Amplified Bible) Sɛ Yesu nsɛm a ɛfa nneɛma nhyehyɛe yi awiei ho no da nkyɛn a, saa nkɔmhyɛ yi di adanse pefee sɛ yɛrebɛn bere a Onyankopɔn bɛma adesamma a wɔrehu amane nyinaa ade wɔn ho afi nneɛma a ɛde mprempren yaw ne amanehunu ba—a nea ɛka ho ne nsasewosow akɛse—ho no.—Dwom 37:11.

So wopɛ sɛ wusua pii fa anidaso a egyina Bible so yi ho? Hu Yehowa Adansefo a wɔwɔ wo mpɔtam hɔ no, anaasɛ kyerɛw address a ɛwɔ kratafa 5 no mu nea ɛfata.

[Ase hɔ asɛm]