9 Munhu Nnipa Kõ A Moyɛ

Sɛ yɛka onipa ko a woyɛ a, ɛnyɛ wo din anaa sɛnea afoforo hu wo nko ara na yɛreka. Mmom no, wo suban, nea wugye di, ne nneɛma a ɛho hia wo nso ka ho. Enti sɛ yɛka onipa ko a woyɛ a, ɛyɛ biribiara a ɛma yehu sɛ wo ne asomasi anaa ɔbenten—nea ɛwɔ w’adwenem, ne nea afoforo hu fa wo ho no nyinaa ka ho.

Sɛ wuhu onipa ko a woyɛ na woma ɛho hia wo pa ara a, ɛnde woremma w’atipɛnfo nkyerɛ wo nea wobɛyɛ, mmom no wode nea wugye di bɛyɛ adwuma.

“Nnipa bebree wɔ hɔ a, wɔte sɛ abaduaba a yɛahyɛ no atade de asi sotɔɔ mu. Ɛnyɛ abaduaba no na ɛkyerɛ atade a ɛbɛhyɛ, na mmom afoforo na ɛkyerɛ.”—Adrian.

“Mabehu sɛ, sɛ ɛyɛ den mpo a, ɛsɛ sɛ mede akokoduru yɛ nea ɛteɛ. Sɛ mehwɛ sɛnea me nnamfonom yɛ wɔn ade ne sɛnea meyɛ m’ade bere a wɔwɔ hɔ a, mitumi hu wɔn a wɔyɛ me nnamfonom ankasa.”—Courtney.

BIBLE MU ASƐM: “Mommfa wiase nhyehyɛe yi su, na mmom munnya adwensakra mfa nyɛ mo ho foforo.”—Romafo 12:2.

Hwɛ nea wobɔ mu mmɔden, nea wommɔ mu mmɔden, ne nea wugye di, ɛno bɛma woasusuw onipa ko a seesei woyɛ ne onipa ko a wopɛ sɛ woyɛ no ho yiye. Nea wubetumi de afi ase ne sɛ wubebua nsɛmmisa a edidi so yi.

Nea wobɔ mu mmɔden: Ɔdom akyɛde ne nimdeɛ bɛn na mewɔ? Dɛn na meyɛ ade wom? (Ebi ne sɛ: Meyɛ m’ade wɔ bere ano? Mitumi hyɛ me ho so? Mitumi yɛ adwumaden? Me yam ye?) Nneɛma pa bɛn na meyɛ?

NYANSAHYƐ: Ɛyɛ den ma wo sɛ wubehu nneɛma pa a ɛwɔ wo ho anaa? Bisa w’awofo, anaa w’adamfo bi a wugye no di ma ɔnka nneɛma pa a ohu wɔ wo ho nkyerɛ wo, ne nea enti a ɔreka saa.

BIBLE MU ASƐM: “Ma obiara nsɔ n’ankasa adwuma nhwɛ, ɛno na obenya biribi de ahoahoa ɔno ara ne ho, na ɛnyɛ sɛ ɔde ne ho bɛtoto obi ho.”—Galatifo 6:4.

Nea wommɔ mu mmɔden: Me suban bɛn na ɛsɛ sɛ meyɛ ho adwuma pa ara? Bere bɛn pa ara na ebetumi ayɛ mmerɛw sɛ bɔne bi bɛsɔ me ahwɛ? Dɛn ne dɛn mu na ehia sɛ mehyɛ me ho so pa ara?

BIBLE MU ASƐM: “Sɛ yɛka sɛ: ‘Bɔne nni yɛn ho’ a, yɛredaadaa yɛn ho.”—1 Yohane 1:8.

Nea wugye di: Gyinapɛn bɛn na mede bɔ me bra, na adɛn ntia? Enti migye di sɛ Onyankopɔn wɔ hɔ? Adanse bɛn na ɛma migye di sɛ ɔwɔ hɔ ampa? Nneyɛe bɛn na mihu no sɛ ɛnteɛ, na adɛn ntia? Dɛn na migye di sɛ ebesi daakye?

BIBLE MU ASƐM: “Adwempa bɛhwɛ wo so, na nhumu abɔ wo ho ban.”—Mmebusɛm 2:11.