Honhom Kronkron No—Onyankopɔn Adeyɛ Tumi

SƐNEA Baasakoro kyerɛkyerɛ no kyerɛ no, honhom kronkron no ne onipa a ɔto so abiɛsa wɔ Onyamesu no mu, ɔne Agya no ne Ɔba no yɛ pɛ. Sɛnea nhoma Our Orthodox Christian Faith ka no: “Honhom Kronkron no yɛ Onyankopɔn wie.”

Hebri Kyerɛwnsɛm no mu no, asɛmfua a wɔtaa de di dwuma ma “honhom” no ne ruʹach a ɛkyerɛ “ahome; mframa; honhom.” Hela Kyerɛwnsɛm no mu no, asɛmfua no ne pneuʹma a ɛwɔ ntease a ɛte saa ara. So saa nsɛmfua yi da no adi sɛ honhom kronkron no yɛ Baasakoro bi fã?

Adeyɛ Tumi

SƐNEA Bible no de “honhom kronkron” di dwuma no da no adi sɛ ɛyɛ tumi a wotumi kyerɛ no kwan a Yehowa Nyankopɔn de yɛ adwuma de di n’atirimpɔw ahorow ho dwuma. Kosi baabi no, yebetumi de atoto anyinam ahoɔden a ɛyɛ tumi a wobetumi atwetwe ayɛ nnwuma ahorow ahorow pii no ho.

Bible no kyerɛ wɔ Genesis 1:2, NW, sɛ na “Onyankopɔn adeyɛ tumi [“honhom” (Hebri, ruʹach )] di akɔneaba nsu no ani.” Ɛha no, Onyankopɔn honhom no ne n’adeyɛ tumi a na ɛreyɛ adwuma ama asase no ani ada hɔ.

Onyankopɔn de ne honhom no di dwuma de ma wɔn a wɔsom no te nneɛma ase. Dawid bɔɔ mpae sɛ: “Kyerɛkyerɛ me nea wopɛ yɛ, na wone me Nyankopɔn, wo honhom [ruʹach] pa no nnya me asase tee so.” (Dwom 143:10) Bere a wɔpaw mmarima 70 a wɔfata sɛ wɔmmoa Mose no, Onyankopɔn ka kyerɛɛ no sɛ: “Na mede honhom [ruʹach] a ɛwɔ wo so no bi megu wɔn so.”—Numeri 11:17.

Wɔkyerɛw Bible nkɔmhyɛ too hɔ bere a ‘honhom kronkron [Hela, efi pneuʹma mu] de Onyankopɔn nnipa no kɔe’ no. (2 Petro 1:20, 21) Saa kwan yi so na na Bible no yɛ nea ‘efi Onyankopɔn home mu,’ a Hela asɛmfua a wɔde gyina hɔ ma no ne The·o΄pneu·stos, a ɛkyerɛ “nea Onyankopɔn ahome.” (2 Timoteo 3:16) Na honhom kronkron kyerɛɛ nnipa binom kwan ma wohuu anisoade anaasɛ wonyaa nkɔmhyɛ adaeso.—2 Samuel 23:2; Yoel 2:28, 29; Luka 1:67; Asomafo no Nnwuma 1:16; 2:32, 33.

Honhom kronkron no na ɛhyɛɛ Yesu ma ɔkɔɔ sare so wɔ n’asubɔ no akyi. (Marko 1:12) Na honhom no te sɛ ogya wɔ Onyankopɔn nkoa mu, na saa tumi no hyɛɛ wɔn den. Ɛboaa wɔn ma wɔkasae nnam so ne akokoduru so.—Mika 3:8; Asomafo no Nnwuma 7:55-60; 18:25; Romafo 12:11; 1 Tesalonikafo 5:19.

Onyankopɔn nam ne honhom no so na ɔde atemmu ba nnipa ne aman so. (Yesaia 30:27, 28; 59:18, 19) Onyankopɔn honhom no betumi akɔ baabiara, ayɛ ade ama nkurɔfo anaasɛ ayɛ atia wɔn.—Dwom 139:7-12.

‘Tumi a Ɛboro So’

ONYANKOPƆN honhom no betumi ama wɔn a wɔsom no no anya “tumi a ɛboro so” nso. (2 Korintofo 4:7) Etumi boa wɔn ma wogyina gyidi ho sɔhwɛ ahorow ano anaasɛ wɔyɛ nneɛma a anka wɔrentumi nyɛ.

Sɛ nhwɛso no, ɛdefa Simson ho no, Atemmufo 14:6 ka sɛ: “Na Yahwe honhom sii no so, na ɛwom sɛ na onkura akode biara wɔ ne nsam de, nanso ɔtetew gyata no mu asinasin.” (JB) So ɔsoroni bi na ɔbɛhyɛɛ Simson mu anaasɛ osii no so ankasa, na ɔmaa ne nipadua yɛɛ nea ɔyɛe no? Dabi, na ɛyɛ “AWURADE tumi [na] ɛmaa Simson ho yɛɛ den” ankasa.—TEV.

Bible no se bere a wɔbɔɔ Yesu asu no, honhom baa no so te sɛ aborɔnoma, na ɛnte sɛ ɔdesani. (Marko 1:10) Onyankopɔn adeyɛ tumi boaa Yesu ma ɔsaa ayarefo yare na onyan awufo. Sɛnea Luka 5:17 ka no, “na Awurade [Nyankopɔn] Tumi wɔ [Yesu] ayaresa nnwuma akyi.”—JB.

Onyankopɔn honhom maa Yesu asuafo no nso tumi ma wɔde yɛɛ anwonwade ahorow. Asomafo no Nnwuma 2:1-4 ka sɛ na asuafo no ahyia faako Pentekoste da no bere a “mpofirim no, ahum bi a ɛte sɛ mframa a emu yɛ den a ɛrebɔ fi soro bae, . . . na honhom kronkron yɛɛ wɔn nyinaa mama, na wofii ase kasaa kasa foforo, sɛnea honhom no maa wɔn sɛ wɔnka.”

Enti honhom kronkron maa Yesu ne Onyankopɔn asomfo afoforo tumi ma wɔde yɛɛ nneɛma a adesamma ntumi nyɛ.

Ɛnyɛ Onipa

NANSO, Bible nkyekyem ahorow a ɛka honhom kronkron no ho asɛm te sɛ onipa nni hɔ? Yiw, nanso hyɛ nea Katolek nyamekyerɛfo Edmund Fortman ka wɔ eyi ho wɔ The Triune God mu no nsow: “Ɛwom sɛ wɔka honhom yi ho asɛm mpɛn pii te sɛ nea ɛyɛ onipa de, nanso ɛte sɛ nea emu da hɔ pefee sɛ [Hebri Kyerɛwnsɛm no] akyerɛwfo kronkron no annya honhom yi ho adwene, anaasɛ wɔankyerɛ da, sɛ ɛyɛ onipa bi pɔtee.”

Kyerɛwnsɛm no mu no, ɛnyɛ nea ɛntaa mma sɛ wɔbɛka biribi ho asɛm te sɛ nea ɛyɛ onipa. Wɔka nyansa ho asɛm sɛ ɛwɔ mma. (Luka 7:35) Wɔfrɛ bɔne ne owu sɛ ahene. (Romafo 5:14) Wɔ Genesis 4:7 no, The New English Bible (NE) se: “Bɔne yɛ adaemone a obutuw pon ano,” a ɛka bɔne ho asɛm sɛ honhommɔne a obutuw Kain pon ano. Nanso, nokwarem no, bɔne nyɛ honhom nipa; na saa ara na honhom no a wɔka ho asɛm te sɛ nea ɛyɛ onipa no mma ɛnyɛ honhom nipa.

Ɔkwan a ɛte saa ara so no, wɔ 1 Yohane 5:6-8 (NE) no, wɔka sɛ ɛnyɛ honhom no nko, na mmom “nsu ne mogya” nso yɛ “adansefo.” Nanso ɛda adi sɛ nsu ne mogya nyɛ nnipa, na saa ara na honhom kronkron no nso nyɛ onipa.

Nea ɛne eyi hyia ne sɛnea Bible no taa de “honhom kronkron” di dwuma wɔ ɔkwan a ɛnkyerɛ onipa so, te sɛ toto a ɛde toto nsu ne ogya ho no. (Mateo 3:11; Marko 1:8) Wɔhyɛ nkurɔfo sɛ wɔmma honhom kronkron nhyɛ wɔn ma mmom sen sɛ wɔbɛma nsa ahyɛ wɔn ma. (Efesofo 5:18) Wɔka wɔn ho asɛm sɛ honhom kronkron yɛ wɔn ma sɛnea su horow te sɛ nyansa, gyidi, ne anigye yɛ wɔn ma no. (Asomafo no Nnwuma 6:3; 11:24; 13:52) Na wɔ 2 Korintofo 6:6 no, wɔde honhom kronkron no ka su ahorow pii ho. Sɛ honhom kronkron no yɛ onipa ankasa a, anka nsɛm a ɛtete saa no rennɔɔso.

Afei nso, bere a Bible mu nsɛm binom ka sɛ honhom kronkron no kasa no, kyerɛw nsɛm afoforo kyerɛ sɛ ɛyɛ eyi ankasa denam adesamma anaa abɔfo so. (Mateo 10:19, 20; Asomafo no Nnwuma 4:24, 25; 28:25; Hebrifo 2:2) Honhom no dwumadi wɔ nhwɛso a ɛte sɛɛ mu no te sɛ radio tumi a ɛde nsɛm fi onipa biako nkyɛn kɔ ɔfoforo nkyɛn wɔ akyirikyiri.

Wɔ Mateo 28:19 no, wɔka “honhom kronkron no din mu” ho asɛm. Nanso asɛmfua “din” no nkyerɛ onipa din bere nyinaa, sɛ ɛyɛ Hela, Engiresi, anaasɛ Twi kasa mu. Sɛ yɛka sɛ “mmara no din mu” a, ɛnyɛ nea yɛreka onipa bi ho asɛm. Ɛkyerɛ nea mmara no gyina hɔ ma, ne tumi. Robertson nhoma Word Pictures in the New Testament no se: “Edin (onoma) a wɔde di dwuma wɔ ha no yɛ nea wɔtaa de di dwuma wɔ Septuagint no ne papyri no mu ma tumi anaa tumidi.” Enti honhom ‘kronkron no din mu’ a wɔbɔ asu no gye honhom kronkron no tumi tom sɛ efi Onyankopɔn hɔ na ɛnam ɔsoro apɛde so na ɛyɛ adwuma.

“Okyigyinafo” No

YESU kaa honhom kronkron no ho asɛm sɛ “okyigyinafo,” ɔkae sɛ ɛbɛkyerɛkyerɛ, ɛbɛkyerɛ kwan, na akasa. (Yohane 14:16, 26; 16:13) Hela asɛmfua a wɔde di dwuma ma okyigyinafo (pa·ra΄kle·tos) no wɔ ɔbarima kabea mu. Bere a Yesu reka nea okyigyinafo no bɛyɛ ho asɛm no, ɔde ɔbarima kabea mu edin nsiananmu ahorow na edii dwuma. (Yohane 16:7, 8) Ɔkwan foforo so no, sɛ wɔde Hela asɛmfua ma honhom (pneu΄ma) a ɛnkyerɛ ɔbea anaa ɔbarima no redi dwuma a, wɔde edin nsiananmu “ɔno” a ɛnkyerɛ ɔbea anaa ɔbarima no na edi dwuma ma ɛfata.

Baasakorofo asekyerɛfo pii de saa nokwasɛm yi sie, sɛnea Katolekfo The New American Bible no gye tom wɔ Yohane 14:17 ho no: “Hela asɛmfua ‘Honhom’ no nkyerɛ ɔbarima anaa ɔbea, na bere a yɛde edin nsiananmu a egyina hɔ ma onipa di dwuma no, Hela nsaano nkyerɛwee pii de nea egyina hɔ ma biribi a nkwa nnim na edi dwuma.”

Enti bere a Bible no de edin nsiananmu a ɛwɔ ɔbarima kabea mu di dwuma wɔ pa·ra΄kle·tos ho wɔ Yohane 16:7, 8 no, ɛredi kasa mmara so kɛkɛ, na ɛnyɛ sɛ ɛreda ɔkyerɛkyerɛ bi adi.

Ɛnyɛ Baasakoro bi Fã

NHOMA ahorow gye tom sɛ Bible no mmoa adwene a ɛne sɛ honhom kronkron no yɛ Baasakoro bi mu onipa a ɔto so abiɛsa no. Sɛ nhwɛso no:

The Catholic Encyclopedia: “Yenhu Onipa a Ɔto so Abiɛsa ho nkyerɛkyerɛmu a emu da hɔ biara wɔ Apam Dedaw no mu baabiara.”

Katolekni nyamekyerɛfo Fortman: “Yudafo ammu honhom no da sɛ ɛyɛ onipa; na saa ara na adanse a emu yɛ den biara nni hɔ a ɛkyerɛ sɛ na Apam Dedaw no ɔkyerɛwfo bi kura saa adwene yi. . . . Wɔtaa ka Honhom Kronkron no ho asɛm wɔ Asɛmpa ahorow no ne Asomafo no Nnwuma no mu sɛ ɔsoro tumi bi.”

New Catholic Encyclopedia: “Emu da hɔ pefee sɛ Apam Dedaw no nsusuw Onyankopɔn honhom no ho sɛ ɛyɛ onipa . . . Onyankopɔn honhom no yɛ Onyankopɔn tumi ara kwa. Sɛ ɛtɔ mmere bi na wɔka ho asɛm sɛ ɛyɛ soronko wɔ Onyankopɔn ho a, ɛte saa efisɛ Yahwe home di dwuma bere a apue.” Ɛka nso sɛ: “Apam Foforo no mu kyerɛw nsɛm no mu dodow no ara da Onyankopɔn honhom no adi sɛ biribi, ɛnyɛ obi; wohu eyi titiriw wɔ nsɛdi a ɛwɔ honhom no ne Onyankopɔn tumi ntam no mu.”—Yɛn na yɛde nkyerɛwde soronko akyerɛw afã bi no.

A Catholic Dictionary: “Ne nyinaa mu no, te sɛ Apam Dedaw no, Apam Foforo no ka honhom no ho asɛm sɛ ɔsoro ahoɔden anaa tumi.”

Enti, Yudafo anaa tete Kristofo no mu biara ammu honhom kronkron no sɛ Baasakoro bi fã. Mfehaha bi akyi ansa na saa ɔkyerɛkyerɛ no reba. Sɛnea A Catholic Dictionary ka no: “Wosii Onipa a ɔto so abiɛsa no so dua wɔ Alexandria Bagua no ase wɔ 362 mu . . . ne awiei koraa no wɔ Konstantinople Bagua no ase wɔ 381 mu”—bɛyɛ bere a honhom kronkron yɛɛ asuafo no mama wɔ Pentekoste no akyi mfeha abiɛsa ne fã!

Dabi, honhom kronkron no nyɛ onipa na ɛnyɛ Baasakoro bi fã. Honhom kronkron no yɛ Onyankopɔn adeyɛ tumi a ɔde di dwuma de yɛ n’apɛde. Ɛne Onyankopɔn nyɛ pɛ na mmom ɔde di dwuma bere biara na ɛhyɛ n’ase.

[Asɛm a wɔafa aka wɔ kratafa 22]

“Ne nyinaa mu no, te sɛ Apam Dedaw no, Apam Foforo no ka honhom no ho asɛm sɛ ɔsoro ahoɔden anaa tumi.”—A Catholic Dictionary

[Kratafa 21 mfonini ahorow]

Bere bi honhom kronkron no bae sɛ aborɔnoma. Bere foforo nso ɛbae sɛ ogya tɛkrɛma—amma da sɛ onipa